上年買的股票

味皇有廿隻股,包含了還算多的行業,舊有的呢排冇點升,而上年買的基本都係最近升,其中,發現熱錢冇流入REIT,冇流入地產,冇流入電訊股

然後,味皇手上近期升得特多的有四環,晨鳴,齊魯,羚邦,開始動L的有日照,普星,佳華,雞扒,相反之下炒到好高的美蘭就開始回落,相信市場由炒消息轉為炒業績

話說上年新買了好多隻股,除左日照,普星,羚邦有專門出文,國銀同齊魯係橫評出黎,其他基本都係買入時提一句原因,咁現家補充返

日照,普星,羚邦參照同名專題

國銀同齊魯參照大陸飛機膠股同公路股評測

四環,雅士利,強泰3隻有個共同點,之前有一次性攤銷虧損,今年應該冇,買黎就係博佢虧轉盈仲可能有返派息,其實羚邦同樣也是有一次性攤銷但未至於虧損

佳華係比湯財點左去佢個場實地考察,味皇係佢市值0或者負數的場視察過,其價值應該係正數,味皇買左冇耐就通埋地鐵

首機買黎代替美蘭,首機市值200億而美蘭又是200億時,換成首機不算智力測驗

上年增持的部分,晨鳴係唯一自給自足的紙企,大悅城同華南城通地鐵,惠記因為停收幾個月路費股價再打折,漢國建業同CTM開新SERVER,新創建就冇乜特別原因純粹想加到齊頭數

除左新創建同首機冇咁煙外,其他全部都係煙都唔煙的煙頭

另外觀察名單而上年未有買的仲有秦港,遠航,應力,鐵建,雞扒

雞扒今年買的,因為佢賣的就係雞扒珍奶,買入理由同當年買周黑鴨完全一樣,成本夠低現金夠多

味皇有D期望買入果堆今年起碼有一半業績後做到10厘股即食

日照同強泰人事上有重大問題,可能存在老千風險,味皇現在考驗佢帳簿重要定係名簿重要

四環味皇買入係博虧轉盈食一水的,本來預坐一兩年時間,2.4咁樣開始分批賣,但是來福太快,而且佢自己主動出一堆小動作,完全同味皇的買入理由唔乸更,超出味皇預期,因此味皇放長眼光睇佢表演,暫時唔賣

覺得現家只係印銀紙之類的貶值反映左係股市而仲未反映係物價上,沽空會比人夾的話個個都搵返正常野買

照現時情況,今期業績期的好業績的股反彈力度同速度可能會超過以往好多

現家的新股指數股味皇覺得不知所謂,指數就黎連參考價值都冇,如果說快手可以有1萬億市值的話,米哈遊如果上市豈不是10萬億?

兩格廁紙

相關題材舊文廁紙&手指

相關題材舊文直腸括約肌(當時有MK仔拍大劣人周街痾屎的新聞)

是咁的,味皇上年尾照完腸鏡後,現在都用比較多格廁紙,凡事都要因地制直,如果說一格廁紙大法要骨灰精奇天賦異稟,咁用唔到就唔好夾硬用

抆屎可能需要精確的作業,需要更精確找到屎眼,更精確的控制紙張大小,但佢不可能追求精確的結果,你抹一次同抹一萬次,也不會真正乾淨,你加大力量抆,最多也就指甲留香,徒增苦痛,你在廁紙上擠點牙膏還是直接換成砂紙,把屁眼拋光拋光,也不會真的清理乾淨,頂多就是有些冰火作用而已,點樣為之抆完,問你自己

你抆得一次,抆多一次,如何感受,一個人順便已足夠

抆屎,你的努力可能反映在上面,但點都唔會完美,你可以設定寛松的標準,也可以設定閹尖的標準,或者標準每日變,隨心而為,抆掂,永在心,聞外看,新生趣,味皇是講環保的,味皇抱著好好學習,天天向上的精神,係度又分享下同屎戰斗,同自己戰斗的心得,曰:與屎鬥,與尿鬥,其樂無窮

屎係一個變量,有時一格廁紙可以滿足,有時多多都唔夠,同時廁紙也是個變量,有時一格可以抆完,有時多多都唔得,你點抆點為之抆完,也是變量,為屎相對論也,咁好難比較,因此呢度狹義一點設定屎係同你係一個靜止狀態,只觀察廁紙的變化

當用比較大量廁紙時,有人一次一格抆一下掉,有人一次3幾格,對摺一兩次抹一下就掉,有味皇一次兩格,對摺抹一下再對摺抹多下再對摺閹多下,多人多樣性,但就以這3種為例,假設呢度設定抆15下就算數

一次一格--總共用15格,但是面臨穿破風險,對摺7.5格,即8格

一次3格--總共45格,手指應該冇感,對摺抆多下的話22.5格,即25格,摺3次需11.25即14格,摺4次5.625即8格

一次兩格--總共30格,手指應該有點風險,再對摺的話15格,摺3次7.5即9格,摺4次3.75即5格但面積可能有點細

一次一格,表面上最慳最菇寒,卻不但面臨第一次接觸,還要面臨第二次第15次接觸的風險,實踐上可能8格,頂多就4格

一次3格,風險最低,但這樣的人首先就不一家肯返閹幾次,用45格的幾會大,肯返閹幾次的話,可以去到8格,再摺就可能太厚

一次2格,風險一般,最多30格,返閹幾次可以去到5格,摺少一次就9格

對比一下,1格廁紙面臨大風險,下限高,但上限都用了8格,3格廁紙,用45格,換成怕屎環保人士用8格,2格廁紙,下限30格,上限5-9格

結果不是線性的,太菇寒反而做成浪費還要面臨風險,太潔癖會做成大量浪費,環保用法可以用少很多,但摺的次數越多效果就遞減,收尾時有無謂的損耗,中庸的部分能取得比較好的效果而環保的結果較好甚至最好,超果而言,在你覺得風險可接受的情況下選的最低格數,會比一味求少同一味求穩效率好,因為前者因小失大,後者一定程度後會受限制

用係投資上,有時想要最平的可能反而最貴,想要最安全的多數最浪費,你想在最安全的上面搾出更多的價值,可能會有較多的損耗結果不是最佳,在你覺得風險可控的程度下比較實惠的,一般會有較好的下限表現,視乎你摺同抆的投術還可以更精進,好多時最有效率的不是來自頂端同底端的項目,而是來自中庸偏下的項目

味皇是說,邊條粉皮亂9掹曬廁所D廁紙

如果問30秒大法的話

30秒大法簡單一句講曬就係排除法, 例如你有100隻股要連續分析,你總不可能每隻都用10分鐘睇,30秒大法唔精確但夠快,大致係味皇2009年3月到5月寫的其中的一些內容,30秒大法味皇姑且象形命名啫,等於林平之的躺屍劍法都係咁嘅原理命名

公司有幾種,一睇就知壞的,硬係覺得有D唔妥的,麻麻地的,有特色的,一睇就知好的,類似咁樣

味皇打開隻股的5年數字,先開資產負債表定先開現金流量表睇是隨機的,共同的是,一睇就知壞的可以係是但一個表上都分到出黎,過程只需3-7秒,當你第一時間就能排除左垃圾,而垃圾估港股幾千隻股的3/4,咁你以後的工作量就少好多

資產負債表睇的主要係股本,負債,存貨,現金,資產,現金流表睇的主要係經營現金流,利息,稅,股本,有大問題的大概一眼就能睇出問題,至於金融銀行股,佢地報表唔同人,30秒一定超時,不過味皇不買就行了

一睇就知壞的,是但一表睇一眼3-7秒

一睇就知好的,味皇會打開未睇的另一個表,睇埋確認多次,30秒之內係OK的,但睇埋市值淨值就會超時,貴的排除,夠平的話,事後你一定會另外搵時間詳細研究,30秒以上

一眼未能得出所以然,30秒內睇曬兩表,你硬係覺得有D唔妥的,覺得冇利用價值就直接排除,30秒內

30秒睇完覺得麻麻地的,用多5秒睇埋市值淨值,唔平的排除,超平的就再研究,30-40秒

有特色的,就是一眼可睇出邊度怪怪的,睇完兩表再睇埋損益表有冇特殊項目,再睇埋市值淨值,超過30秒

如果只是判斷隻股好/爛/排除,30秒內一般可以搞佔,但估埋值就一定唔止

由於港股3/4都係垃圾,大半都係幾秒就能排除的,你睇返味皇的批量分析舊文,凡是垃圾股的評語多都是一句起兩句止,因為味皇就只看了一兩眼