8月30日

趁唔駛返工去存味丹的實貨,要等到下個月中先賣到,今個月戶口少過50萬,逼住要比50蚊罰金,不過做專櫃客戶的得益應該大於50蚊,起碼今日都慳左少少佣金

3.8沽清左晨鳴,換入9.97的神威藥業,發現神威今年都會有新產能,大約將增加50%產能,由於同晨鳴相比毛利率的保持上神威有絕大的優勢,作為投機定投資都好,應該除苯有精,由於聯亞的好業績,晨鳴的差業績及升都冇朋友的CTM,味皇昨晚特登去找潛在的換馬的目標,先發現神威都跌唔少,因此換馬,如果CTM今日再升,我仲會換埋做粵海添,至於聯亞如果升過6蚊,可能會換成金利來或者漢登,換文軒也有可能

存完實貨去BOSSINI睇下買衫,睇啱左先話斷碼,點做生意架?唔怪得股價跌到7毫,雖然漢登都跌到1.8,係南灣BOSSINI對面間慕斯原來執左,不過佢本業係地產而唔係賣衫,間舖應該賣左,係噴水池思捷旁邊的joy&peace,開張左冇幾耐就執左,現家變左做謝瑞麟

日前愛隊被屈1比5,味皇心血來潮想買件球衣著,同2比8自爆的那隊一樣,著件球衣出街恐怕會比人恥笑,不過不這樣想的球迷還是有的....不過原來澳門冇得賣,鬼叫唔係BIG4,比人笑都冇機會

動向業績點評

動向一早出左盈警,現在討論盈利跌多少並無意義,問題是要持續幾耐同公司有冇問題先係重點

動向強調是一次性的回購,同埋推出新的5年計劃,雖然效果不明,但信住佢先

存貨上升1.3億,撥備多1億,而營業額唔見10億,毛利唔見6億,不成比例,唔通己經處理了大半?根據說法其清貨方式是打折網上出售,正常會嚴重拉低今年的毛利率,而動向的毛利率沒有下跌,因此必然使用了非常特別的會計方式入賬,可能是由第三者代售,又可能是以一次性的收入/支出入賬,以後再由撥備處增撥或回撥加以調整,由於是原價回購,仲有個做法只要直接在今年的營業額同毛利減左當年"增加"的部分就可以了,會計上咁做唔知合唔合法,可能有兩本賬簿,總之就是將今次的損失排除在銷貨成本外

感覺上財技用得太多,賬目也不甚透明,最近入股美股上市的麥考林,現在渾水過後,股價計應該渣都冇,浪費了金錢,會計師如果用市價入賬業績仲難睇,業績至6月30日,因此下半年可能會反映投資失利的損失

派息比率70%,但金額計只佔現金的九牛一毛,因此高派息比率不代表甚麼

批評了這麼多之後,還是要說說,動向的毛利率是很高的,支出比率亦很低,呢兩點難以量化,但只有很好的公司才具有這種特點,同具這種特點的仲有思捷,因此現時說佢好是缺乏說服力,但佢的分店有3500間,賣的都是幾百蚊的貨,貴賣又可以成行成市,廣告支出超過1億的公司始終會有一定的本事,就算佔一半盈利的金額都唔少,連同下半年,動向隨時會少20幾億營業額,圍起黎是每間分店入少57萬貨,或每月入少48000貨,要清乜都清曬,乾手淨腳下年就可以復活,推新產品同埋邀功

但盈利跌剩3成之後,就算出一個一倍的盈喜,盈利也不過是之前的6成,比佢出足兩年也不值得歡喜,未來動向可能會"低盈利高增長",而不是一次過回復

至少比李寧的情況好少少

奧普中期業績分析

營業額持平,盈利也沒有點減少,派息4仙,比上年少1仙,但派息比率超過100%,姑且先前沽貨的管理層信用得以保全

同淘實的銷售量不成正比,公司營銷反而縮水,開始質疑自己做淘寶的統計有冇必要,聯營公司亦未能提供盈利,因此聯營公司不可能在3年內上市

奧普最近搞好幾單副業,隨時管理層外面又套現去放貴利,沒有借D倚減派息比率的做法很滿意,但業績本身令人相當失望

行業整體應該相當低迷,情況是人損1萬,自損3000的情況,以單個公司來說,不死身的奧普會更加獨大,但山寨廠會無限復活,高端的吊頂銷量可以得以保証,但被吊頂取代而低端化的浴霸競爭會更激烈,兩者的比例為1:2,不是太樂觀

今年大陸地產市道己相當差,好多消費股亦冇乜增長,保得住毛利率而冇捲入價格戰已經算做得好,但做得好唔代表結果唔好,呢個盈利實在水準以下,而且是通過節省一些廣告開支而來的

分銷支出下降了1000萬,應該是增加了自營店而成的,不過要交租,即使交租都減1000萬,似乎分銷商數目整合了不少,另一個可能是部分成本由自營店同店賣貨的聯營公司攤分

賬款方面沒有特別惡化,而下半年是旺季,派息率超過100%不會形成問題

有2億定期存款,又有4000萬抵押貸款,又存錢又借錢,財務管理做了不少多餘的事,本業的資金需求很易估算,正常負留足夠資金而不會突然要借錢的,還是本業以外會有臨時的資金需要?

四川的"地產"項目沒有提到,考慮到現在的地產市道,不排除爛尾的可能性,既然佢唔想提,就當佢"唔存在"就算了,將來驚喜定驚起都好啦,至於1500萬風險投資,數目不多就不用理了,主席都是海歸,前輩幫後輩道義上是應該的,限制金額就是

未來展望度講明主業暫時冇乜前途,想搞更多副業,事實上佢現在賣的產品已賣左好幾年,缺乏更新,上年我提佢搞多D換湯唔換藥同改良安裝方法,似乎有認真考慮,但佢開發一個產品動輒幾年,短期未必會有新品

沒有特別賣出的必要,如購入都只為收息,前境一般,換馬可以,合理價由1.6調低至1.3

8月25日

風和日麗的日子,風指冷氣,日麗即係曬,又吹冷氣又曬太陽,味皇乍病不起,不是詐病,揮舞長長的鼻涕,可以省打倒敵人,名曰"波波波鼻涕真拳",不過要被打例的敵人似乎不在,呢尋日同今日賭場的賭客出奇地少,剛返工時的的賭客數目不足平時的1/5,唔通股災同水緊的影響?

手上的持股大半都公布左業績,基本上我不會因此有甚麼行動,除左味丹想存倉,如果不是實貨的話我在昨天就換馬了,現在我要等放假先有時間去銀行存倉,想搞都要等到下個月先得,業績不講住,無謂倒自已米

要財證券,是你手損

話說上個星期1883曾大跌成兩成,果真一扑一碌,咪話佢,好似598,2345呢D都有跌到咁多,兩日味皇就唔見5萬,現家未夠10日就收復失地,多得當日去撿燙手煙頭

味皇冇睇報紙,今日先知原來有證券行動L,茂利揮刀亂斬,何B叔叔頓成新成龍

一般標榜手續費平的證券行,吸引到的客都是投機炒買居多,用孖展也不足為奇,唔做好風險管理的就是抵死,但是突然加保證金9倍的似乎是宇宙奇聞了,是將1.9倍聽成9倍呢?還是間公司個米倉是養老鼠呢?屈機是合法的商業行為,不管你信不信,反正你就死了,現在想來,碌50張卡買正股可能風險仲細

上市公司每年只會提供幾%至十幾%的盈利予市場,我們想得到超出公司盈利的利潤,就必須要某D有人犧牲,有人比茂利斬死煙頭散落一地,我撿到荀野,唔駛同情唔駛講多謝,政府說:資本市場,貴客自理,3秒條屍就會消失,跟住又有新PLAYER黎JOIN GAME,用玩CS有乜分別?自已唔比人射死已經唔容易,撿槍都是為求生而已

加保證金肯定唔會只有今次,每逄市場先生震波,必定又成地爛番茄,我們記得到時空返隻手出黎撿就係

1883出左業績,一如預料本業果然冇乜前境,停滯不前,只有CTM的盈利因為多左幾個月入賬所以大增,上年CTM的盈利是8.1億葡幣,20%佔1.6億,上年入賬8000萬當然係入少左,今年半年入賬7700萬,假設CTM派息比率80%,盈利是9600萬,即全年近2億,增長2成有多,即是說"副業"盈利已經超過了"本業"了,味皇是澳門人,因此對CTM評價較高,不過股價如果持續上升而令股息率足夠地低,比佢好的換馬選擇還有很多

集優半年業績

業績上升3成左右,增長看似不錯,半年盈利1.2億,總算回到以前高峰水平

葉片分部:

葉片分部純利率11.1%,跌1.3%,營業額上升25%,同時盈利都同步上升,說明不是產品標價上升,如果只是轉移成本而加價,盈利是不會上升的,因此是銷量上升,葉片出口增加4成,說明外商認同佢的產品

新廠在5-6月先投產,貢獻應該唔會太多,產能大增後營業額應會火箭式上升,不過非常遺憾地,今期佢毛利率並沒有上升,依生產進度來說,新產品理應賣了一個月,如果今期的銷售包含了新產品,毛利率應該會拉高,因此新產品毛利可能同舊產品持平,又或者舊品毛利率下跌,如果新品仲係樣品而未銷售,咁下半年的毛利率應會上升,現在銷量上升而純利率下跌,暢銷的可能是舊產品

葉片分部自我目標話要做"世界級",非常囂張

啤呤分部:

營業額上升17%,盈利增加25%,純利率7.2%,增加0.5%,年內收購左母公司的一間子公司,增幅可能來自呢度的整合,這樣來看整體銷售並沒有增加,出口部分增加17%,說明唔係鐵路部玩曬,集優自稱汽車啤呤用已經成功出口

不過非常唔明朗的一點就是,啤呤很大部分是鐵路部埋單的,自從有左銀河鐵道之後,有排都唔駛再出車,而且風電公司冇補貼唔好賺,啤呤可能會少人買

葉片分部自我目標話要做"世界一流",口氣好大

刀具分部:

營業額同盈利上升17%,問題是出口下跌,說明其產唔外商唔賣賬,唯有轉攻內銷,同上面葉片的脫銷不同,純利率跌0.5%至10.9%,母公司可以保証其使用量,但集優的刀具似乎同外面的產品相比競爭力一般

刀具分部自我目標話要做"國內領先",忽然謙虛

五金分部:

營業額大增一半,出口也是,剛剛上網查到,原因是歐盟的反傾銷已經破除,五金可以重新出口到歐洲

http://info.wujin.hc360.com/2011/08/101048391850.shtml

雖不保證歐盟會繼續找碴,但07年集優的五金全部出口14億賺6000萬,今年上半年出口4.7億開始重上軌道,今日仲宣佈要收購五金公司添食

五金分部自我目標話要做"國內龍頭",有D根據

07年集優的盈利分布是葉片3/6,啤呤1/6,刀具1/6,五金1/6,今期盈利分布是葉片4/10,啤呤2/10,刀具3/10,五金1/10,當中極有前境的葉片同五金佔的比例為50-66%,前境一般的刀具佔16-33%,前境差的啤呤佔16-20%,因此集優應該較有前境,經過幾年收皮期後,下半年應為收成期,豐收應可持續數年,廠迷有福了,不過此廠不同彼廠

1883中信一仆一碌

一仆一碌其實幾好聽,不過最近改左名中信國際電訊,一點個性也沒有,呢度叫返舊稱

中信1616的業務的名稱好難明,好多都是完全搞唔明白佢做緊乜,只有根據自己的推理,味皇的以下的說明可能同實際有所出入

一仆一碌的主業看似分四類,語音電話相關,短訊相關,儲值卡相關,資料數據相關

根據味皇的推理,佔營業額2/3的語音電話相關的業務,是來自IDD的抽水,但凡電話由大陸同港澳台之間過境的話,必須要佢接線,每分鐘收費大約2亳,同樣地,但凡過境的每條短訊佢要抽毫半左右,短訊相關的營業額佔約1/10

儲值卡相關只佔幾%的營業額,可以忽略

資料數據相關業務的說明完全唔明佢UP乜,不過睇圖片的其中一兩張可以睇到機房,而有建設大型機房的需要的業務,9成9係SERVER出租,即係等於新意網(8008),呢方面一仆一碌的營業額6億幾,同新意網差唔多,但盈利似乎少得多

由此至終中信都避談任何業務的毛利率同純利率,就公司整體而言,其純利率只有十幾%,並不見特別吸引,即使是計現金流,也不過20%,盈利同業務性質相當不乎,甚至還不及一些工業股,一仆一碌的成本控制看來不能自控,9/10的成本來自外部,只有1/10的成本是員工等自主部分,因此不能望佢改善到幾多經營效率

最新的安卓手機據說可以使用免費的網絡電話,普及的話對一仆一碌的通訊業務可能有很大的衝擊,起碼有減價的必要,會唔會倒退,具體要睇IDD的使用量增長夠唔夠多了

四個業務只有機房出租有點前途,今年第一季佢新建成一間機房,或可增加兩三億營業額

總體而言佢的業務穩定有餘,前境不足,核金盈利3.5億,PE13計45.5億市值,最多值兩蚊,由於上年曾在2.3的價錢向母公司發行的新股,相當於淨值2倍,現在我們可以用當時母公司的一半價錢回購,算係咁

問題一仆一碌有一個不可忽視的賣點--澳門電訊

澳門電訊CTM的數字:

                     07           08            09            10

營業額         23           24            24            28

純利            6.5            7            7.4           8.1

純利率(%)   28           29            31           29

能夠達到近30%純利率的公司,而又同公用股的性質,同時又是完全壟斷事業,其市盈率同市賬率必會很高,假如只用區區的18倍PE對呢條食人大白鯊計算,市值達140億,2成股權已相當於現在的29億市值了,即是說其他"主業"是免費的,免費的東西要求不會太高,公司整體的估值就是29+45=74,大約每股3.1左右,電訊公司對固定資產不太敏感兼太多商譽水份,PB不適用

上年業績計,一仆一碌可分佔CTM1.6億盈利,但實際入賬的只有9千萬,大家沒有留意到入賬的是CTM"貸款"而不是CTM"股息",由於CTM是在年中收購的,因此佢冇必要派足12個月的股息,於是用貸款代替了大約8-9個月左右的數量,實際上CTM的盈利比入賬的數量多

CTM的法定的完全壟斷合約在今年結束,問題是CTM在合約結束之前超快速完成全澳的光纖鋪設,加上現有的電話線,澳門的地底100%被CTM佔有,競爭者無可能重鋪,政府亦唔會批掘路工程,因此在有線式的方面CTM的完全壟斷是50年不變的

無線另計

至於CTM的資產除左電線外,主要是位於新世紀酒店附近的總部地皮,面積極大但上面建築物不多,要搬唔係冇可能,通過目測,估計地皮起碼值30億

一仆一碌同時收購一間由國務院同中信持有的叫中企網絡的公司,業務又是難以明白的,依個人推斷,它的主要業務是傳說中的"牆",你可以叫佢"萬里長城","萬里鐵壁",還是想叫"綠壩"定叫"紅牆"都得,仲有一般的電訊企業,發行的充值卡只能獲得在省級發行的牌照,例如淅江神洲行充值卡,四川神洲行充值卡,而中企網絡則有唯一一張全國級發行的牌照,不過一仆一碌收購一半股權的代價是2.5億,即全公司市值只是5億,如此規模應該不會產生多大的盈利貢獻,象徵意義大於實用意義,得到無形之爪的力量,就可以維護世界和平

哇!股災

今日第一次用到股災呢個字眼,因為連公用股同房產信託都大跌,美國隊長發狂拿電鋸大閙交易所,跌到成地拖鞋

味皇隨地撿起左隻錦江酒店的拖鞋逃走,走遲半步比隊長劈中倒在血泊中,味皇用手指在地板上寫上1.2/8000的血字,有勞隨便搬阿爺個名上檯的偵探說明了....兇案現場嗎?

過一排後,有個上身西裝骨骨下身穿孖煙囪的臭屁小孩上電視"兇手就是你了",小孩擺個POST轉身說:"話說笨蛋雞金的基金經理撿起CTM的員工拖鞋逃走時,同時用粵海酒店的拖鞋車鳩隊長,點知車中味皇,証根據就是地上的屍體原來用腳趾寫左"4.36/4500&1.22/16000的血文字",小孩再轉身360度擺個POST說"好似天鵝一樣,鏡頭映住手指優雅地寫血書的時候,鏡頭外的腳趾正在飛快地運動",鏡頭映住小孩耍帥,鏡頭外小孩扒光了味皇的荷包

重覆一次,今日朝早用1.2買入錦江酒店8000股,原本打算在0.8賣一些奧普換一些文軒的,但一開市見人的買賣開價是0.7買0.82賣,差價太大都味皇費事出價,點知味皇午睡完起身發現都幾多人賣到0.8以上,心口碎大石中

另外雞金下午將4.36的粵海(270)全部換成1.22的CTM(1883),CTM頭先突然大跌近兩成,味皇強烈推薦

乘呢次機會順便公開一下現在呢個時點味皇的觀察名單:

811新華文軒 270粵海投資 1883中信１６１６ 771自動系統  450鴻興印刷 57震雄集團 598中國外運 1199中遠太平洋 2368鷹美 3998波司登 357美蘭機場 3928鄭州燃氣 3399南粵物流 659新創建

*PS:頭先靈機一閃,醒起同價位的CTM應會比錦江好,於是賣清了錦江1.18/24000,換為CTM1.28/22000,由於落單時失誤,分開左15000同7000股兩次買,比左兩次手續貴,永亨賺大了

標血500指數紀念

未見過白鶴都見過篤屎,難得美股大插插,噴血500幾公升,點都要圍觀下,吶喊助威,咦?點解帝國大廈天台排長龍嘅?原來周星星伙同美國隊長正在販賣報紙摺的飛行帽

美國隊長問周星星"點樣先可以唔駛破產",周說"成立私人公司發公司債回購美債,一間變兩間,兩間變八間,再叫佢破產",美國隊長說"俺是英雄喎",周說"英雄都有賴帳嘅",美國隊長說"有冇其他方法",周說"去伊拉克搾油還款,如果要在還款期上加個期限,可以用1萬年",美國隊長說"揩油好似唔乎合我英雄身份",周說"大家不要緊張,你本身呢,是一個美國人,這個油呢,是你用來炸雞用的,很合理吧?",美國隊長說"現 在我可以做甚麼",周說"賣飛行帽"

美國佬印銀紙當廁紙,難委我地港澳D銀紙跟住要越來越大捆,姜太公釣鹹魚,要自己上釣,有人說係時候要脫勾,魔鬼說改變不好,副作用你受唔起,欲仙欲死,仙完就要死,難得味皇今次同魔鬼同意見,比起直接脫勾,其實仲有其他另類方法

味皇建議港府國有化八達通,推行雙幣制,在香港實行兩種不同匯率政策的法定貨幣,新幣不能自由兌換,卻能自由轉換成人民幣,只能在香港作小額使用,出糧都出佢,原來的港幣主要作對外貿易用,將港幣邊緣化,再跟據新幣的流通量同大陸的貨幣政策,逐漸修改發行比例取代掛勾的港幣

股票未因為印銀紙而升值,卻先因為嫌印得少而貶值,各國的貨幣政策時常改變,銀紙的價值會升降,如果在一項產品或服務要得到一個合理的收費,就必須要有盡量多的各國閒人參與出價,貿易只是兩國間雙邊的交往,必會有一方蝕底,如果問有甚麼收費能在國興國之間最多的交集的話,通常是物流,航運股近期是冇得救的,但碼頭股卻可以考慮

股市無差別下跌味皇是歡迎的,因為我唔等錢駛,雖然總值跌到50萬死線以下有點不滿,但不會因此而訓唔著