其他工業股業績

遲左幾個月,現家先有閒情寫業績

528肛蛋
營業額大增,增幅同出口量相同,毛利率降,說明產品是銷量增加,而不是單價增加,需求無虞,產能100%利用,下年有新廠投產,產能能增加4成,巨大利好
存貨增幅不大,沒有積壓,因此行政費用大升唔關營運事,為一次性支出,應收賬大增,因此該一次性支出為有人走數,相信下半年仲會走多一劑
存貨同財政都冇惡化,派息可以維持
估值兩蚊多少少,有機會得到重估

450鴻興
經營環境惡化,存貨壓左些少,財政維持到往年水平,艱苦經營
冇方案可以改善,派息未必維持
近期估值不會得到重估,即使合理值高

3983中海化
銷售同盈利同往年一樣,產能增加少量
年內產品價格走勢如U字一樣,低迷左一段時間,如果產品價格維持在現水平,下年增利會增長好幾成,等於投機商品,倒是跌的理由不大
資本資出令現金下降,現時現金不比存貨多很多,已沒有很多閒錢可再投資,只能等收成期
如果經營向好,佢可能會發債
現時估值合理

2345集優
就像8年無冠的等收成期一樣,我們不知道今年會否有收成,我們只知有有好多事不是自己能控制的
雖然集優非常有底蘊,每年經理都打官腔說好說話,但交不出成績就冇用,年內銷售全面惡化,除左賴內需不振外,味皇認為更多是中央打貪,最近就算搞大工程都不好撈油水,就算撈到都冇得曬命,打擊官老爺大躍進的積極性
相信此情況會同樣出現在所有同"政府項目"有關的行業
投資重工業搞到同投資奢侈品一勁樣咁,相信都係中國特色
財政冇惡化,冇壓貨,只是減少產量,不作為,安全性不用擔心,派息一定會有,但數量很懸
情況同鴻興類似,不過佢冇壓力,鴻興就有壓力,我指的是經理,至於股票的情況亦相同

2727上電
情況同集優一樣
值3.5

148建滔
本業大致持平,存貨冇顯著積壓,剛發現南商的資料原來將存貨同樓都一併歸入存貨,味皇比佢誤導左幾年添
情況非常良好,齋本業是值百幾二百億的,仲未計佢果百幾億樓
如果佢賣樓,將會用於還債,而不是派特別息,佢的派息只會限於本業盈利,即是說,盈利就算多一倍,派息都一樣係5,6毫,只有地產方面的收租部分就會加入派息
值30蚊,有分拆慨念,等於當年的東方海外

1888即沉板
同老母一樣,本業100億,樓30億,值4.3,但派息高好多,因為本業佔的比較較大,選派息還是選增值是個人選擇

179德昌
努力還債,經營穩定,越來越好,估值太高
還多一年,增加派息,可增至0.14-0.16之間


669創科
財政改善,但負債依然高
成長率高,估值超貴,只因佢槓桿高到冇人有,如果公司拿盈利還債,對公司絕對有利,但股價就會因此跌去大半,因為增長率冇左,做對公司有利的事但對股東卻是不利,這就是股票
只值10蚊
同德昌一樣的好公司,要買的話大把機會

1882海天
經營很好,估值太高,沒甚麼好講的
8蚊都比多佢

變現獲利

無聲狗咬死人,在冇人察覺的情況下,愛達利已急升左超過50%,原因是佢得到銀河3億的外判,對此味皇不會意外,將來路氹永利又好,巴黎人又好,星麗門又好,最後咪又係判比佢做,鬼叫佢係澳門獨市,但是能賺幾多又是另一件事,金沙城單刁的規模一樣唔細,但愛達利都唔見得收支平衡,公司口袋同私人口袋始終有些差別
只是不意外而已,味皇買入的原因大半是地捫公司的股權,澳門的業務不抱太大期望,地捫公司的股權味皇認為值3亳左右,已大於當時總市值,其他本業當賺個殼,佢突然出通告而急升完全是味皇予想外的,迪士尼的卡通從小就教導我們,好波不如好運是永遠的真理,於是味皇不客氣笑納了
平均價0.28以下買入,持貨一個月,現在以0.425沽出50000股,1.07換入左同金額的廈門港,仲剩下3/4,這是味皇買股咁耐有數的狗屎運,再升還會再賣
丟空左成個月,樓A終以6000蚊租出,增幅1成,依然低於市價,由於將來退休,必需重組債務,樓A是必賣的,而味皇征服屯門的野望被CY粉碎後,成個企左係度,除左選擇收息股外,似乎買日本樓已成為極有必要行的一步,遲下味皇會沽清富豪,先進行小額實驗
大陸舖仲未開張,不過都應該差唔多時候,到時嘗試加4成放售,套現資金改買珠海同中山的丙級寫字樓,有剩就買REITS
味皇鄉下遭拆毀,味皇冇故鄉了,有人會說中國出世就中國是故鄉,珠海出世就珠海是故鄉,味皇自己則沒有太多如此政區劃分的地緣性的想法,地球人用國家地區自居好像有點膚淺,而味皇個人只認同自已雙腳走過留過腳毛的地方先係故鄉,就類似於射尿黃狗,這似乎更為膚淺?鄉下拆毀後,屋企人得到回遷房一間,位置座向樓層都上佳,但味皇動議,與其花大錢裝修後養老鼠,不如沽出換成兩間二手細屋,一間自用一間放租更有效率,由於味家沒有面子當飯食的思想,因此動議得到通過

日本買樓

原來打算賣出澳門的一房樓FP換成屯門的兆康邨,最大的目的是為左退休後冇糧單亦依舊保有借錢的手段,當然減債也是重要目的,但早兩日放租樓A時,經紀提起澳門人買香港樓係要比買家印花稅,直接閹左味皇
即是買香港樓已經行不通了
上一篇文提到,味皇打算買日本樓,呢幾日都同日本經紀交換電郵,味皇用日文同繁體中文內容向5間有中國員工的地產發電郵,結果有兩間有回覆,其中有間服務最齊全叫湯馬士的台資地產問我預算是多少,味皇答左後就斷左聯絡,另一間叫阿魯馬田的只有10個員工兩間分店的地產就冇嫌棄,一直有問必答,蚊子再少也是肉啊
這些都是味皇搜出當地的地產協會,再查協會的會員的曲線方法找出來的,直接GOOGLE是查不到
日本人口老化,大部分地方人口都在減少,買日本樓收租不一定可以收到老,而且極大機會買左賣唔出,但是,雖然大部分地方包括大阪的人口曲線是向下,但總有些地方人口是增加的,舉例說廣島同長崎就因為歷史原因冇乜老人
日本買樓稅收極重,例如頭5年的增值稅直接可以閹左炒家,而且賣樓會另抽一成稅,加上買入時抽的消費稅,樓要升2成先可以打平,想日本樓升?發夢
不過由於是增值稅,你蝕賣或者原價賣就可以唔抽,即是說日元升值兩成,你也有收回成本的機會
所謂安倍經濟學,其實是叛國,雖然吸引了大量外資進入日本,比如說流入1萬億,但由於租金回報高,例如實肉7厘咁計,每年就會流出700億,即是說在安倍任期內會出現一次9300億的資金流入,日本繁榮一陣,但安倍退任後就要面臨每年700億的逆差,而且是流向日本政治上的敵國,長遠會形成嚴重的社會問題,因此安倍其實是賣國賊,不過過左海就神仙,反正任期有限
因此再過幾年,日本必定會對外國人的資產作出各種管制,我們可能會被當成為過街老鼠,因此買日本樓時要限制投入的比重,唔好見啱數就狂買
至於味皇,可能12月飛去日本自由行

收息

收左萬幾兩萬蚊息後,0.27增持愛達利32000股,收夠數不再增持了,連續兩次一買入就跌一成,燈力驚人
最近上網睇人在野,突然有寫文的靈感,下年的迎新年文一於就用貝爺做題材
跌吉地產版有個貼話,有人分租700呎的自住樓房間收14000蚊,35歲就退休等死,咁都引到幾十頁葡萄,14000蚊都好葡萄?似乎說人冇志氣的人自己都不見得有多大志氣,話說味皇將來過的也許亦是類似混食等死的生活,必然有人說毒撚的人生是黑白的,子非毒,焉知毒之樂
以前撻成一塊有首歌講食芒果唔食蘋果,那已經係回歸之前的時代了,別人愛怎樣是別人的事,又惹不到自已,無端端發乜野惡即?不知不覺,魚蛋論成了主流思想,容不下異己,非黑即白,什麼多元文化思想自由死清光了,難怪無線d節目都講移民
於是乎,毫無關係的味皇己嘗試e-mail問下日本的地產經紀,買日本樓收租的可行性,不過仲未有回覆

黃金週

呢幾日的體力勞動搾乾味皇的體力,我和我的小伙伴都龜縮了,曾幾何時,味皇也佣有健♂康的肉體,直到我的膝蓋中了一箭
賭廳都人山人海,都是賭外圍的,這樣明目張膽的做逃稅勾當大丈夫?大丈夫,萌大奶!搵多D錢先可以變議員
早兩日以0.76增持奧普20000股,主要係佢用1800萬係中央台賣廣告,今年之前比再多錢賣電視廣告都是冇效的,唯獨今年開始賣電視廣告就有效了,因為山寨牌子取締左,廣告的效果唔會益左山寨,亦唔會受山寨的質量問題誅連,連同四川的廠房完工,現在是不錯的洗腦時機
早兩年換新樓A時,已預料"你睇幾時兩房逸麗都過300萬"(當時220萬),現在是一房逸麗都過300萬,超級無敵憨膠膠,今年換的樓B都升左100粒,當時個業主肯乖乖地撻訂咪乜事都冇囉,現家如同雞佬食外母,話說樓價又再次乾升,味皇此時已經可以再寫第一個XXX萬系列,可是味皇實在高興不起來,澳門的生活環境越來越劣質化,等於剷左郊野公園換成錢,錢係多左,但生活環境卻比多多錢也回復不過來,一旦成了人妻就變不回少女了
當年味皇幾次換樓都是將2厘的樓換成3厘幾的樓,現在樓價乾升,3厘幾的樓又重新變成2厘,但味皇眼絀,此時在澳門再找不到3厘幾的物體可以再換,如果話租值回到3厘幾,一係租金不變而樓價跌,一係樓價唔跌租金升,而現家賭場放風想輸入外勞,結果令業主亂開價,在此前題下,似乎租金升會比樓價跌的機會更大,像開口330萬的逸麗1房,如果話租值變返3厘3,就要租成9000蚊,澳門的打工仔前途多難了,老鼠也移民?結果而言,澳門會快速香港化,劏房好快會遍地開花,例如味皇的樓A如劏成兩間的話,租金可由6500升至10000,不過就會係咁,味皇還是傾向換入4厘的屯門做蟹民