2877神威藥業

上次分析世紀陽光果陣時提到的盧治是也,今年果然出了令人驚異的佳績,而且派息上升20%之餘仲有錢到派特別息,恭喜曬那些神威的股東了

其實今年佢的成績並不是特別好,只是前兩年特別差,現家只係恢復功力而已,原因是早兩年大陸禁止亂賣醫療廣告,令醫療/補品行業減速,神威亦因此停了下來

神威的主產品係拮屎忽用的針藥,正常人當然唔會買,醫院方面只要定期通一通氣就可以暢通無阻了,由於醫院轉用一隻新藥要搞幾年臨床實驗,而且醫生一向都以反創新著名的,所以醫院一旦用開用慣一隻藥就唔駛旨意佢會忽然轉用其他,而神威的銷售點已經鋪好了,冇咁易流失,而且佢d針劑係某些病指定要用的,所以銷售比較穩定

而且d藥好慳地方,存貨用一間房可以裝曬,而且針劑可以到賣果陣先溝水....醫院唔會一次入好多貨用黎擺,因此存貨可以好少,而且唔值錢(成本),積壓都唔怕

神威最吸引人的是其流動比率,6以上的流動比率簡直可以用妖孽黎形容,原因係佢d藥主要成分係水,其他草藥成份蚊滋咁多多,批量計冇乜成本,由於產品名為"高科技",定價可以好高,而且醫院都樂意賣貴,另外好似由今年開始,病人有政府資助些少,醫院可以有公帑補貼,一般來說,有公帑流動的地方營運效率就會下降,物價就會上升,所以醫療行業可以迎來另一次爆發(當然納稅人是痛苦的)

                     07           06           05           04        03(上市前)          

營業額(億)  10           8.4          8.3            7          6  

現金流(億)   4.6         4.6          4.6            2.4       1.9

派息(億)       1.9         1.8          0.9            0.3       0.7

流動比率      6.0         7.2         7.2             10        3.6

上市時有壓低流動比率抬高上市價的嫌疑,不過幾年之後的流動比率應該可以相信

以佢48億的市值來說,即使是上年4.5億的現金流來說也不貴,以佢派息支出2億都有8厘息,由於佢支出極少,可以輕鬆的派高息,現金15億,冇欠債,近年仲係咁增產,任何角度來說都是完美的(由於數字太靚,反而會令人覺得佢假)

如果要話佢有乜缺點的話,應該是業務性質吧,公司同醫院的"和諧"主宰著佢的生意,如果有對手比神威更會和諧之道,公司就會出事,另外神威其他藥物係放係藥房度賣的,病的野估佢唔到,至少我唔會無端端去買藥,要清熱我寧願飲涼茶食西瓜都唔會買冚包散