今日落雨,陰陰濕濕,味皇如常返工,不過平時返工是揮舞電鋸的心情,而今日則想拿起砂輪
見落雨於是提早出門口,去到架公司巴晨早滿坐,司機回眸一笑,味皇唯有轉移陣地,行左幾條街去到另一個公司巴上落點,等待味皇的仍是司機的笑容,今日賭場的工作量又特別多,因為公眾假期兼連住星期六日,驚覺失策的味皇立即走去請定端午節的大假,今日的工作量足夠做到喊,一殼眼淚的味皇捱完8個鐘後,搭公司巴返屋企,司機竟向味皇三笑留情,我想此時拿著把縮骨摭,唔駛槍頭也能捅得死人
雖然今個月人工加左幾百,但加人工不是提高員工滿意度同工作態度的萬能藥,人工極低時,加人工是很有效,但人工到一定水平再加不不會有大效果,要提高員工滿意度同工作態度的最有效方法是減少工作量,想像一下一間衫鋪,當生意好人山人海時,職員做到唔停手,劉華話咁嘅態度是採你都有味的,相反成日都冇單生意,突然有個人走入黎未開口講借廁所,d職員都會烚熟狗頭咁圍曬埋黎,尿都縮返轉頭,所以說創造一個放鬆的工作環境比出高價請死士更為適當
黎我公司度賭錢的鬼佬,幾乎全部都不滿我地d服務態度,號稱世界第一的賭場,員工卻沒有資格在美國派牌,不過澳門的賭場本來就不是服務鬼佬的,佢地冇發覺自己入錯左戰場
另外賭場最近出現津巴布韋的1000同500蚊紙(以為上面再印中國銀行同匯豐銀行d宇樣就陰到人?),話說津巴布韋的紙幣面值一度低於同面積的廁紙,於是d人就用銀紙黎敏屎,於是津巴布韋政府去出新聞話用銀紙敏屎是犯法的云云
澳門通漲未有咁誇張,都逼到吹水安再派3000蚊,有錢收味皇自然歡迎,但今次又派返就以後想停都停唔到,政府作了個愚策,另外政府話買賣住宅要比20%印花稅,呢招超必足夠秒殺所有地產代理,無雙狀態下的政府能夠推低樓價呢,至少短地內自己都炒埋一份的地產代理會急住出貨,其他的賣家會冇人理,起碼唔會升住先,雖然XX佢地都是地產商,但佢地d樓盤都賣曬,政策出台的時機亦算適當,由於印花稅是針對樓宇的,炒家大可以轉炒車位之類,因此今次的政策有都效都好,都算是一種積極的政治表態
味皇換樓的計劃受到挫折,由於2年內買賣要比2成印花稅,因此唔可以換得太密,要一擊即中,而且要確保加息期呢兩年的財政安全性,因此我想減債會較為優先,另外個租客話唔租搬去第二區喎,味皇的暫時收入減少一些
以前玩足球經理(CM4),雖然是玩英超,但都有試過買香港腳黎收藏,當時買過李建和,歐偉倫同蔣世豪,現家得返兩個人仲係度,係香港踢波搵唔到食,如果美斯生在香港也只會是廢青一名,運動員的職業生命很短暫,其他職業也有各自的職業生命期限,就業你唔認老,有能力做,社會也會逼你退出,當你做量地官時,發現自己青春不再,又不能轉型,如果自己冇作事前準備,消防員會同你準備
有人由球員轉型開酒吧,有意識是好,但風險太大,其風險在於酒吧是開左之後等客到,而不是預定有客先去開酒吧,好多人自己做生意例如開餐廳都係咁,成功率似乎太低,青春只得一次,基本上要一次過就要成功,另外好似味皇一類唔開口又缺乏行動力的人似乎唔係太適合創業,係呢點上,比起自己創造一間成功的公司,去購買成功的公司的股票似乎成功率更高,而且比起需要聰明才智的方法,用持之以恆的方法更為簡單
好似味皇自己冇開鋪頭,但每個月儲少少股票,以股權黎計已經養緊幾個員工,佢地唔餓死味皇也不會冇飯食
