四十大板

大雄:"狸貓,你要幫我"(抱著蘿蔔腳痛哭流涕)
藍貓:"誰是狸貓,雖然我唔似貓唔係狗,但我也是能夠解答三千種問題的藍貓就是我了"(一腳伸開)
藍貓:"說,又想點"
大雄:"說來話長..."
(話說技安要將佢間八百半上市,問我同阿福有冇問題
技安:"你地話有冇問題呢"
雄,福:"唉?"
技安:"我咁英明神武, 一定冇問題呢"
雄,福:"唉唉?"
阿福:"技安咁英明神武, 一定冇問題"
大雄:"唉唉唉?"
技安:"大雄你敢質疑有問題?!"
大雄:"唉唉唉!")
大雄:"結果最後要我拍心口條毛黎保證上到市,唔係唯我事問"
藍貓:"樣衰唔係你錯,走出黎現世就是你不對了,大致情況估到了,上市唔難,但技安想上市後都仲要全部的控制權吧"
大雄:"就是就是,佢的東西是佢的東西,別人的東西也是佢的東西"
藍貓:"寫上名字就行了,無人要的東西上面有誰的簽名就是物主嘛,例如我在你條X度寫上技安個名,咁條X就不屬於你了"
大雄:"不對!就算不簽名,別人條X也是技安的私有物!不對不對!為什麼我條X會是技安的私有物!說到底我會比你寫野上去咩"
藍貓:"切,明明不是新八"
大雄:"技安威脅火星人,說不從佢的話,就唱破喉嚨,沒有人會阻止佢去地球上市"
藍貓:"地球很危險,快回火星吧,我指監管"
大雄:"但是大話已經放出黎,食回頭草面子又放不下,要跪玻璃360度反轉再反轉求佢先得"
藍貓:"咁你咪跪玻璃360度反轉再反轉求佢囉"
大雄:"點解要我跪玻璃360度反轉再反轉,監管的又不是我"   "反正最後跪玻璃360度反轉再反轉的角色都是你"藍貓說
大雄:"我錯了,藍貓大爺唔好咁淘氣啦,教壞細路就唔好,技安上唔上到市唔關我事,我想要嘅只係可以忽悠佢的方案"
藍貓:"唉"
隨後來四次元內褲中搜尋
藍貓:"萬能人型觸手君!"
大雄:"呢壇野冇乜用?"
藍貓:"投票時如果出面人數少,可以用用舉手表決,有萬能人型觸手君的話,舉手投票絕不會輸"
大雄:"如果出席人數多呢?"
藍貓:"可以把萬能人型觸手君的觸手烤來分比大家食,嘎嘣脆,魷魚味"
大雄:"能有這個意義的萬能嗎!說到底這個觸手能食嗎?!明明上面沾上可疑的液體,食了會懷孕吧!不對不對!觸手的口味我不想知,我是說出席人數多要用乜方法處理!"
藍貓:"唔,呢個比較復雜,唔知講你聽唔聽得明,不,以你一定聽唔明,姑且透露下啦"
不知何時,藍貓戴上了一個全白的眼鏡,道貌岸然,兩手指交叉作托鰓狀,但由於沒有手指而作了肉酸托鰓狀,氣氛變得詭異,大雄不覺吞了過量口水,"咳咳咳"
藍貓:"股權補完計劃"

在民主制度下,少數股從多數,即是100人的圈子入面,佔51人的社團可以強暴餘下的49人,而51人的社團中只要控制當中26人的多數派就可以統一社團的行動,收買26人並不困難,自己的親朋友佔1/3,自己的影分身佔1/3,同自己有利益關係的佔1/3,事先安排下就可以
將100%的股權分為ABC三家公司持有,加上公眾,各佔1/4,A持有B51%及C26%股權,B持有C25%股權,C持有A49%股權,如此一來,A公司有(1/4X51%+1/4/X26%+1/4X25%)X51%=13.005%(可能會計錯,但不影響理解原理)
即是說A公司的董事長最低可以以13.005%的股權去控制BC兩間子公司,即使ABC將手上多餘的股票賣出去,只要A公司在手,話事權賣唔走

藍貓:"就是這樣"
大雄:"哦哦哦,雖然不明白,但好像很厲害的樣子"
藍貓:"原話講比技安聽可以了"
藍貓:"仲有...記得帶走埋萬能人型觸手君"

愛達利8033

因為有朋友係入面打工,所以味皇先知道有呢間物體,一直都冇興趣的,睇都冇睇過,最近先發現佢恢復派息,姑且睇下,咁就買左
愛達利係當年科網股時代的餘孽,比電盈慘烈百倍,4蚊跌到7仙左右的程度啦,爬就一定爬唔返上黎架啦,好似老左做唔到車手,但老本都仲夠開豆腐店同用老爺車送貨,科網股時代老笠返黎的資金敗左九成,都夠過下半輩
因為年青而犯下的錯誤,愛達利已經承認左,當年惹埋一埋食窮郎的大口物體已經忍痛清理曬,雖然痛的是別人
總之愛達利斬老二避花柳的結果就是冇狠用,當年只照顧拈花惹草而不理本業,南柯一夢醒來,只剩下殘破的空殼,現在來看愛達利更象殼股
啊,春眠不覺曉,處處是啼鳥,夜來沖水聲,花柳揩多少
話說這空殼,當年成蟲上腦到處播種,難得仲有一件地捫貨對佢不離不棄,仲可以提供軟飯比佢食,基本上愛達利最大的價值就係呢年冇乜人知的地捫貨
地捫,即係帝汶,唔係菠羅,澳門人以前習慣咁叫,以前係葡萄牙殖民地,歸澳門總督管理,一樣係用葡幣,原則上算係澳門的海外政區,可以想像為類似香港同山打根的關係,不過更密切,地捫(下稱東帝汶)係世界最窮的國家之一
愛達利係東帝汶有間聯營公司,當年無心插柳養落的,現在變成當地的寡頭壟斷的電訊商,在人口不比澳門多幾多世界最窮的國家之一的國家中,2011年居然壓搾到5億幾的營業額同億幾的盈利,非常超自然,比尼古丁伯爵更加吸血,由於聯營公司有按比例的巨額派息,因此無可能做假,而手機是近期出現的事物,因此營業額相信是大半是出售手機的一次性收益,一段時間後可能只有月費收入為主,想像一下屁民工作半年的人工去買一部手機,換機的可能性就很低了
愛達利現000金萬而市值不足1.7億,仲佔有一間派息幾千萬至過億的公司近兩成股權,估值低估,冇人知道佢本體在第三世界
正因聯營公司過分吸血,類似ctm,當地政府提早中止獨市合約,引入競爭,分別是一間越南的公司同印尼的公司,將來或許有更多國家的公司進入,但大雞唔食細米,東帝汶的市場規模應不足以吸引外人甚至僅維持3間公司,地沿關係印尼公司威脅最大,越南公司可能頂爛市後自爆,聯營公司由於現時市佔率最高,合約起碼挷兩年,懶換電話號碼,競爭中會有優勢,但由於一定有人頂爛市,盈利必然下降,至於降幅則難以估計
聯營公司2012年停派息,今年都可能停,例如冇比銀行call loan之前的消費同call左之後的消費就完全唔同了,東帝汶政府就是相當於call loan的角色,雖然做法係斷佢獨市權,停派息的做法是正確的,重整財政是當務之急,因於欠債不是無限,遲下就會派返
愛達利在開放競爭之前,開左間建設公司,專做發射塔,網線等,等於ctm先過人鋪完電話線之後其他人想再鋪就冇行咁,做左呢個後手,競爭對手就要租用佢的線路,呢方面收益亦有潛力,將來會唔會再搞埋地產就不得而知了
在落後地方搞建設,執輸行頭慘過敗家
至於佢澳門的業務,係自助過關,印醫療券之類機器,同埋賭場閉路電視,由於佢係澳門本地公司,招標會比外來公司有政治優勢,事實上係佢獨市做
安裝同出售設備不算賺錢,但保養只能由佢做先和味,只要播種越多,每粒種子的回饋越大,雖然不多,但有加冇減
公司毛利不錯,但支出太多,所以冇一年賺錢,主要是人工貴(澳門人居多),而且技術性強,員工不易取代,例如澳門少左個戰鬥員,佢不能由香港同大陸補充,寫程式可以外判,但保養一定要當地人落手,因此支出居高不下,但今期中期業績,愛達利首次出現毛利多過支出的情況,第一次產生核心盈利,即是到左盈利爆發點,佢不蝕錢的話,還是養得過的
不講呢個,齋講佢總部愛達利大廈,好似係自置物業,位於北安碼頭邊,海景呀喂(雖然亦望仙境),地皮面積超過200x250米,不過只能商業用途
由於本業可自給自足,同時亦無前境,因此收到聯營公司的股息時,可轉頭全派返出黎,不過前提是"有"先得,具體派息能力估計在1-3仙之間,今年就不用想了,過幾年十厘廿厘股,是慨率事件
公司總體長遠是比較看好的,但估值就極度睇淡了,由於公司過度不知名,又或者說科網時代太過惡名遠播,可能非常長的時間也不會出現價值重估,作為殼股創業版又冇乜利用價值,交投不多難以正價出售,因此味皇不建議人買呢隻
ps:地皮面積200x250英呎先啱,位置係水泥廠後面

葉氏業績

全方面小量增長,低增長下顯得估值過高
管理層上年聲稱今年會完成100億營業額的目標,現在完成度44%,似乎未必成功
如果有100億營業額,原則上賺5億不成問題,但佢行政支出增幅過高,侵蝕盈利,如排除特殊收益,盈利比上年更低
存貨大增,同時現金減少,現金少於存貨,營運資金不太充足,雖然佢維持派息,但有夾硬派的成份,除非下半年現金流大幅改善,否則留多些現金在手較好,一般都是這樣的,但由於佢D存貨不冇過時的問題,因此只要防止揮發掉,遲早都可以賣返出去,只是非常浪費地方
固定資產15.7億,以往常的7倍計算,可以支持110億的營業額,即是說,如果佢成功達成百億的目標,佢就用會曬產能,到時可能開始還債,又或者再借錢增產,由於欠債已經較高未必借到錢,盈利用於減債的機會較大,此時派息增加兼盈利停滯一段時期
可以理解為已播種,到收成期,但收成未如預期,不過播種面積不變的話,一般都會有恢復正常的時候
總體比中海化差,比建滔同中化肥好

買入愛達利

早排沽出聯亞後,冇即時換入其他,結果CTM升左冇得買,想改為買唐宮,因升左少少仲未買,今日放假循例睇下有冇其他選擇,味皇習慣用息率由大到少查的,意外發現呢隻派返息,所以睇左幾下就入左,以0.28買左濕鳩幾萬股,呢隻係創業板的
跟左味皇十幾年嘅MOUSE最近壞左粒制,相當感嘆,味皇青春一去不復返,以前對住別人槍桿向下一樣可以正中顏面,現在對住別人槍桿依然向下,但總是舉不起來,這就是遊戲同返工的分別(揸過AK你就明)
原來淘寶仲有呢D舊MOUSE買,IE3都只係幾十蚊,不過就算買到返黎,都只能懷舊一番
另外電腦壞左條RAM,CD-ROM自檢又有D問題,最近部腦有D多災多難
北岭個商場離開張仲有個半月,現家拆左外牆,唔知佢想點整,內部裝修仲未開工,似乎未必趕得切準時開張,個人就希望佢早D開張,早D可以出售
BLOG又開始有鹹味廣告入侵,唔知有冇辦法防止?

聯亞業績

不知幾時開始,包括聯亞在內的幾隻股比RF仔叫做5虎將,

雖然有人人有得食的景願,但現實未免殘酷一點...

1:無念!
2:如果果時搞掂的話....
3:...可惡!
4:現家 講乜都冇用鳥
5:唔該同我玩多次

講返業績,營業額同毛利表面上算平穩,沒有明顯的減價求售,但以分類來說,製衣的盈利同營造都同時少量下降,屬銷售下降而不是減價,但零售方面,營業額上升而盈利下降,說明毛利率下降或積壓存貨
虧損原因來自分銷費用同行政費的增加,分銷費用係指狗牌的推廣費,由於年內營業額同以往齋代理的的時候相當,因此年內狗牌的銷售並不算成功,如果聯亞執意在此市況下推廣狗牌,只是燒錢,縮減規模是最好的選擇,但胯下的寶劍一旦出鞘,不見血就收回是很痿的,管理層未必願意承認錯誤止損,至於行政費,聯亞正在建設海外奴隸工場,把將生產設施由舊廠遷至新廠,多少會產生一些成本,不過基本上是一次性的,但新廠即使順利都要下年先用得
存貨大增2億,來自狗牌賣唔出的貨,相信會再次形成虧損,貸款多3億,只要佢一還錢,就會計入虧損,另外有一奇異點,借多左3億,但利息支出完全冇增加,可能係出業績前早幾日借的
零售方面營業額上升7000萬,但盈利少2000萬,假設增加的部分為狗牌銷售,7000萬毛利率50%計,需3500萬存貨,即狗牌營運成本用左起碼5500萬,僅僅打平都需1.1億營業額
製衣方面,總員工13500人,零售舖960,當一間3個員工計,都布過萬人做工廠,聯亞人工支出4億,當一半是工人的人工,搬一半人手去緬甸,如果果邊人工係大陸一半,人工支出可能會降5000萬,但運費上升同成品率下降,支出可能只降兩三千萬
聯亞有足夠財力度過經濟衰退,如果持有直到市道好轉毫無疑問可以獲利,但是把股票留著的大前題是公司基本面沒有變差,而聯亞不具備呢個條件
姑且比面臨重大危機的IT好,但就算要買,遲D先決定,除左班尼路等少數,賣衫呢兩年都不是好目標,味皇遲下打算寫返篇邊隻賣衫會死得快D
聯亞表示末期息先一次過派,可能真係會派足一年的份量,但留意到聯亞可能全年虧損,兼借多左錢,想像其豪爽的派息並不現實

沽清聯亞

今日以3.16沽清手上的聯亞,原因是味皇認為聯亞的發展方針不合時宜,而且財政惡化,沽出的念頭是昨日一邊睇業績一邊寫文時萌生的,由於成交少利益沖突的結果會相當嚴重,因此文章延至味皇沽出後先發布
由於是臨時決定,尚未有明確的換馬目標
樓A租約月中完結,租客話搬去橫琴,打算加租起碼1成重新招租,以買入價計回報3.8厘,但以市價計回報先得2.1厘,完全物非所值,味皇未能看好澳門樓市,於是早就打算下年FP換成屯門的兆X苑,雖然味皇亦同樣不看好港樓,由於屯門樓升左而可能唔夠錢,時機非常尷尬
由於要退還定金,今個月冇閒錢買股

奧普業績

最近論壇發生關於奧普的激烈辯論,關心奧普的味皇當然唔會唔知,雖然味皇也想發表唱好奧普的言論,但發言前需要搞清楚一點:
公司並不會因為你買左佢的股票而變好或變壞,持貨後可以莫明其妙的增加自己的信心,但這宇宙位面上似乎並不存在精神世界幹涉現實世界的現象,我們是處於一個魔法師必然會被劍士宜砍死的世界,在對待問題時,可以唯心假設,但要唯物論証
比起盲目唱好,倒不如寫E-MAIL比奧普比意見,比如味皇就寫過兩次,比左D關於公司銷售方向的建議,巧合地,下年奧普真係調整左銷售方向,所以說奧普有一半機會是有耳性的,至少味皇對佢印象唔錯
奧普浴霸,是一個好商品,但味皇卻不認為佢是一個好產品,多年前,味皇曾研究,如何自制一個基本功能的浴霸,當時成本大約40蚊港幣,今日的話成本升到65蚊,某人話,有專利就無敵了.
專利又如何,賺幾百萬,殺頭生意有人做,蝕本生意冇人做,而且罰幾萬蚊就冇事,一個星期罰一次都仲有著數,而且邊有咁多人執法,當然現家會好D,但人性是改不了的,況且佢登記為"浴室取暖照明換氣",本身已有捉字蚤的破綻,可以說味皇只要有心,都可以有方法收佢皮,當然,奧普關乎味皇自身的利益,斷無倒米之理
要搞清楚,奧普浴霸的優勢,不是專利,而是洗腦成功
相反,奧普的集成灶,味皇認為是相當好的產品,如果要在前面加多D好字,加一萬個都得,但遺憾的是奧普仲未可以將佢變成好商品,賺唔到錢的話,就算發明到可以改變世界的產品,投資者都未必會歡喜
講左一堆廢話,講返業績
在幾乎所有產業都出問題時,同地產相關的奧普今年居然取得營業額增長,有點像怪談的成份,其實這不難解釋,實情係告入左山寨奧普,人地掛唔返個山寨牌,奧普搶返本應係佢的份額,因此今期的成長有一次性的成份,但卻更合乎奧普的真實銷售情況,經銷開支增加較少,就是表明是同店銷售增加
盈利表面賺少左,但扣除特殊收益後,是大幅增加的,全年能否派夠港幣1毫,也不是完全冇可能
其他支出多左,是因為多左研發支出,主要是新產品,包括熱水爐同暖爐,我想奧普遲早會搞埋抽濕,除塵同地熱
促銷費800萬降至300萬,說明減少左打折,是好現象,銷量上升而不增加運費同售後服務費,說明產品更輕量化同工藝更優良
借貸多5000萬,但應收子公司的賬款都多5000萬,間接抽子公司水,貸款為兩三厘的港幣貸款,財技越來越猛了,今期玩套息同港幣貶值,雖然安全性冇大問題,但太熱衷財技也不是好事,初步判斷公司的職權相當分離獨立,有分專門理財同專門營運,味皇不認為主席會兼具兩種能力又面面俱圓,因此推斷奧普是完全委任AI
總體財政冇任何惡化,亦冇再明顯的向副業投錢,維持派息不會形成問題
來自子公司的利息收入由90萬增加到270萬,博朗尼股份只有40%,因此算為暗息的話博朗尼的盈利推算會在270-680萬之間,今年非常奇跡咁公布左博朗尼的營業額,得千幾萬值得囂張咩?而以前就好似家醜咁提都唔提,態度明顯有所轉變,也許可以開始分拆的前期工作了
四川設廠的話,可以開發全新的市場,亦節省運費,不過由於奧普的銷售模式特異(先收錢,後發貨),初期分銷商未必受落,新廠要請人,又係初期會增加支出的,加埋會否損害盈利則尚未可知
展望到提到,浴頂重點是由設計師硬銷,同集中SELL電器部分,即使話奧普浴頂有市場優勢,但天花板冇,人地都係用山寨天花混合奧普浴頂使用,其他浴頂牌子會消亡同合併,浴霸競爭壓力冇咁大,推廣方針似乎係比新樓預裝

富豪REIT業績

在此之前先看其他:
美麗華營業額下跌
香格里拉營業額升9%,香港部分冇升
半島營業額升5%,香港升7%
香港部分的增長基本同通漲冇差,代表自由行的效果已經去到盡頭,或者說香港地產的租金同人工亦已見頂,無論將來香港人是用爬的還是用跳的,反正力場已經打算撤了,如果說好事的話也許只有金舖同藥房會減少
返回正題,富豪底租加少少是合乎市場的,唔似美麗華咁已經萬幸了,在單體酒店收入難以提升下,只是從增加酒店數目入手,富豪年尾打算用4厘幾的貸款收購32億約5厘回報的酒店,套息1厘的話就是3000幾萬,可增加派息1成多D,但收購效果要下年先有
收購完成後富豪貸款佔固定資產近3成半,可謂借盡,先不講加息的問題,起碼佢已然冇加按的能力,就好似法師放火球術可以清好多怪,但MP用完後,就只能平砍三連,如果不能升級補MP,這就是最後的一發,因此富豪最高估值的時間會在兩年內出現,之後就會軟垂
現價只有6厘,加1成也是6厘6,並不算吸引,似乎換成另外兩隻酒店REIT甚至者冠君都不是壞事,不過它們都有各自的問題,換馬時機還有兩年時間等

美蘭業績

崖州雖然唔係話冇車到冇船到,但走陸路同水路的話就限制了運輸距離同時間,特別係時間,貨運的話唔係生鮮貨走水陸冇大問題,但客運的話飛天是必然的因為請假難,假期少,假期要特別珍惜,因此即使有海隧也不會對旅運有大影響,建設可行死亡動車的海隧現時來說沒有經濟效益冇錢瞻性,而建設普通高速公路海隧又會有政治風險比人話冇前瞻性,因此崖州有建設海隧的必要,但沒有建設海隧的政治因數,兩廣以外的遊客多數會坐番飛機,地理狀況決定非常長的時間內機場都會缺乏競爭
海口附近會有幾個新景點,可以吸引遊客,提高客運量,比起航班收費,更多是人流多左租金就會上升,廁所改建舖,大舖切細舖,廣告牌收費提高,反正機場不缺地方,即使建設成效遠不如預期,這些景點都可以浪費大量的維護成本,做運輸的一定冇死,對機場的貨運也有好處,由此這於景點題材不是搽太陽油同天體海灘,因此不怕客流分流到果d題材嘅鳳凰機場
美蘭機場擴建中,擴建停機坪不一定會增加盈利,但是有候機的地方就會有舖位,現時美蘭的接待能力是1000萬人,擴建後為3000萬人,至少出租面積會倍增
總之美蘭機場的營業額幾乎不會下降,在降低負債的過程中,利息支出也會減少,每股盈利唔升都幾難
佢減少派息令人非常失望,但扣起的派息用於清還5,6厘息的貸款,我們卻沒有太大的理據去質疑,最多比人話保守,但不構成犯錯,半年就還左1億,派息必然會有減損
早兩年收購鳳凰機場,用左十幾億,借左周身債,由於當時a股發行失敗而冇錢,所以只收購左24.5%,到現家美蘭仲係死心不息,在預期a股將來也不會成功發行的前提下,儲蓄也許是唯二的收購方式,而美蘭因為近年盈利上升,借貸能力也會提高,於是加按就是另一個方法,美蘭應該會提出加按再貼錢收購,如果股價較高可能仲會配股,至於收購價,鳳凰機場也是成長中,肯定不會是幾年前的價碼,尾數可能超過20億,現時美蘭的利息保障比率接近10倍,借十鯪億是借到的,只要中央命令銀行放水的話
24.5%鳳凰機場計入的盈利是1400萬,即鳳凰機場整個5600萬,派息比率50%的話,盈利是1.1億
美蘭市盈率極低,前景非常明確,但派息有可能進一步減少,如果說收購前派息只是有可能減甚至停,收購後就肯定會減派息,直至負債水平下降,美蘭只是好搵,而不是有錢
收購鳳凰機場是美蘭向母公司收購,而現時母公司搞地產又不是特別好搵,那麼可以比錢向母公司收購鳳凰機場,母公司用果筆錢發行內資股(或認購証)增資美蘭,咁就對雙方都有利

龍翔業績

相對之前果D分析呢隻就簡單得多了
收入大致持平,人工支出少左
資產負債表有一定的進步
新租約下半年開始入賬
新建的固定資產由於是全新的,維護費初期會較低,老舊左先會上油消耗維護費,類似日本樓遞增的維修基金
固定資產由6.35億升至6.7億,以毛利率半年12%計(指固定資產),毛利在8000萬左右,毛利效率似乎同以往相近
半年盈利5,6千萬,現金積壓至3.3億,收租唔會有太大營運資金要求,最多留番D按金同上期,當佢可投資3億,可一次性增加3600萬毛利,純利佔7成計,總盈利增至8500萬,全年就是1.7億,而盈利再投資純利16.8%,如保留盈利在5成-2成之間,不考慮加價,每年的自然成長率8.4-3.4%,1.7億派5成同8成的分別,是每股6.7-10.8仙,即現價7-11厘息,總回報15%以內,當然有16.8%的投資回報的話,可投資的空間一定有限,如果市場開始飽滿,派息率會提高而自然成長率下降,如仲有投資空間,派息率會下降而自然成長率提高,分配有分別,但總數是15%不變,由於股息稅的悲劇存在,自然成長率高的方向也許會更令人更開心

不過市場有冇3億的投資空間倒不是太確定,如果經理說一句"最已陣",那麼只能改為向股東派高息了
"中期報告":傳龍翔將會引入相當於兩個7000萬的強援,將於48個月內加盟,據消息人士透露,材料已抵達南京,現正進行體檢
仲剩下的兩個7000萬似乎未有明確用途,可能會存定期,又可能派息比人去那不勒斯旅遊

只有1.5億的話,都可增加2500萬盈利,而現時部分新建成的倉庫6月開始收租,盈利下半年會增加,前景相當明確,而現時都6厘息了,在一兩年內龍翔是優於REIT的選擇,等待成為10厘股的時間不會多於無冠的時間