GA數一例

如果味皇圖文並茂咁講解某D大型知名股而引起茶杯裡的風波,實為不美,講國王的裸體同驢耳朵的屁孩的故事如果在後面加多一頁,內容9成係屁孩必須死,味皇也沒有打算比人的去飲茶,因此今次用相對不知名的股做例子

表面上佢上市前到剛上市後盈利都有增長,市值最高去到55億,派息比率20%左右,利息支出比較多

本次題目係睇佢GA係邊度

如果用法術從空無一物的ATM提取1個大雄出黎,等式係咁: 0  -> 0-大雄=-大雄,  平白多個大雄即係另一度欠個大雄而處於負大雄狀態

回正題,盈利點講都得,但盈利多左就會多左資產,如資產係召喚出黎咁就要有同等的負債,會計先平衡到

其實計算之前,我地用C眼都可以睇到佢有乜問題--債越來越多,存貨越來越多,屯積相當於5年盈利的存貨係唔係真係做生意?起碼2012存貨先同盈利數字差唔多

假設味皇開設吹氣公仔飛機杯生意,味皇想用藝術調劑下盈利數字,可以有多種方法,1.比如話發現隻飛機杯原來係名人用過有味限量珍藏版,升值N倍,2.比如話予約發售分期付款,搵堆MK仔企街叫人買會籍啪啪啪卡,3.比如話聲稱買人地個2手飛機杯但賒住數先,飛機杯一到手就媽媽咪呀我捧杯呀咁嗌,4.其他

* 1.盈利增加扮資產(固定資產/投資/存貨)增加以後減值 2.盈利增加現金增加負債增加 3.盈利增加資產增加負債增加 4.一時諗唔到   其中1最陰濕,因為用左隱藏技能

上面的例子,味皇推測係3

例如2016年咁,佢固定資產增加1.8億,上年盈利2.3億,現金流表派0.5億即保留1.8億,剛好平衡,發左3億新股,現金多3.3億,但債多2.1億,數字缺口1.8億,其中1.4億係存貨度,0.4億不明

2015年存貨多1.2固定資產多1.3,上年盈利2.1億,數字差唔多,但賺到錢又何來債多2.2?之前2014年又係咁,集資7.8億,資產多9.9億,佢賺果2億加埋去資產,咁1.9億負債又何來?

2013年上市,佢淨負債冇點,盈利買曬存貨,咁買曬存貨的盈利到底算唔算賺錢呢?要睇D存貨將來賺唔賺到錢,例如賣得出或炒得起,基本上係判斷唔到幾成真幾成假,以小人之心度中國人之腹的味皇或許會認為佢在上市的敏感時機,可能使用方案1的大技,2014年後就兼用方案3的賒數

(隻股本身的業務黎睇,D存貨用黎炒河粉就得,炒升值都幾唔喇更)

味皇推斷佢2016-2014年上市後3年的盈利數字為3000萬,-2000萬,2000萬(唔準),同佢聲稱的差好遠,反正就係隻ST股

港口股業績

6198青島

營業額+16%,盈利+29%

負債多近廿億,而資本多近90億,其中重要原因係發新股,今期固定資產冇變,但多左40億現金同30億投資項目,增加的盈利相信來自呢度,同時負債相對較少

盈利由上年的12億變15億,即多出的3億來自上面果70億,上年固定資產116億同51億投資產生12億盈利效率7%,30億投資同40億存款利息產生3億盈利效率同以往差唔多,因此青島港的經營睇唔到太高的忽然劣化或突然爆發的可能性,假設青島港有40-60億閒置的現金作投資,7%效率可以增加2.8-4.2億盈利,因此青島港未來的盈利最大值18-19億,半年每股人仔39仙,全年賺8毫派28仙,如果唔投資齋自然成長估計全年賺68仙派23仙,換成港幣PE10為7.5,息率3.5厘為7.3,味皇認為佢PE再高少少都得

3378廈門

營業額+55%,盈利+80%

盈利1.4億變2.6億,佢固定資產+投資比上年的93億多14億,上年效率1.5%,今年多出的8.5%,簡單講唔係成長高,而係之前基數低,新項目的8.5%效率比青島的好,幅度又唔算離譜,有錢的話應該可以繼續

但佢現金少左4億,得返7億,同時欠債多左9-16億,可以話呢次成長係出盡奶力,因此冇持續的可能性,同時欠債多派息比率會很低

估計全年賺20仙派6仙,換成港幣PE10為2.2,息率3.5厘為1.7

3382天津

營業額+6%,盈利-4%

固定資產同投資基本冇變動,採用無為而治的方針,淨現金也變化不多,腳步完全停滯,佢本身欠債還算多,扭毛巾都滴唔出水,因此唔好惗佢有太大的自然增長同收購增長

匯兌收益一次性兼佔比例大,估計全年賺11仙派3.8仙,換成港幣PE10為1.2,息率3.5厘也是1.2

144招商局

營業額+少少,盈利+好多,主要係特殊收益

佢會派1.35的特別息,由於可以股代息,因此招商局的支出在0-42億之間,佢現金154億,負債比上年借多52億,扣左剩102億,派0-42億就剩60-102億,佢總債務也不過30億左右,因此有增加投資的財力,核心盈利持續增加不成問題

由於有特殊項目就不計今年的效率了,按以往的約7%效率,唔借銀行,投放30-70億能增加2.1-4.9億盈利,即半年7-16仙,佢核心盈利78仙,加埋全年1.7-1.9,派9毫,未計中集的部分

招商局港口部PE10為18,3.5厘為26,中集的部分業績比較難估計,賺8毫以上應該冇問題,因此招商局折讓還算高

大連港同秦港冇利用價值就不講了

以前提到,味皇將1.2的天津換成3.85的青島,如出現4股青島兌1股招商局時就再換成招商局,現家天津1.2而青島5賺到左,但寫文當時青島4.7招商局21差左D而未換到,現家青島5招商局25拉開左,但以估值計7.3的青島4股還有些少可能換到29蚊以下的招商局,所以仲未駛絕望住

REIT業績(大陸)

由於大陸稅改,大陸REIT的業績同時出現一次性影響,所以唔同本地REIT撈埋講了

1426春泉

半年減派到0.95,股價3.5計,全年可能低至只有5.4厘,已經唔算高息,主要係發新股攤薄左一成,而收入追唔上攤薄,收購英國樓係7月完成,而業績計到6月,新股係之前發行,因此攤薄即時見效,但下一期開始先會計入英國租金,照道理派息會回升,假設英國租金提供到一成的收入,下期派息10.5仙,全年6厘,假設提供到15%的收入,派6.2厘

營業額平穩,舊租約同新租約相差唔係太大,佢樓下地鐵起好照計會加租但實際唔見佢點加,因此續約加租的潛力有限,出租率93%,旁邊有地盤就起好?形成競爭?出租率上升的機會比較低

租金少2.6%,佢話唔計稅改就多0.9%,前後當係3.5%好了,唔考慮加租,上面6.2厘也不過是變6.4厘而已,因此春泉股價相對貴,同時前途也不是特別好,加租速度有可能低過管理費的攤薄影響派息

87001匯賢

租金多0.5%,而佢話唔計稅改就多4.3%,前後當係3.8%好了,同春泉大概相近,姑且租金增長比春泉高,下年國情相同的情況下匯賢租金增長應繼續高過春泉,可能由於匯賢一黎唔係全部係寫字樓,二黎帝都以外有樓的關係

派0.1377,股價3.07計,全年派9厘

匯賢帝都的樓加租在3.8%甚至3.5%以下,所以果度租金變成跌,但稅改應該係全國性的,佢帝都以外的租金都升好幾%,所以加埋可能有高單位數,拉上補下仲有得升,因此匯賢租金繼續上升的機會較大

佢將部分空置的鐘仔酒店房改成劏房出租,即係消耗潛力換成較低的即時效果,舉例形容就是,勇者有6000HP上限,但扣左血得返1400,手上沒有紅水,勇者使用特殊技能即時回血1000但HP上限減半,原先1400/6000變成2400/3000,而這扣HP上限的副作用一時半刻無法解除,第時即使撿到補血都食唔返原來咁,現時匯賢的酒店就是這種情況,如果旅遊業好轉有人入住時,長租左劏房的短期內趕唔走就會浪費酒店的潛力,當然現家呢D時候乜機會撿到補血,特殊技的實益大於機會成本

9厘扣返一次性的3.5-3.8%開支變9.3厘,如加再租4%就9.7厘,管理費攤薄2%變返9.5厘

405越秀

租金冇多冇少,冇特別提到稅改,可能性一:政令不出中南海,稅改未係或晨早係妖都實施,可能性二:越秀租金多左3.5-3.8%而佢冇提

東塔起好招租,越秀照計冇乜可能係呢種時候加到幾多租,而實際情況係西塔加租8%,其他甲乙寫字樓跌1%,即係話東塔吸走的是甲乙租客但吸唔走IFC本身的抖甲租客,IFC佔越秀收入6成,因此越秀的租金還可以維持向好,按西塔的經驗,東塔應該兩年內裝滿,到時甲乙就會回到原來的寫字樓而止跌,但越秀的白馬大廈租金大跌,白馬大廈係商品批發的超寫實商業模式,賣衫比淘寶打死就永不超生,白馬大廈收皮了,就好似電腦城咁,現時白馬大廈佔越秀租金2成,假設白馬大廈未來租金下跌1/4,則IFC需加租9%才能打平,兩方都有相同的可能,因此越秀的派息前景略為闇淡,將來應該會維持或微減,但是基數改變後越秀會開始向好,白馬大廈第1年跌1/4,第2年再跌1/4,想打平IFC第1年需加租9%,而第2年只需6%,第3年需求更低,咁IFC加租6%的機會點都比白馬大廈血崩的機會高

補貼過期,以後不用考慮呢點

現派15.66仙,股票5.15計6.1厘,估計變化不大

87001>405>1426

短期87001加到租的機會大,派息高

405同1426加到租的機會一樣咁細,派息水平應該差唔多,但兩年時間以上考慮,兩年後405的處境應該會比1426好

無事生還

雖然味皇也遭遇到一些危險情況,但總算無事生還,不過離味皇50米附近也出現遇難者

最高水深會比這高50厘米,而且相當的急流,姑且拍左片但上傳唔到,就係對面停車場吸左人入去,說明一下,最近呢區比人叫做"低洼地區",但味皇住咁耐只係水浸過兩次,因此味皇不認為呢度本身係低洼

味皇遇到的危機是回到大廈但防火門因水壓差而打不開(門外水位高門內水位低),當時大廈內水位己過心口仲上升中,街外接近兩米,最後要3個精壯男子踢爛防火門才能逃生

味皇過左4日以上冇水冇電冇上網的日子,頭兩日齋食公仔面,而公仔面用元寶臘燭燒黎煮,冇風扇只能睡地板,冇水腌鹹魚,冇電梯唯有日行N次樓梯,住地面,住高層,行動不便,養大狗之類的人的生活實在難以想像

上面個停車場抽左6日水先抽乾,,青州經屋現家都仲抽緊,水浸地區所有銀行同超市到現家都不能營業,好多學校唔見左屋頂,澳門的百年老樹基本冇剩,據說陣風時速最高240KM(大橋),持續風力比不上其他大台風,但怪風應該算歷來最猛

打風當日電公司水浸斷電,電訊公司冇電而斷訊號,電台冇電而停止廣播,水公司水浸停水,停車場冇電抽唔到水,冇訊號打唔到999,條街水浸出唔到消防車,有消防員但唔夠人手同時處理,救人裝備冇電濕水只能用手動或電油工具,情況大致係咁

救災同清理主體以義工同差佬為主,差佬同消防全體出動連日通宵32度體力勞動唔可以話佢地冇做野,前期媒體報導會讚美警隊同義工,但軍隊出場之後媒體就只報導老解的偉大,警隊同義工媒體基本不再提起,好似足球隊員們的功勞會自動比最大粒的球星吸走咁,實際上老解做的相對於義工其實不是很多,但這時免費的勞動力能利用時就應該好好利用,防疫就是同時間競賽

味皇認為今次水浸的範圍向北擴展,原因在於內港河道填海,雖然澳門已停止了內港填海幾十年,但河道另一邊的珠海並沒有停止,因為灣仔填了很多地變豪宅,河道變窄變淺,水容量就變少,令更上游的地方水浸

9000蚊下年未必會派,難得澳門有正經駛錢的大義名份,想叫停9000蚊只有現在

到味皇恢復比較正常的生活時,業績期也出得7788,日前以3.5以上賣清春泉,5.13以下換入越秀,味皇必須承認當年越秀換春泉係錯誤,呢次換馬中間損失起碼80萬,認左錯就要修正,否則同雲格有乜分別,春泉棟樓旁邊跟住會起好棟KING SIZE的物體爭食,相對越秀旁邊的巨物已經起好招租但IFC的租金冇跌(也冇點升),補貼又拿清光,因此今年是踩返入越秀的適當時機,而且今年息也比春泉高,味皇下一個要處理的是電腦網