2008年12月31日 星期三

08年回顧

08年政府努力營造一個和諧社會,粉飾一個太平盛世的形象,大手筆搞個奧運,相當成功,連在拘留所中的乞兒都感到滔光,政績工程空前成功,本可以展現歌舞昇平的形象之際,天有不測之風雲,雪災,地震礦難,火車相撞,動亂,毒奶,股災,倒閉潮,由於連續出現的大規模天災人禍,想遮都遮唔住,結果08年印象中係多災多難而非多采多姿的一年

"澳門點都好個你地香港"form一名上電視的同事

08年澳門現家係市道差,人人減薪啫,去拱北買餸起碼平過澳門,窮一排死唔去,但香港唔同,人人減薪時,食物卻逆市加價,而且毫無反抗的餘地,去深圳買餸根本行唔通,澳門樓價跌得快過香港,尤其係減薪之後,但澳門的熱門住宅本來就十室九空的,因為根本不打算住人的,買的都是炒家,由於炒家多數渡海而來,因此鄰阜的人受的損失自然更多,澳門沒有官商勾結,因為官同商沒有定義區分,可以返工係官,放工係商,可以背住人時係有背景人士,見人時係有頭面人士,但起碼都做到肥己不損人,而香港就只有演員,收左觀眾錢又唔交貨,日日上演六國大封相,成班人又算死草,損人又勞氣

天將降大任於斯人也,必先勞其筋骨,餓其體膚,苦其心智,08年很多人受苦了,勞筋骨可以堅持過去,苦心智只要有意念亦可捱到,只是餓體膚邊個都唔搞,天將降大任於屍人就該煨囉,09年亦是艱辛的一年,要有勞筋骨苦心智的覺悟,但千萬不要餓到自己同屋企人


社會變化不重要,自己的變化先重要,今年有甚麼得失,自己知自己事,10月時,我就失去了一樣很重要的東西,喊左幾日,現家有時惗起都會傷心,錢財身外物,請想一想自己真正想得到的是甚麼

2008年12月30日 星期二

08年最後一次交易

昨天打算用0.78買入珠江船務,失敗左,今日再打算買之時,發現奧普跌到0.48,於是尖隊改買左12000股,完成今年最後一單交易

回顧08年,投入的股本由年頭的10萬增至28萬,年頭仲收支平衡,現家就蝕緊9萬,即1/3,恆指由27500跌到14300,跌左1/2,看似跑贏大市,實際上只是不斷搆淡而已,蝕大錢始終是不可否定的事實,澳元由年頭8萬減至2萬,這是年內轉為股票而成,即係全部投入由18萬變為30萬,但身家卻縮剩21萬,冇左1/3,說實在,唔心痛就假

雖然30萬連廁所都買唔到,算唔上"大錢",但已經是打工仔努力左幾年先儲到,血汗已夠大了

05年至08年由0增至18萬,08年1年內由18萬增至30萬,已經是個很大的進步,這是工作的收入,始終會有日手停口停,仲有屋企人要養,所以實行收息攻略是不可避免的,而我確實進行緊,雖然效果不明

現在持有 (按本金計)  (按估值計)    :

匯豐              21%            16%

中國消防      20%             16%

第一天然      17%             21%

奧普              12%             17%

中國銀行        8%               5%

德昌                5%               3%

味丹                5%               5%

錦江酒店         5%              9%

中海集運         3%              4%

新華文軒         2%              3%

惠理基金         2%              1%

年內,匯豐變成了第一持股,中國消防退居第2,第一天然由於寄存左16000股的展鴻,所以只算是第3持股,今年發掘的奧普成為主力,今後還會增持,由於奧普派息而中國消防唔派息,所以奧普優先度較高,現在比較一下,發現我買入中國消防,德昌的安全邊際相當不足,即使說在早期買入,也不應成為推諉的理由,以後要反省,後期買入的奧普等就有比較充足的安全邊際,乾坤一擲時買入的錦江就最滿意了,最後投入的部分效率最高,早期的部分現在看來太不謹慎了,匯豐,中銀我明知溢價亦加以買入,這是由於其經營地位理應值得一些溢價,現在大熊市証明了所有溢價都是不可靠的,但基於今次熊市的特殊性,我堅持認為理性的人不應採用不理性的估值方法,而惠理擺明係投機,可以忽略

月供匯豐的策略我認為相當正確,雖然股價由150供到70,但如果不月供的話,我肯定1股匯豐都買唔到,而匯豐是股息投資的必需品,而且不月供的話大慨會買左其他野蝕得仲甘吧


投資策略方面,年內有一點重大的轉變,就是集中投資變為分散投資,原因係三聚奶引起的,蒙牛都可以一夜由強牛變死牛,加上後來味丹的"水喉門",鰻魚的"走佬門"事件,雖然遠比不上東尼的"AIG門",但打擊選股信心的效力是一樣的,價值投資人有一個盲點,就係對自己認為啱的事會一直堅持,如果事實係佢錯的話,佢會係世界上最後一個發現的人,嘅然我入左門,呢個盲點我亦不可避免,採用分散投資的方法並不一定正確,但確實可以在心理上取得一些平衡

展望下一年,估計奧普將會係盈利能力增長最快的一隻,不過股價卻會係錦江酒店,另外應該沒有任何一隻在09年會列入轉會名單

2008年12月25日 星期四

食之感想

有時同人去聯邦大青樓飲茶,一圍檯都係垃圾,唔好味之餘又食唔飽,食完找數一人得百幾蚊,碎銀比貼士,冇人覺得貴,食自助養又係,食一大堆垃圾,唔好味之餘又唔衛生,肚就飽呀,找數又百幾蚊,又係冇人覺得貴,一丁友走去老記食麵,老記d竹昇麵聞名港澳,真係好好食,但係食完一碗要比幾十蚊,牙痛咁聲

食百幾蚊垃圾覺得平,食幾十蚊極品反而覺得貴,真實地發生在我身上,原因其實係心境問題

冇人會一個人去飲茶食pro飛,一去就實係團體去,同人一齊去心情都好d,或者說有閒情先會叫人去,心情好自然豪爽,相反,一個人去食就會理性d,會去一d抵食嘅鋪頭食,如果心情唔好更加會求其食,自然姑寒d

這就是為甚麼經濟差時大家樂同麥記會特別好生意,經濟好時又會差d的原因,與此相反,今年咁嘅衰樣,死肥羊唔駛旨意會賺到錢

現家全世界嘅人都冇心情,受影響的是團體活動,其中最重要的就是旅遊,消費等,正因如此,我首先被減薪....如果有什麼個人活動有關的公司受益的話,一定係公仔面

不過我的處境又未到咁衰

另外祝大家聖誕快樂

2008年12月24日 星期三

煲鰻魚

區區幾日鰻魚就塞滿曬d董事空缺了,一般來說,任何出大問題的公司,董事跳左船就唔駛旨意會再搵到人上返賊船,直到船沉左都會唔會有人影係船倉,反之來看,鰻魚似乎唔似會沉,算係解決左一個疑慮

但另一個疑慮出來了,係董事人選問題,其中一個非執董來自大昌行,這人選我舉雙腳讚成,問題係執行董事的人選有問題,執行董事李華倫係禹銘投資(666)的ceo兼執行董事,同水產業毫不相干,而且禹銘的非執董其中一個正是我們熟知的名叫蘇樹輝的物體,人物的風評就不講了,審視一下禹銘的財務數據,發現它炒味濃郁,而且即滿了鹵水千島醬,多食會壞肚皮,一個來自証卷行業的人君臨水產公司有什麼用呢?不應期待他來到會改賣孔雀石綠,倒是如此人物的到來,多數係表演財技

鰻魚現家股價低迷,玩得嘅財技無非係發認股權再清算拆骨炒高股價變賣之類,鰻魚咁多現金,派個特別息股價就會飛天,財技並非難事,但鰻魚卻變了質,長期食會中毒

說到底,做乜鰻魚會同証卷業人材扯上關係?想像一下可能的原因,回憶鰻魚的年報,好似提個有一個抵押貸款的合同條件係主席的持股最少要有35%,如果有內亂,有人私自玩弄主席的持股,好可能會觸發違約,債主可能接管主席的股權,再派人入黎控制公司,另一個可能的原因,瑞銀德銀拥有公司的大量股權,由於德銀同鰻魚反左面,因此派人入去拆骨還錢都唔出奇

如果係前者,原來的主席可能會比人趕走或降級到營運總裁,公司由債主控制,除左管理層變天外,小股東沒有甚麼大影響,好似領匯咁,後者的話,公司大概會部分清盤,然後派巨額的特別息,剩低的部分賣盤或私有化

似乎小股東未必會有損失,甚至有機會有賺,但今次的事件卻會毀左一間好公司

2008年12月21日 星期日

對沖

對沖成日聽,實際做法係點呢?今次趁渣打難得的供股講解一下

渣打88.8 供股權42.2 供股價45 手續費唔考慮,因為只係講解

假如好似大口仔咁本身持有,方法如下

持有渣打100股

沽出渣打     100股 +8880

買入供股權 100股  -4220

行使供股權 100股  -4500

持有渣打100股+160蚊

 

假如本身沒持有,方法如下

持有8880蚊

沽空渣打     100股               +8880

買入供股權 100股                -4220

現金                                       4660

十日後渣打升至100蚊

沽空渣打部分損失               -1120

行使供股權 100股                -4500

賣出渣打100股                  +10000

利潤                                         160

 

持有8880蚊

沽空渣打     100股               +8880

買入供股權 100股                -4220

現金                                       4660

十日後渣打跌至70蚊

沽空渣打部分利潤              +1880

行使供股權 100股                -4500

賣出渣打100股                    +7000

利潤                                         160

 

持有8880蚊

沽空渣打     100股               +8880

買入供股權 100股                -4220

現金                                       4660

十日後供股權同渣打的差價收窄至0.2

渣打升至100蚊時:

賣出供股權 100股                +5480

買入渣打100股                    -10000

利潤                                          140

渣打跌至70蚊時:

賣出供股權 100股                +2390

買入渣打100股                     -7000

利潤                                          50(用行使的方法更好)

十日後供股權同渣打的差價拉闊至2,無論升跌

行使供股權 100股                      -?

賣出渣打100股                          +?

利潤                                         160

 

假如本身錢都冇持有,方法如下

借入8880或100股

沽空渣打     100股               +8880

買入供股權 100股                -4220

現金                                        4660

十日後渣打升至100蚊(跌都係咁話)

沽空渣打部分損失               -1120

行使供股權 100股               -4500

賣出渣打100股                 +10000   或歸還100股

現金                                       9040

負債                                       8880 

還款後現金(利潤)                   160

如果計過手續費在利潤以下就真係有賺,而且幾乎唔怕蝕

 

散戶唔沽得空,手上又冇貨,有冇d有實用性的呢

今次講匯豐的以股代息

匯豐一手要400股,以0.18美元計,要起碼50手先可以一次一手以股代息,現家似乎只有市場先生同鄧小閑先有...

以股代息有一手計,以股代息價為75

匯豐現價80時:

賣出匯豐400股              -400股

接受以股代息               +400股

利潤                               2000

匯豐現價70時:

買入匯豐400股           -28000

接受現金股息            +30000

利潤                               2000

渣打一手得50股就方便得多

2008年12月20日 星期六

鰻魚煲?

第一天然最近的情況令人相當不安,成班董事人間蒸發,早前的公告沒有董事名單,我以為係筆誤,個秘書等炒,現家個秘書真係炒左,但沒有董事卻是事實,而且消失的是全體執行董事,好大劑

柯南:"凶手就是你!"

味皇一腳伸開了臭屁小鬼

到底發生了甚麼事呢?用我的水晶頭蓋骨立即想像到是有人穿櫃桶底,而且凶手唔止一個....

走佬的董事中,包括左主席個仔同女婿,似乎主席比人蒙在鼓里....現在我想像到一個人,叫葉劍波,想像到一間公司,叫海域化工,係一個一直運作良好的公司突然死亡的故事,不同的是葉劍波走佬,留比董事善後,而現在係董事走佬,留比主席善後,我居然可以立即聯想到海域化工的故事,真係悲哀

雖然以上全是臆測,但公司出現內部問題確是事實,作為股東的我,可能要無辜辜損失一筆,而且遠比阜豐果次嚴重,由於事出突然,連反擊的機會都冇,開始明白東尼買AIG的心情了

不過第一天然的資產負債同現金流情況都是優良的,遠非海域可比(如果咁都踩屎以後就真係乜都唔駛買了),最差的情況,假如現金全部比人掏空了,都應該可以順利向展鴻借到營業資金,只要兩兄弟沒有內鬨的話,而且年內第一天然的零售店己經由一間變成三間,而日本方面的定單亦比往年多,盈利能力比上年強左唔少,所以要生存應該是沒有問題的,如果冇事發生當然最好

我會一直留意事態發展,雖然有過沽出換馬的念頭,但一切起碼等到出業績之後再決定


突然想到,德銀最初係追數5000萬,現家卻變為1.24億,如果事情係有關連的話,仲有第二個可能性,即係有董事的"私人投資"失敗之後入公數,然後拍拍籮柚走人,即係類似中信泰富的情況

總之唔方好野

2008年12月18日 星期四

亮碧思

史上涉及金額最大的亮碧思,維持左48年,金額500億美元,主腦認真本事

不過即使成500億,如果以5%通脹計,亦不過是48年前的48億,同發明者的本事差的遠

根據曱甴原理,當你發現廚房的第一隻曱甴時,廚房內一早已埋伏了千千萬萬的曱甴,現在出現了第一個500億,豈不是仲有千千萬萬個500億?

亮碧思發展起來,第1個人賺n,第2個人賺n,第3個人賺n,第4個人賺n,於是乎人人賺錢,經濟向好,股市上升,如果冇人唔識趣去篤爆佢,最多可以賺60億-1個n(跟住爆)

亮碧思註定是失敗的,原因是世界太細了,水魚接近無限但不是無限,最後一個水魚始終會出現,如此一來,總要有一個人要承擔60億n的債務,很遺憾,破產法會令債務公有化,大家一人欠返一個n,結果得個桔

經濟起伏,只不過係互拋柑桔的遊戲

2008年12月17日 星期三

論足球同投資的分別

歐洲國家盃葡萄牙打入決賽,斯高拉利名利雙收,打入決賽靠的是闘志,我不認為一定是代表教練勁,而應該係費高身先士卒的努力所帶動

某人成為媒體熱捧的股神,某人利名利雙收,成為股神先要賺到錢,我不認為一定是代表某人叻仔,而應該係某鬼佬的行為所帶動

當年歐洲國家盃葡萄牙正選有兩個明顯的缺點-c朗拿度同保利達,如果改用施蒙同朗奴高美士成績一定更好,但是只有識貨的球迷排陣先會考慮實力棄用前者,而識貨的教練排陣卻先會考慮名氣棄用後者

32000點時財演的倉都有兩個明顯的缺點-中資股同商品,如果改用本地股代替中資股,債券代替商品成績一定更好,但是只有識貨的散戶選股先會考慮常識棄用前者,而識貨的財演選股卻先會考慮潮流棄用後者

一些球員好有實力卻成世比人過度忽視,例如摩連迪斯同沙維奧拿,一些球員卻一直受到同實力不相稱的重視,例如真拿斯同丹尼臣,一些球員好有實力卻長期比人忽視,但最終都比人發現,例如馬基尼尼同比沙路,一些球員曾受到同實力不相稱的重視,但最終都打回原形,例如列寶夫同費拉拿


一些股票好有實力卻成世比人過度忽視,例如金利來同葉氐,一些股票卻一直受到同實力不相稱的重視,例如中交建同蒙牛,一些股票好有實力卻長期比人忽視,但最終都比人發現,例如邵氐同海灣,一些股票曾受到同實力不相稱的重視,但最終都打回原形,例如李寧同思捷

一些球員係曾經係名將而最終卻成為廢物,例如麥馬拿文同古華特,一些球員曾經係廢物而最終卻成為名將,例如法比加斯同亨利,一些球員係曾經係名將而最終都係名將,例如費高同巴治奧,一些球員係曾經係廢物而最終都係廢物,例如卡奴爾同施根


一些股票係曾經係好野而最終卻成為垃圾,例如電盈同小輪,一些股票曾經係垃圾而最終卻成為好野,例如長實同人壽,一些股票係曾經係好野而最終都係好野,例如匯豐同TVB,一些股票係曾經係垃圾而最終都係垃圾,例如龍蝦大王同金威集團

沙維奧拿同泰維斯實力相當,打法相近,而泰維斯身價卻遠超沙維奧拿,闘志同年齡等會影響身價,但身價差距由於超過1000萬鎊,因此有極高的轉換價值

建設銀行同工商銀行實力相當,業務相近,而建設銀行身價卻遠超工商銀行,增長同盈利等會影響股價,當股價差距超過大或過小時,應該有極高的轉換價值

曼城出價5200萬鎊買大衛韋拿,而5200萬鎊=格連+哥魯卡+安東費甸南+高柏尼+歷克馬茲尼+亞皮亞+泰摩斯卓克+迪根士文+馬田柏杜夫+奧雲+化芬,古語有云:韋拿常有,水魚不常有


有人出價6200億蚊買平保,而6200億=中電+華煤+港燈+太古+中信泰富+長實+大家樂+永安+維他奶+莎莎+九巴,古語有云:平保常有,水魚不常有

前鋒泰維斯同朗尼以樣衰衰見稱,如果要買靚仔,可以用辛達告魯斯同科蘭,實力相近的情況下,這完全是個人風格問題

藍籌中壽同平保以成長力見稱,如果要買股仔,可以用上海集優同首創置業,選股不錯的情況下,這完全是個人風格問題

皇家馬德里的後衛是世界級堅固的,但組合在一起的防線卻是世界級豆腐的,這就是1+1=0

李澤楷係精明的,但同梁伯滔一齊時卻是陰險的,這就是1+1=0

列斯曾經係強隊,但它不顧後果的擴張及消費,最終令它破產

玖紙曾經係好野,但它不顧後果的擴張及消費,最終會令它破產

足球先生及金球獎的不公平係公開的秘密,這是因為評審委員都是專家

專家的老點係公開的秘密,這是因為背後的是佣金

球證的水平下降是不可逆的,足總作為監察機構只作"監察",因為這是建制

港交所的管理水平下降是不可逆的,金管局作為監察機構只作"監察",因為這是建制

一線球星受大眾追捧,身價特別高,因素是效力大球會,靘仔,有性格,多新聞等,如果有同樣實力的球員,效力小球會,樣衰,冇性格,寡言的話,就不值錢,例如c朗同施蒙,雷哥斯達同列基美,舒夫真高同基艾沙,巴迪斯圖達同夏索賓基,比亞荷夫同真高拿,巴治奧同蘇拿,保方同基雲,羅賓同柏杜夫等

熱門股受大眾追捧,股價特別高,因素是基金愛股,圖表,有慨念,多新聞等,如果有同樣實力的股票,冇成交,冷門,冇慨念,少新聞的話,就不值錢,例如中壽同宏利,華電同港燈,中鐵同港通,招銀同大新,中石油同葉氐,思捷同包浩斯,康師傅同四洲,雨潤同廣南等

皇家馬德里當年的"施丹柏文"政策,證明了其不合理性,過於集中某類球員投資,形成陣容難以調整的風險

財演當年的"中資必買"政策,證明了其不合理性,過於集中某類股票投資,形成難以調整的風險

阿仙奴的陣容非常年輕,成長潛力極大,但由於隊中沒有老油條,場上一旦出現劣勢就容易陷入混亂,因此追求成長的同時,亦需要一些有穩定性的球員平衡一下

四叔的持續非常熱門,成長潛力極大,但由於持股沒有安全邊際,市況一旦出現逆轉就容易陷入混亂,因此追求成長的同時,亦需要一些有安全邊際的股票平衡一下

小球隊最好的球員會比大球隊的最差的球員好得多

牙籤的龍頭股會比石油的龍尾股好

腳趾尾拉西射門中柱唔入,叫屎波,腳趾拗柴射門中柱入左,叫世界波,呢d叫足球

經過理性分析買股蝕錢,叫估神,唔用腦亂買股賺錢,叫股神,呢d叫現實

熱刺的真拿斯(JJ),可以視為毒瘤,但"唔捨得","仲用得","睇定d","會升值"等原因會令人難以下決心把JJ切除,甚至為保JJ而切除其他東西,這是優柔寡斷,應該避免

地產股的嘉華,可以視為千股,但"地皮靚","老闆叻","有地位","儲備多"等原因會令人難以下決心把嘉華沽出,甚至為保嘉華而鼓勵其他人買,這是有缺考量,應該避免


利物浦的希皮亞,頂上功夫冠絕全球,雖然老了不值錢,而且跑唔郁,但隊中有這種有感染力的人壓陣是非常重要的,但教練往往會想將走下坡的球員以低於價值的價錢出售

德昌電機,規模冠絕全球,雖然行業缺前景,而且盈利下降,但持股中有這種龍頭股壓陣是非常重要的,但芬佬往往會想將走下坡的股票以低於價值的價錢出售

大連實德的董方卓,缺少經驗,但年輕打得快,很有潛力,隊中有這種有升值能的人在陣是很有吸引力的,教練往往會以高於價值的價錢購買成長中的球員

蒙牛,市盈率高,但盈利升得快,很有潛力,持股中有這種有升值能的股票是很有吸引力的,芬佬往往會以高於價值的價錢購買成長中的股票

舒靈咸乃一代名將,由於他年紀大走下坡,球會可以以低於價值的價錢入手,而且發揮了好幾年良好效果

白花油乃垃圾一隻,由於公司停滯不前,投資人可以以很低的價錢入手,而且賺到超過交行的良好效果

辛達路斯乃瑞士主力,效力大球會阿仙奴,年年安排他打下主力,卻冇幾多次打得好

中國電力乃國企大股,主席係李鵬個女,年年有傳媒吹,就係賺唔到錢

隊中的一些核心球員,大有前途,值得期待,但遇到不幸,如果是不可抗力就唯有泰然面對,錯不在已,例如拜仁的戴士拿,西維爾的佩利亞

持股的一些核心股票,大有前途,值得期待,但遇到不幸,如果是不可抗力就唯有泰然面對,錯不在已,例如東方電機,飛毛腿

c朗拿度係世界最貴的球員之一,但他的傳中仲差李健和幾皮,因此名氣唔代表一切

工商銀行係世界最貴的銀行之一,但它的效率仲差恆生幾皮,,因此名氣唔代表一切

高價買了大檸賓,發現貨不對版或者買左冇用,應立即退貨或者轉手

高價買了蒙古能源,發現貨不對版或者買左冇料到,應立即退貨或者轉手

高價買了羅比堅尼,隨即發現貨不對版或者買左唔啱用,隨即賣家話肯折價回收,價錢合理就應退回,高價買入本來係買家的不對,不應因面子問題而再錯多次

高價買了列文債券,隨即發現貨不對版或者買左唔啱用,隨即賣家話肯折價回收,價錢合理就應退回,高價買入本來係買家的不對,不應因面子問題而再錯多次

皇家馬德里高價買入活基治成日傷,而米堡低價買入就堅過石堅,此時皇馬應檢討是球員問題定自己隊醫問題,自己是否山西豆腐隊

甲高價買入中資股蝕死,而乙低價買入本地股就堅過石堅,此時甲應檢討是股票問題定自己方法問題,自己是否決乏投資知識

我敢肯定曼城買人有參考過fm,馬田柏杜夫,高柏尼,哥魯卡,伊薩臣,李察士,羅賓奴等都係妖人,自己欠缺知識時參考一些沒有利益衝突的資料是很有用的

我敢肯定這裡買人有參考過blogger,昆機,宏利,渣打,瑞安等都係好股,自己欠缺知識時參考一些沒有利益衝突的資料是很有用的

球員不是一成不變的,舒靈咸同柏金年紀大左越來越陰濕,希亞路同史必年紀大左越打越後,長期持有某一球員,會發現將來必定會轉型

公司不是一成不變的,長實以前整膠花的,和黃以前係造船的,長期持有某一股票,會發現將來必定會轉型

拥有巴治奧同蘇拿等有品的球員會比拥有芝拉華特同迪奧夫等易管理

由汪穗中同鄭海泉等有品的管理人會比由李澤楷同呂志和等來得放心1