2021年9月27日 星期一

生果腐爛時

是咁的,天氣熱,通常生果好快爛,何況擺左一段日子的,有D生果皮光肉滑,入面爛撻撻,有D生果層皮還巢過英女皇,入面粉紅多汁的...味皇指沙田柚

最起碼還會有沙田柚之類唔貴又唔易爛的,可以提供我地維他命C,如此類推,籮底橙既然同係柑橘類,咁應該有唔少樣衰但未爛的,不過,橙唔理好醜,入面好多時都有爛的,相反,巢皮柑味皇未見過爛的,最多乾,但乾左也別有風味,可能柑皮更厚?厚皮提供更高的安全邊際?味皇也見過比柑皮更厚的橙,但也有爛,味皇推測皮的含氣量可能會影響?鬆泡泡的皮更隔熱同通風冇咁易發酵,也可能只是柑冇咁多糖

沙田柚同芒果差別明顯,沙田柚同柑橘差別冇咁明顯,而柑同橘的特性卻差比較多,但是最薄皮的橙同最厚皮的芒果食用期限還是有差

回到股票上,當然現在不是好環境,是做縮頭龜的時候,有些種類的股,好似停電時的芒果越擺越臭,多數生果停電時都唔擺得,當成個生果檔都係酒糟味的時候,仲有邊個會埋去買,但是會去買斷碌蘿蔔的味皇,如果佢清貨大平賣,咁可能都會過去睇下還有冇好的,當中中伏率最低的,應該就是沙田柚,老老實實,味皇覺得個生果檔都已經夠臭了,還去買佢無非係佢獨市同埋貪平,臭生果檔買野一定會冒更大的風險,如果夠平還是可以cover的,而且營養來源還是必要的

例如地產股就是芒果了,我們買是幾冒險的,感覺點選多少都有D爛,但夠平的話,也不是不能出手,要點是有D看起來可能爛3/4,有D可能爛1/2,咁賤價買個爛1/2的還有D肉食,接近免費的話,爛3/4也可以要黎舐下,要錢買就不好了,如果你手上有爛3/4的芒果,也可以買個爛1/2的,再退貨你爛3/4的比檔主,檔主個名叫市場先生,好易話為,好易騙的

咁有乜係正常可能買的呢?感覺比較有限,但是數起來,也還有公路股,港口股,水務股,電信股,應該好似沙田柚咁實在,但多少會變乾也在所難免,至少還可以食,煮埋層皮食乾淨都得,不過沙田柚係成果檔口有限的唔爛品種,平唔平比你就另一回事,當中水務股都好多老千股,保鮮紙包個N年前的沙田柚比你,或者碌柚皮包個桔比你,或者只有空心碌柚皮,水務股只得一兩隻係正常野,舊文有寫

我們要小心的是,買柑橘類的心態,以為好安全,原來買到一堆爛橙,舉個栗子,春城熱力,大東北賣水蒸汽賣地熱的,D人冇煤燒過唔到冬,表面上你以為佢因此好安全有賺頭,但是,1.佢有可能都冇燃料燒,2.停電停工工廠唔會要蒸汽,3.燃料炒貴左而加價比鐵拳打壓,之類的,如果是市場經濟,好處是成立的,但實際上並不成立,好似因為停電就認為電力供不應求電力公司買得過,這種想法最危險,電力雖然係公用類,但中伏的機會頗大,好橙咁

退而求其次,柑會好過橙,邊D夠柑?味皇推測,副食品製造,大賣場,大商場收租,呢類有影響,但唔會一收就死,例如停電同鐵拳應該未至於打翻你食緊的杯面同腸仔,未至於唔比你買米,收租方面,雖然話拳打收租佬,國企大商場出租率高時,但街舖有好多空置的情況下,要國企大商場率先減租,出面街舖更難租,社會形象不好,出面街舖接近租滿的情況下,要國企大商場減租,先可以拉低街外租金,出面街舖完全租滿,要國企大商場減租,釆大大有味,最多減租加管理費,因此味皇推測主要城市收租還算安全,最多冇得加,不過要選一D本身出租率高的,街舖多是中小企,而大商場多是連鎖,應該襟D,樓價可能會被直接鐵拳制裁,但租金應該只受大環境影響

同樣係收租,有一D味皇要提下,例如味皇揸住的普星咁,好似係發電廠,實際也是發電廠,但佢唔係電力公司,而係收租兼做埋管理的業主兼管理公司,披著橙皮的柑,但是,這樣的柑也是有個有效期,佢同地方政府簽的約好似係3年期,現在冇問題,跟住兩年都冇問題,但現在的大環境下,到下一次續約時,地方政府應該會比現在更加冇錢,到時可能會出利潤管制去調特許低利潤率,這對所有類似的公司都有效,擴大一點,所有提供政府服務的公司都可能在下次續約時被調低利潤率,這可能包括電信,交通,服務,經營權,融資貸款等等,還有共同富裕下有錢賺的月費型公司,可能都要為維穩作出貢獻

4 則留言: