1883業績

本來想等埋中期報告先寫,但似乎有人急問,咁提早少少寫

佢3月5日已經還左批35億債券了,但份業績係到12月31日,所以要到下一期先知還左幾多

參考半年前的舊文1883業績 :

如果佢發債35億,咁佢今次唔減派,再還銀行多一兩億,下期開始增加派息比率

如果佢借銀行35億,咁佢今次唔減派,每年還銀行4億,派息唔點升

如果佢佢發債20-25億,咁佢今次會減派,下期開始大幅增加派息比率

如果佢借銀行20-25億,咁佢今次會減派,下期開始增加派息比率兼每年還銀行4億

如果佢發債35億以上,咁就係係國家任務,佢今次唔減派,下期都唔增派

如果佢借銀行35億以上,可能性不高

而佢今次減左派息,同盈利減幅一樣,按半件前的預測係第4種

先唔計佢呢兩三個月儲的錢,佢今期報告現金有16億,黎緊準備派5億,即係有11億係手,因此佢借最少24億,最多借35億,因為佢今次有派息,所以不是全力還款,另外3月5日佢並沒有出發債的公告,所以可以得知佢係借銀行

佢債券利率係6.1厘,上年佢共有39億債利率6厘,35X0.061=2.135,39X0.06=2.34, 2.34-2.135=0.204, 0.205/4=5%,上年多出果4億利率5.1%?,12月31日佢,39億利率5.8厘,35X0.061=2.135,39X0.058=2.262, 2.262-2.135=0.127, 0.127/4=3.2%,即是今期CTM有本事少少地借到3.2厘的銀行貸款,多多咁借有冇咁平錢唔清楚,估計都會比6.1厘平,假設銀行貸款3.5厘,當佢借30億利益1.05億,比現家的2.3億少,佢現時純利9.1億,下年就會變10.3億,如按正比例會增派到21仙,中期5仙,末期16仙咁樣,每年再還4億的話因為得3.5厘只能慳千幾萬,增長唔算多

食左數碼通果7萬人,和記4G流失的可能有一兩萬人,同埋中國電信嫌貴的5G客,今年多左11萬人,但呢個是一次性的,短期冇第二間數碼通執粒,亦都冇咁多4G轉台時順便出5G機,佢賣電話同月費營業額只增7.8%或1.1億,半年前舊文就預測佢下半年每月多交1000萬月費,下期冇呢批新黎呢度的增長可能冇咁好睇

最近開始收緊D乜乜園區,以前崩牙同水房做的時候用CTM卡,後來福建佬都改曬用移動卡,因此現在已不會對CTM有很大影響,但也唔係冇影響,短訊少6成現家得返6億,對CTM黎講已經是細項,佢IDD增3成到16億變成大項,懷疑佢策略性調整,費事一眼睇得出有份參與

數據中心同光纖總共15億,當中味皇推測數據中心9.8億,光纖5.2億,下半年分別是5億同2.6億

企業服務半年前是增長的,但全年卻下降,佢話大陸同東南亞減少,如果下一期係下半年乘2就唔係咁好睇

佢上年有1400萬重估收益,今年就重估蝕700萬,來回2100萬

大致係咁,下年唔係特別樂觀,但純利會增加兼增派(同今年相比)

稅率14.2%低於法定的大概17%,咁多年應該得今年係咁

唔知未出業績的和記乜情況,但今年澳門和記一定更悽慘,佢還有冇續牌的動機都成疑問,如有興趣可以親自上和記股東大會問,例如今年6月5日3g牌過期剩返3年4g牌有冇打算投5g牌咁

佢借左相當於港幣3.4億的玻紙,應該係問新加玻銀行借(3.2厘),同時佢手上多左3億幾的存貨,唔知佢係新加玻有乜搞作

1606國銀租賃

味皇已經有一排冇寫分析文,由於最近又買返1606,所以又搵佢寫下,對上一篇大陸飛機膠股
係2020年寫的,當時20年8月味皇1.13開始買入,24年2月放曬,現家又買返

咁用2019同2023比較一下

                    2019             2023

固定資產        737             1203

投資               117               368

-------------------------------------------

                       854            1571

流動資產      1818             2787

其他資產          45                 70

----------------------------------------------

                    1863             2857

總數             2717             4428

總債項          2186            3433

利息支出          16                12

現金流          1090              691

派息             0.104           0.098

淨值               2.03             2.95

股東權益         257             373

2019年同2023年比,資產同負債都增加左,固定資產+投資佔總債項的39%同45%,流動資產+其他資產佔總債項的85%同83%變化不是太大,國銀有分借物同借錢,所以佢的"資產"分成實物同數字兩項

"資產"佔總債項的124%同129%,也沒有特大的變動,成份接近

利息支出少,因為佢係就係國開行,如果年頭佢賣盤成功,就有機會冇左呢個優點,年頭佢雖然狂升1倍,但賣盤對國銀本身是大打折扣的超巨大壊事,賣盤失敗雖然跌返一半,但對佢反而是好事,當然市場反應另計

                       19         20       21       22      23   

現金流         1090       293    247    189     691    (平均502)

交稅                10        15        9       18       23     (平均15)

總派息             11        12        9       13        9      (平均10)

利息可以比得超低,咁佢的利潤率亦必須很低,巨大的資產卻交不了多少稅,代表盈利數字比例相應地低

但是2023年交的稅已經比2019年多,代表23年稅基比19年多

而佢減派息係因為3年前某1小時22分的影響,再加某態清零,財產被充公加D人冇錢找數,又或者找數的人已經唔存在,所以冇錢周轉兼減派息

而2023年被充公的財產有保險賠了,有返錢周轉,加派息的可能性高

以佢交稅的情況睇,佢派2019年雙倍水平也有可能,但姑且打折考慮

稅率25%,交10億稅稅基40億,23億稅稅基92億,現金流502億時稅基60億,前期2019-2021年大致交幾多稅派幾多息,假設下年不用23用平均值15,咁佢派15的機會較大,相當於派每股0.147

每股淨值2.03時能派0.104為5.1厘,淨值2.95時派0.147是5厘,可能存在過度樂觀,但並不是沒有可能

問題是佢雖然好轉,但不代表佢的客戶也好轉到有錢找數,要作打折考慮

國銀的業務包括租飛機,租船,租地鐵,租巴士,租工程車,租水塘,租坑渠,租公路,租燈柱之類的,一般來說都好來好去穩定能賺點小錢,就是後者地方政府佔比相當高

社會風氣對佢影響大,如果風氣好轉客戶都肯找數就是巨大利好,但反映在業績上會相當延後,因為佢的盈利是多年拉長攤分的,收唔收到錢都易照計攤分的盈利數字,可能賺到錢收到錢係真賺錢,也可能賺到錢收唔到錢係扮賺錢,扮得幾年收唔到錢先作一個虧損數字抵銷之前幾年扮賺的數目,即是說佢盈利數字冇特殊項目一般不會大變,一般不會大變的情況下派息卻可以大變這樣,當然早幾年的情況並不常見,是百年大業的累積所然,通常不會一直咁出,而我們只是希望將來可以過得正常一點點

數碼通澳門

由於和記唔公布澳門數字(唔敢公布),而數碼通有,現家數碼通執粒,這是寫佢的最後機會,而本文的目的係偷渡CTM

數碼通澳門 

                 21下       22上        22下       23上       23下      24上 

營業額      263         247          167         92           34       沒有公布

現金流         7           -2           -10          -6             -8       沒有公布

 CTM        21下        22上        22下       23上       23下      24上 

營業額     1957        1685       1804       1765       1996      1912

------------------------------------------------------------------------------------------

時系列   (封關)>>>>>>>>>>>>(出5G)(停健康碼)>>>(緬甸)>>>

所以味皇可以斷定和記唔公布澳門數字是唔敢講,相信係股東大會問也會顧左右而言他,(不過如果能用合適的質問方法,相信也可以從和記管理層口中間接探聽到CTM的業績,和記股東會比CTM早,而且管理層講自己有限制講競爭對手冇限制)

按數碼通黎睇,營業額至少要5億先可以收支平衡,養得起幾個鋪位同一百幾十人,想有錢投牌營業額可能要再雙倍先得

當月費150蚊,以前比現家貴,一年5億係30幾萬個客,可以係上台可以係儲值卡,味皇唔覺得佢會有30幾萬客,就當有好了,到最近23年就走剩8萬個,冇5G就冇新客上台,澳門外勞增加也不是23年的事

係封關冇漫游時,數碼通營業額下降6%再32%,CTM就14%再回升7%,冇左防疫短信後數碼通跌仲多,冇5%牌跌更多,由於和記澳門同數碼通澳門性質完全一樣,相信和記也會出現類似的情況,只是和記用戶數多D營業額在5億以上的日子比數碼通長,而今時今日的和記恐怕在收支平均線以下,至少澳門子公司未必有投牌的資金

假設和記是數碼通的2.5倍好了,中國電信再大和記少少,廿萬外勞時代,澳門人口100萬時全盛市場容量大概推測是半年40億營業額,和記同數碼通退出而政府又冇打算引入聯通的話,比例上CTM會分30億,中國電信分10億,CTM用緊好多中國移動的資產,因此能引入的非鬼佬只布聯通,方法是聯通收購或入股和記,主要睇政府有冇心,對聯通來說和記是還不足以盈利的負資產,如非收到命令,未必有動機進入澳門市場

數碼通話唔做喎

早兩日新聞話數碼通話唔續牌,將D客甩比CTM咁話

咁就當係上一篇的補充

通信局的資料,22年推出5G時,澳門和記同澳門數碼通沒有浪費錢申請5G牌照,所以至今亦沒有5G頻段

冇申請5G,好處係慳好多錢,毛利率更高,主要係初期得益,壞處是5G機開始普及,用4G的人換機時有機會走,冇新人用新機入坑,至今仲接受4G的人唔會係水魚客,主要係後期出現

CTM同中國電信的電話牌入面,3G係下年6月4日到期,4G係2028年到期,5G牌照到2030年,相信和記同數碼通都係3G下年到期,到時唔知澳門會唔會開始淘汰3G

當時5G係世界上仲未普及,雖然高通865係2020年的產品,但當時是有5G機但冇5G服務,大陸算推出得早,去外國漫遊仲落後

和記同數碼通,係2023年沒有大影響,因為當時5G貴又唔普及又浪費電,但2024年CTM已經進化到冇4G新plan,2022-2024年間,和記同數碼通的客量減少,甚少換機冇必要換機4G機已足夠,完約可能轉台,味皇記憶中數碼通的市佔率不足兩位數,客量減少養唔起鋪位,上年先執左運順間鋪,假設數碼通有7萬個客好了,為左7萬個客值唔值得投一個3G牌同一個5G牌呢?回唔回到本呢?只投一個3G牌當然可以繼續延命到2028,但客每依然會年減少,唔投5G牌就冇新客,但7萬人未必養得起個牌,所以數碼通計個條數先唔做

同樣問題也會出現在和記身上,假設和記有20萬客,佢也要考慮養唔養得起個牌,投個3G牌冇乜野,但CTM同中國電信未到期時,政府會唔會開放投標呢?和記會唔會中途投個短期5G牌呢?定係租人地個頻譜?冇5G會流失舊客,佢4G plan平又唔係平過人地5G,買個iphone16用4G?當然和記的財力遠比數碼通好,但最近一兩年唔覺和記會有5G牌,因此客會流失去CTM同中國電信,最後搞到好似數碼通咁自己退出市場,總之和記係下年6月之前會出相關通告

數碼通現家的客好大可能仲係用緊2018-2020年的4G機種,即係小米9,三叔S10之類的,今次轉去CTM換5G plan可能會換順便三叔S24呢D機

假設7萬個客,平均120蚊月費,每個月840萬

但是如果市場上得返CTM同中國電信,新特首可能就會引入新公司或者叫和記改名當做政績

1883業績

2020年上半年疫情的時候,短訊爆升3.2億,漫游少1.2億,盈利冇點變,全年短訊爆升5.8億,漫游少2.8億,盈利冇點變,即是說漫游的毛利率比短訊高,又或者防疫短訊收費可能較低,漫游如果能夠上升的話應該有唔錯的抵銷能力

2020年短訊爆升5.8億,每條垃圾短訊收費1毫,是58億條,半年當佢29億條好了,今年果分類半年少左7.1億,當中聲稱已抵銷3.8億的語音話增長,咁即係齋短訊少左10.9億?半年109億條詐騙短信?假設園區有6萬人,每人發18萬條詐騙短信,感覺點都對唔到條數

味皇認為,CTM之前一眼就可以睇得出同詐騙有直接關係,唔好睇,於是佢會不會將同呢D園區相關的收入拆開,再打包入其他分類度,咁下次就顯得冇咁核突呢,咁樣,變成國際電信業務歸類多左D不是園區的收入,或者其他企業業務或者移動業務歸類多左D是園區的收入咁

比起半年少左109億條詐騙短信,味皇覺得入面唔一定真係全部真係短訊,可能有D子公司要切割或人物要切割,於是都順便歸納入去為一次性損失

園區上年10月就冇比錢的,但欠費一個月唔會當爛帳,欠費兩個月唔會當爛帳CUT號,上年業績報告時CTM只係收唔到錢冇營業額冇盈利,但現家欠費超過半年,需要CUT號,於是可能總會有一D要野攤銷變一次性損失,例如電話卡,例如分期付款的電話之類的,反正在園區活動的少不了澳門社團

下半年短訊應該會因為銀行6月開始的煩膠認證短訊恢復一D,但肯定唔會半年109億條

佢上年短訊少左9.7億,97億條短訊?而盈利12.3億卻基本冇減少,上年固定資產折舊左3億幾,而今年上半年只折舊左1億,而盈利反而唔見兩億幾,會唔會上年提多左或今年提少左折舊呢,佢上年全年現金流26億,上半年14億幾下半年11億幾,今期上半年10億幾,現金流方面比盈利所示更差

移動業務部分,好似味皇同同事疫後第一次出國外游,飛機也冇咁擠拥,機師也熟手返,我同事今次就用左CTM的68蚊漫游,至於味皇的中國電信冇出國漫遊服務,所以淘寶49蚊人仔買電話卡,總之結果就是漫游上半年增加4000幾萬咁樣,下半年應該會更好一些

電話用戶多左一成左右,增加好多,似乎係新外勞,新增的人下半年會交足6個月,舊人都有電話,新登記唔多會係老人plan,假設平均月費120蚊9萬人,每月約1000萬

4G變5G轉plan的人多左30萬,味皇頭先特登去門市問價差,發現CTM已CUT曬4G,新續的都5G起,至於月費,感覺比4G時還平左...,實際收費仲低過中國電信,由於中國電信冇漫遊CTM有漫游,所以新增的一成人大概大半係由中國電信度搶過黎,即係咁,政府用續約逼CTM減價,而政府己經成功左

數據中心同光纖加埋總共7.4億,當中數據中味皇推測是4.8億,光纖2.6億,成長率很低

企業服務左多少少,主要都係東南亞地區,假設如果出一D包埋短訊的收費plan比東南亞做慈善的有限公司,咁109億條短訊的收入自然會下跌,咁影響數字會變細,切割也快D,假設,另外澳門08年後就冇街景,睇youtube冇廣告,但最近連香港都唔比走顯卡,咁香港相對於澳門的優勢就拉近,甚至澳門人脈對北泡契哥同包頭佬更有優勢,CTM係東南亞投資就自然會有公司用,無論D人搞幣定搞AI

總而言之,短訊唔會全部恢復,亦無意全部恢復,本來就係石頭爆出黎的,但相對漫游會再恢復些,剛好同2020年相反,電話月費會少量上升,另外其他某些業務會上升,當中有些是變相的短訊,下半年會比上半年好,但好幾多就難講,唔計短訊,其他業務下半年應該會增加1億以內的盈利

但是派息部份大偏治,雖然中期冇減派,但是留意到佢有35億的債會係3月到期,而最近十年?CTM好似每期業績都有大量還債,但今期冇同上年尾一樣,現金還少左,半年後CTM要面臨決擇,到底是借返35億然後以前的派息,還是借少1/3的債然後減少派息?結論而言下期派息叫做借錢派息,如果CTM的債唔係最近到期,咁佢大機會唔減,冇選項就唔會去選擇,但還債的選項如果擺在面前,佢就有機會選擇,如果味皇有去股東會就可以直接問佢傾向還債定派息

另外佢果35億係債券,其他的債差唔多已經全部還曬,即是佢還埋就走向淨身,佢今次續借到底是發債劵定借銀行都有可能,發唔發債就要睇母公司有冇需要賺發債錢

如果佢發債35億,咁佢今次唔減派,再還銀行多一兩億,下期開始增加派息比率

如果佢借銀行35億,咁佢今次唔減派,每年還銀行4億,派息唔點升

如果佢佢發債20-25億,咁佢今次會減派,下期開始大幅增加派息比率

如果佢借銀行20-25億,咁佢今次會減派,下期開始增加派息比率兼每年還銀行4億

如果佢發債35億以上,咁就係係國家任務,佢今次唔減派,下期都唔增派

如果佢借銀行35億以上,可能性不高

佢平時25億現金流時會派10億息再外加每年還幾億債,現家佢現金流可能得23億,派10億本身係冇問題的,睇佢想優先係邊度

而且CTM還有幾十億國家的債要還,政府唔會係佢未還清之前特登搞死佢,上次CTM無牌經營純粹係澳門公務猿工作效率高

1522京投交通

建設鐵路的唯一目的係將人或貨便宜迅速安全的運送到目的地,嘛,正常的情況下

不過有D地方會想係各種行業包括鐵路上面加入原本沒有需要的其他偏離主旨的功能,於是洐生一D例如撩鼻之類奇形怪狀的行業,特別係最近呢10年,好似1522就係出於呢種原因而產生的公司,可以說沒有聖上的登基就不會有這公司存在

1522的業務係起同保養地鐵站,  ---的入閘機,售票機,充值機,電視機,wifi點,監控,人臉識別,安檢,數人頭,自動門,警報,估計係呢類名曰大數據AI維穩野

呢類野係估計係唔會真招標的,而是事先指定某人做,再成立公司,再扮投標,然後內定,因此經營者唔會點變更,而地鐵公司開公數,除左呢幾年地方政府可能開始會拖數之外,穩定性應該是有保證的

成長性的話,上面係大地鐵時代,會有人為左追求GDP,加上炒地皮,會不斷起地鐵,對地方官來說簡直是魔戒,除左呢幾年地方政府可能開始會拖數之外,成長性應該是有保證的,本來商用鐵路係應該追求快速便宜易保養,但來到執行果度就會變成追求高大威,變成更多無謂多餘浪費燒錢丟空的建設,這樣也會變成1522的成長養份,而且天朝獨自的無謂技術可能會輸出到某D有需要的國家

"將CCTV的密度再加多一倍","鼻毛呢!我要看到鼻毛","廁所也給我往死裡裝","角度噠!由下往上的角度"之類應該唔會嘅,如果上面出台呢類政策,也會是1522的收入,1522相信就是這樣的公司

由於係唔招標的,會唔會分派到比佢就是概率事件,好似1522的公司似乎是分好多山頭的,可能母公司都係同一個地方政府,但每個仔都有各自的豬肉,可能係二代,可能係退職幹部之類,例如1522揸注京師兩個機場線咁,如果環狀線加站那是其他二代的山頭唔到1522插手,只有加長機場線先會100%輪到佢,如果京師新建全新的線路咁就有幾十%概率輪到佢

成長性來說,1.來自原先的地鐵延線,2.低概率接新路線(包括高鐵站),3.收購

收購的話,收購同級的二代肥肉相信比較困難,即是說1522有帝都政府撐腰,但1522唔可以向其他同樣帝都政府撐腰的二代出手,相信也不可以向力量相當的魔都政府的爪牙出手,但1522可以用狐假帝威向四天王實力之外的中boss著手,招攬一些豬頭人將軍,哥布林薩滿,寶箱怪之類二三線戰力

建設收入是一次性的,賬期長,近年仲有可能拖數,但保養應該會穩定,毛利率高,而且一手錢一手貨,味皇主要係貪佢的保養收入

2386起同保養煉油廠,門檻是技術,1522起同保養地鐵站,門檻是權力,除左產品形狀唔同,內裡其實都差唔多

PB只有0.25,但是公司的實際財產其實唔多,所謂"資產"大半係商譽之類溢價,真資產主要係價值不定的經營權

派息0.25,比之前兩年低,相信是政府唔找數,就好似唔找核酸數咁,不過話曬係京師,應該有拖冇欠,如果係徐州揚州荊州果類地方就大機會唔找數

損益表營業額十幾億,盈利大約1成,但佢稅率普遍都比法定稅率低,代表盈利比賬面高,現金流表顯示已交稅項每年都極高,代表佢稅基也很高,但相對佢經營現金流最近幾年好少,"賺左錢"所以"交埋稅",但冇錢袋仲要掏存款出黎交稅咁樣,現在睇政府肯幾時一次過找一大筆數啦,拖緊的尾數起碼6億以上,派息5000萬,交稅4000萬,盈利同派息其實都很好,尾數到手就升天,如果一直拖就二年後會出大問題,不過味皇假定京師為顏面最終還是會找數的

市值唔夠7億,資產淨值27億(偽),盈利1.7億,派5000萬,交稅4000萬,看起來生意來源穩定(除左政策變化時),一定有成長性,唔駛點錢升級,hea做,派息比率高,1522應該係很不錯的出糧股,對股東來說,更加是對安插來的高層來說,唔駛點做,唔駛揹鑊,係辦公室食下秘書,就有糧出,如果味皇冇理解錯的話

缺點主要係拖數問題,仲有就是高層如果想刷存在感亂收購的話,可能會高溢價買野,錢賺唔到反而多一堆商譽要攤銷令盈利數子減少,呢類公司好多時都是基層中層同副手很會做野,但高層是白痴

雖然由登基而來,但佢應該唔會怕萬一駕崩的影響,無論繼任者係乜人,當權力者得到一樣很好用的控制工具時,是不會放手的

1713四川能投

寫之前先講下AI股

點解NV會當成AI股炒到咁高,而同整樣晶片INTEL同AMD又唔可以呢,IT狗味皇認為並不是因為NV的晶片計算能力比較優勝,而是因為軟件問題,正確來說是OS問題,無論win定linux,可以支持一部機同時用好多張顯卡,但唔支持同時好多粒CPU,習慣上底板廠可以設計成支持插100張顯卡的底板,但唔會設計插100粒CPU的底板,CPU的功能可能包括南北橋總線內存總線之類雜物,插100粒就有100份雜物,而顯卡就相對純度更高只有運算功能插100張就單純增加100倍算力,並唔係用顯卡搞AI更有效率,而是用大量的CPU並不會增加效率

如果AMD當年唔收購由香港人創立的ATI,或者唔鏟除ATI個牌子,咁齋ATI可能炒得貴過現家的AMD+ATI整體

咁100張顯卡帶來的是什麼呢,是100倍的功耗,一張高級顯卡起碼450W,100張就是45000W,一個鐘燒45度電,100張顯卡放埋一齊降溫的冷氣可能要6000W,即使用80puls的火牛的高級火牛,耗電應該還是超過60000W,如果其他國家冇又新又貴的顯卡又想彎道超車,咁450W的新卡實際上係可以用10張3年前的300W二手舊卡黎超越的,即係用300000W耗電的1060的新時代算力黎超越45000W的4090外國反動算力,1000張新時代顯卡的機房可能要500000W,一個鐘燒500度電咁樣,AI係帶來美好的J圖時代之前,太概會先帶來人類毀滅吧,所以其他國家想彎道超車的話,就必需帶上毀滅全人類的氣勢,智慧可以輸,但氣勢不能輸

簡而言之,味皇想說的是,發展AI是假,搞AI的公司大多並無生產出有多實際的東西,不是用AI產品黎盈利,而是炒賣集資製造財富轉移的籍口,真正係AI發展上有直接相關的除左晶片股,就是電力,而電力股卻不被市場視為AI相關,可能是太實際了,冇得發夢,所以沒有利用價值

電力市場好多地方是依靠政府補貼的,所以凡是發展高耗電而又唔會盈利的行業,例如半導體,只是會拖垮政府財政,反正小學生不會懂,同樣搞AI也一樣,如果用火力發電黎搞,只會邊度搞邊度死,所以味皇先話真係有心搞就去冰島搞,慳返煤炭同散熱,類似這樣的原因,要搞AI最重要的是穩定強大便宜唔駛補貼的電力,可以是水電,可以是核電,唯獨不能是火電,受地理條件同政治因素限制,全世界只有極有限的指定地方可以搞

呢度有幾間電力公司,可以發現火電好易奉旨蝕錢,只有其他接近免原材料的先易D賺錢

現家就話搞AI啫,而AI其實是第二代藉口,上一代藉口是挖礦,如果排除了名稱,你會發現炒買的方法,炒賣的人,目標的群體,消耗的資源,是完全一樣的

挖礦高峰期火力發電廠好易蝕到媽媽聲,特別係離偷電黑點多的地方的電廠,(836可以睇落最近增長咁多,是因為火力發電蝕錢變成中間有個氹),1713同1816由於發電唔駛本賣一度賺一度,即使偷電也是偷市電,政府找數都係賺,而火電發一度蝕一度偷一度蝕一度

點解全國挖礦的基本都集中曬係四川呢,因為全國只有四川果邊的地理條件適合大量做水力發電,全世界冇幾多地方有咁密的斷層,咁高的落差,咁大的水量,咁窄的河谷,所以四川的水電廠名義可能只是山卡啦鳥不生蛋地方的的電廠,但佢卻是服務左全國的礦工,所以你就算幾唔鍾意幾唔想承認都好,只有地理是冇得呃人的

1713是四川不算大的城市的水電廠,但需求不需視乎不算大的城市有幾不算大,反正只要挖礦有利可圖,礦工頭子就會好似蟲族咁蜂擁而至,變成不算大的城市有奇怪的高耗電

基於呢個理由,味皇果幾年就想買1713了,不過直至最近先買到,而現在升左咁多已冇乜加注的動力,雖然仲係平

係各電力公司之中,1713盈利算相當穩定,而財政可能是最好的一間(早幾年想買果時),味皇認為佢可以無視疫情影響,就算唔增長都至少唔會衰退,當時味皇將佢當成是投資組合出危機時的換馬退路之一

最近期的業績所示,佢營業額/固定資產增加相當多,同時現金減少/債務增加,可能有GDP鐵拳成份,叫有增加投資,由於是營業額增加多而盈利增加少,是前期投資或低回報投資都有可能,當中有50%概率盈利之後會追上營業額比例,如果唔計自然成長同額外投資,5年次中佢盈利大概在營業額的7-10%, 50%的概率3/10的成長

另外佢5年的經營現金流是8.2, 8, 6.2, 6.6, 4.9(億),增長應該是算多的,現家市值先16億,派6厘幾,仲係平,又平又穩定,又有真AI加持,係冇得發夢啫,至於礦工,由於挖礦同AI是同一班人,重覆左的舊題材效果會比早幾年差

搞假AI同挖礦是邪魔外道,但水力發電卻是真環保,味皇唔拍拖唔生仔,係真☆環保份子

四天王

呢度有4隻股,質量幾乎完全相同,前景也類似,屬於成長性微妙又唔多會衰退名氣又差唔多的物體

甲現價5.14,PB0.67,派0.34人仔,乙現價3.83,PB0.61,派0.25港幣

丙現價3.77,PB0.56,派0.22人仔,丁現價3.15,PB0.69,派0.17人仔

差距基本都在誤差範圍內,大概揸是但一隻結果都差唔多...大概,但資本市場並唔會對完全一樣的東西比完全一樣的估值,何況只是類似的東西,現實並唔講道理,但我們文明小市民的心中一般都唔會忽略道理嘅,以後會唔會比現實毒打就係另一件事了

如果相信道理的話,可以嘗試係甲乙丙丁之間反覆橫跳嘅,只要股價超出其他的太多的話換馬也是一種選擇

甲係2386,乙係934,丙係552,丁係3969

不過四天王有五人係常識,味皇正在買其他

1883業績

業績好差,上半年賺7.3億,而全年總共只有12.3億,即係下半年只賺區區5億

有兩種情況,上半年成長率25%高得有點出奇,於是有可能係下半年的生意分配左去上半年,例如集中曬係上半年轉plan之類的,咁下年盈利會同今年比較持平,另一種情況係下半年真係好唔掂,咁下年可能繼續維持在低盈利水平,咁全年就會大跌到得10億

下半年盈利大跌的原因,味皇認為主要係10月尾的緬甸內戰,突然冇曬詐騙電話同詐騙短訊,相信在坐各位都實際感受到呢幾個月收少左垃圾電話,

CTM比較利好的係淘汰左ADSL,可以掉曬D陳年存貨,執左維修部,炒咁D老年IT狗,經營成本少D

營業額細分:

                           23全年     22全年      23/22上半     23/22下半

移動通訊服務         967        827         457/417         510/410       -下半年成長

(電話月費)

互聯網業務           1427       1331        705/649         722/682       -下半年成長

(光纖同數據中心)

國際電信業務       2954       3453      1951/1715     1003/1738    -下半年腰斬

(IDD)

企業業務              3079       3069      1506/1538     1573/1563    -下半年成長

(VPN同雲端)

所謂國際電信業務呢個分類係2022年由24億忽然爆升到34億幾的,現在只是回到原點而已,由於澳門係果D實力團體的係地球上的第二大據點,因此影響不會細,同樣道理,相信台灣大哥大也會有影響,如果今次連根拔起,到下次勃起之前呢D垃圾電話是不會再收到的,因此CTM下年係呢部份相信大概率唔會恢復,而且緬甸是10月尾打起來的,只佔半年的1/3時間,因此影響可能更大,當然這只是基於味皇個人推測

數據中心的營業額味皇推測是9.3億,而光纖5億,同業新意網營業額成長16%,因此CTM算長得慢,企業業務微微增長,月費也是,除左做詐騙呢行之外其他比較差但都叫穩定成長,整體是好的,只是中左一拳

假設IDD跌回2019年水平,即是18億,2019當時賺10億派20仙,2024年按比例最差賺10.5億派21仙,希望估錯啦

今年CTM實際是衰退的,但CTM還左5億利息支出減少,又炒左D服務詐騙的人,所以派息仲可以微增,現家CTM債務還剩大概35億,予計7年就還清,可能減少派息,但債務少可能增加派息比率而維持,兩邊都有概率

2348東瑞製藥

味皇睇中佢時仲係1.01,當時沒有閒錢買,現家已1.3,如果不是1606中途突然爆升有錢換出黎,味皇應該錯過左佢,業績前寫一下,費事馬後炮

用30秒大法黎睇:

1.固定資產增加,特別係上年大增,應該有搞頭

2.現金大增,大概率增加派息,或者是特別息

3.有回購股票的習慣

根據上面3點,東瑞已經有投機價值,至少一年前就可以通過睇呢個表知道,至於有冇投資價值就睇價錢了,1.01的話是PB0.57,派息8.7厘,味皇覺得非常可以接受,不過在15000點的時候也唔一定輪到佢

之後中期後呢個表冇寫出黎的事情係,佢又有子公司賣左比人,現金再度增加,派特別息的機會再增大,不過也是味皇買左之後的時情,非常近期

於是東瑞有多個好處,股市特低而佢有回購,借錢極難而佢有現金,生意唔好而佢好轉,行家縮小而佢增產

唯一壊處是增產請人賺唔賺得到唔一定,但折舊會先增加

佢經營現金流連續5年增加,疫情下仲想點

通過30秒大法的東瑞有睇年報詳細了解的價值,佢固定資產增加是因為舊廠搬新廠,而新廠今年己全部投入使用,無論好定唔好,都會在今年表現出黎,現金增加是舊廠地皮收地的收地款,由於是非經營收入,所以派的話是歸類為特別息,當然現金多身痕胡亂收購也有可能,但東瑞有回購的習慣所以收購外人的機率低一半,雖然想這樣說,但近年並沒有回購

按呢5年經營現金流的數量黎睇,經營現金流大致係存貨的2倍,折舊的7倍,佢折舊率約10%,最新的8億固定資產應該會產生8000萬折舊,因此東瑞下年的經營現金流估計4.8-5.6億之間,由於最近賣左批子公司變現,經營現金流可能少過估計,但相對地利息收入會超出正常

最近賣左子公司之後,現金應該已經超過10億,味皇不清楚佢想留幾多現金為之合理,根據以往記錄,佢3年前現金7.3億時,就派了特別息,現金跌回5.8億,因此東瑞如果派特別息的話,預計連同正常派息合共派總額1.5-4億之間,即每股0.1-0.27

如排除呢點,係大6賣藥不確定因素很多,想穩定地長長久久地賺錢可能比較困難,在組合中只能分散不能柯煙,要形容的話,好似球會咁,你可以推斷佢的實力係行家當中算強定算弱有冇優勢,但對賽結果同排名同實力並無必然關係而不太能準確預測

2633保濟丸

就係那個傳說中的保濟丸,上市後集資所得用左黎收購左賣西藥的何濟公,最近幸運傷風素又炒到百幾蚊,見TVB賣何濟公的傷風素廣告,結果濟公能醫百病都只係用西藥,唔係用漢方老泥丸

味皇睇中佢主要係高息,跌得耐唔算貴,產品連老母都聽過,有南洋收入,移民潮會帶動東方神藥去到西人地方流通,好似潘高瘦枇杷膏咁

細部黎講,係資產負債表到睇,好幾個好處:

1.股本下降左兩次,有回購股票的習慣,加上佢本身派息多,輸出大

2.固定資產平穩,冇增產需要就冇資金需要,閒錢可以用黎派息或還債

3.現金增加,特別係最近大幅增加,之前存貨同現金咁上下時有周轉壓力,現家冇

4.存貨大致平穩,固定資產也差不多,看起來近期不會大變

5.最近1年現金狂飆,佢增派息,有回購,還算老實

6.可能係保就業筆錢?一次性收入也可以作特別息或回購,反正已解決了周轉問題

7.明顯經營好轉,要買就呢一年

不好的部份是欠債冇點還,欠債來自收購,每次都收購欠債公司

基本上單一張表就可以結案了,姑且睇埋現金流

1.近7億現金流,只派1億其實姑寒,20年能派1/4,之後有周轉壓力派少,今期現金大增,可能增派

2.(其他)應該係回購股票的支出,上年用左3200萬

3.稅4700萬,稅率17%計賺2.8億,比現金流少得多,佢低估盈利,也可能代表佢折舊同攤銷高,至於折舊是否有效,味皇對於佢生產幾十年老泥丸的設備應是無效,但收購的專利藥的有效期減損就可能有效,總體而言盈利多少會有低估,於是佢能存到錢

4.佢自稱盈利2.5億,同上面2.8億的差距不大,明面上冇點厄人,2.5億派1億還算可以

5.收入增加可能係保就業筆錢?一次性收入也可以作特別息或回購

6.明顯經營好轉,要買就呢一年

結論就咁,呢年股市大跌,應該話年年都大跌,但佢今年跌得最多,而佢呢年經營好轉,會增派,會回購,股價低回購又有著數,未增派息時都7厘8厘,味皇睇中時,佢派息係醫藥股中排第二,仲唔駛抽稅,如果冇增長學白花油咁全派OK,好似扮增長咁學利豐咁收購也可以接受

市值12億,pb0.4多D,子公司2161都8億市值,2161經營情況同佢相似,相比之下不算標青,但貴得多,pb0.9

另外中期顯示,呢張表之後的半年,一如上面結論,盈利再增加2成,而股價卻繼續跌

移民潮會帶動東方神藥去到西人地方流通,好似潘高壽屁杷膏咁,BNO算英人唔算外勞,16年後可能有香港人球星踢英超,食老泥丸,就好似將來港隊成隊巴基斯坦人咁,唔食豬扒

2019年新股剩蔗

本來冇呢篇文的,忽然味皇手上多左筆錢,忽然就有搵股需要,於是即席揮亳寫文

現家過左2023年,比5年時間D新股收水,時間黎講本來想寫2018年的半新股的,睇下發現味皇好多觀察名單都係呢年的上市的,為左搵新野避免重複,退而求其次寫2019的

舊文有雞立的2019年新股列表2019新股,30秒大法睇,初步判定可以留的有,6049, 9928, 1553, 8216, 3348, 8617, 8627, 1401, 6186, 1987, 1853, 8441, 3601, 1876, 1839, 3798, 1935, 6117, 3692, 2230, 8635, 1780, 2682 ,3316, 1785, 2885, 當年上市164隻,留底26隻

另外2019年下半年RF死server,味皇當時寫唔到文又留唔到言,遺言都做唔到,有半年空窗期,好多讀者唔知味皇之後搬左google,以為執7左,之後味皇就冇乜人睇了

6049保利服務

貴,唔抵買,對於發展商的物管股,味皇認為是一大市場陷阱,也括藍籌果批,同外判管理公司唔同,佢地唔駛招標,自己出糧比自已,成本可以開公數,唔夠人可以問老闆借,用避稅的術語叫轉移訂價,例如味皇開間動畫公司,母公司係病大,拍一套26集的每集24分鐘的玩具廣告,正常賺100萬咁,病大想將間動畫公司上市,同味皇講,墨水夠唔夠?我1蚊二手讓比你,地方夠唔夠?我1蚊租比你,上網用唔用?我比你痴WIFI,肝夠唔夠?我同你捉帕魯返黎,你套廣告片要上CCTVB播?本來要比錢CCTVB的,我病大大代比,CCTVB同你買套片,錢你照袋,這樣味皇的動畫公司盈利就平白增加到1000萬,然後10倍以上的價錢上市,然後病大袋返,對於成本數字能夠任吹的公司,味皇會迴避

9928時代鄰里

也是物管,如果是外判的就仲可以,如果是開發商旗下的也是迴避

1553邁科

看起來比較OK,有還錢意向同能力,不過存貨比較高,周轉需求大毛利率相信也不高,派息約9厘,PB0.44,呢個市上看一般般,唔夠平

8216豐城

看起來經營良好賺錢多存錢快,但不派息,也極貴

3348鵬飛

財政也算是不錯,冇欠債的習慣,但存貨比較多,有周轉壓力,壓力可能仲不少,短期內唔會派高息,PB0.6偏貴

8617永聯豐

現金大致是一味增加的,冇欠錢,看來相當不錯,pb7倍幾,買果個傻

8627旅橙

同上,但是冇派息,唔派息下的存錢能力也未見非常優秀,PB0.7不低

1401唔知乜叉

最近情況很好,清理大量存貨,也還了債,但有幾個缺點:1.情況很好是因為清理存貨,但存貨清理是有上限的,2.佢冇派息,3.PB4.8買果個傻

6186飛鶴

現金每年都上升呢樣好,積存大量甚至過量的現金,也有派息但相對較奀,pb1.2還算OK,但個格似姑寒財主,3年前已能增派但佢冇

1987新加坡乜叉

還債的途中,想要買等佢還到差唔多先,而不是現在

1853春城熱力

已寫過,pb0.8有點貴

8441國際永勝

公司好似好,但集資過兩次,唔好

3601魯大師

味皇IT狗也不知道佢點賺錢的,冇派息,pb0.3,唔知點形容

1876百威

現金大致年年增加,冇固定資產投資,派息比率相當偏低,pb2比較貴

 

1839中車

財政不差,也不叫好,有存貨壓力,pb1唔抵

3798家鄉互動

感覺似炒股的公司,比唔到一種長久的感覺,pb1.6,叫有派息

1935嘉宏教育

財政上係好,但怕鐵拳,pb0.5

6117日照港

寫過買過,pb0.3平係平,但味皇親身驗證過佢有幾姑寒

3692翰森製藥

pb3,唔見得有相應的暴利

2230羚邦

寫過買過,pb0.7,有成長,但現價吸引力不大

8635

微量的上進,非常微量,微量的派息,非常微量,pb0.2,老闆咬糧股

1780 B&D

有賺有蝕,只派特別息,pb6倍幾

2682潤利

寫過買過,pb0.8,平穩中帶少少貴

3316濱江服務

又是物管

1785成都高速

品質很好,但好價錢己過,pb0.8

2885彼岸

差唔算差,好又唔到好好,pb0.5,小貴,唯一好處係博亏轉盈咬一啖

結論呢年上市的164隻對現在的味皇都唔夠吸引力

267的補充說明

算係另外開一篇讀者回覆啦,267有D特別性,值得稍為講一下

267手上有銀行,味皇自己並不太熱衷銀行,特別是中國人開的銀行,但味皇卻買了267

是咁的,假設味皇自己開銀行,錢一定係要借出去,下面好幾種情況:

1.味皇把存戶的錢大量借比朋友做生意

2.味皇把存戶的錢部分借比朋友做生意

3.味皇把存戶的錢大量借比自己做生意

係銀行角度黎睇,借比邊個都風險都是一樣的,1=2=3,但係味皇角度黎睇,自己袋一定比外人袋風險低,1<2<3

好似郵儲銀行,佢錢借出去,借款的一定都是外人,要兇人,人地也會兇返你,好似中信同華潤銀行,佢錢借出去,借款的一定概率是自己,左手同右手畫面幾咁和諧,中信同華潤手下應該有彊屍企業,銀行借比外面的彊屍企業有可能會爆,自己借比自己,只要自己不說就唔會爆,外面的民企好多是逼爆的,而自己就唔會逼害自己

假設中信借比自己同外人的錢是一半一半,咁中信的風險就是全借比外人的一半,中信銀行單體的風險可能同郵儲銀行一樣,但中信泰富整體黎來說小金庫有點都比冇好,係市場上有呢個特點的母公司得中信同華潤,華潤貴而中信平,華潤置地炒得大中信泰富炒得細

另一方面,中信做乜生意,外人做乜生意,中信做物流,做交通,做通訊,做礦,做能源,外人做地產,成份上回收的難度肯定比外人低,比起放貴利做信用卡呢D賺少左錢,但風險相對低,在母公司整體黎講,自己籌到錢可以自己人形蜈蚣,銀行賺少左其他子公司賺多左,咪一鳩樣

如果出面行情唔好外人越做越縮,而自己的生意還可以,咁自己借比自己的比例就增加,風險反而變細

極端黎講,銀行犧牲自己,賺越少錢,自己的生意反而越大,而且銀行自稱唔賺錢也能減少被收割的概率

現家其他國家最大的問題貸款來源地產同地方基建,貸款如果是借比礦場之類的話,現在的市道一般都會收得返,能源同埋礦石,在軍用品搶民用資源的情況下,就算唔賺都冇有蝕

銀行成行都有問題,但如果睇成是公司的小金庫,觀感就會好D,冇人靠小金庫賺錢的,但賺錢的都想有小金庫

1883業績

營業額多7%,但盈利7.2億多26%,大半分類都係持平,增長來自IDD同漫游

營業額地區分類來自其他的大增1倍至3億半年,一年之前CTM來自其他地方的營業額一直是全年3億

光纖同數據中心增至7.05億,上年同期6.5億,下半年6.8億,味皇不認為澳門光纖賺錢有大增長,繼續當佢增長5%好了,光纖2.5億,數據中心就會是4.55億,增長4%,顯得相當差,而上年有1成,相對新意網上年也是1成,即是說今年增長非常唔好,等新意網過兩日出業績就知係成個市道唔好定係競爭力唔好

澳門5G牌係上年11月先開始有的,電話費營業額增10%,賣電話營業額增9%,換機的人非常有限,例如味皇都仲用緊4G,具體數量是,賣電話營業額增5200萬,一部新機假定為4000蚊,代表賣出13000部,而且也不一定全是5G電話,最平5Gplan貴120蚊,13000部大慨多2000萬營業額,現家多4400萬,代表那些錢多人傻的可能用貴400蚊plan,壞方向看,換成5G會非常緩慢,半年13000部,而且有錢追潮流的傻人會在最開始就消耗掉,而且plan遲早會減價,好的方向看,市場上仲有起碼50萬部的5G機容量黎緊慢慢搣

企業服務應該同周圍經濟相關,之後估計頂多持平

文字方面,CTM第一次出現 "向新加坡政府部門提供數據中心託管新服務，在 印度尼西亞向多家企業、包括一家東南亞地區金融獨角獸企業提供公共雲項目， 融合人工智能技術向客戶交付無人機人工智能噴漆解決方案，提交菲律賓ISP許可 證申請，逐步落實向越南市場拓展計劃。 " 出現印尼呢個字眼,而且遙控飛機同CTM本身做的都唔關事

           2021/12    2022/6   2022/12    2023/6

商譽       9721       9700        9710      9712       

CTM盈利7.2億,現金流應該過10億,上年全年年報寫29億添,佢現金少左2億,債還左5億,至少有好幾億的現金不明消失,公司係正常冇事做情況下,商譽呢D"溢價收購"產生的物體是續年減少的,例如2022年上半年就攤銷左2000萬咁,但下半年本應-2000萬的反+1000,即係呢半年有溢價3000萬的送錢收購,今年上半年再有溢價1800萬的收購,CTM係冇通知我地的情況下鬼鬼祟祟用溢價收購左關於印尼的公司,唔知係好係壞,唔知還有冇陸續,能夠溢價4800萬,咁個收購起碼過億,至於點解係印尼原因不明,至於點解係遙控飛機原因不明,考慮到CTM並無印尼的人脈,咁可以斷估一下,母公司中信還有冇其他奇形怪狀的子公司?如果中信因某些原因需要現金的話,CTM可能會一而再三溢價接母公司資產

冇增派息比較唔好,也許佢末期一次過派夠24仙,也許象徵式只加派少少,今次唔加中期息,同埋半年前末期冇派22仙,可能係因為用左果不明的幾億

回到債還左5億上面,剩41億,當年中信1616時代蛇吞象借的100億己還左過半,41億利息1400萬6.8厘,上年46億1300萬5.6厘貸款成本加左唔少,不過下半年應該唔會再點加,下半年還到36億的話可以慳1200萬佔盈利近2%,再4年就還清

傳說中Mtel已進入橫琴,當然不是全境,但至少類似居屋的地方有可以上google的網線,反向推斷,CTM應該是現在進行式的狀態下在橫琴鋪緊網線,代表CTM會有不少的前期資本支出,因此也會影響近期的派息能力,而橫琴封關的時間是設定在今年尾

若干增持同部分業績

呢排個市又唔掂,味皇用派息再買左D,排過1.04恩達,排過8.7美蘭,排過0.1地勤,排過0.1拖頭,排過0.305遠航等等,最後成功排到的是0.25入左50000股大悅城,0.58入左20000股唐宮,7.69入左2000股中信泰富,反正錢有限排到乜就算乜

發覺味皇推測的成功率可能不算低,味皇估唔中的半死,但就算估中都往往沒有效果,好似遠航破天荒派息股價冇郁,恩達加派1倍股價冇郁,唐宮重新派中期息股價冇郁,筆克重新派中期息股價冇郁,個市實在難服侍

唐宮一如所願應該有近10厘,之前味皇在唐宮同太興二選一之中選左唐宮,結果燈神的唐宮由0.65開始跌(市值7億),而太興由0.84開始升(市值8.4億),最後兩隻的業績都反轉,現家市值分別是6.2億同9.6億,而大家都一樣係賺4000幾萬,現價派出黎係8.6同6.2厘,暫時計埋都係味皇燈D,不過味皇依然認為唐宮比較好,下期派息加幅更高,但是比起揸太興,揸唐宮是有時限的,味皇應該不會揸佢到下年8月,因為唐宮的免稅額會係下年中期食完

恩達的業績麻麻,本以為PCB個市很好的結果衰退(營業額),不過恩達今期已經還清全部債務,可以加派息比率,派息好運的話仲可以維持

遠航的業績麻麻,居然冇增長,也許今年海螺水泥唔好賣掛,全年估計派4仙

煉化的業績麻麻,營業額有點衰退,派息象徵式加一點,但人民幣跌總計都係少左,加派息的機會一半一半,由於佢現金極多,可能好似中移動咁食拳,好的可能是派特別息,不好的可能是接垃圾資產

衛星業績唔掂,營業額少15%,減派應該未至於不過己有先例,佢下年新衛星上市,但今年已出緊糧,就當佢可以平白產生多30%的營業額好了,暴利率80%,咁支出是6%,下年增30%同時又吸走5粒舊衛星每粒5%的舊客,5粒共25%成本5%,營業額增5%成本減5%上下大約10%,今年支出已多6%咁下年共是16%,即是說下年的增長大概只能補缺口,除非新衛星的成本比舊衛星慳好多咁全轉過去提高暴利率,舊衛星同舊衛星差10年,WINXP時代電腦同WIN8時代電腦成本肯定有差但差幾多好難量化

神冠賺唔到錢,但派息方面味皇不是非常擔心,因為大量還債,另外淘寶度睇佢多左好多有的無的騎呢產品,仲有佢下面多左好多可出售的子公司,應該有變身可能

大悅城出類似盈喜既野,派息應該會加返D,不過有錢首先都係還債

建滔出左盈警,睇下係唔係地產之類特別項目,派息估計又減

四環出左盈警,派息方面味皇不是非常擔心,現金流應該還是較高的,但下一年可能出問題,醫院被打拳,以國人尿性推測,醫院可能會減少用藥,只聽診唔執藥,唔堅醫,只比葡萄糖維他命拮鹽水針扮醫病唔揹鑊,拉長個病診金少食多餐直至政策再變,而咁一黎老仿製藥的用量會減少,二黎老仿製藥公司就賣唔出,三黎出價的買家也會少左,對四環賺現金同賣資產都有負面影響,四環最好就是減少支出,唔好一次過同時做幾隻藥的三期

gogo拖的業績由15號延期到25號再延期到31號,味皇有D擔心佢出唔到業績

CTM的業績另外出一篇

個市唔好,如果大筆錢冇腦灌落去大概會灌落CTM同筆克

752筆克遠東

4月21日舊文

羚邦最近逆市上升,原因可能是因為入樽大陸的票房好,可以大賺一筆,實際上今年羚邦的業績應該會相當唔錯,賣左係有D可惜,但筆克應該不在羚邦之下,差別在於羚邦是成長而筆克是恢復,上限比羚邦高,味皇覺得香港同大陸正走向衰落,政府需要外國人的錢,政府想掙扎的話,政府可能會要求筆克辦更多不成功的展覽會,政府會補貼展商去參加更多不成功的展覽會,筆克就算賺唔到展商錢,至少也會賺到政府錢,而且佢新加坡杜拜現家的生意應該唔少,另外筆克有機會恢復中期息,多一個投機理由

https://sigumdick.blogspot.com/2023/04/blog-post_21.html

筆克1月出過業績,冇留意佢6月又出業績,間隔近得離譜

如味皇所料,佢真係恢復中期息,但即使係咁筆克也未有爆升,投機失敗左,不過以息率計股價計都比羚邦賺多一些

筆克非常不好的係呢幾年借錢多,資產負債表方面算不上好目標,筆克主要的優點係由好高的起點跌落黎,就好似思捷咁,如果能恢復反彈幅度會很大

味皇不認為佢的市場會有多好,但味皇認為政府會強行灌生意比佢,客戶冇需求,筆克冇生意,政府貼錢甚至全包比客戶做無謂又不可能成功的展覽,以展示政府官員有在做野,有在掙扎,展覽越唔成功政府就再追加預算補貼更多開更多展覽,直至政府頓悟或客戶成功是但一個成就解鎖,而期間筆克不受市場容量限制,變相成為稅金小偷

疫情前營業額5億,疫情開始後得3億幾,之後慢慢恢恢到上年4.5億,即是說筆克在求生狀態仲可以回到血,麻痺狀態解除後如果補師恐慌性放大補血的話有可能補過龍

因此排除筆克的長期經營記錄,齋睇稅金小偷呢點,足以投機一波,退一步黎講,筆克派息高,派息記錄好,長期成長快,固定支出低,歷史估值高,不易被鐵拳,而且賺外幣,現家價錢平相當值博,同只有自然成長的羚邦相比上限更高

疫情前曾經試過1年交8000萬同6400萬稅,以20%稅率計,現金流3.2-4億,由於佢要還債,派特別息機會低,如果只恢復至疫前水平,現價也就10厘水平,清債要還5年,筆克曾經在市場上有點知名度,PE同PB都好高,博升值再換馬,過兩三年還左債先再換回來的策略比較合適

最新中期報告,至4月30日,半年營業額2.5億,算有疫情前水平,半年盈利1億,香港是某人握手之後先開始共赴黃泉,時間還不多,而之後半年預算會不斷充值,不會冷場,比較遺憾的是報告冇分類營業額地區,假設50%營業額境外勢力,50%自己人,境外勢力唔增長,自己人加50%預算,預算上半年食3個月下半年食6個月,上半年的50%是20%(第四季)+30%(第一季),下半年就是30%+30%=60%,年共110%,因此計算上營業額好大機會超過疫情前(盈利另計)

然後半年業績所示,固定資產多DD,租樓多DD,無形資產多DD,現金多DD,負債還左D,還派了息

假設全年每股盈利19仙,PE15是2.85,PB1.5是2.55,平均2.7計派5厘,水位只有一倍不算高,優點是確定性比較高,而且第二年還繼續有貨賣

筆克有自然增長,有自身恢復,但自身恢復部分和稅金小偷是重疊的,恢復大補貼就少,上限有定量,味皇推斷政府掙扎得最多兩年如不順利就會躺平收水道歉但唔駛下台,係官媒放聲氣話行業要轉營或者索性公開求救索要類似自由行呢類鳩藥

自然增長部分,新加坡估計是相當好的,但中東之前是呢邊的代用品,共赴黃泉之後地點會改返返黎,因此中東是一次性不可逆收縮的,兩加總體不及之前,但新加坡擺的是有市場的剛性存在,呢邊的是冇市場扮有市場的政策性存在,因此"市場"看起來會平白增加實際是重復加算,不是真增長不是持續增長,因此買入後需留意退出時間

2129gogo拖

呢兩日味皇用30秒大法再搵左一D股,例如2481,560,6812,403,1455,1587之類的,然後買的是2129

隻股冇中文名,按公司拼音照計應該可以譯做中文嘅,冇名叫咁呢度姑且稱佢做GOGO拖

2020年股情期間上市的半新股,4亳上市現家跌到1毫,保薦人同會計都極度垃圾,不過味皇也體諒佢細公司請唔起big4,保薦人有幾垃圾呢?下限定價,最後集資淨額4050萬,上市收費4870萬,手續費超過50%,之前味皇睇過的細公司可能抽兩三成,抽過半唔知算唔算一個紀錄,金融才俊下話

上市前佢有56部拖頭,拖頭牌子係日野,日本貨,每部賣68-75萬,38000平的爛地場,員工140幾人,司機40幾人,爛地場租約到22年尾同今年6月,經營地點係新加坡,當時佢最大隱憂係疫情持續時間同爛地的租約到期,因為司機比車少加上疫情,後來劏車賣車剩50部

到今時今日,味皇買佢的原因係:

1.新加坡!

2.香港...

3.員工增至190人

4.2022年的租約完左,爛地增至53000平,另有15000平的倉庫有瓦遮頭

5.2023年6月的租約完左,現在手上都是新約,到中期報告時倉庫可能比年尾更大

6.人地一早共赴黃泉

應該同倉庫增加有關,佢營業額大幅上升,相信今年也會繼續升唔少,PB0.5以下,味皇估計佢下年盈利應該超過650萬坡紙,中期應該唔會派住,下年末期有機會第一次派息派12-20仙,派息的根據是,佢上市前已經試過兩次派400幾萬比老闆而公司現金冇少到,起碼能自力賺息派息,當然燈神味皇例如係8502也有估錯的先例,8502遲左1年先派

資產淨值0.36,合理價0.28左右啦,咁嘅市都唔求佢高PB了,上市價4毫相當水魚,考慮到上市抽過半手續費,咁即係兩亳賣屎忽,當初管理層認為公司值兩亳

1045業績

盈利減少同埋派息減少,當然唔好,盈利2.6億減到2.3億,營業額冇跌現家9.4億

上年佢有幾個值得注意的項目:

1.還債1億,現金增加4億,利息收入增加900萬

2.匯兌損失2600萬而前年是賺1800萬,前後差左4400萬

3.現金流由7.3億增加到7.6億

4.行政支出由1.2億減到1.1億,員工數由110人增至113,另外前年行政支出是1.5億

5.聯營公司由蝕4400萬變蝕5800萬,聯營公司權益由8.1億跌到6.9億,少1.2億

6.折舊率約8.3%,折舊左3.8億,即12年壽命,每股淨值跌1%,而聯營公司權益跌15%

7.己收按金少1成至4200萬

跟住評鑑一下,盈利減少左3000萬,但是當中主要原因是匯兌由賺轉蝕,而今年唔一定會咁多,上年除左坡紙之外幾乎所有亞洲貨幣都大跌,今年暫時未見

亞太衛星的聯營公司以行業類別來說應該同本體類似,本體縮水不多而聯營公司縮咁多,有兩個可能,1.真係蝕,高折舊之外仲有蝕錢,2.分身家,高折舊之外分身家咁派身家會大縮水.早兩年亞太街星每年派完息現金咪多得一兩億,但今年卻多4億,聯營公司派特別息或者轉移定價蝕比本體的可能性不低,現在聯營公司的規模細左,下年會唔會再蝕咁多?唔一定,如果後者成立,或有可能蝕少D但本體現金增加少,或繼續蝕多多而本體現金爆增,如果是前者成立真係蝕,咁本體的現金流入有D離譜

唔計過期10年仲有人用的,衛星的設計壽命是15年,射上去測試一年都有14年用,而折舊壽命12年是比較激進

佢行政支出由1.5億>1.2億>1.1億,營業額在上升,行政支出反而一直下降,早兩年佢做射衛星的前期準備,現家己經射左,後期支出應該不多

減派息簡直難以置信,每股賺25仙派22仙而不是上年的25.5仙姑且叫盈利以內,派息比率88%,上年90%叫保持住,但在味皇視角,佢再派多30仙特別息就差唔多,話曬現金爆升

佢現金爆升唔知有冇包括新衛星的前期按金,不過測試都未完應該唔會咁快接生意,最多將舊衛星現有的信號轉去測試衛星度,舊衛星變backup,新衛星的維持成本同覆蓋範圍應該比舊衛星好

新衛星4.3噸,現代衛星中規模極巨大,10年前的尖端晶片是28納米,15年前時代尖端是60納米,以早幾年單層12納米計是10年前的18%面積同耗電,但最後體積都咁大,比幾公斤的小型化衛星應該塞更多不知名功能,一定會夾帶很多不可描述的國家任務,亞太衛星唔一定會自己接任務,但接任務的某人自然會比錢維持衛星正常,越多人分擔支出就越平,如果只是純通信衛星無需咁巨大,亞太衛星不佔有全部體積,但佔有特定功能就得

以佢的業務類型黎計,收客戶的按金同有幾多客應該成比例,2020年按金4550萬下年營業額9.3億,2021年按金4600萬營業額9.4億,佢9.4億營業額7.6億現金流賺80%,假如下年營業額按比例跌1成,現金流會少7500萬跌相當多

總結而言,今年新衛星測試期間最多是轉舊衛星的信號,唔會接單,可能會降一D經營成本同增加折舊,現金流唔錯,匯兌損失今年未必會出現,加上利息收入上升盈利反彈,派息比率90%,另有可能派30仙以內的特別息,一般情況下今年唔會有大升的理由,新衛星測試一年入賬一年要等兩年,新衛星測試完後有可能出售位置重疊的舊衛星,上年下半年開始D人窮電視轉播收入變差,今年全年窮營業額有機會縮水,就睇反彈多定縮水多了

幾隻港口業績

6119茂名港

每股盈利2.9仙,派4仙(人仔),睇落好似派過龍咁,其實又未算,好似維他奶咁長期派超過100%盈利的股也唔係冇,首先佢交稅都千幾萬,25%稅率的話佢稅基都有成4千萬,咁佢派2千幾萬也唔係唔得

好似維他奶幾十年如一日用舊機器搾汁,舊機器折舊到0一樣可以搾,能夠派超過100%盈利的切要條件是無效折舊,港口如果要好似維他奶一樣就要又殘又舊,機器唔升級唔換,一直維修,舊機器幾十年歷史,生鏽落漆甩皮甩骨,但又唔影響使用,連工人都係一堆老頭子老屎忽,越來越息微咁,舉例來說,澳門內港咁,如果內港有上市可以派極高息,但換成外港同九澳港就冇可能到咁,而茂名港就乎合又殘又舊一堆老頭的條件,甚至還乎合越來越息微的條件添,不過佢息微緊都仲想擴建,所以下次未必能超過100%派息比率

6119係茂名的舊港,位於市中心的古老小碼頭,即係等於澳門內港,茂名會係山卡啦起高大威新碼頭黎取代舊碼頭,即係等於澳門九澳港,市中心的舊碼頭地理條件同方便性取代唔到,但政府長遠的目的始終都係想舊港息微變地產項目,呢種情況下舊碼頭運量長遠會一直下降,不會再有投資淨輸出,增長只能來自單價增長而不是增量,不過佢短期還未走到澳門內港的階段,現在還有些少擴充,不過茂名已經在市外幾十里建了茂名新港,60里外還起多個雞打港,現時都係山卡啦,以成本考慮,散貨還是去市中心,礦石之類大貨去山卡啦

回到業績本身,好似賺多左咁也不盡然,只是還清債唔駛比利息,最後派埋比你咁,闊佬值得肯定,但下年冇債還錢又派清光,這種增長並不會重現,佢現金冇曬,存貨突然多1.6億,那是柴油,搞到好似國泰炒油咁,由於佢業務包括同人入油,所以問題不大,不過如果油價急跌而佢短時間未賣曬就會蝕大錢

佢話想擴建多個泊位,但好似一直攞唔到地,擴建進度停滯,最好一直停滯一直淨輸出,咁收息最好,如果佢一開始擴建,咁可能有一年減派息

佢派4仙人仔,即4.7仙,唔抽稅,下年大機會不增不減,下下年再下下年都可能就咁,大漲幾會不高,大致係咁,味皇平均0.37買,13厘,現家市值先2.1億蚊中之腿

8502池州港

以前比味皇評價為創仔殘存股中最優質,會係2020或2021業績破天荒的第一次派息後大執一劑,最後2021年也沒有派,以為是姑寒財主,味皇平手走人的股,結果2022年業績一次過派兩年份量,味皇高追大手指落錯單的股

營業額比上年上升比教多,是因為上年完成了碼頭擴建,現在收成期才剛開始

債己經還清,擴建已完成,短期唔會再有新投資,所以派高息,佢肯派高息而不是用來亂收購是萬幸

現金暴漲5000萬,盈利8400萬每股8仙派3+3仙,,好似幾派得起,交稅只有900幾萬比茂名港仲少,但池州港的稅率是15%而不是25%,因此稅基是6000萬左右,池州港規模起碼比茂名港大一半,派6仙是6000萬,如果有增長,下年派5-6仙也是有可能,因是15%稅率比政府調回25%的話,稅基就剩4000幾萬,會派得4仙,另外8502現家現金將近3億,佢用唔著,今次肯派,咁下次派特別息機會也大

現家升左咁多市值先2.6億,味皇0.24買0.25走,現家大手指平均成本0.345高追,現在看返味皇即使完全扑中,0.24到0.345也就40%,坐2年博首次派息呢D極高不確定性就算成功左似乎也不算特別肥,每股派0.3的話,0.345買是8.6厘,而且冇稅,派5-6仙的話是14.5-17.4厘,茂名港同池州港都是0負債,而池州港規模起碼比茂名港大一半,同時在收成期,而人地是息微期,因此池州港是完全上位,負面的是池州港是創板人地是主板,但市值2億0成交的股應該冇差

盈利雖說是8400萬,但稅基6000幾萬,數字其實有高估

其實地區性冇投資的縮骨港先係寶,好似A股一堆垃圾高債低息高估值大港口,但卻有一隻反常高息0債低股值的港口叫營口港,最後比大港口收購

6198青島港

青島港各方面升一成半,派7厘幾,不過要比稅

增長相信係來自跪低肯買澳洲煤而不是越南煤,下年有冇呢個增長比較迷,但青島的地理位置要大倒退也不易

任何時間呢D大港口都有工程同收購,因此有資金需要,佢債也沒有特別點還,現金也沒有特別增加,不過佢帳面近百億現金,接任務的機會並不是沒有,如果有甚麼又要買收購價可能特別高

派息比率38%,沒有特別理由去提高,7厘幾以呢個體量的港口來說已經相當不錯了,大港口當中依然是突幾個頭的存在

冇貨果D詳細就唔講了,3382天津港大減息又冇大跌唔吸引,不過開始大力還債,5年後可能值得睇但不是現在,144債比較多,1199同144一樣的債務水平,1919財務比較好但是錢來自發新股會攤薄,3369同2880都財政改善,但3369加派而2880反而減,6117成身現鈔金光閃閃但沒加派,如果排除老千人底的6117後,如果話有邊款大港可以同6198水平接近的,得934

睇返業績期

味皇比鐵拳打完之後搵左大堆新後補名單,預測大概派幾多,特別仲多搵左堆市值只有三兩億的煙頭,唔計6月出業績的,平時有比較留意的稍為總結一下:

有D預左今年會減的,冇人會期望MGM同餐廳同惠理會派,但唔理,數量夠大讓單手單腳都應該睇到方向

1883,加

1606,減

762,稍加

552,加

3328,稍加

2356,加

440,加

2888,大加

144,減

6198,稍加

934,維持

2386,稍減

267,稍減

460,減

133,減

806,大減

1888,大減

771,維持

46,加

3969,維持

3315,加

752,加

6811,減

1181,減

1045,稍減

1785,加

1576,維持

737,大減

811,稍加

829,維持

2119,大減

6858,維持

2258,大減

954,大加

543,維持

2282,冇

6083,大加

1853,稍減

1936,冇

528,大加

6119,加

1837,冇

8502,首派

1480,大加

1289,加

1713,維持

2180,大減

6616,冇

2116,維持

狂加6

加10

平14

減6

大減6

冇4

35%加比較多,30%差唔多,35%吐血,即使係史上最慘的經濟情況,能有技術地收息,65%餓你唔死

考慮到預測會減的,實際大半都預測到正確方向,派息還是有一定的預見性的,至少有人做到,平均看像穩贏,不過35%不是低,但概率壓在個人身上就是要你命,你要麼分散,要麼提高眼光,要死時還是會死

蚊滋咁大的股,可以派息的還是會派息,牛龜咁大的股,唔派的一樣會唔派,收息唔好歧視細股,大細影響的是套現難度

上面有幾隻味皇非常驚愕,即沉板以為今年軍用單多賺錢點知唔掂,肛蛋是向好的但埃塞俄比亞內戰以為會拖累點知井噴,合和以為算好地地點知死直,池州港以為姑9寒點知利是遲一年先派,燈力尚在

今年經濟似乎會比上年好,咁65%餓你唔死今年就更加餓你唔死,上年能夠有果子食的今年大概率更香

題外,舊文提過味皇認為941,762,728當中762最好要買就寧願佢,941太有錢會怕被打拳,728最窮難發圍,762中間位唔上唔落唔怕拳唔怕窮最好,結果得762加派,941真係接任務上徼450億,其實香港自己都接唔少任務,以後陸續有黎