奧普09年中期業績

營業額跌7.1%至2.21億,毛利跌19.9%至1.07億,純利跌19%至3000萬,每股盈利4仙,每股派息人民幣5仙,以現價0.94計,齋中期息已經6厘

浴霸安裝係裝修的一種,地產低迷,d人就唔裝修,如果地產狂升,d人就炒樓,又係唔裝修,係地產比較隱定先多人裝修,因此在此市況中,毛利只跌兩成實在唔間單,尤其係山寨廠紛紛破產的時候

銷售及經銷開支跌23%至5600萬:

廣告費1290萬,上年1460萬

促銷費890萬,上年1600萬

推銷員人工1550萬,上年1990萬

售後服務290萬,上年280萬

運費600萬,上年670萬

係得奧普自交帶得咁詳細...運費冇得慳,而廣告費佔左毛利的12%,推銷費佔23%,售後服務佔3%,三樣合共佔左毛利的38%,我想在如此不明朗的市場上咁揼本賣廣告的人唔係天才就係白痴,一般電器公司都慳得一蚊得一蚊,至少我今年甚少睇到電器廣告(除左大金冷氣),奧普的做法是絕無僅有的,這亦帶出了一個訊息--奧普產品貴市價1倍,用賺多的錢賣廣告也就是免費的,對消費者同競爭者是個惡性循環:奧普貴-->免賣廣告費-->奧普更貴-->賣更多廣告免費,消費者係羊毛出在羊身上,競爭者就輸係廣告費上

假設浴霸賣500蚊一個,營業額2.21億代表賣44萬個,售後服務290萬,即每件貨的售後服務費6個6,如果44萬件中只有4400件出問題,即每件的售後服務費為660,等於免費換新,我認為免費換新足夠令消費者滿意,因此奧普的售後服務係超額投入的,對維持品牌形象很有好處,浴霸賣500蚊,售後服務費6個6,又係羊毛出在羊身上,只要出問題的數量不多於5800件,換新都可以免費,如果一早加左售後服務費20蚊係售價度,壞幾多都可以包換,而且奧普夠膽賣咁貴,產品出問題的幾率不大

行政開支跌33%至1600萬:

一般及行政職員薪金580萬,上年1010萬

折舊190萬,上年140萬

專利費240萬,上年310萬

辦公室開支110萬,上年190萬

購股權攤銷200萬,上年420萬

總人工2210萬,上年3350萬

員工數1113人,上年1296人

雖然股東會著數左,但我認為奧普的員工同供應商是很悲慘的,是但一樣開支都可以減咁多,會唔會有工人運動呢點我頗為關心,另外董事肯減人工又係奇景,不過公司同時提高派息,董事收入實際並冇減少之餘,而且同股東利益更一致

存貨周轉日數    69-->70

應收賬款周轉日數  28-->29

應付賬款周轉日數  46-->48

公司運轉一切如常,簡直係商業奇蹟

賬款數量變化大,可以理解為季節性的問題,折舊上升,代表產能提高

資產負債表一切正常,唯一問題係多左一筆1.58億的抵押存款,同時又有1.48億短期銀行借款,不過奧普同時有一筆1.87億的定期存款,因此可能是在定期存款到期前班錢用,(1.58押比銀行,銀行先比1.48億,銀行原來食水咁深)資產負債表在6月30日結算,筆錢已經在8月清還,可能係旺季前存貨準備的支出,而且奧普派息再一次多於盈利,因此財政應該冇問題

關於派息率方面,管理層咁交代:本集團主要流動資金及資本資源的來源一直是（及預期將繼續是）內部產生的現金流量。本集團的主要現金一直（及預期將繼續）用於營運成本，以及擴充生產及本集團的銷售網絡

即係話唔會借錢,亦唔會問股東攞錢,如果賺的錢多於所需營運成本,其餘都會派息

"董事話"的其他部分:

展望二零零九年下半年，集團管理層認為本集團的經營總體保持平穩，發展將面臨更多機會

7月底奧普新一代吊頂產品「奧芯」系列問世

董事認為，下半年集團品牌推廣方面，減少高空投放，採取更多的落地的形式，更貼近消費者，加強對消費者售前、售中、售後的細心服務

董事認為，營銷網絡是集團的生命線

「奧芯」的核心技術特點在於合（功能集合）、分（大循環交換系統、功能區分離）、容（材料之間更好的適配性，克服了浴頂其它材料如石膏板等材料不能使用的缺陷）和快（快速升溫）。

截止二零零九年六月三十日，集團擁有的專利有178項，其中發明4 項，實用新型30項，外觀專利144項

本集團之政策為不訂立金融工具交易

宣佈向二零零九年九月二十一日（星期一）名列本公司股東名冊（「股東名冊」）的股東，派付特別中期股息每股人民幣0.05 元

奧普集團控股有限公司將於二零零九年九月二日（星期三）下午二時正至下午四時正召開二零零九年中期業績發佈的網上路演，各位投資者可瀏覽www.p5w.net，或奧普網上路演專用鏈接http://roadshow2008.p5w.net/2009/ap09/index.htm，點擊參與本次網絡直播。集團董事局主席方杰先生、集團CFO梁華先生和杭州奧普電器有限公司財務總監劉文龍先生屆時將會介紹二零零九年中期集團業務發展情況以及下半年戰略規劃，同時回答投資者的提問

 

關於網上路演真係非常新奇,上年都有,今次我3點幾先得閒上去睇,問左佢一堆問題,但係....似乎要註冊左先可以發言,我問的好似send唔到出去,現在姑且整理一下其他人的問題(如果唔係自問自答):

1.目前公司OEM的比重越来越高，奥普是如何考虑的？

公司的成功在于：勇于创新和研发。我们公司的OEM从30%上升到50%，生产和研发都是我们自己的，别人只负责代理。谢谢！

2.方董事长，你平时除了工作外，工作之余都有什么安排?

我每天早上6点多起来，看一小时书，如果有时间就会去买菜，然后亲自下厨，自认厨艺很不错。二十多年来买书的花费合计在15万左右。谢谢！

3.公司自上市以来一直都在说，正在积极发展香港市场，目前拓展情况如何，是否有新的进展？

公司已专门为香港市场设计了更适合当地市场的产品，很快会有效果显示出来。谢谢！

4.刚才说奥普的税率多少？没听清,何时可以享受高新技术企业的优惠？

09年的税率为10%，在高新技术企业认定以后税率为15%。谢谢！

5.销售系统管理：公司如何对整体及各个销售系统的存货进行动态监督？

公司非常注重做实事，存货分两种：一、75%是代理商买断而没有风险；二、25%做直营代销。公司对物流及资产安全链非常重视，内部监管到位，形成一个良性循环。谢谢！

6.14800万元的短期银行贷款是如何产生的,中报披露8月已经归还,请解释下这个交易,谢谢

在香港，没有债务的公司是很少的，但是请投资者绝对安心的是，我们公司从1993年开始至今，从来没有借过一分钱，1.48亿元是一个非常安全的短期投资，它可以产生一定的短期利息，补贴公司的其它支出。谢谢！

 

其他自己聽到的(我只聽了後半30分鐘,遲再d返睇),最重要的是"奧普未來冇任何資本開支",冇發展計劃所以先會派咁高息

奧普的歷史派息為:

09上半年5仙常規派息,中期5仙,盈利4仙

08年9仙常規派息,末期5仙中期4仙,3仙特別息,合計12仙,盈利9仙

07年6仙常規派息,末期6仙中期冇,4仙特別息,合計10仙,盈利14仙

06年(上市只有半年)4仙常規派息,末期4仙中期冇,盈利14仙

奧普的總資產是在下降中,09年的內在價值並不比0607年高,股價仲下跌左添,但股東因為收到龐大的股息而在股價下跌的情況下暗中發左達,好似我都收左佢3期的股息,佔左成本的13%,原先我預計奧普09年只派8仙,但奧普話未來冇任何資本開支,唔需要留錢係身,由於旺季在秋冬,末期派息應不少於中期,因此估計09年末期派息5-7仙,奧普的營運資金充足,而且仲有筆定期剩,可能仲派多一期特別息,雖然我想佢起碼留返1億旁身,存貨先賣比分銷商再幫分銷商賣廣告,這種模式係將資金壓力推比分銷商,自己賣的真正產品係賣牌子,類似M記,奧普年銷量先得果幾十萬件,新廠(中央廚房)應能支持長期所需,唔需要擴建,甚至外判都得,主要支出係廣告費推銷費,可以用預先收左分銷商的錢黎賣,好鬼賤格,營運資金夠買存貨同出糧就得,1億應該足夠

味味一品

這一篇同投資完全冇關係,只係我啱啱食左個杯面,感動左,即刻寫返篇同"味皇"身份相乎的食評

最近返半夜,收工想搵d野食,而我又係味丹股東,於是我買左食左個味味一品紅燒牛肉面試食,11蚊185克,好貴,台灣台中沙鹿縣製造,即味丹總部的產品

煲完水,打開個杯面,個面睇黎得65克左右,不會多過合味道,另外仲有兩包調味一包餸,奇景

杯面有餸已經出奇,而且量似乎唔少,餸用錫紙袋包裝,係軟罐頭的一種,通常係軍用,打開佢,d汁"必"左出黎,整污漕左地下,立即聞到五香牛肉味,汁大慨佔左1/3,倒出黎一看....汗一個

裡面有牛腩!

數過有5舊,如果系茶餐廳度叫腩面,老闆實比兩舊腩,其餘蘿蔔,因此個杯面仲比茶餐廳多料,定係應該講茶餐廳偷工減料,消費者的悲哀?

3分鐘後,面已經發起可以食,面身唔同丁面的圓身,而係合味道果種扁身的闊條面型,(闊面比圓面表面積大,可以索多d湯汁,適用於濃湯,圓面一般係用係清湯上)食起黎口感比較焾,有少少彈力,好似好易夾斷咁,口感比統一康師傅高幾皮,但同合味道比仲有差距,由於係闊條面,所以非常入味,而且湯料雜質多,應該係五香粉同辣椒粉,面沾左唔少,味道幾香,就係辣左d,面的份量唔多,幾啖食曬,唔係幾夠喉

牛腩有少少筋,好焾好入味,肯定係用壓力煲燜,話係紅燒牛肉,但味道似五香牛肉多d,總之同丁面的紅燒牛肉味完全唔似,由於我未食過紅燒牛肉,所以唔知邊個更似紅燒牛肉味定係兩者都唔似,不過兩者都好味,講返牛腩,雖然幾大舊下,但缺點就係一夾就散,跌曬落碗底,湯又鬼死咁濁,好難夾

最後食完慢慢撩d面渣同肉碎食,這是食即食面必然的行為,也是情趣

錦江酒店重組兼業績分析

今次資產重組,中銀估錦江會換走錦江之星換入有星酒店,而味皇就估錦江會換走長江證券換入文華東方,結果出黎,中銀全中味皇全錯,証明散戶靠估好難估中,但同時亦代表大行可能一早就知,這段時間的交易都是內幕交易,應該係很嚴肅的問題,當然,證監係唔查的,大行都係"咁啱估中"的

即使如此,我還是認為錦江很快就會接收東錦江同文華東方的

講返資產重組,錦江會用錦江之星加3.4億換一批3星以上的酒店,由於交換前已持有交易對象錦江發展一半股權,假設錦江發展持有2的酒店,錦江酒店持有2的錦江之星,交易前的資產如下:

錦江酒店--錦江發展50%(1酒店)+2錦江之星

交易後的資產如下:

錦江酒店--錦江發展50%(1錦江之星)+2酒店

錦江發展係大陸AB股上市,同錦江酒店業務一樣係"麗晶酒店"同"麗晶大賓館",今次交易後,錦江發展變成只有"麗晶大賓館",錦江酒店只有"麗晶酒店",一人分一個,兩公司在"質"上而經完全唔同,如果交易係公平就冇問題,但交易係一方特別著數就有問題了,對家都係上市公司,都有小股東,咁就成為一方搵老襯的交易

由於雙方係用資產值對價,交易價格應該公平,問題係資產類型唔同,背後的盈利有差異,特別係上市公司的市場計價方法,市場先生發瘟起黎,會將盈利低的資產評得一文不值,而今次交易雙方,一方是用盈利的資產交換對方虧損的資產,因此接受虧損資產的一方的市場價值定必重挫

難得今次資產重組,錦江先肯公開每間酒店的營業數據,數據非常珍貴,下列細明最近一年的數字:

錦江酒店交易代價:

錦江之星x71.225%:

總資產--20億 淨資產--2.4億

毛利--1400萬 純利--900萬 上年純利--2900萬

錦江國際旅館投資x80%:

總資產--18億 淨資產--17億

毛利--3200萬 純利--2800萬 上年純利--5300萬

上海錦江達華賓館:

總資產--3300萬 淨資產--2100萬

毛利--120萬 純利--120萬 上年虧損--80萬

================================

合計:

總資產--29億 淨資產--15.5億

毛利--3700萬 純利--3000萬 上年純利--6200萬

 

錦江酒店交易目標:

新亞酒店:

總資產--9100萬 淨資產--8800萬

虧損--300萬 淨損--300萬 上年虧損--250萬

新城飯店:

總資產--7200萬 淨資產--7000萬

虧損--100萬 淨損--100萬 上年虧損--80萬

海侖賓館x66.67%:

總資產--1.4億 淨資產--8500萬

毛利--400萬 純利--300萬 上年純利--2800萬

建國賓館x65%:

總資產--1.3億 淨資產--1億

毛利--600萬 純利--500萬 上年純利--2300萬

湯臣酒店x50%:

總資產--3.3億 淨資產--2.9億

毛利--1000萬 純利--1000萬 上年純利--2000萬

武漢錦江大酒店x50%:

總資產--4.5億 淨資產--5400萬

虧損--3200萬 淨損--3200萬 上年虧損--6600萬

揚子江酒店x40%:

總資產--1.5億 淨資產--1億

毛利--0萬 純利--0萬 上年純利--4500萬

溫州王朝酒店x15%:

總資產--1.6億 淨資產--8200萬

毛利--600萬 純利--500萬 上年純利--400萬

錦江德爾互動x50%:

總資產--1600萬 淨資產--100萬

毛利--40萬 純利--40萬 上年虧損--500萬

錦江管理學院:

總資產--200萬 淨欠債--600萬

虧損--100萬 淨損--100萬 上年虧損--200萬

錦江酒店管理:

總資產--2億 淨資產--1.7億

毛利--2200萬 純利--1800萬 上年純利--4300萬

================================

合計:

總資產--10.2億 淨資產--6.7億

毛利--1900萬 純利--800萬 上年純利--6500萬

(這是錦江酒店提供的上年數據,根據錦江發展提供的最新數據,各酒店除武漢錦江外的盈利明顯惡化,錦江之星210萬,旅館投
資2400萬,管理學院130萬,海侖賓館320萬,建國賓館400萬,湯臣-740萬,武漢錦江-2600萬,揚子江120萬,酒店管理1700萬)

兩者並非等價交換,但是,可以明顯看出錦江酒店用有錢賺的資產交換對方微賺甚至虧損的資產,錦江酒店係比人搵老襯的一方,如果下半年的經濟同上年一樣,錦江酒店用3000萬盈利交換800萬盈利,形成2200萬虧損,即每股0.5仙,10倍市盈率計,股價會跌5仙,同時大陸的錦江發展會賺2200萬,大陸熱熾的A股市場,30倍市盈率計,市值會多6.6億,如果錦江打算在大陸抽水,今次交易絕妙之極

但是錦江酒店係咪真係咁老襯呢?

咁又未必,按上年盈利計,錦江酒店得到6500萬,支出6200萬,即係當經濟好時,有星酒店的盈利其實很高,未來經濟好轉,業績可以強烈反彈,當然先要捱一年虧損先

係今次交易中,換出的資產係市場一致看好的廉價旅館業務,成長性似乎好高,實際上可能好快飽和都未定,亦可能真係好有前途

換入的資產中,最重要的係武漢錦江,佢先啱啱開張,建設費未回本,又撞啱金融海嘯,蝕到喊,上年未開張蝕6600萬建設費同利息,今年開張,入坐率先3成半,蝕3200萬建設費同利息,總之對整體業績有明顯影響,現家錦江的交易就係將佢攬上身,好似咁既虧損酒店仲有幾間,下半年業績會超難睇,但是,虧損酒店只是短期現象,現家錦江走香格理拉路線,酒店地理位置又靚,容易加價,建設好的酒店棟係度,自然會財源滾滾,前途未必會比廉價旅館差,而且換入的酒店管理都係優質資產

結果交易後,錦江發展得到市場一致看好的業務(長遠盈利可能較低,競爭亦大),最近盈利也能上升,成為基金熱炒的股票,以供潛在的二次集資,股票變成具廉價酒店特色的扮成長股,錦江酒店就得到長遠穩定的收入(短期蝕到扒街),股票亦變為具有高級酒店特色的扮公用股,各取所需

由於下半年業績會走樣,業績分析就簡單帶過算數

持有的長江證券市值上升了10億,上半年派息1000萬,而一般股票中期息都會少於末期息的

半年業務現金流仍有1.5億

和平飯店年尾開張

武漢錦江蝕少左

趁酒店拍烏蠅,各地酒店乘機進行改修,支出上升

上海入住率4成半,房價跌1成半

肯德基業績微跌

財政狀況良好,仲係淨現金

工商建設中銀的業績比較

工商的業績微升,建設的業績微跌,看似工商優於建設,現在比較同分析一下

中銀業績出埋,加返上去

(億)                   工商         建設        中銀

純利                   667          558           434

每股盈利(半年)  0.2         0.24         0.16

淨資產             6136        5045         4708

每股淨資產      1.84         2.17          1.85

市值()17700133009700股價($)17700133009700股價($)              5.29         5.91          3.81

市盈率                 12            11             11

市賬率                2.5          2.4             1.8

上次果篇有誤算,冇考慮到市值同股價係港紙,其他數字係人民幣,今次修正返

現在這個數字說明3隻野股價都唔算好貴,但我們有理由相信工行可以每年12%,建行中行可以有11%的速度成長,前兩者市盈率低市賬率高,說明兩銀行的資產盈利效率明顯高於中行

                            工商                   建設                  中銀

每股盈利         0.19->0.2         0.25->0.24        0.17->0.16

每股淨資產       1.8->1.84            2->2.17        1.83->1.85

工行的盈利上升,市場認為它必然比盈利下跌的建行為佳,當然這是市盈率的理論,但是建行的資產增加得比工行多得多,可以非常肯定的講句,建行的表現遠優於工行

市場點解要放出相反的論點?散戶賣建行買工行時,自然有人做相反動作

中行每股淨資產微升0.2,比工行仲差

任何時候銀行的盈利數字都是銀行自己隨口up,外人無從考証,雖然資產數字都隨口up,但自由度會較低,經濟保守的銀行,多數揸債券等進行安全套息,資產數字應比盈利實在

現在再進行質量分析(這部分是重點)

(億)                    工商                     建設                         中銀

                        09        08                  09       08                     09       08

客戶存款 95331   82334+16%  76100  63759+19%  62528  51021 +23%

客戶貸款 54364   45720+19%  44092  36836+20%  42058  31897 +32%

貸存比率    57%     56%                  58%    58%           67%    63%

淨息差        2.13     2.88                   2.36     3.16             1.93    2.55

可以看得出,工建銀行的貸存比率是相近的,但息差相差好大,工商在存款未增加前,仍大力貸款,而且是以很低的利息借出,谷盈利的意圖非常明顯,而建行每借出一蚊貸款,背後都有相同比例的存款存入,代表銀行經營穩定,息差比工行高,証明建行有嚴選貸款對象,中行同工行有同樣現象,問題係中行貸得更誇張,而且貸存比率高達67%,由於香港中銀的貸存比率是58%,因此大陸部分的貸存比率實際上不比招商低,非常危險,雖然中行新增的貸款很多數是針對國企,但國企貸款是不是不良由阿爺說了算,實際上唔準時還,還住借據先,都唔計入不良貸款,加上可能爆炸的樓按,貸存比率高會好唔掂

請容我在此加上一個溫馨的小插曲,最近爆煲的展鴻控股(572),即係中國包裝,佢有好多錢係同中銀某支行的經理借的,要重點講一次,係同中銀的某支行的經理借的,是以支行經理名義而非中銀支行的名義,大家知乜意思啦,展鴻爆煲的原因似乎係假現金,展鴻的鰻魚大佬都出同樣問題,因此我蝕到阿媽都唔認得

http://www.hkexnews.hk/listedco/listconews/sehk/20090430/LTN20090430651_C.pdf

基本上銀行的撥備額是隨意的,冇乜觀察價值,但是只要平時小心慬慎,就可以避免很多麻煩,建行有個呢個步驟,最低的不良貸款率証明了呢點

(億)                      工商                           建設                           中銀

                       09          08                   09        08                   09        08

淨利息         1160     1318              1025     1111                747      815

手續費           277       245                234       202                230      224

可以看到建行的淨利息收入跌幅比工行少,相反工行的手續費收入升幅比建行大,現在出現一個問題,賺一蚊的利息比一蚊的手續費,邊個更好?

我認為賺利息遠比賺手續費重要,原因很簡單,貸款是有年期的,利息長賺長有,而手續費往往是一次性的,況且我比銀行收利息,個心可能冇乜野,但我比銀行收手續費,我實咒死佢

所以我一向對以收手續費為主的招商銀行評價很低

講返中行,佢如此強力的加大貸款力度,淨利息降速先勉強比工行慢,建行輕鬆放貸,淨利息只少8%,由於加大貸款力度,客戶數目理應更多,但手續費冇增加,捉到鹿唔識脫角

工行同中行有交數的嫌疑,中行可以說成做數添

我持有的是中行而非建行,非常遺憾

中行本來可能從外國經濟復甦得益,問題係佢貸存比率太高,冇餘力捕捉機會

說了咁多,中行係三間之中最差的銀行,但佢有個決定性的優勢--平

原本我對中銀,工商同建設的估價分別為3.67,4.1同4.52,現在資產淨值改變,現修改為3.71,4.2同4.9,已在試算表中更新

好似1月尾,中銀股價2.07,而工商3.35,建設3.85,中銀"平"的優勢對工商30%,對建設35%,所以近期的股價表現先遠超工建,以現價來說,中銀"平"的優勢仲有20%,己經追落後成10%,人人都知中銀垃圾,但又唔知比左個垃圾不如的估價啫,仲有20%追落後的能力,問題係中銀應唔應該買,答案係唔應該,因為大陸中銀的處境其實非常危險,貸存比率勁高,樓市又海綿咁,可能成為阿爺近期的一大負擔,其於君子不立危牆之下的原則,再抵都唔買

雖然話危牆,中銀有阿爺照住又唔會衰到執粒嘅,最多打腫

咁其他兩件?算抵買,但回報唔會太高,比起其他

不過幾十年嘅話邊買間都冇問題

睇過中銀業績,我好失望,而我打算將中銀的實貨存返入銀行換馬