高息股的搵法

現家恆指升到差唔多28000點,現家仲講買高息股似乎有D同時代脫節,比如其他所有球會都用天價買人,唔跟團買人的球會就會比球迷話有罪咁,主要係有比較,其他人都咁做,你行反其道而行,要神經足夠大條先得,見到其他人買股升值賺錢,自己仲買股收息就成個苯實一樣,不過,球會天價買人同成績沒有必然關係,只有概率關係,只買Google人,同成績也沒有必然關係,只有概率關係,同樣地買股博升同買股收息取得成功的也是概率,只前者比較高調而已

有味皇成功退休的案例下,收息流的人數應該比10年前增加一D?

今次的內容同基本上就是之前寫過的10厘股搵法,不過現家個市仲講10厘股似乎唔多現實,所以名題變成高息股的搵法

首先要明確兩樣野:

1.高息股=/=收息股

2.我地要收的是買入之後的股息

1的意思係,高息股係高派息的股,收息股係股東出糧用的股,收息股可以係高息股或低息股,高息股唔一定係收息股,因為唔一定年年派咁多,味皇特意說明的目的係,我地搵股票時首先會見到佢的歷史派息,如果發現有明顯趨勢,我地有可能被歷史數字迷惑,而不特別考究其派息的動機

2的意思係,同上見到佢的歷史派息,我地有可能被歷史數字迷惑,而冇歷史數字的股票,可能白白被放棄,而不特別考究將來其派息的動機

高息股味皇分為3類,1類係本身派息高,而股價唔算太高,2係派息低或冇,但之後會大幅增加,3係派息低,但股價更低令派息顯得高

收息股味皇分為3類,1類係本身派息比率高,而且可以維持,公司沒有資金需要,2係派息比率低或冇,但之後會大幅增加,而且可以維持,3係派息比率低,但保留盈利可令將來派息增加,而且可以維持

簡而言之收息股注重的是公司層面,而高息股相對注重的是市場層面,我地可能會買一隻高息股收佢幾年息,變壞前掉走,買一隻低息股變高息股,狠狠的賺佢一波再掉走,得果D同時符合收息股定義的高息股,我地先會長期養住

判斷是不是收息股,對我地的影響是隻股票會唔會被賣出,判斷是不是高息股,對我地的影響是隻股票會唔會被買入,收息股同高息股各3類,即3X3的方陣共9種兼容組合

                                1                                                               2                                                             3

1    派息高派息比率高可以維持股價合理           派息比率高兼派息又大增可以維持       派息高派息比率高可以維持股價不合理地低

2    派息高之餘之後會仲會大幅增加可以維持    派息比率由很低變到很高可以維持       派息變高之前股價不合理地低可以維持

3    派息一路增加可以維持而股價相對較低       派息比率不變但派息大增可以維持        派息一路增加可以維持而股價出奇地低

其他不符合雙重定義的外野,例如派息高股價仲高,派息高將來減,派息減股價升,今年派下年唔派之類的呢度就唔講

咁呢度要搵9隻例子講解先得,其實係有的

派息高派息比率高可以維持股價合理--曾經的新意網同奧普,現家的科聯,莎莎,大快活,置富REIT

可唔可以維持見仁見智,呢類股的特性係,冇必要保留盈利,每一年的收入係獨立事件,收入的多少同投入關聯性不大,例如開個油站,只需初其投資,之後就有人上門,不需要追加投資,每年賺的錢全拿走也不影響,客量成長唔到你控制,客要黎自然會上門,要從財務上分辨出黎,通常都具有低或無負債,高派息比率,固定資產變化細,原因係冇追加投資的需要,自然就沒有借錢的動機,REIT另計,作為例子舊文http://realblog.zkiz.com/lgaim/9588

派息比率高兼派息又大增可以維持--一時間搵唔到,唯有虛構例子,例如新意網用2厘貸款蛇吞山打根電訊30億的服務器業務純利增加2.4億派息增4成

財務特徵相同,差在有冇特別原因可以增加盈利而你又搵到,一般係收購,新店開張,改政策之類的

派息高派息比率高可以維持股價不合理地低--曾經的收息股

時間大概係阿仙奴起球場的時候,REIT全部超過15厘,好似租金呢D長期合約,唔會話減就減,搵D冇得減或冇乜機會減的就係,例如置富REIT的租約,粵海的供水合約等,離題的舊文http://realblog.zkiz.com/lgaim/12419

派息高之餘之後會仲會大幅增加可以維持--曾經的粵海

早年,粵海本身的派息不算低,但一直冇增長,同時佢有不少負債,味皇發現粵海每年的負債快速減少,大約差一年就還清,佢還債的動機係乜?還錢比留錢好,點解唔留錢?用唔著,那麼還清後會如何呢?用黎派息,時間為2011年,佢05年欠銀行134億,07年94億,09年44億,11年13億,而佢派息06-10年都係0.1-0.11之間,2011年後就跳到0.2以上了,種類當然唔止呢種咁少,仲有其他成因都得,但呢種可以從多年負債的走向一眼掘到出黎,最為簡單,難得冇死圖http://realblog.zkiz.com/lgaim/39529

派息比率由很低變到很高可以維持--曾經的SOHO同順豪,現家建業同漢國

建業的派息長期低到當成老千股,因為冇固定財源,但下年開始唔同,因為有棟巨大收租物業建成,而佢唔係用黎賣而係收租,今月的租金全部拿走並不會影響下個月收唔收到租,因為租金用黎派息的機會比較大,呢類股轉型的同時盈利組成會改變,唔派得的盈利會額外加上派得的盈利,從而改變派息政策,大抵空殼公司收購左一隻收息股佢自己都會變收息股,原理可以參考舊文http://realblog.zkiz.com/lgaim/146598

派息變高之前股價不合理地低可以維持--惠記,路勁,同埋上面兩種等等

基本上都係經濟差的時候,例如4rsenal梗的最後一年咁,舊文http://realblog.zkiz.com/lgaim/104719

派息一路增加可以維持而股價相對較低--曾經的長建同新意網,現家置富

派息能一路增加,有兩種門派,一種係高派息比率,不斷加價,一種係低派息比率,用保留盈利增加投資錢搵錢,長建後者,新意網前者,舊文http://realblog.zkiz.com/lgaim/25929

派息比率不變但派息大增可以維持--曾經的美籣,現家的太古

呢種一般係,派息同盈利數字直結,而非派息同真實盈利關連的公司,例如新創建咁,佢真正賺幾多唔理,盈利數字會計師整到幾多就派幾多,也有例外,呢類股派息增加的原因,普遍都係一次性原因,例如出現擴建,子公司入唔入帳等劇情,現家太古的情況屬於,派息之前減少,之後恢復,在減左派息後買入的人角度來看,就是派息大增,加價劇情後的晨鳴看似係呢種,但佢唔具備收息股的特性,所以只算高息股,混淆就唔好,舊文http://realblog.zkiz.com/lgaim/243126

派息一路增加可以維持而股價出奇地低--曾經的新意網同置富

上面都提過就算

簡單地總括下,9種當中直向有3種係價錢OK的情況下搵現在式或將來式的高息股,即價錢問題,3種係立左FLAG有劇情展開的股票,即內涵問題,3種係股災時撈的,差在撈邊種,即係勇氣問題,其實都係價錢問題,價錢問題66.6%通用,橫向有2種係確定冇資金需要的公司的穩定性,7種係確定公司之後的派息會比現在高,77.7%即係政治能力,你加點去武力同魅力在股市形同廢人,因此你想成功,格價技能同政治力是但一樣要高

收息股必要的是公司有派息的動機,例如債不多仲還債代表有閒錢冇用途,冇欠債存現金代表有概率浪費掉或派息,派息比率低的公司,要確定佢的保留盈利,可否在用完維持營運後仲有錢剩可以投資,例如長期唔增加欠款而固定資產一路增加,同每年保留盈利投入固定資產但只能抵折舊現金流不增加的分別,生財工具例如固定資產的效率係水平以下定水平以上,例如前4年固定資產兌現金流1:10,而第5年1:20,就梗係有劇情發生,最後就係儲備金可以提供幾大的投資能力,例如佢100的固定資產可產生10的盈利,佢有20的閒錢,就可以買20的固定資產產生2盈利--的可能性

齋講高息股,味皇比較鐘意幾種,一種本身高息的因乜事幹變低息冇息,再睇佢有冇復活的本事,味皇現家揸住的晨嗚,太古,CTM等,一種係冇資金需求,除左還錢就只有派息,揸住的嘉士利,建榮,SOHO等,一種係本身有D息兼身懷巨款,隨時掟出黎,揸住的黑鴨同以前的廈門港等,呢類味皇通常會搵跌到趴街的半新股,盈警出左但錢未用,之後就睇價錢入了,普通一路增長上去的同本身低息的因乜事幹增加派息的,前者唔平,後者死腦細胞,味皇都有但比較少選用