嘉士利1285

33.1沽出了大塊木,加埋收租的按金2.27以下換成了嘉士利,好耐冇研究過其他股票,前日稍為睇左一睇,又搵到兩隻神仙股,一隻係收入唔一定穩定的機電工程,另一隻係嘉士利,錢少的原因味皇只能買一隻

嘉士利係半新股,保薦人方面係大名鼎鼎的招商証劵,味皇原全沒有理由相信呢間公司同子公司係虛構的~~味皇原全沒有理由懷疑呢間公司條數係藝術創作的~~味皇原全沒有理由想像呢間公司地址會係福建之類的~~味皇原全沒有理由認為呢間公司會隨意玩財技的~~咳哼,由於上市時價錢也不低,所以味皇無論上市前冇睇過佢一眼,也予計上市後呢隻都唔會關味皇事

前日按息率排列睇食品股,發現呢隻乜叉野排在前列線,味皇先去睇呢隻的財務數字,睇得好地地,保薦人原來係招商,比如插水係不君子行為,但味皇也見過球員經常插水得分成為球玉受萬人景仰,因此也不能排除一些老婊臨老時取得貞節牌坊的可能,反正唔會有嫖客同肯德基自認鹹濕,你一個觀眾攞住餅錄影帶,根本無法向球証同足總証明球員插水而扣佢分

即使如此,由於味皇認定派到落手息是確定的,前提不管是甚麼,派到息就好,即使用龐氏的方式,在財務報表上總會找到些疑點,在爆發期限前發現剔除就是,會計師德勤雖然會接納任何來自異世界的帳單,但也未至於唔對數

2013年佢盈利聲稱為6900萬,2012年4300萬,而味皇限據負債增加的數量自行修正為4200萬,3500萬,發行價3.7市值15.3億36.5PE,對淨值不足3億賺4200萬的公司仔一次集資到3.2億應該足夠恰皮的,咁疑似人頭的利益又點呢,無資金需要下,2015年尾向復星的財仔發行1.29億的換股債券,2016年9月尾用1.44億同復星買回,10個月向復星輸出1500萬即14厘息,這很招商,2015年8月向順客隆注資300萬美金,順客隆呢壇野係唔係正經公司就唔講了,這也很招商,反正15同16年成3000萬送左比好朋友咁解,而在呢兩年業績期,嘉士利名義盈利6500萬同1.05億,看似大成長股,換股債行駛價4.8,差點就到,如果炒作能再多少少的話,復星表示非常可惜,於是只拿點利息就算了(同復星的陰謀失敗之後業績走樣就另一件事),按負債變動推算,其實呢兩年的盈利係1億,1.05億,通常手段唔會出到成長股的股價,而順客隆唔用四大,反正股價炒高左,第時肯套現就好

好朋友要錢,兩胳肋底插刀,嘉士利兩年輸出3000萬的情況下,呢幾年派息5300萬,2000萬同2500萬,上市前仲派左1.2億添,同時呢幾年淨現金分別係4.3億,3.8億同3億,即係話佢一邊義助朋友之餘,仲可以派到息兼有現金剩,盈利方面,由2012年起3500萬,4200萬,1億,1.05億,1.1億(加返比財仔果筆),味皇認為佢有足夠能力維持果5000萬派息,現金不是虛構的話龐氏至少也能維持幾年,一般好似某類丁家股咁虛構現金都會有另一種反向的數字在財報度並存,但嘉士利不存在,因此味皇認為佢現金是真的

盈利由4200萬跳升到1億,原因是兩年前固定資產由1.3億升為2.1億,而佢今年固定資產升到3.3億,業績要延遲一年先生效的話,2017年盈利會由1.1億升到1.8億左右,即每股0.49,派息3亳,現價2.27,因此是潛在的10厘股,合理值暫定7.5啦,水位比大塊木多好多,實際上味皇覺得佢私有化或被收購的可能性不低

子公司唔敢包,但嘉士利係實際存在而非虛構的公司,係淘寶搜"嘉士利餅乾",都見到有萬幾人買,味皇自身亦在拱北萬家同北岭沃爾瑪見到實際產品,由於沃爾瑪比較平,於是今日就係沃爾瑪度買左幾樣諗住試食,包裝地址乎合報表提及的工廠地址,因此嘉士利股票公司唔係同名同姓的痴金糠公司,而係真係果間餅乾廠,於是福建成份就低好多了

食用網址https://jiashilisp.tmall.com/search.htm?spm=a1z10.3-b-s.w4011-16086910968.1.O1jXVo

扮搵工

早排以1.58-1.59賣清貿易通,2.38-2.39換成CTM,味皇睇唔到貿易通的前途,有若干機率業績小幅向下,CTM也有同樣率業績小幅向下的機率,但相對地CTM同時存在反CUP的機率,貿易通冇乜未來而CTM有,而息率一樣,因此換馬,太平洋電腦網味皇對佢仲抱有幻想,因此仲保留

退休一週年,樓A己經收樓,而樓B準備裝修,鑑於退休人士冇收入証明比銀行歧視,搞到兩間樓都唔落得味皇名,因此同上次帶睇偽電梯樓的AA吹開水時提過下好唔好扮請味皇寫收入証明,而現家演變成真係想請味皇,橫掂得閒考個AA牌試下,間地產自帶裝修公司,可以吸經驗值,底薪5000云云,未落實

齋買同齋賣味皇保持中立乜都唔講,但如果要樓換樓同改善財政的方案味皇應該可以提供

實情係大魔法師味皇有個細佬,最近打算結婚,佢冇儲錢,味皇要比唔少禮金,裝修又要錢,原本多借出黎買收息股的錢都要轉用途,現金儲備有D缺乏,結婚(後)也是重大不確定因素,所以以後可以落自己名就用返自己名,味皇的被動收入可能在27000左右,需要過番好幾個月現金才可以鬆動D

去咖哩妹食左個腩飯,小辣都辣到飛起,又貴冇下次,食完第日政府就話加辣椒,減按揭成數,味皇判斷最近租樓觀望的人會變多,辣椒食完一排就唔記得有幾辣,咖哩妹話食完冇下次,其實味皇以前都食過一次又係話冇下次但現家一樣中返伏,按以往經驗同樣面積同樣質量的唐樓同電梯樓合理差價係25%,即係裕華賣450時順豐應該要係340,東華賣400時南藝閣要賣300萬,但現時有名有性的唐樓好多估值都在最近反超左,再買呢類容易中伏,因此現時只能在個別的荀盤賺到錢,不存在亂買都齊齊升的情況

味皇尋日睇完熱刺打曼聯場直播同球場封閉儀式,今日白鹿巷球場就爆破拆除了,到最後味皇一次都冇去過,突然發現味皇潛在的旅遊圈子細,毒遊時絕對冇打算走出語言能力範圍,台灣可能去多兩次就100%完成度,就算日本可能去多幾年就冇野睇,現家呢個年齡就退休似乎剩係用通常的旅行方式消磨唔曬咁,結論係想擴大行動範圍最好抱團,做毒行俠佛男子原來會有呢D煩惱

1556建榮業績

味皇手上的是0.38時當10厘股買的,最後又真係比佢派到10厘

業績能講的部分不多,工程公司唔同管理公司,合約期短業績難予測,始終接到幾多工程都係睇彩數

不過有幾點可以留意下,佢毛利率今年下降左,官方理由係行業不景氣,但實際上,佢68頁有一句提到,2016年提高左折舊率而額外減少1400萬,如果加返上去,毛利率是27.3%,同上年一樣

佢2015年折舊4800萬,今年過度折舊7200萬,折舊率分別是12.5%同21.4%,建榮採用的折舊率是機器同車20-25%,即設定為4-5年壽命,建榮4同5年前的固定資產分別是1.7同2.3億,而最近兩年折舊左1.2億,即係當2012年用緊的設備大半都當左去填海咁話,而呢兩年新買的設備係2.1億,代表建榮將手上的機器都更新換代

味皇認為佢的設備壽命應該多於5年,假設佢有10部新舊不等的打椿機,其中2部淨值為0咁,而佢接到10單工程,咁佢10部機都會出動,如果佢只接到5單工程,就只會出動5部最新的,3部收埋,兩部當廢鐵回收,因此建榮突然提高折舊率,代表佢接唔到需要全部出動的定單,而決定廢棄一部分老機器,一般黎講,新機器會比舊的慳油電同效率高D

                         12           13           14           15         16

固定資產          1.7          2.3          2.7          3.8        3.4

折舊               0.21        0.27        0.35        0.48      0.72

新買固定資產 0.51        0.97        0.76        1.63      0.47

------------------------------------------------------------------------

折舊率%        12.4        11.7       13.0          12.6     21.2

添置率%        30.0        42.1       28.1          43.9     13.8

-------------------------------------------------------------------------

固定資產新/舊 0/1.7    1/1.4       1.7/1        3.8/0                        2012

                                   0/2.3       0.8/1.9     2.4/1.4   2.9/0.5       2013

------------------------------------------------------------------------

營業額           10.5      11.8        13.8        15.2       13.8

營業額/固定資產3.6       5.1         5.1            4          4.1

名義上建榮現有的機器沒有任何在2012年前買的,2013年買的仲有5000萬剩

2015年前的折舊率是12%左右,因為地產的折舊率用6%,其他20-25%,因此,一係2015年前的固定資產起碼有一半係物業,一係機器的壽命正常在8年以上 

如果加埋1400萬多出的折舊,今年固定資產同營業額的比例都有3.8倍,姑且比2012年景氣少少,如果有1314年的工程量,5.1倍即有17.3億營業額,毛利率27.3%係4.7億,賺14仙派10仙,如果學2012年咁差,營業額12.2,賺3.3億或5.4仙派3.8仙,估值0.7-1.2之間

從來建榮都是淨現金兼增加緊,由於冇存貨所以唔可以用存貨推算佢的現金需要,因為唯有用折舊推算,建榮一般折舊率是12%,當15%好了,3.4億15%即5100萬,建榮只要有5100萬現金就可以保證下年的固定資產保持到以往水平,因此建榮現在的3億現金是多餘的,有維持高息的動機,由於佢定單少到要廢棄固定資產的地步,因此佢冇必要在此時再買太多新機器,所以想佢活用現金並不現實,建榮將要面對派息,淘空,浪費,收購,私有化呢類可能

這就是青春嗎

最近味皇又買多層樓收租了

現家嘅樓價係人買的嗎,呢個世界痴左線啦

係就開始儲錢,積少成多,去少D旅行搞少D女人...

咁同鹹魚有乜分別!!

這就是青春嗎

哼,講道理都要人聽得入先得,抵你比人打,應該講成功需父幹之類的

太甜了

該出手時就出手,買唔起時就早唞,要錢仲有決斷力,人到老前要有樓

你講就易!!

是咁的,味皇旅行之前用賣樓C的錢換左層200萬內的唐樓,早兩日用埋上年賣樓B的錢換左另一層300萬內的唐樓,本來樓B的錢是由家人決定的,佢想買電梯樓,但佢拖左成年嫌3嫌4都唔郁,而電梯樓已經升左3成,因此最後改為由味皇決定,回報率希望有4.5%以上

大聲D講,邊隊係英超榜首先

我們阿仙奴是不可戰勝的

我們的番梘已經飢渴難當了

非常對不起

我們阿仙奴是不可戰勝的

迷之自信到底從何而來,同熱刺比歷史,同曼聯比現狀?

之前對宇宙仁還不是...

不要說了

夭壽啦,還不打臉

啊...好像想起些東西...

這就是青春嗎

啊...好像又想起些東西...

這就是青春嗎

是咁的,退休之後去左3次境外旅行,其中有個支線任務係搵件熱刺球衣,但結果都係搵唔到,台灣冇,日本都冇,在社會地位上,熱刺算係地底泥了,就好似手機想用4.3吋屏的人一樣,被當成透明的一群,當然透明都有透明好,冇接觸就冇沖突,但熱刺今季之後恐怕就會變成經常有轉播的球會,同多左很多勝利球迷,平時透明開的熱刺老球迷不但是英超球迷的少眾,仲會變成所謂熱刺球迷中的少眾,因口徑唔同,對外對內都被排擠?除左買到波衫的可能性高一點外,好似冇乜精神上的好處,當然熱刺取得好成績味皇是很高興的

早幾年熱刺的問題不是因為買了那些人而解決,而是因為棄用了那些人而解決的,阿仙奴的問題其實都是因為唔肯棄用某些人,投資組合中,味皇在08年就棄用了認為會拖後腿的銀行股了,現家睇返個投資組合,可能又有股要棄用了

順帶一提,味皇手機合約就完,由於冇4.3吋的機,因此退而求其次等小米6出,點解小米6?因為有渠道搵到台灣版的ROM,一定有舖頭支援救磚,中國電信所有android機的系統都係大陸閹割版,再貴都冇乜價值,所以有P10都唔買了,先接個合約紅米4A,之後買小米6刷機就係