2016年結

由於CASHMAIN已經不存在,因此味皇冇辦法得知今年的回報率,估計在4-7%之間,比起冇升跌的恆指都叫跑係前面

新增資金82000左右,最終味皇職業生涯入面投入的股本為337萬(職業生涯大約127個月),估計190萬來自儲蓄,其他來自租金同賣樓

現家手頭股票市值440萬,20隻股,現家唔寫低下年冇CASHMAIN就計唔到數了,當中2/3的收入來自大陸,年初軟妹幣匯率是83,而現家係90,貶左8%,最終將令派息減少,全年收取股息242000,奧普私有化影響重大,達不到30萬息的目標,下年由於有番太古頂奧普個位,但是軟妹越來越軟,因此下年派息目標保守的設定在28萬好了

買入21次,當中8次是換馬,有2次是奧普私有化逼住換的,即係買入13次,其中2次係買金沙作紀念之用的,賣出10次,當中6次是換馬,即係賣出4次,新增投入在7月為止,之後味皇已開始抽取生活費了,去左3次旅行,為期一個月多D

本年的策略是,增持看好的股,REIT維持不動,軟妹幣貶值加速後改為增加反匯率股票的比例

其他資產有租金半減的大陸舖,兩層唔值錢的日本樓,已賣的唐樓,住緊的自住樓,少量現金

今年的重大里程碑是,5月味皇終於成了廢人,其他的主要劇情是奧普私有化,大陸舖位減租,賣出樓C,今年或下年本來有個買入日本樓劇情的,但因湯兄觸發特殊劇情,層日本樓已經借左比湯兄了

下年策略是:

增持反匯率股票,增持公用類股票,假如有錢的話

賣出樓C的錢換成:1.比樓C更細更平的樓,2.在可接受範圍內換成連天台屋,3.因冇糧單而借不到錢就換成置富同太古

考慮買多層日本樓,假如當湯兄衰左的話

對下年前景,由於當選總統的係當奴侵,味皇估唔到佢下一步想點,唯有隨機應變,因為美元相對於全世界升值,因此本地的地產項目買方利用價值低下,大陸樓相對於人工同就業率升值,因此大陸的地產項目同銀行買方利用價值低下,因為PH2.5相對於肺活量升值,主要係因為咁而大停工,因此大陸的耐用型消費品原料包裝品會加價,銀行債轉股,有人冇工開,用電量減少,舉個例子,大陸的車廠因為大陸鋼鐵廠停工,因此佢都要停,如果入口鋼材又貴,就算鋼鐵廠遲下復工,全世界的鐵價都升了,因此大陸車廠皮是一定收的,呢個時候有利用價值的是,外國收租項目,本地公用項目,本地食落肚項目,大陸賣樓項目,中國撿紙皮項目

華人世界範圍的地產有一點要留意的是,佢地租金普遍都只有3厘以下,同時客氣咁講叫租金提升的趨勢不明顯,相信是現時資金利用的渠道相當有限,出到用球員黎走資我諗應該都冇乜招可以再出了,相對地,美國似加息,而且可能兼埋加租,因此可以的話,降低在華人世界範圍持有的地產佔比例會較妥當(但不是0)

美國稱講會變返工業大國,實際在美元升值人工上升的情況下,變消費大國似D

組合換馬

旅行完返黎以1.21出清天津港,3.84-3.85換入青島港,天津港欠債比較多,當中有1/3係港幣貸款,相對地青島港全身現金,在人民幣貶值兼毒氣籠罩下,青島港的派息表現應該會比津港好少少

0.36出清小南國,28.3換入大塊木,小南國比起味皇買時跌左1成,但大塊木跌就左兩成,由於人民幣貶值,來貨平左而售價不變,大塊木的毛利率會提高,而且大塊木手持兼有大量港銖流入,足以對抗人民貶賤,而且香港有錢派大陸冇錢派,比較之下劣食大塊木都比欠港銖的小男國好

味皇手上的資產以人民幣收入為主,坐得係呢度就好難避免,一榮未必榮,一損俱損,總不能人人大半身家買西股掛,如果人地唔高興,日日搞"萬人暢聚珠江取水口痾屎痾尿大聯歡"之類的活動助興,呢邊陸沉都似,所以走資唔好過度,但係上面腳都唔好踩咁深,古有五木水池3腳理論,腳唔跛企得穩,死你唔去就以靜制動

樓C已賣,價錢麻麻,由於味皇冇糧單,之後能否換過間成疑,如果換唔成都係買778算,8008由於己高升車尾都見唔到,因此大跌的1883也可以納入考慮,但1883因為減網費,今明兩年的盈利會比現家少,而且會少幾多下,另一間電訊公司廢的,到現家都D線都未舖到黎味皇住果區

旅行廣島機場出入,去左尾道>福山>岡山>津山>出雲>米子>鳥取>姬路>神戶,8日時間唔夠,下次去要預多幾日先得,去到先發現網卡上唔到網,好多酒店冇WIFI係大問題,8日旅行用左6000蚊

周黑鴨1458

脷伸:味皇星期5係7蚊買左6000股

鴨上年賺6億幾,市值170億PE30咁滯,點睇都唔平,不過係味皇眼中姑且視作PE15好了,不過新股信唔信得過呢....

而味皇買周黑鴨的原因,純粹係買佢的特性

佢賣的產品係咸鴨--的下欄,成本幾乎係0,如果唔係有耕開人爭根本係當垃圾倒,相信佔產品主要成本的不是鴨本身,而是包裝盒

牌子根本不重要,最重要係唔難食,食得落肚,食唔死人,咁多山寨的話應該唔會難食得去邊,呢D野放左止痾藥直頭可以代替保濟丸,食用價值同藥用價值滿點,仲可以增加便秘相關行業的市道,排便時間長~~排便量~少~~便秘,經常便秘,請服香單清

要沽空佢賺錢好簡單,沽空左股票之後搵香港傳媒大肆講解下鄰國水客走落黎的腸仔之類加入的亞硝酸鹽對人體的益處,然後拍一拍山寨店的東西咁上下就得

周黑鴨的咸鴨因為成份問題賣唔到比德國的燒酒佬,國際化就比較難了,如果改行生產辣條,因為成份少一D,咁就可以運出國境

個名都已經叫黑鴨,點解仲一定要D鴨顏色偏紅?全黑都冇乜所謂啫,反正都是黑暗料理,少D成份就少一分成本

講返股票本身.佢有好幾種相當有特色的特性:

1.成本奇低--即係回本期快,佢招股書咁話,開店成本10萬,2-6個月回本,即係話佢開間新舖,幾個月內毒殺一批人後,拍拍屁股沒有損失,毒佢地唔死,幾個月後就係白賺班道友的,比起賣白粉或白粉報,原來做鴨仲好賺,2-6個月淨賺10萬,即一年淨賺20-60萬,如果佢集脂10億,就可以開1000間,當500間好快死,咁就有500間繼續刮民脂,500間排隊重開,不斷復活下,1000間是遲早問題,假設養得熟的概率係40%,4個月回本期,執粒前至少回到本,10億本金,中間賺的唔計,4個月後400間賺,8個月後600間賺,1年後760間賺,下年業績起碼多賺3億

2.零資金需要--假設佢在守業的狀態下,佢手上的存貨少兼唔值錢,補貨超平,持續正現金流,檔口亦唔需要裝修升CUP,服務員都冇必要用到食鴨西施,賺到的錢會點處置?浪費,淘空,派息都有機會,周黑鴨整體是在擴展階段,但分店本身並非全部都要升級,好多都是淨輸出的,同上,當一間店賺40萬,1000間賺4億,新開200間用2億,咁佢可以不動用儲備開多2成店同時又有2億用唔著的資金,以這例子來說,佢可以用盈利新開4成數量的店,超過這數量先要用到其他的資金來源,因此佢到瓶頸前是成長股,到瓶頸是高息股

3.地圖炮--佢有網店,銷量超級猖狂,線上銷售好代表乜呢?代表打死實體店,打死自己的實體店,附帶的,會打死埋自己的加盟店,打死埋對手的加盟店,打死埋對手的實體店,打死埋山寨的實體店,出拳打自已的臉,你臉雖然腫左,但你的體重沒有因而上升或下降,營養學上你同樣是等值的蛋白質,你出拳把別人往死裡打,但自己一般都唔會打死自己,店面賺少左網店賺多左,反正凡事差不多就好了,何必太認真呢,中國人有跟尾狗,人云亦云,人有我有,排除異已之類的生活習性,有人排隊圍觀的地方自然會痴埋去,多人用的就用埋一份,網店多人買開其他人又跟住買,現家網店有獨大的成份,別人都不用做了,周黑鴨又冇加盟店,完全是自損3百,人損3千的打法,打死自己店最多蝕D租,如果乘機裁員除苯有精,佢又冇加盟店,唔會有可憐的小老闆比總公司頂死左去門市自焚

4.非地域性--但佢現家係地域性的,非地域性需要在網店佔比例大更時,快遞的運輸距離應該會跨越多幾個省,包裹密封冇人知的情況下,仲可能流出國外添,當佢在不同地點開臘鴨工場後,運輸點就多左,可以用到美團外賣之類的快遞以外方式,主要是送貨還可以外判唔駛自己郁手送慢左仲有得賴

另外對山寨的方面,網店仲有個好處,如果將人分成4類,先食過實體店後食過網店,先食網店後食實體店,先食山寨後食網店,先食網店後食過山寨,1同2會繼續食,3同4會食到唔同未而知道是山寨,3因為山寨有可能都好食而有50%機會繼續食山寨,4會有"假"的先入為主心態而非針對味道作公正評價,無論山寨乜味都唔會買返山寨,因此幫襯過網店的人最終會有87.5%機會轉向周黑鴨,周黑鴨D野已經好很貴,幫襯得佢網店的人斷估唔會因為貪平而買山寨掛

周黑鴨冇負債,現金唔係上市前狂派息的話,現金是猛增的,周黑鴨雖然增長快,但現金都係用唔切,因此味皇判斷佢派息比率不會低,佢冇必要上市,自然增長都可以好快,今次上市除左人有我有人上我上心態外,估計佢想同絕味鴨頸果D進行決戰,搞佔有率競賽

上年賺6億幾,集到廿幾億一半用黎開舖,用1的例子咁計,開得一年半載盈利可以多6億,最頂果句PE15,係用集資金額20%回報率,加埋本身盈利推算的,PB的話,有哪隻賣白粉是睇PB的

而用曬筆上市錢後,可以增加1200間舖,連同本身有2000間,增加3倍,盈利例如去到11億咁,之後增長速度就會降為1100間以內,派一半息就降為550間,增長下降到時PE就會下降形成出售時機

簡而言之,味皇是以賣出為前提買入周黑鴨的,始終係會爆炸的強國食品,會唔會又長揸N年不得而知

味皇反而擔心鴨供應量遲早會不足,比人搶貴曬,下欄當上菜

*拱北的全部都係山寨