2011年11月27日 星期日

新創建(659)

即使是黑手黨,也會做正行生意,因為只有正行生意先有白錢流入,正如一些大富豪,總會有一些壟斷兼又有政治本錢的生意,起碼留比子女"老實商人"的名號,好似長江基建,新創建,信德等
今次想講新創建,但礙於蟲叔個底太花,散仔想坐佢大脾,菊花九成會爆到變向日葵,但同+X一樣,玩財技主要是從分支入手,主體一般唔會用於直接作惡,我們甚少見長和同新地咬人,會咬人的都是TOM同礦業之類的觸手,要對附觸手大叔,我們直接毆打大叔的本體,同打機唔同,先打觸手不但浪費回合數,仲除時扣血
因此先考察新創建的輸出攻擊力,如果只會狂吸補血道具的話,收為同伴就毫無作用
(億)     03    04    05    06     07     08     09     10    11   
股本 17.8  17.9  18.3  19.4  20.1  20.6  20.7  21.8  33.9(拆股)
盈利 12.1  15.4  29.2  16.8  20.4  40.3  25.8  40.8  48.5
派息  3.7    7.2  14.6    8.5  11.0  19.4  12.8  20.3  23.4
由2003年至2011年,沒有大型的股本融資(2011年2送1拆細),新創建每年股本略有增加,這是因為佢有以股代息,平均每年股本增加3%左右,如果新創建派息率為4%,母公司佔62.42%,如果母公司以股代息的話,股本剛好會增加3%,即是說母公司很重視新創建的股份,每年都增持,但反過來,母公司每年都想著要增持的話,唔駛旨意新創建會升
唔理呢點,新創建會得到母公司最好的營運,借款息率亦會最低,同時母公司唔收現金股息,新創建的保留盈利會較多,整體規模會成長得較快,派息比率50%左右(雖然實際輸出金額很少),以收息來就絕對合格,不過一般的小股東如無特別資金需求,都以股代息會較有利
母公司的持股量62.4%,有兩個臨界點要留意,66.6%及75%,當母公司的持股量到達這個臨界點時,因為最高持股量的限制,很可能會去降低持股量,因此股價可能暴升伴隨套現,等將來股價跌返先再慢慢以股代息補返
由於沒有大型的股本融資,因此新創建是靠保留盈利同借貸擴充的,保留盈利是有限的,所以2011同2011年的盈利大增就不甚合理,除非借左大錢,但這兩年新創建卻減了債,2003年至2009年盈利由12億增至26億,中間有些年份不正常地多,應該是特殊收益,按以前的水準來說2010年正常盈利都係30億先啱
而看其固定資產及投資,2011年共304億,2010年244億,2009年214億,似乎這兩年盈利都超出正常水平10億,因此假設新創建的盈利少10億而降至38億,現在真正的市盈率應為10倍,5厘息,當然不排除新項目特別好油水,但慬慎點好
2010年盈利大增主要來自出售大福,約7億,這年股本增加較多,似乎母公司用埋這些"特別息"增持,仲有其他賣資產9億,都投放在公路上,常規盈利的確會因此略升
2011年盈利大增主要來自公路收入,出現了其他公路段掘路而集中用左佢的路,應該算一次性收益,這部分近4億,仲有其他賣資產3億
新創建的盈利有一半來自聯營公司,自營部分盈利20億,排除掘路的4億都仲有16億,業務的性質比較穩定,至於聯營公司,都是碼頭同水廠居多(特別是澳門自來水廠),盈利也會有保證
估值方面,設盈利38億,PE12為456億,即每股13.4,息率4.2%,用PB計,每股淨值9.17,PB1.4為12.8,平均13.1,比起已達合理價的長江基建有估值優勢
但重覆一次,母公司每年都想著要增持的話,唔駛旨意新創建會升

2011年11月24日 星期四

福建

聽講早兩日龍九個大佬帶左一班福建佬同女星黎(0070)屬下的場度豪賭,明明佢自己係幾間賭場都有廳,原來龍九個大佬係我公司度有廳新開張,五哥係點樣我就無緣見到了,比你見到也不是好事,話曬新2安咁多手下
班福建佬個個賭幾十萬百幾萬一口,邊度黎咁多錢?話說賭客都有名有姓,只要Google一下話唔定知道D野,間中會彈一些乜乜商會會長,乜乜副秘書長出黎,但冇上市公司董事出現應算萬幸?
有一個問題大家可能唔知--賭場D賭鬼最多的係邊度黎?就味皇現家個場,意外地,原來60%的賭鬼來自香港,28%係大陸,剩低的係星馬泰同韓國等外國人,平均每人每年丟底30萬,味皇理應多謝香港人的7000蚊
如果齋計大陸佬,以味皇多年經驗,以地區計賭徒最多賭得最大的是浙江同福建,其次係山西已經是不同檔次了,它們點解咁鍾意黎澳門,應該是因為有人帶路,比如有一些賭廳就專門做一些省份的生意,至於用股票主題有關的話,就是用向下炒的公司有關的廳,基本上客源全來自福建,台灣,東南亞三地
看來福建的有錢人很難令人信服,總是有很多巧合的東西,唔講以前的魚罐兄弟,比如特步,安踏,361度,美克,華鼎的主席都是姓丁的咁,如果是但一間有人染上不良習慣,好快就會蔓延到成族人身上
中國人好賭,但是又唔見李+X去賭,因為佢後生時比較苦命,捱好多年先發蹟,有一個現象就是勞碌命的廠佬好少去賭,而暴發戶好爛賭,如果根據呢點黎選股,一些公司成立時間很短又賺很多錢的公司比如新興行業,就可能容易有小動作

2011年11月14日 星期一

公路股橫向評測

浙江滬杭甬(576),江蘇寧滬(177),深圳國際(152),深圳高速(548),越秀交通(1052),安徽皖通(995),四川成渝(107),港通控股(32)
由於食文遲左幾日先出街
公路呢類野的特性是有經營年限,每年有穩定的現金輸出,同時因有效期縮短資產逐年下降至0,有效期完結時剩餘價值要睇保留了多少盈餘同其投資成果有幾多,不過投資成果一般都是一些可持續的新項目,通常到期也不至於清盤,假如不考慮盈利的變動,只考慮有效期,經營期20年的公路以10倍市盈率買入是穩賺的,反之就死梗,不過用10年時間去賺1倍,回報並不吸引,除非在特殊時機買入,否則一般散戶不會在公路股上賺到太多,在某程度上,公路股可能只適合機構投資者同銀行進行套利之用
                                滬杭甬    寧滬     越通    皖通    港通    深國 深高 成渝 
現金流+股息收入         35.3     42.3    10.9    12.3      1.5       -       -       -
利息                              1.2        3.5      0.6     1.2       0.1       -       -       -
派息                            14.6      15.9      4.5      3.8      1.4       -       -       -
--------------------------------------------------------------------------------------------
負債                             18         63         21       23        3.6       -       -       -
現金                             60           5         21         8       9.4       -       -       -
深圳系列同成渝有若干的問題冇可比性,暫且剔出評比
滬杭甬現金流+股息收入=利息+派息的2.23倍,保留盈餘19.5億,負債用盈利可立即還清,如果派息增加1.5倍,保留盈餘12.2億,因此派息安全性是冇問題的,還有增加的可能性,資產淨值173億,為現金流的4.9倍,即是說估值用有效期5年黎計,而且仲有一些現金,如剔除現金,資產淨值131億,為現金流的3.7倍,如果其實際經營年限超過3.7年,咁佢的資產淨值就是低估了,市值220億,為現金流的6.3倍,就算用盈利計也是10年上下,只要經營權遠大於10年,滬杭甬就不算貴
寧滬現金流+股息收入=利息+派息的2.18倍,保留盈餘22.9億,負債用3年盈利還清,如果派息增加1.5倍,保留盈餘15億,有維持派息的能力,但負債太多沒有增加派息的底氣,應該是減債優先,資產淨值190億,為現金流的4.5倍,市值340億,同滬杭甬相比,寧滬全面性的劣,貴得冇道理
越通現金流+股息收入=利息+派息的2.13倍,保留盈餘5.8億,負債用3年盈利還清,如果派息增加1.5倍,保留盈餘僅1.9億,派息比率已經好高,因此想越通再增加派息似乎強人所難,維持倒是冇問題,資產淨值81億,為現金流的7.4倍,同上面相比,同樣成本的公路盈利能力並不高,市值51億,折讓切實地反映了盈利能力低同可再投資的資金少的問題
皖通現金流+股息收入=利息+派息的2.46倍,保留盈餘7.3億,負債用3年盈利還清,如果派息增加1.5倍,保留盈餘5.7億,有維持派息同兼顧還債的能力,資產淨值69億,為現金流的5.6倍,市值74億,估值在中間水平,要留意皖通的利息支出估現金流比例較大,加息會令盈利有明顯減少
港通現金流+股息收入剛好等於利息+派息,保留盈餘0,負債雖可以立即還還清,但完全沒有加派息的空間,港通無法通過使用保留盈餘而成長,反過來,過度派息一般代表公司將來盈利有很高的確定性,資產淨值31億,為現金流的20倍,市值23億,無論作為沒有成長性的公路股定係公用股,同市場上某些有成長性的公用股相比,估值都不算吸引
總合而言,滬杭甬無論公司質量定估值都最佳,以銀行的角度來說,滬杭甬的借貸息率較低,是好債仔,至於以長期穩定收息為目標,選越通定港通還不如選香港的電力公司,相對而言,是其他太差先顯得滬杭甬特別好,正如其他亞姐平凡冇特點,先顯得宮雪花好似BUG一樣的存在
至於被剔出的深國同深高都是負債極高而現金流不甚穩定, 成渝就現金流同派息都不穩定,並非過人世的好目標

2011年11月12日 星期六

新世界做大世界

收工等車前,係公司睇東方報,先知道蟲叔要將周大碌上市,自己套現150億舊股,香港地產商賣野冇死錯人的,人地將發熱棒丟過黎,你以為係震動棒好興奮地接,用完之後除時有排都起唔到身
好似味皇唔會無端賣樓一樣,蟲叔亦唔會無端端套現,梗有一些更好的用途促使,另一則關連消息,新創建打算同其他人合資搞水廠同工業園,投資額700億,新創建佔21.5%的股權
700億的21.5%,正是150億,簡單的講,新創建將會供股,大股東注資150億,利好嗎?香港地產商買野冇死錯人的

2011年11月11日 星期五

增持美蘭

星期五以5.55增持2000股美蘭機場,價錢比較接近全日高位比較不爽
集優暫時來說近景最好,公司自稱營業額增加較多,但我不想組合太過集中,於是買入其他,美蘭由6月起連續幾個月的吞吐量比上年同期增超過15%,又唔知係唔係多左航線
樓A現正以23X的價錢放售,仲未賣得出,味皇用口技誘惑地產經紀,不過段估也不是咁易賣得出的,味皇在網上睇中層98年的經屋,但未賣出都冇得講
調識去左細場,工作量少左好多,可能唔到以前的1/10,係難請假衰,肉體上雖然好左,但時間好似好慢過,伙食仲差D,報紙都冇得睇,而且原先四次元內褲般大的儲物櫃被換成只能裝內褲般大的三次元儲物櫃,不過味皇還是知道半分八兩同半斤八兩的分別的
匯豐公布了不是咁得體的業績,股市大跌1000點,正如1000蚊紙上面印的是獅子頭,但恥球亦不會因為有人公布差的業績而向西轉,人地都係如常的做生意,如果咁怕死的話,大可以同組合"去金融化"
話說仙境傳說RO到年尾就執,10年歷史的化石亦走到盡頭,味皇將賬號停放在首都教堂後的墓地前靜待死亡,所以,苯蛋雞金不搞了,由於長期持股同真實組合同步率超過400%,所以形體都是無意義的,不存在先係最原始的形態,得閒總結埋結果,睇下有冇其他形式的雞金補完計劃,簡單講就係因為打唔出經驗值,因此打算轉新地圖
至於GAME的方面,味皇正在玩裸裸娜的工作室

2011年11月4日 星期五

偉星管業

這是A股,全名叫浙江偉星新型建材股份有限公司,號碼是002372,業務是製造膠管,同香港上市的某公司一模一樣,連上市年份都一樣,但大陸的審計比香港嚴格得多,財技不易施展,假數的難度較高
偉星:             10         09(上市) 08         07
固定資產     1.80      1.49       1.15     1.15
存貨            2.54      1.53       1.50      1.54
長短債         0.64      1.93       2.38      1.85
營業額        12.5        9.3         9.0        7.0
毛利率(%)   16.4      17.1        11.7      16.1
純利            1.7         1.3          0.95      0.87
現金流        0.96        2.1          1.46      1.09
----------------------------------------------------- 
現金            9.71     0.77       1.16     0.29
應收            1.02     0.58       0.78     0.7
預付            1.32    0.62       0.24     0.75     
偉星的營業額同固定資產的比例約為6.5倍,存貨同固定資產比約1.3,每1存貨可產生6營業額,毛利率約16.5%,由於增產並沒有拖垮毛利率,說明市場供不應永,成長力強,偉星上市的主要見的似乎是還債,根據其存貨同賬款數字,生產膠管需佔用極大量的營運資金,而且預付款項顯示,客戶同供應商普遍有賒數的習慣
4年純利共4.82,4年現金流共5.61,兩者差距僅0.79,純利數字大幅造假的嫌疑似乎不大

某公司:           10         09(上市) 08         07
固定資產     17.1       13.0         7.3       6.3
存貨            11.4         7.4         5.8       4.5
長短債         7.8        13.1         4.7       6.0
營業額        77.1        53.2       39.4     30.3
毛利率(%)   26.3       22.8      13.9       12.7
純利            11.3        6.4        1.35      0.75
現金流         8.5         6.8         0.78     0.16
在同一行業上,香港上市的某公司的營業額同固定資產的比例約為4.8倍,存貨同固定資產比約0.7,同偉星比,某公司固定資產生產效率低下,但存貨管理較佳,唯一解釋原因是某公司的固定資產有很大的部份是非生產的閒置物
但同偉星相比,某公司的數字不合理的部分較多,比如毛利率跳級,比如早年的純利異常地低,近年的純利異常地高,4年純利共19.8,4年現金流共16.2,兩者差距3.56,純利數字頗為疑問, 每1存貨可產生7營業額,同偉星差唔多,如果產品同偉星有差不多的去貨速度,財務數字應不會有如此差別
我寫此文的意義不是說那隻較好那隻較差,而是想說,它們都是傳統工業股,只要有錢人人都取而代之,況且佢地毛利率又不是特別標青,因此沒有需要溢價購買,工業股強大如德昌電機,味皇早年以為3.9買入冇死,海嘯時1.1就比我再買到,折讓到冇人有,現在偉星同某公司都在市場以3倍淨值進行交易,其淨值仲唔包有幾多水份,學得廣告話齋,有D人會詐唔知,有D人會敬而遠之

2011年11月3日 星期四

歸來的味霸王

去完個幾星期韓國終於歸來了,不過歸來的不是咸蛋超人,我重重的回來,正如我輕輕的去,揮一揮衣袖,帶走了一堆臭襪
呢篇同投資關係不大,今次去旅行用左8500蚊港紙,4000蚊交通費,其餘食居多,一日狂食4餐,酒店反而用錢少過正常,正常酒店的價錢同大陸差唔多,但平價由村屋改裝而成的叫"吉屋"的一般300幾蚊一晚,就唔係成日有房,味皇RP爆發,搵到間計人頭的,160蚊佔住左臨時空出的8人房,賺左好幾日
買左兩個三星LED的7W燈炮,約110蚊個,抵到爛,買左罐頭,立頓的檸茶沖劑,海帶,龜甲船的模型,耳塞,一件NIKE的衫,仲買左幾包貴價即食面做手信(溫馨提示:去韓國旅行第二件事是帶一堆牙籤,韓國不提供牙籤,非常杯具)
韓國同港澳一樣成街係NIKE同ADIDAS,PUMA同大雞都幾常見,但KAPPA只見過兩次,時裝店ZARA同GAP最幾多,佐丹奴都相當常見,但漢登,BOSSINI,思捷等一間都未見過,化妝品店更多,但冇一間左香港上市,食肆異常地多,可以認為任何一條街都有7成舖位是食肆,而且味道類同(反正都是泡菜味),根據酒店老闆娘說,韓國人冇乜生意頭腦,見人做乜就跟住做乜,冇差異化的思想,另外老闆娘對李明博的評價不能太好,說幾年間樓價升左6倍,事實上味皇發現,韓國的同類產品物價基本達香港的160%,但凡是有包裝的貨品全部都好很貴,得汽油農產水產等比較平,比如地鐵7蚊起標,一罐可樂240ML要6蚊,4G的SD卡最少要80蚊,但文具就好很平,1/3的價錢可買到質量高過香港好多的筆,韓國冇士多,都是便利店,可以話由7仔,GS25,familymart三間統治市場,OK連影都冇,韓國最大的超市是樂天集團,等於大陸的華潤或香港的和黃,乜行業都插一腳,隻腳大到冇朋友,韓國的買產品質量幾好,但好多都是中國製造,好似耳塞找好耐先見到一個本地貨
如果在韓國購物,應直接去免稅店(非機場)同DAISO百貨買就最平,其他所有地方的價錢都是坑爹的
港澳的唔樹係榕樹,而韓國的路樹居然是白果樹,白果結到一揪揪,空氣韓國好好多,係飛機窗口度看的能見度已說明一切,至於食方面,前菜是泡菜,一坐低自動會比你,你知道嗎?連食炸雞同食PIZZA都有泡菜做前菜,港澳流行的飲品是奶茶,檸茶,而韓國同樣位置的是麥茶,水蜜桃茶,牌子方面,立頓佔有率奇高,之後是百事同可樂,味皇食左隻巨大皇帝蟹,成2公斤,具體來說大小同我面前的17吋MON差唔多,香港起碼賣1500蚊,而韓國只賣300幾蚊,仲生猛添
買野韓國唔及香港,香港先叫購物天堂(只有對成身搽乜搽物的人來說韓國較好),食野嘛...還是澳門最平靚正
返黎澳門,第一件事係公司打電話黎叫我返去撿包袱....
調職喎,由"屈你死人"調去"水鬼酒店"
至於換樓方面,今日已通知左經紀放盤,要開始等運到