大炒

又唔係冇方法嘅,第時補習社可以明面上非謀利,然後同另外開經紀公司同補習老師簽獨家代理合約,補習老師出勤要比經紀委託費同車馬費,補習老師轉去其他公司要出轉會費,諸如此類係咁蝕盡量蝕比非關聯公司,然後用其他名義係非關聯公司度收美金回佣,冇錯,就好似foot球咁,正是世之日常

舊文盈富基金廢的寫的野最近係咁顯現,砣拉味皇頭5個月的盈利幾乎冇曬,趁此時候,味皇1.74沽出10000股匯賢,0.44換入50000股大悅城,跌1000點原來第日又1000點,聽日可能又跌,基金贖回申請點都要幾日,因此抽資應該會維持一排,根本原因還是恆指公司老是選些鳥股,基金先會贖得咁快,上面的事,不便評論

金融風暴金融海嘯之後,今次要叫乜野?金融鐵拳?係味皇比較熟知的股入面,例如四環同美蘭咁,今個月跌一半,呢兩隻都係熱錢多的公司,相反國銀同京客隆呢D,今個月基本冇升跌,因為向來冇成交,味皇手上無成交的股多的是,損失應該比人少,味皇10幾年前已一直係股市上保持防疫距離,而且早知道我們立於浮沙之上,站在人少的其實地方更安全

2010年時睇中信銀行的業績時,佢不良比率不增反降,味皇就即時沽清了內銀股並從此不沾手,事實上佢經過10年有多了,仲係冇爆到,咁代表味皇是錯的嗎?咁只係代表味皇信自己所想的並堅持下來而已,事實上一日唔爆味皇一日都可以應該係錯的痴9左線佢

也不是第一次講了,以維穩的角度看,銀行股東可能有幾百萬幾千萬,但銀行存戶會有幾億十幾億,甚至手上的兵也是存戶居多,如果必要在兩方之間犧牲一方,要選那一方不言自明

至於存戶同債仔之間的話,味皇覺得兩方都麻煩,但是相較之下存戶會緊要D,犧牲債仔會製造失業,最終會影響存戶,但即效性黎講,犧牲存戶即時會控制唔住,而犧牲債仔,至少可能頂多幾日先發作,而且債仔同佢相關的人數點都比存戶少,但是,與債仔同存戶相比,股東同投資者(包括債券),實務上是屬於能收割的部分

摸摸的茶上市先有幾耐?話咁快噴左一半,外賣鐵拳下受傷最大的唔係美團,係利用美團的下線

這是早兩日味皇飲的爆汁檸檬茶,上面寫的金額是15蚊,即是15蚊營業額,間野睇落有5個店員,味皇爆汁也整左5分鐘,至於味皇比左幾錢呢?答案是5.99,味皇用美團特價買的,5.99同15蚊營業額之間似乎有個相當細的差距,味皇比5.99,間野係唔係收到5.99呢?未必,用美團叫單一定會被抽水,美團也有成本,5.99甚至還可以叫外賣仔外送,簡單講呢一單是賺唔到錢的,賣一杯蝕一杯,這就能解釋摸摸的茶空有營業額但冇盈利的情況啦,當然呢間唔係摸摸的茶

5.99同15蚊的差額中間有乜事情呢?上面有個12.9,表面上15-12.9=2.1係美團比間舖的回贈,12.9-5.99=6.9表面上係間舖比味皇的回贈,果2.1,美團有冇比呢?還是羊毛出在羊身上?由於美團也是蝕錢做,因此5050機會,至於果6.9,係間舖比味皇,定係美團比間舖再比味皇?咁就要視乎邊間想係股票市場上殺水魚了,假如是美團要的話,可以比錢間舖,間舖回水返去(生成營業額),假如是間舖要的話,間舖先比錢美團,美團再比返錢間舖(生成營業額),味皇的出現只是令佢地一個有生成營業額的機會,齋吹,猜想而已,不能排除有人就愛做蝕錢生意

有時把戲老土,但有效,好多好似恆指公司咁甘心樂意上釣,正是姜太公釣魚

如果堅持從資產負債表同現金流表上選股,就不會犯呢種正確了

味皇推介有本書叫"智慧型股票投資人",叫格拉咸的人寫的,1949年

如果美團受限,下線的人就不能繼續以往的手法,如果唯一的解套方法是打算上市抽水,美團之類團體萬一用唔到就會破局

在這個時候叫撈底,實際上不講明天繼續跌之外,經過疫情,味皇也不認為大家會有很多閒錢,有閒錢的人估計很多也被之前的各種誘惑割韮菜,是咁的,先活下來,食飽飯,搵份收入來源先再講,好似D港股基金近期應該會各種抽走,平時大成交的股會跌多D,味皇反而覺得類似惠理基金806第時可以留意,呢次之後好多基金資產規模應該會大減,股價同時受市場風氣同本身擠提二連擊,份受影響業績公報時間可能在一年之後,味皇要講的係乜野呢?今日又好,下年的今日又好,能買的目標唔會走左去,冷靜下來整理好現時的情況較為重要

亞太衛星1045

上一篇提到3隻信號管制其中一隻,在世界範圍中也算奇妙的行業,至少港股中未必有第二隻,wifi中繼知道冇?佢的原理也非常類似,只係中繼距離比你想像更遠,資產只有幾粒太空衛星,好處的係佢唔太會有新投入,就算佢想投入門檻太高也投不起,因此一味只會派息,缺點係唔排除下一秒佢的衛星就會受撞擊變成太空垃圾,同埋現家打炮的成本比蘇聯時代平左,最近維珍亞馬遜老闆都大氣層上一遊,射垃圾上天會越來越平,舊時代的垃圾加速變成太空垃圾

講返1045,佢固定資產...隨意就好,關鍵係佢現金增加很快,冇集資,派息肥厚,近10年基本都有派息

資產數量實際上不能確認,也許下一秒就減值,但資產能用的情況下至少會有現金流,看起來現金流7億左右,交稅不多,味皇推測佢的收入來自外太空,由哪一個國家抽稅都會出現法律問題

最近生意好似越來越縮,而且用埋加速折舊,業績顯得非常難睇,可是相對的,佢的現金最近像蟲子一樣係咁滿出來

反正佢的資產不是0就是1,因為最好從現金流方向黎評估

佢派息1.7億,以5厘計,值34億,7厘計就24億

佢現金流7億,10%回報率計70億,15%計47億,20%計35億,30%計23億

而佢市值22億,按上面標準就係派7厘幾,資產30%回報率的公司標準,這種程度怎樣也叫算係好搵的公司,那樣就試下咁假設,1.佢資產好快唔用得,佢會用3-4年時間將手上資金全部折換成現金,2.佢資產好長壽,佢派7厘幾息,每隔幾年會派一次特別息

如果佢市值44億時,同樣標準就變成得3厘幾同15%回報率,這樣公司算唔算好搵就非常微妙了

簡單講,味皇認為佢的固定資產會折舊到0,期間會搾取出很多現金,當固定資產折到0時,佢還有50%機會繼續搾得出

如果不是天意弄人天動萬象的話,呢個價錢估計蝕不了本,前途就冇乜,但有可能派特別息,佢累積資金再射垃圾上天的可能性相信不高,做呢行應該很難轉行,到衛星唔用得冇收入的時候,私有化退市或者賣殼的可能性較高,這是味皇的個人推測,冇乜根據

伯爵茶

收租樓租客走左,味皇搞裝修少寫文,一黎冇錢買股也就冇乜想寫

最近來來的維他6盒無糖茶特價9.9,維起黎1毫子買到15毫升CP值高,買左幾種口味,烏龍茶一般,鐵觀音比較合味皇口味,佢仲有隻叫伯爵茶的物體,名就好霸氣,飲起黎一言難盡...

臭,成陣化學味,似飲洗清精,是否廁所香水?上網查一查,疑似是加左佛手柑皮,據說是高級紅茶咁話

味皇應該算是紅茶黨,對味皇來說咖啡就也就是泥水而已,可是味皇也HOLD唔住,只能這樣解釋了,青椒是不快,薄荷是惡意,榴連是貓屎,芫茜是行刑,食煙是服毒,可是偏偏就有人愛做抖M,兼講野大聲過味皇,伯爵茶估計也是奇人異士的口味,佛手柑皮大概同芫茜差不多,有人甘之如飴,對味皇就似落毒,並不是味皇杯茶,味皇對於口味可以力排眾議的堅持,因為味皇尊重自己條脷

這沒有乜野對錯問題,只是個人口味,但有時會有人吹噓有幾高級幾有品味,然後又貶低其他口味低級不入流之類,通常一個人嗌得大聲係因為有愛,但一堆人嗌得大聲多數係因為商業化有利可圖

市場上吹噓得最大聲的項目,是否真的適合你口味呢?味皇看見好多吹噓的人發大財,齋聽人講的被毒害,係咁換口味,也許多些經驗不是壞事,但不是自己口味維持唔得耐自己又辛苦

韮幣又好科網又好造車又好,能夠足夠長期賺錢的多是不起眼的行業,靜雞雞贏

今日齊魯出左盈喜,也不是甚麼意外的事,多3個月同多左收購的收入而已,一年前就知,但佢唔派中期息,價值唔一定近期就足夠地反映出黎,不過下一步要點也可以提早想定一下

神冠也發了盈喜,味皇覺得自己已不太可能用滿意的價錢買入就算了,好似齊魯咁,如果升多倍,下一步味皇可能會換成成都高速之類比較低債的公路,一係換成青島港之類比較低債的碼頭仲有幾隻做信號管制的公司都幾吸引,齊魯到價需要一段頗長時間,那些PlanB股唔一定比味皇真正買到,好似神冠應力之類中途升左就不想買了,呢兩個月味皇組合的表現也一言難盡,但看起來指數股熱炒股似乎比味皇更加慘,股市低估值的股票應該會存在一段長時間,要找總會找了的

紅茶口味的話味皇會比較鍾意落糖的平價英德紅茶同阿薩姆紅茶,其他就壽眉

由華南城改建開始...

華南城個萬達廣場,原先6月25日開張的,後來拖到7月3日,但當日有地盤工人跳樓討欠薪結果又開唔成再延期,入面等開張的舖頭浪費的食材之類估計多少都要華南城同萬達賠的

由於今日澳門放寬返7日通關,味皇遲早會再過去8卦下

是咁的,華強北早排係唔係有棟豆腐咁有彈性的大樓嘅?聽講華強北好多人搬左去華南城個長年丟空的電腦城,因為通左地鐵,果度又係物流轉運中心,電子狗反而比華強北方便,唔知真定假

華南城果所謂1000億改造(補地價補死佢)

即係中間的兩層舖位倉庫全部收返推平(同業主回購搾乾佢),就設計圖咁睇,除左酒店就係寫字樓,冇住宅,即係變返工中心,要D人住就去附近恆大佳兆業龍湖冇人買的D新樓度住咁上下

本文目的唔係吹華南城,係咁,深圳睇得出佢想將華南城(平湖)更加返工化,佢周圍就的舊村就住宅化,華南城所在的位置係東莞惠州深圳的交界,外面的地皮暫時未發展,華南城市中心化咁附近的地方就難重複建設

深圳有類似計劃的邊境地區仲有光明同坪山,現家味皇試下預測深圳政府的計劃

坪山旁邊係惠州同鹽田港,味皇覺得惠州利用價值很低,連接惠州最多係住更多勞工同更多的倉庫地,味皇預測坪山會搞個小市中心去服務鹽田港,把山推掉弄些物流用地同起更粗的路

光明上面係東莞,味皇上次住過,北面都係山,不是維他奶的廠,就是光明的奶廠,還有晨光的奶農場,入場費要85蚊,周圍都係空地

光明同平湖非常近似,東莞南面邊境,光明係東平湖係西,光明果邊近蛇口港,平湖果邊近鹽田港,味皇覺得可以由呢度做起點推測,蛇口港係客運兼貨運港,而鹽田港係純貨運,光明平湖的空地各服務一邊的話,光明會傾向將地用係人上,平湖傾向用於貨上,光明果邊還有機場,因此光明應該會整體商住酒店公園化,地積密度更高,最多再整多幾個體育中心同學校之類的,平湖除左將華南城市中心化之外,應該會加闊公路鐵路,整D冷鏈倉庫精細倉庫,大型倉庫用地應該會同旁邊東莞惠州要,地積比較低佔地較大巴士慢慢等,另外既然華強北有人搬去平租的華南城,深圳政府可能會順便一次過清空華強,將班IT狗電子狗趕去華南城返工逼地鐵,再將華強升級再摩天D,美團1棟,快手1棟,B站1棟,TK一棟咁,割一次韮菜多一棟總部

味皇推測光明會炒較貴,得個殼,而平湖就較好租,龍蛇混雜

第二針復必泰

尋日打埋第二針

(另外第一針後的第二個星期，持續左兩日心悸)

打完第15分鐘左右開始手震，側腹的肌肉好似眼眉跳咁抽搐，維持左3分鐘

第一日冇乜事

打完16個鐘開始由針口開始肌肉痛，但冇上次比館長抦咁誇

26個鐘後肌肉痛集中係被拮的手同膝頭上面，另外全身疲勞沒有食欲，附帶頭痛，頭痛位置係太陽穴同眉心

30個鐘感覺有d 發燒，暫時係咁之後再更新

*之後持續左12個鐘發燒,訓唔到覺,冷氣都由25度調低到24度,燒完之後冇乜事

48個鐘又開始有頭痛同關節痛

另外2.55入多10000股CTM

*去到60個鐘仲有頭痛,拮針手麻痺,66個鐘就拮針手麻痺,繼續訓唔好,再之後冇乜大礙,食慾恢復返,係零星太陽穴有D壓力感

*已經108個鐘,正常坐低起身一般係見頭暈,現家係坐低起身見頭痛,"看見了!","右面?不對,是正面!","爆種",閃一閃迴避率100%咁,萬一真係爆,之後就變痴呆了--指爆血管

保持冷靜乃保身之道

*已去到132個鐘,感覺已經好好多,打飛機仲係會有點危險,過多兩日應該可以隨時打飛機?

大致去到咁啦,之後呢篇就唔更新了,味皇白老鼠實驗親測,結論: 第一針復必泰副作用3日,而第2針效果是頭針的雙倍6日