2017年4月29日 星期六

美蘭業績

美蘭業績上年冇點寫,但前年有寫,當時予測一年後即2016年的業績,現定睇返,順便又予測下一年的
前年主要就係予計佢賺5-6億,但可能要比1.5億利息,今年3億,下年4.5億
結果今年美蘭的利息支出係1.4億,盈利3.9億,即係還款前賺5.3億,但佢再上年利息都有7000萬,因此代表佢仲有最大3.8-4.5億利息會在將來兩年出現
按新新翼出資72億計,佢今年借多13億,保留盈利幾億,大概出左兩成錢,仲有8成尾數未借
佢新航站大樓10月開始營運,而佢非航空收入增加9.3%,當佢收兩個月租,即1/6年或16.7%,即係話佢成個機場上年都加唔到租,而且蝕左D水腳,不過如過以分類計算,保護費多15.5%,租金多17.6%,咪錶多10.5%,吸煙房多22.4%,係行李打包少左26.8%,咁睇就發現新起的鋪位大致收入都按面積增加,係下欄跌好多,可能同紙皮加價有關?好彩行李佔收入比例低,得果1成幾,再跌都影響唔大,下年比上年多10個月租,即10/12或83.3%,佢加唔到租兼冇新建成的前提下,佢下年的非航空收入推算為差不多9億,由於佢有D鋪位係今年1月尾開舖,因此非航空收入應該會多過9億,當然,一次過加咁多樓面未必即刻咁掂
而本業的航空業務,上年增長17.3%,當今年增長15%,航空業務收入會増至7.8億
永隆數字2012年營業額6.8億,純利加利息3.7億54%,2013年分別是7.6同4.2即55%,而航空業務2014年分別是8.8同5即57%,而2015年分別是10.6同6.6即62%,而2016年分別是12.1同6.7即55%,當55-58%計,2017年營業額17億,未扣利息有9.4-9.9億,由於今年可能要比3.8億利息,減左只能賺5-6億,借多左十幾億起樓,萬一建成,折舊率2.5-2.8%計,折舊多2500萬,最終賺4.7-5.7億,成長應該算快,圍起黎每股賺1.1-1.4,派3毛,非航空收入當佢增長少一半,每股賺0.8-1,派22仙,戴定頭盔先,予測誤差一定大
2018年利息到頂峰,到時賺幾多仲要睇果幾十億有幾多效果,折舊起碼多億幾先,假設到時D固定資產爆珠全效淨味,現金流18億,派2.5億,還息後剩11億,8年先還清

2017年4月25日 星期二

啊啊啊

早排又以3.19沽左11000股春泉,而味皇兩次沽完春泉之後佢都升,再次證明味皇的燈力,是咁的,味皇手上的匯賢可以以3.02換股,因而正常依計劃是應該要以現價沽出相應數量的匯賢再收代息股的,但同時用春泉換匯賢並行的話就等於對沖左一次買同賣,結果只係齋賣左春泉
最近味皇又去睇樓,發現一個相當奇特的案例,大廈名就不說了,果棟唐樓,頂樓3個單位比同一條友買曬,加建天台屋,而且再劏成12間,在澳門來說算是非同尋常,而且劏的手法亦相當高明,味皇推算,條友月收入應該有30000,但呢個唔係重點,佢嘅重點係--有電梯,有電梯唔出奇,但呢棟有電梯都依然係唐樓,因此個電梯疑似係果個業主自己僭出黎的,係唐樓個天井度,因此係私人電梯,同台灣D酒店民宿果或者行人天橋果D一樣,而部電梯可以由1樓直通頂樓同天台屋,但唔通下面的樓層,簡單地說,就是除左果個業主,冇人會夾電梯維修費的說,下層的其他業主可以用電梯樓(偽)作賣點高價搵水魚,實際也是這樣做了兼有水魚上釣,而頂樓業主今次是3個單位同時放售,其中一個已有接盤俠,剩下兩個,要不是味皇後來再自已暗中行埋其他樓層調查,現家就是另一個接盤俠,同地產傾左一倫,得知電梯需另外比錢同業主買,而電梯每個月需5000蚊保養費,由將會由3位接盤俠分擔,散完貨佢就不管了,原業主有30000以上租金自然可以單挑(電梯費向租客另收),但味皇推算,甲租金15000,乙14000(味皇心儀單位),丙租12000(已售),這情況下丙的支付能力最低,味皇不認為佢每次都會爽手夾錢,交流得幾次遲早會黑化刀劍相向,而且成日打電話也不符合躺賺的原則,因此味皇就PASS了,就單位本身質量同價錢而言是比較優秀的,但人類的精神狀態卻不可量化評估,因此呢個案例係呢度分享比大家
澳門養一部去到5樓高的電梯,每個月要5000,台灣一部去到4樓高的電梯,每個月要3000--台幣,睇黎保養電梯收費主要的是人工而非材料
另外想講下共享單車賺...圈錢的原理,呢度假設按金300,單車成本500,免費使用,方法如下:
人口10萬的A市投放4000架車,成本200萬,每日比人破壞40架,每日補充成本2萬,但係登記人數有3萬,立即得到按金900萬
人口50萬的B市投放20000架車,成本1000萬,每日比人破壞100架,每日補充成本5萬,但係登記人數有20萬,立即得到按金6000萬
人口1000萬的C市投放50000架車,成本2500萬,每日比人破壞1000架,每日補充成本50萬,但係登記人數有300萬,立即得到按金9億
用5億放貴利之類的方式,扮收到5000萬利息咁,上市集資5億(出售舊股或上市前派息),之後冚家移民美國,之後就,可喜可賀
我不是針對你,我是說在座的各位--都是辣雞
人口越密的地方視線就多,破壞率應該會低少少
味皇認為除左單車成本貴到離譜的果間有心生存之外,其他的應該唔會長久存在亦無意意圖長久存在

2017年4月14日 星期五

返黎總結些少台灣旅遊經驗

去左台灣12日,總結些少旅遊經驗同小貼士比大瓜
1.用卡嘟台中巴士10公里內免費,路程大約折算為27台幣,即係27蚊以後先計錢,因此--例如你由台中車站去彰化,可以先到台中高鐵站落(都算景點),下架車上返去彰化就免費, 例如你由台中車站去豐原,可以先到823打炮公園,下架車上返去豐原就免費之類,坐火南係豐原北上同彰化南下都可以慳些少
2.四月一日去台中清水會有媽祖出巡派飯派水活動,雖然味皇冇攞
3.以下基本是無限時的,台中的祟光百貨同大遠百停車場有免費LOCKER,中友百貨就收10蚊,三越20蚊,台南就南方公園旁邊的三越有LOCKER,收免費-20之內,台北101大樓5樓珠寶店前疑似有10蚊的LOCKER,高雄就唔記得了,中壢的崇光有免費寄物櫃台但冇LOCKER,所有百貨公司收10點,呢D都一定有位
4.台北地鐵有各種時間票買,150地鐵1日,180地鐵24小時,280地鐵48小時,380地鐵72小時,180地鐵+巴士1日,310地鐵+巴士2日,440地鐵+巴士3日,700地鐵+巴士5日幾種
5.用一日票免費去台北範圍外的基隆方法是,由淡水坐862巴士到基隆,而且中間也有兩個大景點,雖然未確認,也許同時存在免費去桃園的方法
6.天熱旅行著長袖衫,因為可以向衫袖潑水
7.帶一支野飲同時亦帶些少水喉水用於散熱
8.厚底襪的效果係厚底鞋的3倍,而價錢只是3%,去光南大百貨25台幣買
9.因為玻璃心的關係,銀聯卡除台北(可能也包括高雄)機場的ATM外均已失效,這經味皇多次實測
10.虎航背囊不稱重,僅目測
11.唔做水魚的話,台中酒店單人房假日700-800(2-300呎),假日貴100,苗栗650(350呎),新竹900(350呎),中壢800(200呎),台北劏房都要810(50呎),基隆950(450呎),高雄700(450呎),台南700(300呎),這些大半都是有浴缸的
12.國光客運有USB,其他冇
13.客運同巴士貴過火車,但有位坐有風景睇
14.苗栗縣可以視為冇任何市內巴士
15.周圍都係廣東話
16.景點的單車徑唔好踩單車,因為有四輪的電動車龜速雙向行駛,隨時會停,4輪唔怕停車,但2輪的單車低速卻會失平衡,特別係落斜時前面比個急停你嘆,味皇這裡指的是新竹17公里海岸
17.理論上豐原存在橫貫花蓮的方法,但時間上比較苛刻
18.現家電話卡全部都冇限流量了,因此酒店WIFI不再必要

有人問的關節炎,味皇實際去搵左下,係有的,地址係台中的軍功里,掂唔掂就另一件事