美蘭機場取消機場征費

脷伸,味皇由2011年持有美蘭至今,持有時間僅次於奧普

早兩日美蘭公告話,大陸忽然話今年要取消機場征費--比機場自己袋的政策,美蘭話包括首都機場等3間上市公司會有影響,美蘭一間,694一間,剩低間估計係白雲機場,佢話"等"機場,咁也有可能包括其他上市非上市機場,甚至全國所有有機場征費的機場,而機場征費佔美蘭營業額18%

味皇不清楚機場征費呢D白收的收入會唔會產生成本,假設最大100%係現兜兜好了,咁直接扣除後美蘭上年純利賺4.8億會扣剩得2.2億

問:2017年美蘭航空收入8.3億,機場征費佔32%,非航空收入6.4億,當中特許服務收入包括免稅店租金佔3.8億,兩者只有收入數字,純利唔知,求航空唔航空的純利數字:]

免稅店係美蘭2011年先開始的業務,咁2011年前呢個數字會係0

2010年航空收入3.2億,機場征費都係佔32%,非航空收入1.6億,當中冇免稅店租金,特許服務收入5500萬,最終當年毛利3億,扣左利息之類後純利2.4億,毛利率63%

2008年航空收入2.9億,機場征費都係佔33%,非航空收入1億,特許服務收入3500萬,最終當年毛利2.4億,扣左利息之類後純利1.9億,毛利率62%

兩年水平相近,如果用此毛利率反向剔除特許服務收入的話,2010美蘭機場唔計特許服務收入,營業額4.25億毛利2.7咁樣

因此2017美蘭機場水平一向的話,佢唔計特許服務收入,營業額11億毛利6.8億,至於純利,近年美蘭欠咁多債還利息所以冇可能有5.5億純利咁,而當年味皇買入時是基本無負債,好了,姑且各自都用62%計,得出航空收入毛利5.1億,非航空收入毛利4億,比例56/44

如果扣左機場征費,航空收入得返毛利2.5億,如果1.2億利息支出中56%歸機場,扣左得返1.8億,味皇覺得機場會冇賺頭,唔想投資建跑道

2010年機場征費佔美蘭收入21%,2008年24%,現家有免稅店後佔18%,要追返2.6億的純利,美蘭的收入要增加5.2億以上,或35%以上,只要機場面積增加35%的話...

2017年首都機場航空收入51億,機場征費佔19%,非航空收入45億,當中特許服務收入包括免稅店租金佔31億,機場征費佔總收入的13%,影響度來說首都機場較低

講返歷史,2009年時美蘭話機場征費2010年尾會停,到2011年美蘭話機場征費又比佢續返到2015年尾先停,至2016年美蘭話機場征費又比佢續返到2020年尾先停,舉例的話,就係過海隧道到期政府話將會收返停止收費,然後轉頭又判返比佢繼續收費,連續向市民反口3次咁樣,假如反口的概率係50%的話,2020年反口又比美蘭話繼續征費有一半機會,不過現家政府又反口話不要2020年了,今年就停,但這不影響今年政府又反口比佢繼續征或變相征的概率仲係50%,不過經常反口也有好處的,反口的人每次反口都有人主動請飲茶食飯叫雞

現在在說,政府收機場費,轉頭磅水比機場,咁樣唔知算唔算叫市場經濟,但政府唔插手,就實係市場經濟,深色社會經濟,功能組別經濟,大拳頭經濟,有相有量經濟,三不管經濟,政府唔會埋機場自己點收費,推行可加可減唔好煩我政策,例如對於收開100蚊機場稅的機場,乘客買1000蚊票比1100蚊,機場稅取消,乘客以後可能只用比1000蚊,也有可能收機場建設費繼續1100蚊,也有可能收機場建設費加服務費1100蚊以上,各自都有1/3機會,但味皇做咁耐人冇乜點見過減價的概率被觸發,非洲人面黑掛

好似起好港珠澳大橋有直通車,以為車冇夜航呢樣野就可以逼夜船取消夜航費廿幾蚊,最後居然係直通車收夜航費加價廿幾蚊黎就船公司,三不管就係咁

能唔能夠老屈乘客,關鍵在於店大欺客還是客大欺店,只要是機場夠本錢老屈,唔用就過主唔志在咁,政府唔插手機場就會自行劏豬,政府插手的話最多咪係維持現狀冇事發生,機場最多都係蝕一D禮品費啫,首都機場同美蘭機場有冇本事叫人唔用就過主就自己諗了

乘客可能因為些少價錢真係過主,例如味皇咁,但貨運就不會了,貴一貴都會照用,反正成本可以轉嫁

講返美蘭機場隻股,佢借大錢的建設,基本已經完工,以後就開始收成皮了,固定資產達到最高,而負債開始下降,2017年比2016年都還左9億,唔發新股唔偷唔搶24億債幾年現金流仲清唔到?兩條天橋的錢啫

題外話,海南西部打算起個規劃面積2.2平方公里的儋州機場,打算1年完工,預算係一條天橋,可以有幾咁豆腐渣呢?

*返睇年報,係基本已經完工,但新機場要2020年先驗收,新機場造價5條天橋,無論美蘭揹一半定揹曬,都相當艱苦,但到2020年前美蘭應該儲了不少錢同增加了比較多的盈利,為左揹數,佢有動機返A股上市度水,因此可能谷17,18,19呢三年的數扮增長率黎博高PE

增持美蘭

今日7.8買入8000股美蘭機場,6.38買入9000股周黑鴨,兩隻都係近期低位

GE比道指剔出成份股,股市升左咁多,依然有被認為落後時代的股票,以為得香港有,原來老美都有,不過投資人能否係股票市場獲利,同新唔新潮並無關係,係同人投資的人先需要走在時代尖端

所以說要買股的話,可選擇的股票仲有大把

美蘭因為早排出公告話大陸停止補貼機場征費,所以股價大跌,詳細之後另外出文講,而周黑鴨創52週新低而手上持股得幾萬蚊,所以加到齊頭10萬的份量

另外調左兩萬人仔存係微信的理財通,之前試個存5000入去,日息5毛,提取都正常,於是存多少少入去,安全性就當佢一D都唔安全好了,大陸政府幾時改政策唔比你提甚至直接充公也是一句的事,就作為活期閒置的分散項目好了,2萬每日2蚊可以買扎蕃薯葉或者8兩薯仔

最近終於沏左部HTPC,160W大細21X25X8,ryzen2200G/B350GTN/samsung4G 2400X2/intel M.2 SSD180G,總共2100人仔左右,效果滿意,係SSD速度相對比較垃圾,只係貪佢容量比較大,因性能夠用,所以降頻降壓使用

默電超頻3.9G/1500MHZ   DDR3333+0.102V  功率峰值96W 擼大師CPU57000 GPU48000

現家用緊3.2G/800MHZ-0.255V  DDR3200+0.064V 功率峰值63W  擼大師CPU50000 GPU31000

條DDR係三星普條,冇夾散熱片冇光污染一D都唔新潮的相對下價野,但居然可以超到3333,而且電壓唔高,可能仲可以超高D,不過就唔博了,已經比貴成百的馬甲光污染條仲好,關鍵係RAM的晶片粒,晶片質量同包裝同價錢關係不是絕對的,同買股票一樣,世界性能最好的晶片粒係三星生產的b-die粒,所以買三星的普通綠條比其他牌子夾左散熱片乜都睇唔到的更好的機會並不低

上個月學車肥左,下個月又考過

球會經營－方丈篇

有錢係咪大曬?

抱歉,有錢真的能為所欲為的

假設有一間公司,間野大把錢,公司不是方丈的,但方丈有實權,方丈如向將自身利益最大化呢?

首先要有獨立第三方,點樣的獨立第三方呢,就好似阿B哥哥破產時會請佢飲茶比錢佢搭的士借同一條褲比佢著而褲袋入面漏左錢的人士之類的就是獨立第三方,下面簡化叫3好了

方丈指示公司向3買樓或經3介紹買樓,讓公司的賺比3賺走,公司盈利可能下降可能上升,上升時就嗌加薪,無論上升定下降,再讓公司借錢銀行向3或經3介紹再買樓,直到公司借唔到錢為止,之後方丈就拍拍籮柚走人

香港特產的情況下一般公司是方丈的,方丈可以一邊收高薪,一邊親自或指示下人向3買野,買完再向另一個3借錢買3的野,3不止一個的,正如B哥哥大把朋友,買到公司窮就供股一供多再合一,或大折讓發新股再合一,如供股要錢的話就向3借,如大折讓發新股就叫3認購,收集到的錢就還比另一個3,方丈自己就退下來做3的角色,3就上馬轉做方丈的角色

高緯度地區走資派的情況下一般公司不是方丈的,但方丈有實權,方丈用公司錢同借銀行錢球其搵D野買,乜野都得,買藝術品,買香港特產,買人口,總之要符合兩點,1-價錢隨意開,2-必須經3中介,這樣3每次交易都可以收取N成的佣金,如果當中有部分下落不明,例如交易時3出錢招待方丈時的酒店房發現德川的埋藏金之類的...之後方丈移民出國就可以了

這就是技安如何把別人的東西成為他的東西,他的東西還是他的東西的技法了

最近幾年,販賣人口的通脹非常嚴重,買賣價錢,合約總值,簽字費這三樣都上升到匪夷所思的地步,一部分經紀富起來同把同行合併吸收,計帶公關公司和記者都生活好了,早兩年,有名的水魚用左1億英鎊買入一個勞工,據說而因此支付4100萬鎊的佣金,這一行通常唔會點影響到市民的生活,所以政府先唔會去理佢地收幾多佣金,如果係地產呢D影響民生的項目政府就會管了,所以抽象的項目比較能養更多人

根據小報報導,小國球星普渡司機的說法,去贏國踢波聽起來好像可以搵很多錢,但真正能到手的不多,一入會議室就見到居然有9個經紀坐在著,說著PY交易的事,司機膽子小,最後去了老倭踢波,結果嬴國成了最大的羸家,可以暫時不用出現貿易逆差

咁平時3是點樣工作的呢,主要是招待雙方的的方丈,包佢地會面其間的飲食同酒店,贈送小禮品,招待記者爆料比佢地,又贈送小禮品,招待公關同估值師研究估值水平,又贈送小禮品,招待律師同會計師研究現金處理,又贈送小禮品,咁上下

唔信的話,你睇下呢廿年粉末報同水果報的細格講股佬,佢地推介的係乜卵野股

所以方丈每比人炒一次,生活水平都會有所提高,我要用幾多錢買呢個,下年我要用幾多錢買呢個黎激活上一個,再下年話全部都係鬼要用幾多錢換過曬全部咁

球會經營－球玉篇

今次講一講轉移定價呢招,商業上能用的呢招,可以操作到大部分投資人的精神,同樣道理,在充滿銅臭的球圈,也可以操作到大部分球迷的精神

唔計龍門,其他10人假定為實力相等,不去考慮後防冇出鏡率唔值錢呢點,假定埋身價均為1000萬,每人下來都有1球入球

現在進行轉移定價黎轉移入球,其他9個人有得射唔射,傳曬比其中一個人射,變成1人10入球其他9人0入球,某人變成天皇巨星超人

這對球會同商業世界很有好處,前者10人合共身價1億,後者9人可能跌價到9000萬,但有1人升值到2000萬,合計就有1.1億,股票唔理佢質量係點,越出彩吹得越大成交越高,佢股票就會不自然地高,同樣盈利同樣質量的股票成交量不同,股價同產生的佣金可以天同地比,寫老千股可以養到千萬財演,冇成交的股那怕1個財演都養唔到

廣告收益以外,球會可以聲稱其他9人係豬隊友,豬隊友自覺冇表現的話,續約時會收較低的糧,比較低聲下氣之類的,實際上就算射術好似韋碧克,只要比足夠的空門同12碼佢一樣可以做到金靴,而炒買的價值不是線性關係,只要乎合公眾的審美角度的外觀又沒有顯性暗病,炒上去事半功倍,比如一季入10球的外國球員值1000萬,同樣的10球本土球員1500萬,讓外國球員都單刀橫傳,佢身價不會跌到0,但本土球員射術不精只能夠食一半餅變15球,可以賣2500萬以上,賣左佢等於賣兩個人的錢,再買返一個1500萬的就可以白賺1000萬以上,而2500萬產生的佣金,可以養活更多的獨立第三方同刺激經濟,經濟好時會發生乜事呢?通貨膨脹,交易活躍,媒體日日都有野講,酒樓食飯飲酒不絕,交朋結友送禮成風

實際上以拿卡錫迪為例,如果佢不射果10球12碼,佢就不會攞到法甲銀靴,賣唔到咁貴,人工冇咁高,連有冇人買都未必知,對本人同本身球會來說呢招都是利大於敝,要人單刀橫傳或者比較難開口,但邊個射12碼就是教練或贊助商一句的事,這完全不影響其本身具有的實力,但人類就是犯賤,只見出頭鳥不見龜頭烏

有邊D人適合轉移定價呢?首先唔可以係非洲人亞洲人之類,唔係歧視佢地,而係冇歐盟簽證,潛在買家少註定少成交,之後要乎合公眾的審美眼光,廣告價值係球員的主要市場價值,如果懷仔唔係死肥仔而係小草佢仲會咁橙?跟住要比較好波,護球像亨利的轉移左比佢射曬上天都冇用,再之後就唔可以係毒撚,最好係MK仔,可以提高曝光率配合宣傳,捧紅呂方係地獄難度但只掉白色裝備,捧紅謝檸檬則係普通難度跌暗金裝備咁解

只要有足夠的資源比公關,無論鼻子還是包子一樣可以洗成白蓮花,反正我們已經見過不少沒有業績支持的股王

簡化來看,只用3個球員,每人皆能入15球,唔考慮助攻,各種市價

            A        B        C              A        B          C                A       B      C

入球    15       15       15            5        30        10               5       35      5

身價   3000  3000   3000        2000  5500    2500           2000  6500 2000

合計        9000                              10000                                 10500   

如果你係存心想賣人的,集中力量做一個明星球員,賣左佢就可以換7龍珠,股票的情況就是上市前的各種會計手法,如果想補強球會實力,有意圖地增加幾個球員的名氣,賣又得,比球迷痴下優越感又得,股票的情況係考慮分拆子公司時轉其他子公司的資源過去,另一個好處係同犧牲品續約時,話佢屎波人工續平D,股票的情況係抽左水的子公司私有化,至於分散比向球員自由發揮,係球員球穩定的時候用的,而且上天係唔公平的,一塊綠葉吸走其他綠葉的營養可以當菜賣,一朵菊花吸走其他綠菜的營養可以當周圍擺展覽,普通球員吸精能升級成大菜球員,明星球員吸精能升級菊花球王,這樣會比普通球員增值更多,6500萬也可賣9000萬

另一個例子,一間供應商同一間餐廳,各自盈利都是10,用PE10上市兩間都是賣100,合共200,現在只要供應商用半價賣成年存貨比餐廳,盈利各自變成1同19,餐廳就可以以190上市出售,等上市後餐廳用返兩倍價向供應商入貨,到時輪到供應商以190上市,合共380,GDP同佣金接近兩倍,如果供應商同餐廳都是不太吸引眼球的行業PE不高,咁用經紀業務公關業務之類上市,夠神秘夠想像空間,PE會比實業更高

現家考慮埋助攻,有助攻的球員就算少左個入球也不至於趺價,收到助攻獎金而失去入球獎金球員自己也不會覺得有問題,這令到轉移定價有更大的利益空間,還有這商業性的諗法是鼓勵插水的,入球只會刷一個入球,而現時的球例下,插水自己射返可以刷一個入球加一個助攻,數據多一倍身價升值更高,其他人插水也有助攻獎金,反正現家大部分人只講輸贏不講道德,正合何車,正如賣倫敦金賣礦又點,總之發左達佢就係正義

唔知由幾時開始,睇波唔係睇球技睇表演睇心跳,變左睇數據睇傳媒睇公關

上市前的公司舉個例子,例如出版公司,可以同廣告商講好,上市前賒幾年的廣告費,將未來錢轉到上市前,咁上市前盈利就會高股價就高,上市後盈利跌,例如食品公司,可以同供稱商講好,上市前賒一堆原材料,或者上市前入平貨上市後入貴貨,同樣上市前盈利就高,之類的

球會經營－爺爺篇

萬里長城永不倒

跟住轉頭就倒了，唔係老化風化倒，係贏國村民拆磚倒的，也許爺爺是我們心中的不倒長城，但有形的物體最終都會倒下，死於自身，永遠懷念ATV....懷念爺爺先啱

天下梗共一石，爺爺獨佔八斗，教主得一斗，天下共分一斗，話爺爺一人養活左天下8成的體育記者都不足為過，反正有爺爺在就不缺題材

爺爺前期的成功，同上一手留下的老頭防線不無關係，這裡先不關注其執教成績，先關注其管理方式

爺爺不是完美的人，就如同所有未死未寫入歷史書的一人一樣有優缺點，其優點是肯相信人，相信自己，直到最後一刻，缺點也是這個，又有個優點係量入為出，缺點係太過度縮

你找到一個覺得好的球員，一上場佢就有50%機會踢得好，兩個球員，就有25%機會一齊踢得好，踢得好是來自實力而非狀態的話，實力會隨經驗值增加而上升，不太會突然下跌，所有人的人工都不高的話可以輕易賣走垃圾留下強人，汰舊換新，一隊有8個強人3個新人，新人就算50萬定500萬買回來，有其他人抆屎成績就不會太差，唔掂都可以換，但如果一隊得6個強人5個新人，你就算5個都貴買，成績的隨機性都會好大，利用這一點，以老帶新取得成長的機率都大的話，當然是用成本低的來培養，每年買大班幼幼，淘汰率是高點，但成果好的只需一兩個就可以回本

換成股票投資來說,你持有900萬收息股衣食無憂的時候,你有100萬現金,每隻經檢驗過的煙頭股每隻投10萬買10隻,當中有部分成功部分失敗,而你因為本身衣食無憂,你不會介意把向上的股票立即賣走換錢,因此可以長期持有到,這相當於有8個穩定的老隊員,你就可以玩青訓輪換練級,但如果你得500萬收息股,食你唔飽餓你唔死,你有500萬現金,你會希望投資一D回報率高,安心而又立即見效的項目,同時你賺到錢可能會經常審視新項目把原來的換走,這相當於有5個穩定的老隊員,你要買6個強力新人避免成績下滑,而你有100萬舊股900萬現金時,你會忽視舊投資,只想買到一些能一夜發達的把錢全投進去,這相當於有11個老隊員,眼光光的睇住新人收比他們全部人加起來更高的人工,一般來說,錢是自己的時候,你不會想蝕錢,但可動用資源越大,你會越進取,兼更加避免做一些特立獨行的異樣投資,味皇未見過有錢佬把大半身家買不知名的煙頭股,只有比較窮的人才會把大半身家買煙頭,味皇自己也是賣了樓後REIT做主力,其他先煙頭,那些錢不是自己的例如強績金經理,予左幾年就炒的教練,就會以佣金最大化的方針黎進行交易建倉

講講爺爺的優缺點,他不是個完美的人,是正常的人類,只是像譚玉瑛咁有點集體回憶的成份,人會比較易忘記以前的記憶而只記得最近的事,因此優點集中在十多年前的爺爺看來滿是缺點而且,我們要公平看待佢,學習其糟粕,唔係當佢糟粕,大家錯誤當佢係教練而用其他教練的做的事黎要求佢,要搞清楚,其實佢唔係教練而係經理,教練係按球隊成績收取獎金作為收入的,而爺爺是按球會盈利分取花紅的文職人員,用英文來說明,其他人係coach,爺爺係manager,立場來說他很稱職,味皇口裡雖然經常損佢,但實際上心裡對佢係比較專重的

優點:

以前買D幾萬幾十萬的球員,會親自飛去睇波,睇啱就當場講價--對項目進行親自研究而非道聽途說,價錢要合理

成績比較穩定的時期,比青訓幼幼包辦踢杯賽,聯賽也比些少機會佢地踢等佢地唔怯場,出下名--不知明的股票,只要有出名投資客買入,隻股就會好多人跟風,成交增加

買入亞洲球員騙贊助,賣球衣,唔駛球會出糧,租出去仲有錢收--經營租賃,利用別人資金買入,再租出去獲取利差

老球員不足的時候,重用青訓(已經打出黎的)--比較投資項目,覺得合適的留下

買入雲佩斯等比較平價但小有名氣的球員--不歧視小型股價值股

高價賣出安歷卡,唔貼錢買返亨利等操作--適當換馬

工資帽政策--量入為出

大鑊飯政策--不患貧而患不均,要管理好集體,一係均富,一係均貧

起球場,按揭寫明爺爺唔可以走--增加財源,又保住份工,財源增加花紅也增加,同公司共榮

球隊平均年齡細--升值潛力大的股票佔較高比例

缺點:

法明尼同A高續約時講價壓過龍--因少失大

死攬丹尼臣同阿木等球員--買了霸王雨潤等死不止蝕總想著返家鄉

攬住契仔,出面一埋險簽--留住老千股,壓縮了有限的資金空間

契仔們續約話走博加薪,次次都得逞--面對壓力容易屈服

不會提前同球員加薪續約,次次臨完約先黎續,成日比人騎返轉頭或者免費走--欠缺前瞻性,又想賺到盡

30歲一年一簽--總想著要人減薪續約,也不會提前兩年續約或提前兩年高價賣出--對處方式不靈活

有段時間球隊沒有老隊員,青訓冇可以模仿的人--忽視組合中成熟股票的存在價值

藍斯比歷連有5000萬時不賣--看見一棵樹而看不到整片森林

隊醫話球員受傷有排都唔會好,賣左轉會體檢一下就PASS,踢起黎仲生蝦咁生猛--信任可能錯誤的所謂專家

球隊長期都唔夠人踢又唔進補,又唔租人--唔會變通,股票買左就擺係度,冇套戥,短期換馬之類的想法

藍斯自動踢前鋒唔話下佢,奧燒,拿卡同羊逼踢後腰--話買收息股用收息點知係用黎炒之類錯誤用法

用閘兼職打中堅,正選一個中堅都冇,用技術型球員兼職打防中,高佬打翼矮仔頂頭鎚--同上

死用契仔,其他替補波皮都冇得掂--邊度跌低就要邊度起返身,明天會更好,唔會主動改變

成績差而高價買人--屈服於群眾壓力

買左水貨還是照用,諸多解釋,成日有野賴--不願承認錯誤

應該還有其他,暫時想到咁多,總結下爺爺係一個點樣的投資客:

爺爺係一個不會對原則屈服,但會屈服於壓力,投資組合具有穩定性的時候,佢可以在此基礎上做得很好,有時候有心情去搵到價值股,但投資組合具欠缺穩定性時,佢不願止蝕的毛病會被放大,可用資金變緊之餘,搵價值股的動力也會減退,對成本捉得很緊,可能是因為成本是具確定性的東西,但佢比人逼得緊時會病急亂投醫,佢有勇氣降低其望值,但比人鬧得多逼得緊也會做違心的事

至於年年賣隊長的梗,味皇覺得不是爺爺的錯,比如孫棒子可以係國家隊指指點點,但兵役下來還是要連爬帶滾的回去給連長撿番梘,主要係因為佢並不是處於食物鏈的頂層,也許我應該用大公司細公司的職位做例子,求其啦,總之爺爺隊同味皇愛隊都唔係食物鏈的頂層,不是爺爺的錯,爺爺是磨菇的

好了,這個故事教訓我們,要提高賺賺的成功率,必須先確保心靈的安寧,有壓力的情況下,好多事都做唔好,祖上闊過同現家的人無關,能放低心態拉下面皮,工作會順利得多一味鬧人最後轉會頭奶野係自己

球會經營－兵長篇

在這充滿銅臭的足球世界中，有錢佬就像沒有甚麼智能的巨人一樣，橫沖直撞，一隻手指都捽死你，普通人無可奈何

在這樣的一個世道，卻有一個矮東瓜與巨人死戰而不落下風，他禿了，但他很強大，被稱為業界經營最強生物，其戰鬥方式甚至被寫入該國槍橋大學的經濟學課本，他就是OO兵長

球會本身就是一間有限公司，如果佢有發行股票，那麼正常佢盈利的來源就是公開表演同賣食物紀念品，可是最近些年頭變了販賣人口，行家都發現比起演出，炒炒炒更能產生自身利益，於是出現惡性通脹

但兵長明白，自己是受薪的，他的收入來源來自薪金同獎金，而非佣金，他也滿足於此，同時佢亦知道，炒得起同炒唔起同貨品本身質量不是必然關係，以巨人制巨人成功率不一定比兵團高，但養一隻巨人的予算比養兵團高，又難善後，兼難以控制

用最流行的販賣人口作例子，5000萬15萬周薪的球員甲同500萬5萬周薪的球員乙相比，甲的市場價值比乙高是必然的，但甲的實力比乙高卻是概率事件，兩者都是五體齊全的地球人，肛起來誰騎在上面誰也說不準，爽過先知，但是爽完之後，越想越不對勁，想甩左佢時，甲和乙的善後的難度同回收價值完全不同

賣東西時，必須要有買家才可能有成交，甲同乙只要是智能正常的地球人，佢地絕對唔肯減人工，5000萬的甲，要賣貴就要踢得好，假設踢得好的機會是50%好了，比得起5000賣以上的買家全球可能有15個，踢得好佢地會買甚至逼你成交，但踢得唔好佢地絕對唔會買，即是得50%機會成交，踢得唔好跌到3000萬，全球比得起買家的可能有30個，但另一方面，比得起15萬人工的買家全球可能得20個，但前面15個肯定唔會買，5個同賣家同水平的點解要你的爛二手？於是踢得唔好就好大機會冇人接而無法成交，你說可以賣比剩下的10個，最多自己貼人工...這是可行的，但存在限制，只有在甲合約期內甲才肯，例如甲仲有3年15萬合約，買家能力只能出10萬，你貼5萬人工出租1年冇問題，兩年三年冇問題，但賣斷有問題，如果賣比人人地想簽4年約，你貼3年錢，第4年甲就要降薪實收10萬，甲有50%或更高的機會唔肯，如果簽3年，雖然收入不減，但會比人話係收緊10萬的球員，之後心態低左人工難開高，賴死唔走就可以話我上手都收15萬，獅子開大口，當2/3機會唔肯了，如簽3年以下的約，甲100%唔肯，3種程況各1/3，踢得唔好時，合共得28%機會賣得出，剩低72%機會佢會賴死咬到完約，雖然你可以租佢出去，另一方面，收15萬人工的5000萬大爺，你好難點得佢郁

而500萬身價5萬人工的球員，能接手的買家超過100個，踢得好100個都肯接，踢得一般可能有60個肯接，踢得唔好可能也有有20個肯接,食完鬆冇難度，下等人你可以老點佢而唔嬲，升值的話，5000萬可能升到2億，500萬也可能，但蝕的話，5000萬加人工同500萬加人工差別好大

政治的意味來說，高價的大爺係專制下的獨裁者，可能係明君，但暴君的話你冇得甩身，低價的乜水係選舉制的官員，好大機會係廢物，但飛甩佢唔係太難，做得好就升佢

股票的意味來說，炒到貴一貴的藍籌，你買佢有賺錢的機會，也有可能係老千股，正是藍籌也有老千，相反買冇成交冇街貨乜7黎未聽過的股唔一定賺唔到錢，另外如果將球員的人工支出代入為股票的派息，炒貴的股息率低(人工貴)，冇人要的股息率高(人工平)

能否賣到好球員令球員賺錢，名氣可以找到一部分，球探研究可以找到一部分，大包圍也可以找到一部分

另外仲有一點,不知名的股票比出名投資人買入,就會有人跟風而炒高,小國不知名的球員比算知名球會的佢買左,立即就入到國家隊,聯賽出一出場轉手又可以賣比人升值賺錢

而兵長的打法同出面其他人有乜唔同，主要在於工作心態，前面所題，兵長受薪的，做左好長一段時間，工作穩如泰山，長期以來工作單位的業績不太好也不太差，習慣了普普通通的日子，不需要太過追求於朝夕，而出面的人有短期的工作壓力，不太可能在工作單位獲得長期利益，因此需追求短期利益，同時盡量不犯錯，而不犯錯的最佳方法就是做所有人都做的事，因為這方式在出事時可以賴“方法冇錯，人地都係咁，我只係冇運”，這方法就是燒錢，而咁啱獲得短期利益最有效的方法，就係比獨立第三方賺錢，資本市場，你懂的，就當是平行世界好了，有人話到事就炒作買野向下炒轉移資金，有人話到事做貿易搞業績賺錢出糧，有人買熱門股，有人買煙頭股，一個市場，各自做野，井水不犯河水

兵長管理的球會係咁的，舊球場演出門票收入約7800萬，假如23人分，每人平均每周65000，多過條數就當唔安全咁，如果入圍賺錢比賽產生額外現金流，就將佢發獎金分比佢地，球會仲有其他收入，儲堆埋用作發展營運資金同其他職員人工，包括自己，球員人工佔總收入的53%，近十年有兩位數以上的球會因為超過70%而在後來破產，兵長是比較慳的，而球員人工最高10萬，一般左6萬以下，在這一行，可以比得出10萬人工的買家30個以上，踢得好可以賣左賺錢，仲好快成交，踢得一般，同聯賽都有5個肯接，踢得差先可能爛係手，至於人工6萬以下的，踢波皮都可以有成交，兵長的球會算是業界有名的基金經理，唔知乜野狗屎垃圾買返黎都可以有一家的鍍金效果，刺激成交買氣，買左完全唔理下年賣返出去有水魚比原價高接貨的案例也不少，而且兵長為左保持買家數量用左招財技，例如某球員的實力在市場上完全可以收10萬人工的，兵長比佢7萬底薪5萬出場等獎金，比夠12萬又點話，踢得好可以賣走又可以自用，踢唔好就借d倚冇出場就冇獎金出，7賣人工慳到錢又方便下家接貨，比多少少獎金黎買定保險

簡單說就是選人工低的人，低價買回來，高價時放，續約人工高到冇潛在買家前放，比人私有化時逼住放，換馬放，貶值前放，止蝕放，另外按市場定價的特性，合約短的換成合約長的(時間值)，年齡大的換成年齡小的(成熟換成長)，冇名氣的鍍個金放返出去

平時的保留盈利再投資返入固定資產，放左1億去青訓營，之後每年都賣同租幾個幼幼賺一兩千萬，8億擴建球場同設施會所增加門票數目同廣告牌面積，出租球場比欖球隊同出租設施比國家隊收租，新球場門票收入可能有1.5億，咁平均每個球員分12萬都冇問題，現家的球會能夠提高經常性收益同長期有投資收益產出的，基本上得兵長呢家

有球迷話要立即有成績，想同佢其他球會做一樣的事，之前提過，做人人都做的事一定唔會錯，不過做唔錯的事唔代表得到啱的結果，80%球迷係短視的，就同80%的人冇發達差唔多，而兵長長期四大雞胸保級隊做落黎，唔似會忽然要變風格，比起獎杯而燒錢買明星病急亂求醫，對佢來說也許買生髮水生幾條毛更為緊急

佢出名一毛不拔，事實上佢一條頭髮都冇，對經紀來說佢係最惡毒的魔鬼，經紀推銷話佢棵樹幾好幾好,係沉香係羅漢松,兵長轉頭就自己上山斬樹,但魔鬼兵長比球員獎金好疏爽，唔計佢真實目的的話，另外舊球員回來搵文職，基本都來者不拒

貴野係好野的概率不是100%，平野係流野的概率不是0%,但賺到錢對球會對自身具益處是100%，佢運作的是一個球會而不是一個球隊