少量換馬

今日3.18-3.19沽出11000股春泉,3.08換入11000股匯賢

層樓(本體)今日完左租約終於入到去睇,室內間隔闊4.2米,深5.3米,高2.5米,面積22平方,體積55立方,冇乜柱,開放式,現狀睇落租金3900-4400的若干殘破樣,改間隔同翻新可能要8萬,租金升或可到5300-5700,以市盈率計應該值得改,由於未收樓,想點租仲係前業主話事

另外味皇後日開始至11號會係台灣

太古業績

太古之前派息52億左右,而今次減到只有32億,原因係國泰蝕錢

但係太古的派息主體主要係太古地產的收租樓,因為持有國泰股權不足45%,而太古地產(1972)租金收入為168億,現金流108億,持有太古地產股權82%,佢派42億太古分到34億,相當於B股每股派0.51,現家雖然減左派息,但太古B的蟹貸派息依然優於買入太古地產,港機等其他業務依然有D錢賺,保留盈利比例亦高於太古地產,如果太古地產是有認受性的好股的話,數字上太古B就是太古地產以上的好股,國泰蝕錢部分會否傷及太古本身,視乎太古要唔要向國泰注資,國泰可以自己搞掂當然最好,如果國泰不能自力解決,太古決定拋妻棄女的話,對太古財務不會有影响,國泰賣盤改名玩9李卓人,債務上太古沒有連帶責任,僅有國泰要注資的情況下太古先有問題,而太古注資令股權超過50%就要合併報表,除非太古CEO博炒,唔係佢唔會唔識用賢明的會計處理方式,萬一真係要注資的話,估計是國泰發行債券,再由太古認購

上年國泰派0.53派時,持有45%的太古得到9億幾的息,相當於B股每股派0.14,國泰賺錢唔派息時,太古就會少派果0.14,國泰唔賺錢唔派息時,太古亦會少派果0.14,國泰蝕大錢唔派息時,太古依然會少派果0.14,簡而言之,無論國泰賺多多又好蝕而佢又好,能夠影響太古派息只限於國泰有得派出黎,而幅度由0-無限,而現在是0,因此,理論上下年太古股息不會減,不論國泰蝕幾多,前提是太古冇打算救國泰

講一講國泰的業績,佢蝕錢,特別係下期要炒人佢會蝕更多長期服務金(雖然政府會同佢係強績金度扣),下年業績應該會仲慘,但係有一樣比較奇妙的現象,國泰今年蝕左錢,但淨值反而高左,不是甚麼重估升值甚麼的,是實際有形資產多左(明蝕實賺,李卓人有位入了),在這現象下任憑條友條脷有幾多尺唔爛,也難以說服其他股東因為蝕錢而出錢"救"國泰

所以打救國泰是不成立的,因為國泰股價跌而要多4%認股權反而有可能,如果國泰的資產通過債券利息支付比股東兼扮蝕錢,會比賺錢派息比股東,手段上能容易推倒李卓人一黨,朱國樑個阿臭曬,做醜人已經一早整定了,橫掂都係揹鑊不如用佢名炒曬D人,炸散公會,吸滿仇恨值先再甩個鑊比佢更能物盡其用

對沖合約是固定金額買固定幾多油,唔買唔得,呢個油量佔佢用量一部分,例如每年要買20的油,但佢耗油量減少例如由50變成45,而購買量不變時,對沖合約佔油耗的比例就會由20/50增加至20/45,對沖合約蝕緊錢時油耗減少佢會睇落成本高D,至於國泰佢幅油價對沖圖...味皇睇唔明

點解要做對沖呢,因為佢想固定成本,點解要固定成本呢,因為佢認為在這個成本同票價佢仲可以有水位能夠賺錢,最終國泰係唔係賺到錢,對比下往年票價同燃油附加費有冇減就知,如果有燃油附加費的航線,至少果條必然是賺錢的航線,因為生意佬設定燃油附加費時,首先會以能賺錢的水平而非蝕少D的水平設定,而附加費在客人視角遠比票價本身礙眼,有附加費代表D人仲會一邊閙一邊逼上去,唔憂冇客就自然加到賺為止,如不能賺錢佢自然會CUT航班,佢冇附加費減票價時先驚,到時就變成養租約養利息優先

我們煙頭系的人買太古基本上不外乎3個原因:1.太古本分有折讓 2.太古相對於子公司有折讓 3.太古派息率高兼穩定

對買B股的吾輩來說,還有一樣:4.太古B股對於A股有折讓

而呢幾點在今日依然成立(如果你選擇性視力的話),因此沒有太大理由推翻以前的決定

資產莫名其妙增加的國泰45%淨值249億,太古地產82%淨值1848億,港機75%淨值46億,其他太古方糖之類的價值唔係0,合計>2143億,而3隻野市值分別是198億,1168億,69億,合共1435億,而太古A股9億股,B股30億股,市值分別700億同400億,合共只有1100億,B股同A股的折讓拉開到14%,簡單說,唔理其他業務,買3隻股的混成基金折讓33%,買太古A比起混成基金再折讓多19%去到折讓超過46%,太古B比A折讓多14%,總折讓53%以上

如從純淨值考慮,國泰現時折讓21%,相對於太古股票,作為老闆寧願回購自家股票都唔會注資入國泰,除非國泰跌到超過B股的折讓以上,即股價係6.6以下,咁樣注資先算得上長期利益最大化

齋太古地產的派息轉派已經有B股的0.51,而太古地產的派息不太可能下降,因此阿Q說在派息上佢沒有再大幅下降的理由,除非其他業務又有災難

青島港業績

上個月青島港4.8的時候,味皇嚴正批評了青島港的股價高升,搞到想換馬,味皇:青島港的股價不要那麼高,如果再升信唔信我就換馬了...如果你肯跌返D我也不是不可以考慮下保留的...才才不是要你跌的!唔理你了!

味皇才沒有面紅呢,那是燈光,由於經過味皇親切指導振奮人心的思想工作後,青島港的股價跌到4.5,想換馬果隻反而升左,跌左換唔到馬啦,所以已經唔怕開估,味皇當時係想換輪船招商局

不過最低限度都比天津港好

青島港盈利增加3億,而固定資產同投票增加24億,回報12.5%,如計及新增的23億"其他資產",回報率6.4%,

調用左大約30億的現金,計埋盈利就即係用左50億,淨現金剩42億,如同樣力度搾多一次下年就0現金,唔計增長每股盈利0.57港元,計埋就0.64港元

每股盈利0.46派0.165,派息比率36%,下年現金仲算夠可派0.205,再下年現金不足就可以能冇得加

由於混入左金融業務,最終佢的報表會演變得同晨鳴一樣咁難理解

錢都係呢幾年先借出去,唔會一借到手就即賴數掛,學D共享單車咁,阿龐氏一般都可以頂到三幾年,在一年兩年呢行內應該仲安全,樂觀觀測

磨菇雲就冇得講,暫時青島港還未表現出甚麼大缺點

4股青島港兌到1股招商局時,味皇應該會換馬

CTM業績

利申,今日2.4買入50000股CTM

味皇係澳門人,所以知道減網費CTM會好大獲,固網減網費10月開始到年尾有3個月,網費減25%的話全年網費會係94%,下年75%,至少味皇由15M轉左50M光纖反而網費低左2成(另外Mtel仲未有網線到味皇住果區),相信大把人會因此放棄電話線,連同電話,實際上也是咁

全年CTM盈利上升6%,營業額當中9.2億歸類為固網兼SERVER,上年8.3億,差距9000萬,先不考慮固網增長的情況下,固網收入少6%但整體收入多9000萬,即係話增長的部分都是來自SERVER,前年CTM未搞SERVER賺7.5億,上年搞左賺8.3億,而當中固網有增長,因此上年CTM的SERVER營業額可能在5000萬以內,當7.8億為固網收入,94%是7.3億,推出今年SERVER收入是1.9億,下年固網收入跌為75%5.9億,暴利的SERVER應該足夠填補,同業的新意網營業額在10億水平,而政治上新意網不可能是CTM的對手

由於中國電信甩左CDMA深似海的原因,同CTM可以形成競爭,最終CTM其他收入都會有減少傾向

總體而言除左SREVER一項,其他項目前途都麻麻地,他們的關係,圖解會比較易明

其他業務,縮到極限最多係0,而SERVER的擴張極限則是無限,現時息率也有5厘,PB又低,等疙瘩兄弟成長也等得起

台灣樓

是咁的,有人問台灣樓,由於味皇在兵役年齡,暫時仲未有出手意思,所以我講一篇算數,呢度用味皇旅行去過兩次的高雄做例子(月尾可能會去第3次)

首先以退休等死的深山野人黎講,下面呢個係奮起湖的地皮點睇? 1坪=3.3平方,大約1500平方米的地皮,有馬路,真仙境....海拔1500米,山泥?地震?冇水電?自己決定啦,反正是有人區有人住,同未投錢落去之前的清境農場差不多,大部分係錢可以解決的問題

台灣起屋7萬一坪可以起到相當豪華,呢個例子比多些少運費起個山寨唔難,就係維持費較高,如作投資用途需要的不是財技,而是營運技,例如扮溫泉之類的

之後以退休等死的山野村夫黎講,下面呢個係市郊城鎮的地皮點睇? 大約1800平方米的地皮,水電都得搞,可以用黎解決各種私隱趣味...不過地皮係農地用途,可以搭棚屋,但唔可以起樓

如作投資用途,炒作方向來說,首先唔易賣出先,但收租方向則有機會挽回,唔係租比人種菜,而係用黎放太陽能板賣電比電公司,以1平方米發90W電發5個鐘計,可以發到80萬W的電力,初期投資有點貴,賣電回報率一般有3%,電費有加冇減,主要是電板高架些少的話地皮繼續用得,風險係台風同洪水

咁呢個唔係山野村夫,而是IT狗,咁掘個"摸戒"哈比人的狗窿住咪合法囉

之後以怕無聊的老司機黎講,下面呢個算是高雄市內的地皮點睇?生活性能可以,35平方米左右,可建地面60%即係21平方,地積比200%可以起70平方,即係3層半,地面果14平方做花園又好做流動廁所又好隨你,當然你堅離地全屋高架地面做車位都得,起足70平方的豪華丁屋成本490萬(減工減料350萬),合共600萬,賣得出的話平常有賺,但有增值稅結果都係冇得賺,每層租3000-6000,回報不超過3%,純自住呃移民

但呢個世上有劏房,雖然唔係咁好開口,如果以高香港人居住標準的3倍黎劏,最少整到6間,用代管公司改善管理提升租值,收費大約租金兩成,買埋電器,淨回報率應可升到4.5%

本文唔舉D極品例子,費事比人話鼓吹蝗蟲行為

之後以宅男腐女黎講,下面呢個算是高雄市中心電梯樓點睇?臭河對面,35平方米左右,咁嘅殘樣租4000左右,但係有管理費,回報5%左右,可以作補充投資

但係唔係買左就好,台灣有D稅好似係以幾多層就加(好似4層),持有細屋會影響你第時買大屋,所以換買大屋之前D人必定會放細屋,所以有得平,但買得平賺到又要增值稅,所以學日本咁,啱租唔啱賣

自住的話呢D足夠的實用性

台灣樓跟日本法律,用47年折舊,樓齡47前的有折舊扣稅,同時亦要多D差餉,47年後層樓就淨值0,冇折舊,冇差餉?

市區唐棲,呢間以香港標準叫千呎豪宅,就咁租8000-12000?,如果目的係收租的話都係比代管公司劏的,回報率就不說了,選唐樓唔可以選高層,你可以見到好多5樓的唐樓放,但低層就冇,唔同香港,台灣人租樓大把選擇,駛鬼同你行

下面是胸懷大痣的人向的

市區一棟唐樓,係一楝~~,處理方法基本同上,而呢種有埋舖位,天台,外牆同走廊,天花位你都可以用,發揮想像力就好

主要係例如坐移民監時,理論上你係1樓打PS4,樓上租比人或AIRBNB,一年後就你有居留權

回報率睇你點處理,自住當然合適,除左飛機嘈之外

成棟當成1間屋,大金額係冇人要上面間開放式,人人都揸呢D

呢間地點唔差,留意間殘屋只有3層,地皮92平方,建築面積172平方,未用盡地積比,可以加建,呢個例子返新會好D,如果係兩層建築面積120之類,就值得拆建了

至於追求極品居住性的,選貴的,用銀紙扑落去,扑錢是不二之法,當然,最好唔係扑台灣,係扑紐西蘭,冇錢就退而求其次,去到邊度做人都係咁

大致係咁上下,味皇自己就睇中高雄對面個島有間極品,港幣50萬,不過由於味皇未過兵役年齡,兼50萬又未夠辦証門檻,所以睇下就算

以上樓盤都係永慶度睇到的

至於民國的稅制味皇冇研究過,所以唔太清楚

日本買樓攻略改(4)

無論一格廁紙還是一條用過的衛生巾，也有其價值，日本樓雖然會貶值，但一樣有其利用價值，特別係最近美金升，港樓又升，大陸樓又買唔起，澳洲同英國樓都炒高唔少，全世界得返東南亞同日本郁得少幣值又跌，或者都可以考慮，味皇唔識英文但睇得明漢字，因此這裡只講日本樓

首先在回報率上，日本樓並不算特別高，只是租值特別養眼而已，雖然日本樓有疑似見底的跡象，但最好不要以“高回報”為前提作投資，因為買入後將會面對各種香港不曾出現的問題，適當地降低期望值會對心理更好

個人認為，日本樓實際上是財技性大於投資性的操作，日本樓適合的人群：

1．想隱藏資產的人

例如有申請項目同資產審查有關的人，因為審查時一般比人問到的都是僅指本地資產，如果有人住公屋又每月有近10萬人工，只要錢不留在本地，他賴皮不走的概率會較高

例如不想給別人充公資產的其他國家人，他們一般會買香港樓，因為充公的魔爪不過深圳河，但換成香港人時2047對策之類的唯有買海外，比如B嫂分B哥身家而B哥外地仲有收租樓，B嫂：“臭男人，還有沒有！”，B哥：“你話呢”，同理，給兄弟分身家也是同樣原理，如果有海外資產，還有機會留番些餅碎，日本樓和一般的投資項目相比，其實更像是一份“人生的保險”，當然你必須先把嘴上的拉鏈拉上，把所有值錢的東西都蓋上禾稈草

請不要用看特首的眼光來看我，會害羞的

2．想分散資產的人

香港打份工，交緊稅，收入增加再交更多稅，但你沒有在海外打工，你得到的海外收入會有當地免稅額，可以賺免稅低稅收入，又避免向港府多交稅，下至公屋富戶，上至特首也深明海外收入的重要性，實際的例子講，香港雖然稅率低,但你香港月入5萬的淨收益，應會少於香港月入3萬，但另有2個海外國家各收1萬的總和

可以想象一下，工作收入是一條水管，可以出水50年，股息收入是一條水管，可以永久有水但每次多少不定，本地租金收入是一條水管，水量越來越多但不知道何時制水，利息收入是一條水管，永久有水但水越來越鹹，當你想到水量已不是現在的你最優先考慮的項目，那麼考慮再加一條水管平均一下流量亦未嘗不可，日本樓最少也比保險公司的年金紅利更靠譜一點

香港用美金，海外收入可以一定程度對沖匯率影響，例如大創百貨同樣的商品在港澳賣15元而在日本只賣108円，你有本事的話可以在低物價的那方消費，網上購物的話，無論郵費還是貨價也是日元訂價，例如用paypal或信用卡消費，這會較易利用匯差消費

本地投資機會缺少，值博率低，或者是回報率不高，因而將目光轉向海外，英國樓，日本樓，橫琴樓等風氣都是近年才興起的，熾熱程度和本地樓價成反比例相關

3．想要日本居住權的人

買日本樓同永住權是完全不相關的，但去日本留學同去日本創業之類的入境批文卻和你的蝗蟲程度相關，海關會評估你是蝗蟲怪人還是懞面超人，如果當地已有樓，就能證明你去當蛀蟲的風險較低，放行機會會高得多

但之後也要依正常途徑留10年，例如讀書4年加6年打工或者開公司留10年，好像近期對專才（有錢人）會放寬至5年甚至3年

另一方面，申請日本居留權需10年的工作証明，而所謂的工作證明，就是交稅證明，如果我們針對這一法律漏洞，特意去買日本樓，收超過38萬的租又交了稅，儲夠10年的收據理論上就合資格申請居留權－－不過未經實踐證明

部份城市例如福岡在6月28日出了新例鼓勵外國人在當地創業，即時能獲得簽證，在當地成立公司用法人名義買樓買舖也許都算是創業的一種，具體要視乎當地的政策，只要拿到身份，貸款就容易很多

在這裡還要說一說，日本是很好住不錯，但日本居民可不好當，日本的稅收很重，居民的海外收入也要征稅，如果你香港有免稅的生息資產，當了日本居民反而要多交稅這就得不償失，這實際是防止日本人走資去買海外資產的稅，永住權很好，但也要比較一下利益得失

4．想獲得定期收入的人

要強調一下，日本樓是不升的，租也是不升的，最好要有這樣的覺悟，實際上日本樓和香港的收息股相比，根本沒有多大優勢，但隨便一個散戶，即使手上的是績優股，也往往無法安安樂樂的長期持有，炒出炒入反而更易蝕錢，主要原因是股票太方便賣買，卻看不到摸不著，沒有信心，可是隨便一個業主，即使手上的樓破破爛爛，也可以再KEEP多十年八年，先不論最後賺不賺到錢，但業主都比股民更有信心賺到錢

於是我們可以利用這種心理，買入日本樓，收來的租金拿來買收息股，這樣就能利用來自物業的信心同虛榮感，轉化為持有收息股的耐性，而且由於是用“收入”作投資的，完全沒有損失“老本”的心理負擔，健康同金錢上都有得益，而且日本樓及收息股，都是累積型的，例如你今月買入1萬，每月可以多50收入，下月再買多1萬又再多50,你會明顯地感到明天會更好，有了夢想後，你就不再是鹹魚，是鹹人，回報方式雖然老到掉牙，和十分緩慢，但卻非常有效，而且心理會健康

這其實就是魯迅說的精神勝利法

當你就1億夠你用到老死，但沒有人能忍受戶口的數字越來越少，但是如果每月不用工作有5萬收入直到老死，誰也會覺得滿意，就算能活到120歲，一生也是收7200萬，比1億少得多，可是生活卻更快樂，這樣說可能有違香港的核心價值，但我們追求的應該是肉體和精神健康而不是為金錢而變得神經衰弱

5．橫財轉正財

味皇不排除有人會中六合彩或賽馬，也許下一個就是你，人如果沒有任何幻想空間的在香港生活，可能明天就跳樓了，雖然突然多出來的財富通常以遺產居多

有些人天生沒有金錢慨念，有些人一持有財富就不自在，有些人會突然冒出很多親戚，我們經常會聽到有人口了六合彩，數年後卻一貧如洗，有球星賺很多錢，但退役後就破產，希望讀者有自知之明，拥有不聚財的體質的話，就不要浪費金錢賭博，反正最後就算直的贏了錢，你還是會變得更慘

萬一得到一橫意外之財，把它轉換成日本樓也許是不錯的選擇，你可能看上日本樓收入的固定性，把一筆錢變成出糧，可能看上日本樓買賣的限制性，令自己總會有些賣唔走打底，也可能看上日本樓的親戚會減少的功能，銀行存摺金額變少以便在別人面前扮窮

不過最終還是打算留給後人的話，要注意日本有遺產稅

6．抵銷供款

由於租金是定期固定收益，雖然未算100％可靠，但你也可以用來抵銷在香港借錢的一些每月供款，有些地產可以提供每月匯款，就像出糧一樣，對精神健康及貸款能力大有脾益

同時你可以因應現時所拥有的被動收入，在香港進行借入合比例的貸款進行槓桿投資，例如收息股，i-bond之類的

7．當成酒店用

如果拥有收租樓，遇上租客退租的情況是必然的，由於我們可以免簽證逗留日本90日，因此閒的發慌又不愁衣食業主可以乘空租的時間，選擇到日本小住一番，比住酒店便宜多了，最少便宜七成以上，而且可以順便去地產處直接把之前寄存的租金收回來，免去了一次匯款手續費，如果朋友之後也想去日本，讓朋友接力住也可以

木屋基本上沒有太多用途限制，但要注意大廈有業主主委法團，像一樓一的出出入入小心會比鄰居篤背脊，做一樓一選一樓是基本中的基本

8．虛榮心

在朋輩中炫耀日本業主的身份，話題性十足，放上fb上立即就會吸引人氣，對某些人來說是生活的一部分

這裡舉一些趣味例子：

B哥由於一些原因需要申請破產，在之後的4年內又維持到大魚大肉，那麼B哥有可能用朋友名在海外有收租樓，或海外樓的租金存入朋友戶口中，這樣4年間就有朋友接濟了，B嫂問起就說，出外食朋友

B嫂是大花筒，每個用月幾十萬買手袋，可是手袋一般沒有那麼貴，而且自宅的手袋存量看似也不多，那麼B嫂有可能用買手袋的名義拿錢買了海外收租樓，B哥問起就說，錢整容時用掉了

某議員住在公營房屋需入息同資產審查，而他收入多且經常賣旗籌款，那麼他有可能在外國成立了“某國際慈善投資管理股份有限公司“，他把錢都捐去那公司，而公司就去買樓那樣，有人問起就說，錢全捐了做慈善，我很窮

某官員所在的國家存在沒收個人財產的執法手段，所以某官員把財產都搬到沒有沒收個人財產執法手段的特別財政區內，甚至在此長住下來，但想來想去還是覺得“我要真外國“甚麼的，於是在各國播種似的留下財產同親屬

總括而言，買海外樓很多都是有些奇怪想法在本地限制下難以實現，於是就索性採用脫離“本地“或脫離“限制“的手段而買了外國樓，如果單純是比投資手段，本地不一定沒有更好的選擇

換入樓D

早前大約210賣出樓齡30年的樓C,剩下約110萬,現在以19X換入32年的樓D,借款期限最長的中銀,大豐同永亨可以用55年黎減,但得建行肯借比冇收入証明的味皇,而且只有40年黎減,因此樓D唯有落屋企人名

以210萬計算,樓C的租值在3.1-3.4厘之間,味皇的現金流在200~600之間,淨利潤3000左右,而今次的樓D,由於澳門特色的特殊因素,租值有4.9厘(剔除這因素只有3厘),打算借120萬,變相套現30萬買太古收息,現金流估計增加為3200,淨利潤7000左右,屋企人唔食夾棍的話算是再加薪

不過層樓有人住所以冇睇過樓

另外有D野要聲明下,早排湯兄係專欄度提到我的內容,有幾多係唔啱既

1.湯兄話我發覺賭業賺錢,所以失業的味皇先走去做荷--實情係當時沙士,味皇在這段時期見了好幾份工投左唔少求職信,這些工作人工3000-7000都有,結果係冇一間肯請味皇,不是味皇不肯做,是別人嫌棄,事實上當時的僱主由嫌棄人轉變為比人嫌棄之間有大約2年的時間差,當年沙士年失業人口唯一的出路係做荷,而味皇在這期間入職,唔係就冇飯開,味皇大意是說,因為援 交好賺錢而去做援 交賺到錢,同做左援 交之後先賺到錢,是有若干不同的,僅在精神層面上來說

2.湯兄話當年我"乾坤一擲"賺左大錢--當時味皇將全部定期存款投下,但按絕對數量來說,也許只是幾個月人工,即使賺一倍兩倍總體%數也不是很大,況且邊有賺幾倍?

3.湯兄話我膽博膽方式買入第一層樓--當時兩房單位樓A賣117萬,租金3600,約3.7厘,而3600相當於一個牛荷人工13900(港元折合)的25%,呢度有點可以預測,一個牛荷可以輕易租下這個單位,兩個人加埋更不在話下,澳門未來會全民皆荷也是可以予見的,而味皇推算一個牛荷租一個一房單位比4500,即人工的1/3也許會開始手緊?而味皇判斷兩房的租金在6500水平(而當時兩房3600,一房2800),味皇認定澳門的租金會上升,而用3.3厘計算,買下樓A有相當大的水位,同時3600租出後,味皇支付的供款只佔味皇人工的12%,味皇是非常保守的,價值投資,絕非膽博膽,另一方面,味皇可以明言,所有包括各位身邊的朋友中認為是膽博膽的人,是不是都有非豪宅不買的傾向呢?而味皇只買舊的2手樓,我不希望自己變成宣揚膽博膽的不良教材

4.湯兄話我因為樓價水漲船高而買入樓B--樓B其實是租大於供的,有能力想買多少也沒有關係,樓價升不是因素,順便再提下,樓B以4200租出,供款只是2400,當時牛荷人工也升了少少,因此租值潛力也許再高些

5.湯兄話我身家接近一千萬--台幣嗎?如果定義501萬叫接近1000萬,味皇就冇話講

其實買樓同股票差唔多的,如果將樓同股票都同稱為"資產",咁就文字義意上是一樣的,可以進行價值投資撿煙頭,味皇主打的項目名為"生息資產",而"生息資產"的評估標準係息同質,因此形成:評估兩項生息資產,息相近,那一個更高汁?質相近,那一個更高息?或者就是另一項生息資產是否全面比原有的好

舉例說,如果生息資產一個3厘息,一個3.5厘息,咁無論呢個生息資產係兩層唐樓還是太古的AB股,意思也是差不多的

不過換樓800呎換成500呎(樓A,C),500呎換成300呎(樓D),16年樓換成27年樓(樓B),30年樓換成32年樓(樓D),將收租樓公平的視為生息資產而唔認為是越換越差呢點就唔係人人接受到

早兩年賣樓果度,層樓的租值只有不足2厘,先不講有冇炒高,樓價高唔高唔剩係話厘數低就實係,當年澳門的人工增長到頂,之後幾年都唔駛旨意加,除左公墓猿基本冇人會加人工,因此味皇認為租金冇得升,此時不賣更待何時?(當時2房租8000,1房5500)換成股票呢樣生息資產,要買就搵派息將會增加的,要賣就搵派息將近到頂的