REIT業績(大陸)

87001匯賢

營業額上升9%,可分派多8%,每股派息多5%至0.27人仔,資產淨值下降5%,匯賢聲稱用人民幣計價所以貶值冇影響,其實係語言偽術,若計入貶值5.8%,營業額上升3%,可分派多2%,每股派息跌1%,資產淨值下降11%,淨值下降原因是美金債升值,現時負債比率20%

物業本身,北京的商場多租3%,其間有裝修冇租收,今年就有租收,北京寫字樓多租7%,呎租維持上升,出租率高企,扮酒店住宅,出租率由87.8%上升至92.3%,升左4.5%,而租金多8%,看起來呎租冇下跌,酒店前景唔係太好(毒氣?),但酒店佔租金的比例只有6%可以忽視,重慶大廈佔租金的比例4.6%,只有10個月入賬,今年就收齊,總體有94%的物業前景向好

人民幣貶值產生4.5億的債務增加,現時欠債94億,全美債,利率2.1%,因為利率低,借人債取代美債行不通,每加息0.25厘利息支出將增2400萬,而負債比率20%,如果要收購仲有借錢空間

現價3.08,息率8.8%

1426春泉

計入貶值5.8%,營業額下降1%,可分派多9%,每股派息多1%,資產淨值下降1%,淨值下降原因是美金債升值,現時負債比率35%,可分派多9%的原因是前年有債務重組,現家才是正常水平,而匯兌損失2100萬美元,唔計貶值營業額是上升的

物業本身出租率高企,加左少少租,今年有45%的樓面到期準備續租,物業前景向好,而旁邊KING SIZE的地盤到2019年先入伙,仲有3年安全期

欠債4.8億美元,利率H+2.75,暫時冇借人債取代的誘因,每加息0.25厘利息支出將增200萬,負債比率35%,收購空間有限

現價3.28,息率8.2%

405越秀

其本上所有野都有租加,補貼即將完結而扮住宅的部分業績算追上補貼,補貼影響可以無視

匯兌損失3.8億,欠債110億,當中83億為美元,利率2.5-3%,暫時冇借人債取代的誘因,每加息0.25厘利息支出將增1900萬,負債比率37%,收購空間有限

物業本身白馬大廈同書城因為屬零售用途,所以成長快,但其他寫字樓增長得好少,國金如果剔除地舖的租金,寫字樓都係冇乜增長,而旁邊的周大福塔似乎今年完工形成競爭,因此廣州的寫字樓估計都持平,白馬大廈同書城租金佔總體3成,其下年的增長除3大致就是越秀的增長了,總體有28%的物業前景向好,其他持平一兩年

現價4.27,息率7.2%

6139金茂

金茂的酒店入住率普遍上升,房租就下降,代表人數多左,質量差左,人數多左對零售同飲食有利,對酒店就不太好,因為執房次數同被偷的牙刷毛巾增加,總體而言,大陸的出遊人數增加,但賤左些少,說旅遊業復甦不如說餐飲業(下價)復甦,來自酒店的租金多7%,前景不過不失,上海酒店或會因美鬼鼠而改善,寫字樓就幾猛下,增長12%,出租率亦高,總體21%的寫字樓前景向好,其他一般

匯兌損失冇乜,欠債83億,利率4.6%,有借人債取代的誘因,其實估計大半已是人仔,負債比率26%,有收購空間

現價4.38,息率7.2%

1275開元

租金多15%,原因是收購,唔計補貼增派6%,計埋就少10%

同金茂一樣酒店入住率普遍上升,房租就下降(匯賢都係),由於開元的酒店係杭州,都會受益於美鬼鼠,新收購的酒店有間得半年入賬,所以今年會多1000萬,佔12%的舖位加租較多,其他一般向好

匯兌損失9500萬,欠債20億,利率3.4%,其中17億為美元,暫時冇借人債取代的誘因,每加息0.25厘利息支出將增400萬,負債比率37%,收購空間有限

現價2.86,息率7.3%,補貼用曬就不用計了

REIT業績(香港)

2778冠君

租金同派息都跌2%咁上下,由於花旗銀行大廈出租率開始租滿而上年空比較多,今年可以收多D,花旗銀行大廈佔47%,朗豪坊寫字樓增加9%佔15%,朗豪坊商場增8%佔38%,所有物業都向好,特別係花旗銀行大廈可能有雙位數

欠銀行107億,利率1.9厘,加息0.25厘利息支出多2700萬,債劵36億,利率3.5%,負債比率22%可以收購

現價3.93,派息5%

435陽光

租金多4%,派息多14%,原因係賣樓,屬於特別息,出租率同呎租雙升,足以抵銷賣樓的租金減少有突,剔除賣樓部分,剩低的樓加租7%,下年估計都差唔多

利率1厘幾,加息0.25厘利息支出多1000萬,負債比率21%可以收購

現價4,派息5.9%

808泓富

租金同派息都升8%咁上下,情況同陽光水平相近,下年估計都差唔多

利率2.1厘,加息0.25厘利息支出多700萬,負債比率27%可以收購

現價2.88,派息6.1%

假設冠君增長20%,陽光泓富各8%,一年後派息分別是6%,6.4%,6.6%,由於冠君向來有溢價,冠君回復至5%,陽光泓富回到6%,最終股價分別是4.7,4.3,3.1,因此2778>808>435

*用20%似乎多得滯,如改用14%,冠君一年後派息5.7%,股價4.5

778置富

增加12%以上,冇乜特別弱點,而且折讓低管理費攤薄少

利率2.4厘,加息0.25厘利息支出多2600萬,負債比率30%可以收購

現價8.29,派息5.7%

比上面全部同下面費事寫果隻都好

1881富豪

租金持平,派息下降5%,主要是因為用基金單位計的管理費攤薄同利息支出,酒店詳細情況避而不談,前景唔係咁好

欠銀行62億,利率1.8厘,加息0.25厘利息支出多1600萬,債劵19億,利率4.3%,負債比率37%收購空間不大

現價1.99,派息7.7%,由於租金下跌,特以最近的半年息計,息率8%

1270朗廷

租金減近1成,派息下降15%,做左人仔定期所以蝕水,正常派息冇跌咁多,同富豪相比,冇收購,冇機場酒店,所以酒店質量富豪好D跌幅少D前景唔係咁好

利率1.7厘,加息0.25厘利息支出多1600萬,負債比率36%收購空間不大

現價2.71,唔計補貼派息8.6%,以最近的半年息計,息率9%

假設富豪回復8%,朗廷回復10%,息率分別係8.6%同9.9%,股價回到7%時股價分別是2.45同3.82,而假設富豪下跌8%,朗廷下跌10%,息率分別係7.4%同8.1%,股價回到8%時股價分別是1.84同2.68,結論是現在的朗廷應該比富豪抗跌,返生時亦彈得快,而且派息更高一點,1270>1881

奧普業績

營業額增長2成,由7.8億升至9.3億,而半年業績時營業額分別是3.5同4.2億,即下半年收入為4.3同5億,2014年上下半年比例係45同55%,現家都差唔多,已經唔算季候鳥

上半年賺11仙派8仙,9700萬派7000萬,下半年13仙派5仙,1.1億派5000萬,反而派少左,咁少左D錢去左邊?

上半年有1500萬的股息收入,而下半年冇,簡而言之,果間聯營公司一係一年派一次息,一係果1500萬係特別息,總之半年後就知間子公司有冇料到,如上半年派息扣除果1500萬,上下半年分別派5500萬同5000萬,不過下半年的確係派少左,咁少左D錢去左邊?

奧普有1.1億貸款,而筆貸款係今期還清左,所以話呢半年奧普係駛左1.1億的,因此為還債而派減息是講得通的,味皇個人而言,比起上年同上半年派息唔錯但又無緣無故借錢,味皇寧願佢身家清白,咁頭殼就冇咁多問號

另外,凡是用閒錢還債,就是代表公司冇乜有效投資項目回報率比還債多,個人理財也是同樣原理,與其投錢落成效不明的廣告上,還債能確切的產生實益,呢點你想讚佢又得,彈佢又得,正面負面想點解釋都得

而奧普債已還清,無債可還,如下次冇乜有效投資項目時,重新增派的概率較大,除非佢有值得落注的項目

人工支出由3200萬增至3800萬,當中包括董事人工,今次奧普冇公布員工數目或單獨顯示董事人工,總之我地知道增加左600萬就是了,奧普下半年應派1-1.2億的,最終只派5000萬,而董事股權佔大份,因此說明,董事的收入大幅減少,但冇得別去加人工搵我地老襯填數(唔似D本地薑),奧普董事人工係上市公司世界當中算是非常微薄的,好似李小+一個人都4400萬人工頂得人地全公司,今次減派息說明董事一係本身唔係非常缺錢同暫時冇乜副業,一係就是益公司等同益自己

主要是味皇持有奧普9年了,期間佢一直行為良好,冇乜特別腐化的跡象,所以給予信用

本業表現良好,產品種類多左,一如味皇所料出空氣清新機,差抽濕機同冷氣幾時整了,其他冇乜特別要注意的

惠記路勁利基業績

本文分類係地產股度,但實際上又可以分去物流股又得,公用股又得,味皇近年的持股都唔易分類,因為很多都有跨行業的副業,還是應該說甚麼才是本業都不清楚了,不過正是這樣,呢D股先引人入性--主要指價錢

240利基

盈利由早幾年的1000萬變現在近1億,市值4億還是比較低

營業額大增到4億幾,主要係政府工程,靠接任務的穩定性呵呵就算了,佢話任務欄接左的任務夠排到17年,咁一兩年內應該算安全的,行政費上升比較少,工人人工高但毛利率都仲算高,相信係因為人仔貶值降低了外勞的支出,泥沙的成本,佢收政府的港紙,找數用人仔,由於近期人仔匯率反彈,下年利基未必控制到成本

佢冇分開寫水廠的業績,不過利基剩係做香港工程的原因,因此推測大陸的生意就係指水廠,而呢部分的盈利1000萬左右,貶值下都有得升,所以匯率反彈下水廠下年賺1200萬應該唔難,即每股1仙左右,另外佢打算3500萬收購暖氣廠,由於行基發行的債券利率為7.65%,因此暖氣廠的初期回報率應不低於7.65%或300萬,不過翻開公告睇,暖氣廠的盈利比較唔掂,恐怕冇乜貢獻

佢今年賺唔少,但只派1.5仙,其中0.8仙由水廠提供,即工程賺到錢也只是象徵式彈比你,由於下年水廠賺1仙,因工程冇賺少到的話下年最多都係派1.7仙,工程賺少左(人仔升值)佢減派息的機會頗大

財政還算可以,屯了些現金,可能仲會有收購,或許贖回債券

1098路勁

派息下降,唔計匯率的話盈利同上年持平,人仔貶值的損失為3億左右,暫時睇算係一次性損失,由於呢排人仔升返,佢用呢個理由減派息的話,咁下期就會用同樣理由增派息,如果股票因為咁樣的一次性事件過度反彈,咁可能產生賣出理由

人仔貶值令樓唔值錢,更主要係美元債的還款會上升,不過係咁不利的情況下,路勁依然降低左債務,以財政質量上來說路勁比前年進步價值更高

來自公路的收入大幅上升,分到超過2.5億,相當於半間港通或1/3間深圳高速,而人仔貶值的損失令所有人察覺唔到呢點

地產方面不過不失,由於大陸又開始炒樓成風,如果一年內唔爆,路勁下年的業績應該好過上年

假設匯率維持在上年尾的1:1.195,地產持平,來自公路的收入再上升,咁每股盈利可達1.45,派息0.73,人仔跌5%少賺3億,咁匯率每升跌1%影響每股盈利8仙,影響派息4仙

610惠記

派息7500萬,其中來自利基900萬,來自路勁1.4億,來自REIT500萬,石礦場冇點拖後腿,最後派左一半左右

如來自路勁的股息提高至2.2億,同樣派一半,惠記派息相信可達1.2億或每股2亳

今年年尾會有賣美國樓花收益入帳,數目應該唔會好大,惠記剩剩埋D息估計以炒美國樓同回購路勁為主

財政冇特別話變好變壞,係買左個石礦場要駛5億,位置係屯門的藍地石礦場,係唔係廢場唔清楚,如果係買埋業權的話,可能醉翁之意,轉頭就起左樓

概率

今次講下概率,唔知有幾多讀者有去賭場賭過百家樂,所以就唔用佢做例子了,下面用大細做例子

上面的大,細,係1賠1的,如果遊戲係公平的話,概率應是50/50,即是買100局有50局是大50局是細,但係大細有圍色呢樣野,3粒正六面體可組成的組合係6X6X6=216,出現的圍色有6種,是6X216=36,即36分之1機會,出大出細概率相等的話,機會就是17.5/36或者說48.6%,所以遊戲係不公平的,你買落去就係你老襯,腦痿縮,老人痴呆,咁圍色1賠24又公唔公平呢?80%的人冇諗過,賠率越高相對機率就越細,呢度出圍色的機會係1/36,而賠比你24倍,唔識計?唔駛計,用代入法當你買36局比你嬴返1局,你手上由36注剩返24注,少左1/3,所以遊戲係不公平的,就算同樣係圍色,單圍賠150而全圍賠24,買齊6種150倍各100蚊同買全圍600蚊照道理是等價的,但6種全買100賠15000-500=14500,而買全圍600賠14400,存在相差,所以遊戲係不公平的,而由呢度可以明確看出不公平的不是色仔,而係賠率,或者講係規則,循例講下,1賠150的圍色要賠到216先叫50 50

咁回到正常人唔會識的百家樂,佢的概率係點計的呢?先跳去其他先,和1賠8,對子(兩隻牌一樣)1賠11,唔識計唔緊要,你有D常識得話常識可以幫你推理出黎,先講買和,點數最細0點最大9點,0-9總共10個號碼,即係10種機會,而佢只賠8倍,食左你2倍,買對子的話,啤牌由A-K共13隻,即係13種機會,而佢只賠11倍,又食左你2倍,唔需要學乜鬼數學乜鬼公式,用常識就可以推理出黎,咁回到正常人唔會識的百家樂,佢的概率係點計的呢?咳咳,其實味皇都唔識計,但唔識計唔代表估唔到,同理,百家樂的手贖費係5%,而買莊贏到先收手贖費,咁即係代表,如果莊閒機會相等的話買冇手續費的閒會有著數,而規則咁設定就代表閒出的機會比一定莊低以方便抽水,咁最終低多少呢,5%手續費計入去的話,莊加2.5%閒減2.5%變成52.5%-5%/47.5%的比例,因此出閒的比例是47.5%,出莊的比例是52.5%,但扣除手續費後依然是47.5%,如果賭場存在讓利的話概率會再偏向閒少少,但出閒的比例斷估唔會高過唔多好賺的大細的48.6%,存在讓利的話出閒的比例是47.5-48.6%,出莊的比例是51.4-52.5%,味皇係常識人,所以第一次接觸呢D野時已經推算左出黎(証明味皇幾咁無聊)

至於仲有種叫免水百家樂,規則係平時唔抽水,開6點莊贏一抽就抽你50%,佢的概率係點計的呢?其實仲簡單,0-9當中,開0一定輸硬,開9一定贏硬,開5贏的機會係一半一半的話,咁6就係位於60%勝率的的位置,1/10機會開到6,而6羸的機會係60%,抽50%手續貴,文字說明就是--你買莊,當中1/10機會開到6,60%機會贏到,贏到100%會抽你50%的手續費,10%X60%X50%=3%,比上而52.5%的2.5%賺多1/6也,因此味皇第一眼遇到免水百家樂時已經予知了賭場會力推佢以取代唔好賺的普通百家樂

賭場要賺錢的,澳門賭場多過米舖就証明賭場好搵過米舖,賭場羸錢就是賭仔輸錢,所以說,賭錢的人是老襯,腦痿縮,老人痴呆,智能正常的人,根本唔會入賭場(除非唔係人),味皇實在為国人低下的智能憂心

求其就48%為例,佢可以點解釋呢?

1.買50蚊,每次100%蝕2蚊

2.買100蚊,每次50%蝕4蚊

3.50蚊本逐蚊買,2連敗輸2蚊

4.平注48連勝及52連敗

5.平注買100局,48勝52敗

6.贏48局1蚊,1局輸返52蚊

7,1局贏48蚊,之後輸返52蚊

8.100人中48人贏52人輸

9.1人羸48倍,但52人輸

10.48人羸,但另外有條友輸足52人分量

11.有1人羸48倍,但同時有人輸足52人分量

12.100日中48日贏,52日輸

..等等

同樣48%可各種解釋,反過黎各種解釋都可以合併為48%再轉換為其他方法解釋,例如條友三日三夜唔訓唔食唔如廁所賭錢,梅花間竹咁輸左1萬之類的,情況似乎係4,但你可以曲解佢為贏689局輸769局,同連輸80局一樣(小學數學的簡化,負1+正1=0),變成情況3的連敗解釋,又或者曲解為條友輸的1萬夠貼出面大班師奶加埋贏果D,變成情況10的水魚解釋,又或者曲解為條友之前羸埋羸埋果D,今次仲唔一舖輸死佢嘻嘻,變成情況6的跳樓解釋,味皇自己一般會解釋為100%蝕2%不斷係咁買的必然結果,即係情況1的鹹魚解釋

人冇夢想同鹹魚有乜分別!

但味皇一向係運氣唔多好的人種,所以變成寧願信比較可靠的科學都唔信非常不可靠的運氣的人了,精神上已經係鹹魚一條,所以見到乜都似鹹魚,不過大部份人的精神應該都未死的,有夢想的人也許會認為自已係9的幸運兒,於是去買六合彩,人也許會認為自已唔會係10的IFC,於是去炒樓,人也許會認為自已係8的走得快,於是去買老千股,人也許會認為自已係11的總明人,於是去買期貨,人也許會認為自已係12的愚公,只要堅持就可以取勝...等等,咁你係邊類呢?

嘛,冇話邊種人會好D邊種會衰D,主要係中過頭落去的時候機會係高定低,最後再成敗論英雄而已

無論那種情況,味皇自身通常會將之折算成情況1,概率是否超過50%呢?即使說,贏面大唔大,值唔值得去馬,味皇一般都係買股票的,但用返賭場的例子的話,莊真係唔抽水,圍色1賠220,咁不屑入賭場的味皇就或者會考慮入賭場

2號台末日

呢邊廂11個核數師時薪3000蚊搵上門要老周電視找數,另一邊廂大班律師搵上門要免費同投石男打官司(雖然會搞籌款),談笑間灰飛煙滅,老周同人唔同命

話說旺旺真唔好彩,老周擺明蝕本貨,買佢無非係想當玩具玩,愚樂鄉民,電視好好玩架,例如傳說誤報某人死訊100次,果條友就真係會賣鹹鴨蛋,又或者學乜江台咁,所有廣告都係東亞病FU,話仙貝可以補腎,雪餅可以治腰錐,小小穌可以氣血和,小饅頭可以止經痛之類的,講100次就有人信,不過人地阿燦又要爭玩,而老周得1個,旺旺雙拳難敵巨爪

話說如果可以返轉頭,老周可以點救呢?阿燦冇得救,老周有得救,如果比著味皇係台長,就會將老周幕後化,老周電視有乜係比發達台優勝的?配音組是也,不但比發達台高汁,而且人工低一半,唔駛上鏡的話,發達台的臉皮優勢就可以迥避,唔理時段上電視,可以搏命接西片做配音,字幕判比大陸就得,又接D布袋戲做配音同字幕之後賣碟,魔劍美神之類要比錢買的卡通搬去深夜或直頭唔買,黃金時段全部播玩具公司倒貼錢播的例如游戲卡,四驅車,他媽個臍,變態戰隊果類,多D做有錢收的本地的飲食節目,狂做財經收大戶的做媒費,捧紅D財演等佢開講座抽佣,減少藝員增加主持,做有贊助的遊戲節目,多利用有戲癮所以唔收錢的名人好似海X堂條友同唱歌醫生咁,播兩次港台,要扭虧應該唔難,唔駛同發達台斗收視的,暗渡陳倉就得,當時上面D人見識少,仲認為老周出品必屬佳品,加下工掛個名都可以賣好價錢

俱往矣

嘛,呢排0.45買多40000股世城,有諗過用一D惠記換世城的,但後來又覺得惠記換世城的獲益不甚明確而作罷,另外3.12沽出11000股春泉,T+3之後先換到8000股3.21匯賢(本來是想換3.15的),話T+2,但當日+等兩日共3日,港幣可以即賣即賣,但港幣轉人仔再賣要等,永亨雞得佢

稻香(573)VS味千(538)

有段時間冇寫股,今次搵D野又寫下

稻香同味千兩間都跌左好多,而且前景都麻麻,兼牌子老化,老老77唐宮會好過佢地

未寫都知味千高汁過稻香好多,主要現家係睇多汁幾多

                       稻香            味千            

固定資產         15.7             17.2

折舊                  3.0               1.9

存貨                  1.5               1.1

營業額             44.9             33.2

兩間資產規模比較接近,味千D大,唔清楚佢地食品工廠值幾錢,但,第一,生產拉面的成本恐怕較低,因此相信味千自有舖位可能相對較多,第二,稻香折舊率很高,相信好多固定資產為貨車,因此味千運輸費更少,存貨兌營業額都係1/30,兩間管理水平相同

                       稻香            味千       

已繳稅              0.7             1.2

盈利                 2.1              2.8

現金流              5.8             5.8

稅率稻香33%,味千43%,由於大陸稅率是25%,港澳16.5%,因此味千的盈利數字更低估,以現金流計稅率稻香12%,味千21%

再者稻香折舊高,而且已判定為設備居多,因此稻香需在現金流中抽出保養費作定期更新,而味千就不用,現金增長快

                       稻香            味千 

現金                 3.5             19.4

債                    1.9                1.3

利息收入         -0.1             0.35

稻香就不管了,味千19.4億現金,收息1.8厘,存人仔就偏低存港幣就偏高,即係佢可能一半存大陸一半存香港,一係就香港存人仔.(其實打開年報可能就睇到,但呢度示範唔睇年報做推理),佢冇必要下又借錢,因此會出現D現金其實唔郁得或者已經唔存在的疑點,由於唔係全部存大陸,因此就算真係穿櫃桶底都唔會話全部穿曬

                       稻香            味千 

現金流              5.8             5.8

折舊                  3.0            1.9

----------------------------------------

                        2.8             3.9

派息                 1.3             2.0

兩者派息比率都係一半左右,味千資金佔用低派息會比較平穩

                       稻香             味千

市值                  19               32

資產淨值            18              33

---------------------------------------

資產淨值-錢     16.5             15  

盈利                   2.1            2.8

----------------------------------------

效率                 13%           19%

PE                     9.3           11.8

息率                   6.4            6.0

將公司淨值減去現金,可以睇作開緊工的公司同伙記咁,味千的工作效率比稻香高得多,或者說暴利得多,事實上味精溝水加個面起碼易過蒸腸粉,洗湯碗易過洗蒸籠,話說蒸籠都係消耗品

PB計稻香好似平少少,但真係計的話味千的店舖PB只有稻香的一半,效率又高,咁PE的差距就唔算乜野了,味千係味皇話事的話,用19億現金買左稻香,味千資產淨值不變,兩間公司加埋的市值仲係32億,盈利近5億,兵有甘荀

現在的情況是,味千的牌子老化,同店盈利下降食緊老本,但係佢有好多現金,而且盈利再下降都好,味精水加面點都係暴利,牌子老化的話爽爽手改過個公司名唔用味千叫味精就可以,學霸王咁死攬住個臭名梗冇運行,簡單講味千能夠收購或者改名去邊緣化個老化牌子而不改暴利,相對稻香冇太多閒錢,名臭就臭名香就香,收購唔夠錢改名豪唔起,冇乜主動發展空間

如果話味千效率是稻香1.5倍,咁佢D開工資產應比稻香貴1.5倍,稻香有16.5億咁味千就值24億加18億現金共42億或每股3.9,同市值19億股價1.9的稻香比為1兌2.1

上面句詐睇唔到,簡單地稻香PE10=2,PB1.5=2.7,平均2.35,息率5.1%,味千PE15=3.8,PB2=6.1,平均5,息率3.6%,估值是隨意開的唔好問典解

以前舊文有小南國VS唐宮唐宮勝,今次稻香VS味千味千勝,於是下次味千VS唐宮邊個贏就買邊過咁(暗黑武術大會?),如果有一大堆股票目標,其實只要分開兩個兩個一組對決,咁遲早能搵到最好的股票