手機不能用大陸wifi

最近味皇入手左一部sharp現家用緊,發現佢係大陸用唔到wifi,呢個問題似乎普遍出現係各種牌子的手機上,味皇覺得唔少人對解決方法有需求,所以順便整理一篇出黎

近幾年的新手機有D一出大陸就連唔到wifi,有D就連到,整理一下網上見到的例子,大慨係咁:

連到大陸的:

華為,三星,中興,小米,步步高,聯想...

連唔到大陸的:

google,諾基亞,sony,sharp,華碩,HTC...

是咁的,現家android係連wifi果陣,會先偷連上google的網站黎確定個wifi係連得上定連唔上,有毒冇毒之類,而後再確定連接,基於不可描述因素,其他國家由於連唔到google的網站所以一概會報錯,而接近黨的牌子就冇呢個問題

大概就咁,你叫雞之前有人同你講隻雞可能有毒,出於好心或其他原因都好,阻止你叫雞,咁應對方法你一係休返好條褲,一係唔理警告接硬上,說可能有暗病但並冇話用萬能膠封死,實際還是門戶大開,當然,後果自負

而係大陸wifi上面,原來佢只是報錯自動唔同你連,但你依然可以無視警告繼續硬上強行連接,結果而言佢雖然一直報錯,但照樣可以連到B站連到睇波,正如最後有冇中到成身毒都好,硬上至少都能達成叫雞的最基本目的...唔怕的照連就係

-------------------------------------------------------------------------------

回到平時的題材,味皇係2.27-2.3沽出35000股齊魯,2.28換入35000股CTM,主要是見齊魯貴過CTM,下次有機會再換返過去,早個星期衛星也有貴過CTM,味皇第日仲特登早起身想換,結果也是那些只得一日的行情換不成功

另外2.09沽出26000股能投,1.24換回44000股國銀,這些能投主要是2月時味皇把國銀1.8X賣左再1.6X換入的能投,現家見價錢可接受就打算換返過去,一來一回+80%,算今年少有的大成功例子,另外當時1.8X賣再換入1.1的東瑞算小成功

之前23000跌到17000點時,能投逆市升,17000點升到23000點時,佢龜速升,最近23000跌返落20000點時佢冇郁點過,無論係個市定係組合入面都算特異點,而其他股呢排波動極大,之後如無意外味皇會持續將能投換出,由於能投係味皇第二大持股,可能會密密賣,但這不代表現價的能投貴或差,反而應該說相當高質

講起黎之前咪話銀行網頁一入去就要認證碼極度擾民嘅,現家建行又變返唔駛(永亨仲要),CTM的短訊又少返D

關於最近的市況

10/2

是咁的,味皇日日都訓到收市,唔係講笑,好多時冇睇市,個市點樣同味皇關係不大,係

實情係冇錢,味皇的股息要10月過幾日先到,現家買條毛

冇錢的情況下能做的最多就是換馬,成個月以來,有一日東瑞收市價比國銀高,味皇諗住第二日起身換入國銀的,結果就只得果一日合價換唔成功,之前路勁/惠記,齊魯/成都,都試過第日訓醒就冇左的唯一一日餐士,也不是第一次的經驗,過左就算,係467億成交到4000幾億成交之間,味皇的股要剛好動L,同其他目標有相對大的價差才能活動,冇錢就只能咁,而個市動L,但偏偏輪唔到我

熱錢不是憑空產生的,轉過黎港股,就代表係第二度流出,即是之前炒作的日股台股美股AI股,隨港股炒熱,另一邊就會失去熱度,一個記者每日能出10篇鱔稿,如果佢寫一篇港股題材,咁AI股果類就會寫少一篇,一個大戶比錢記者寫10篇鱔稿,佢唔會寫10篇不同的題材,而是同一題材寫10篇不同文稿,這樣大戶就可以集中資源更合乎成本效益地洗腦

即是說現家果4000幾億是恐慌性買,買左先算,題材同鱔稿之後再安排,同一般老千股一樣,之後會一邊唱好一邊上升,非常唱好一邊出貨,終極唱好終極甩貨(比指數基金)

通常D人會先買指數股,再買可以有題材寫的股,個市升,之後個市唔升成交唔跌,變成慢慢賣指數股題材股換業績股,再之後就(甩大股,買大包圍,市跌成交大,有人開始接細股,就比佢地接,自己再換返大股)...味皇對港股能否進入到第三個階段持懷疑的態度

熱錢流入指數股,也不是一定100%利好,例如2萬點跌落萬7點,青島港反而由3點幾升到近6蚊,而今次由萬7點升到2萬點,青島港反而由近6蚊跌過到5點幾,佢有中間有變化嗎?並沒有,股市不講武德的,跌市中表現非常好的煉化也一9樣,即是輪到你就是你的,輪不到也就這樣,熱錢由避險股流出,但要記得,避險股能迴避風險,持有它一般沒有損失(能把有風險的機會"成本?"當佢不存在的話),唔值得急

現狀是指數股同題材股為第一波的概率最高,人地文章創作也要時間,發窩輪也要先手頭有貨,隨豬起舞也許成功率不低,但不合味皇個性,味皇的話就會買業績股,迎接第二波,或者第二波從來也沒有黎過至少也叫買了隻好股,呢度所謂業績股,不是下年業績好,下下年業績更好的股,好似東瑞咁未確定的未必有效,最好是己知的,已確定的,就是之前幾年業績都好,但卻跟個市一齊跌到冇影,到現家都未升的股,可以的話有點點名氣的中型股比較好,就是說你啦,筆克

過幾日股息到齊前希望筆克繼續紋風不動就最好,好似亞實呢D蚊型股,離熱錢似乎有D遙遠

由於港幣兌美元7.75,換美金也不失為一個放閒錢方法

但港股升也不代表XG會重新過上好日子,正如西人呢幾年一樣

10/4

如之前宣言咁,1.85買左30000股筆克,0.61買左50000股雅各臣,另外9.7沽清30000股中信泰富,1.42-1.43換成20萬股國銀

數碼通澳門

由於和記唔公布澳門數字(唔敢公布),而數碼通有,現家數碼通執粒,這是寫佢的最後機會,而本文的目的係偷渡CTM

數碼通澳門 

                 21下       22上        22下       23上       23下      24上 

營業額      263         247          167         92           34       沒有公布

現金流         7           -2           -10          -6             -8       沒有公布

 CTM        21下        22上        22下       23上       23下      24上 

營業額     1957        1685       1804       1765       1996      1912

------------------------------------------------------------------------------------------

時系列   (封關)>>>>>>>>>>>>(出5G)(停健康碼)>>>(緬甸)>>>

所以味皇可以斷定和記唔公布澳門數字是唔敢講,相信係股東大會問也會顧左右而言他,(不過如果能用合適的質問方法,相信也可以從和記管理層口中間接探聽到CTM的業績,和記股東會比CTM早,而且管理層講自己有限制講競爭對手冇限制)

按數碼通黎睇,營業額至少要5億先可以收支平衡,養得起幾個鋪位同一百幾十人,想有錢投牌營業額可能要再雙倍先得

當月費150蚊,以前比現家貴,一年5億係30幾萬個客,可以係上台可以係儲值卡,味皇唔覺得佢會有30幾萬客,就當有好了,到最近23年就走剩8萬個,冇5G就冇新客上台,澳門外勞增加也不是23年的事

係封關冇漫游時,數碼通營業額下降6%再32%,CTM就14%再回升7%,冇左防疫短信後數碼通跌仲多,冇5%牌跌更多,由於和記澳門同數碼通澳門性質完全一樣,相信和記也會出現類似的情況,只是和記用戶數多D營業額在5億以上的日子比數碼通長,而今時今日的和記恐怕在收支平均線以下,至少澳門子公司未必有投牌的資金

假設和記是數碼通的2.5倍好了,中國電信再大和記少少,廿萬外勞時代,澳門人口100萬時全盛市場容量大概推測是半年40億營業額,和記同數碼通退出而政府又冇打算引入聯通的話,比例上CTM會分30億,中國電信分10億,CTM用緊好多中國移動的資產,因此能引入的非鬼佬只布聯通,方法是聯通收購或入股和記,主要睇政府有冇心,對聯通來說和記是還不足以盈利的負資產,如非收到命令,未必有動機進入澳門市場

換入舊僱主

見業績唔好,於是0.99出清恩達,再14.2換入4000股舊僱主,成個8月象徵式買賣一下

同味皇預測相反,電動車同打仗都拉高唔到PCB的業績,恩達塊地皮又唔知幾時先有錢,見唔到明顯的前途,於是蝕少少放曬,不過買返黎中間跌左10000點,反而味皇係恩達身上微賺,話曬收左兩次近10厘息,佢又冇點跌,相對舊僱主期間跌到得返1/3

舊僱主係呢半年股東權益由負變正,有返派息的可能性,但派都係計由正數開始的下半年部分,即使仍佢現家跌到得14蚊,但今年就算派頂多都係3厘,而且只是解除派息限制,有可能派但不是必派

舊僱主用半年前比股東權益多左5億鎂,利息支出少左6700萬至2.2億鎂,第一,下半年利息支出會再減少,第二,下半年美國可能減息,於是流動資金會多左,佢肯派的話下年派息可能去返7厘,但都係要睇佢會唔會一口氣續回債券,佢之後4年的增長主要會來自還債減少的利息

味皇下個月電話合約到期,早兩日問中國電信,佢D plan仲未updata,仲係2年前的plan,現家CTM最平的plan係98蚊的5G,而現家的中國電信最平的plan係2年前98蚊的4G,中國電信最平的5G plan係198,已經貴CTM一倍,毫無競爭力,政府果然唔敢郁央企,但澳門不用競爭,因為一卡兩號鎖死大陸號碼字頭唔存在轉台的可能,因此味皇不情不願的睇黎都係要續4G plan,部2019年的S10e睇黎可以再戰兩年,不過電池已經虧虧地,可能上閒魚幾百蚊買部sharp代替

數碼通話唔做喎

早兩日新聞話數碼通話唔續牌,將D客甩比CTM咁話

咁就當係上一篇的補充

通信局的資料,22年推出5G時,澳門和記同澳門數碼通沒有浪費錢申請5G牌照,所以至今亦沒有5G頻段

冇申請5G,好處係慳好多錢,毛利率更高,主要係初期得益,壞處是5G機開始普及,用4G的人換機時有機會走,冇新人用新機入坑,至今仲接受4G的人唔會係水魚客,主要係後期出現

CTM同中國電信的電話牌入面,3G係下年6月4日到期,4G係2028年到期,5G牌照到2030年,相信和記同數碼通都係3G下年到期,到時唔知澳門會唔會開始淘汰3G

當時5G係世界上仲未普及,雖然高通865係2020年的產品,但當時是有5G機但冇5G服務,大陸算推出得早,去外國漫遊仲落後

和記同數碼通,係2023年沒有大影響,因為當時5G貴又唔普及又浪費電,但2024年CTM已經進化到冇4G新plan,2022-2024年間,和記同數碼通的客量減少,甚少換機冇必要換機4G機已足夠,完約可能轉台,味皇記憶中數碼通的市佔率不足兩位數,客量減少養唔起鋪位,上年先執左運順間鋪,假設數碼通有7萬個客好了,為左7萬個客值唔值得投一個3G牌同一個5G牌呢?回唔回到本呢?只投一個3G牌當然可以繼續延命到2028,但客每依然會年減少,唔投5G牌就冇新客,但7萬人未必養得起個牌,所以數碼通計個條數先唔做

同樣問題也會出現在和記身上,假設和記有20萬客,佢也要考慮養唔養得起個牌,投個3G牌冇乜野,但CTM同中國電信未到期時,政府會唔會開放投標呢?和記會唔會中途投個短期5G牌呢?定係租人地個頻譜?冇5G會流失舊客,佢4G plan平又唔係平過人地5G,買個iphone16用4G?當然和記的財力遠比數碼通好,但最近一兩年唔覺和記會有5G牌,因此客會流失去CTM同中國電信,最後搞到好似數碼通咁自己退出市場,總之和記係下年6月之前會出相關通告

數碼通現家的客好大可能仲係用緊2018-2020年的4G機種,即係小米9,三叔S10之類的,今次轉去CTM換5G plan可能會換順便三叔S24呢D機

假設7萬個客,平均120蚊月費,每個月840萬

但是如果市場上得返CTM同中國電信,新特首可能就會引入新公司或者叫和記改名當做政績

1883業績

2020年上半年疫情的時候,短訊爆升3.2億,漫游少1.2億,盈利冇點變,全年短訊爆升5.8億,漫游少2.8億,盈利冇點變,即是說漫游的毛利率比短訊高,又或者防疫短訊收費可能較低,漫游如果能夠上升的話應該有唔錯的抵銷能力

2020年短訊爆升5.8億,每條垃圾短訊收費1毫,是58億條,半年當佢29億條好了,今年果分類半年少左7.1億,當中聲稱已抵銷3.8億的語音話增長,咁即係齋短訊少左10.9億?半年109億條詐騙短信?假設園區有6萬人,每人發18萬條詐騙短信,感覺點都對唔到條數

味皇認為,CTM之前一眼就可以睇得出同詐騙有直接關係,唔好睇,於是佢會不會將同呢D園區相關的收入拆開,再打包入其他分類度,咁下次就顯得冇咁核突呢,咁樣,變成國際電信業務歸類多左D不是園區的收入,或者其他企業業務或者移動業務歸類多左D是園區的收入咁

比起半年少左109億條詐騙短信,味皇覺得入面唔一定真係全部真係短訊,可能有D子公司要切割或人物要切割,於是都順便歸納入去為一次性損失

園區上年10月就冇比錢的,但欠費一個月唔會當爛帳,欠費兩個月唔會當爛帳CUT號,上年業績報告時CTM只係收唔到錢冇營業額冇盈利,但現家欠費超過半年,需要CUT號,於是可能總會有一D要野攤銷變一次性損失,例如電話卡,例如分期付款的電話之類的,反正在園區活動的少不了澳門社團

下半年短訊應該會因為銀行6月開始的煩膠認證短訊恢復一D,但肯定唔會半年109億條

佢上年短訊少左9.7億,97億條短訊?而盈利12.3億卻基本冇減少,上年固定資產折舊左3億幾,而今年上半年只折舊左1億,而盈利反而唔見兩億幾,會唔會上年提多左或今年提少左折舊呢,佢上年全年現金流26億,上半年14億幾下半年11億幾,今期上半年10億幾,現金流方面比盈利所示更差

移動業務部分,好似味皇同同事疫後第一次出國外游,飛機也冇咁擠拥,機師也熟手返,我同事今次就用左CTM的68蚊漫游,至於味皇的中國電信冇出國漫遊服務,所以淘寶49蚊人仔買電話卡,總之結果就是漫游上半年增加4000幾萬咁樣,下半年應該會更好一些

電話用戶多左一成左右,增加好多,似乎係新外勞,新增的人下半年會交足6個月,舊人都有電話,新登記唔多會係老人plan,假設平均月費120蚊9萬人,每月約1000萬

4G變5G轉plan的人多左30萬,味皇頭先特登去門市問價差,發現CTM已CUT曬4G,新續的都5G起,至於月費,感覺比4G時還平左...,實際收費仲低過中國電信,由於中國電信冇漫遊CTM有漫游,所以新增的一成人大概大半係由中國電信度搶過黎,即係咁,政府用續約逼CTM減價,而政府己經成功左

數據中心同光纖加埋總共7.4億,當中數據中味皇推測是4.8億,光纖2.6億,成長率很低

企業服務左多少少,主要都係東南亞地區,假設如果出一D包埋短訊的收費plan比東南亞做慈善的有限公司,咁109億條短訊的收入自然會下跌,咁影響數字會變細,切割也快D,假設,另外澳門08年後就冇街景,睇youtube冇廣告,但最近連香港都唔比走顯卡,咁香港相對於澳門的優勢就拉近,甚至澳門人脈對北泡契哥同包頭佬更有優勢,CTM係東南亞投資就自然會有公司用,無論D人搞幣定搞AI

總而言之,短訊唔會全部恢復,亦無意全部恢復,本來就係石頭爆出黎的,但相對漫游會再恢復些,剛好同2020年相反,電話月費會少量上升,另外其他某些業務會上升,當中有些是變相的短訊,下半年會比上半年好,但好幾多就難講,唔計短訊,其他業務下半年應該會增加1億以內的盈利

但是派息部份大偏治,雖然中期冇減派,但是留意到佢有35億的債會係3月到期,而最近十年?CTM好似每期業績都有大量還債,但今期冇同上年尾一樣,現金還少左,半年後CTM要面臨決擇,到底是借返35億然後以前的派息,還是借少1/3的債然後減少派息?結論而言下期派息叫做借錢派息,如果CTM的債唔係最近到期,咁佢大機會唔減,冇選項就唔會去選擇,但還債的選項如果擺在面前,佢就有機會選擇,如果味皇有去股東會就可以直接問佢傾向還債定派息

另外佢果35億係債券,其他的債差唔多已經全部還曬,即是佢還埋就走向淨身,佢今次續借到底是發債劵定借銀行都有可能,發唔發債就要睇母公司有冇需要賺發債錢

如果佢發債35億,咁佢今次唔減派,再還銀行多一兩億,下期開始增加派息比率

如果佢借銀行35億,咁佢今次唔減派,每年還銀行4億,派息唔點升

如果佢佢發債20-25億,咁佢今次會減派,下期開始大幅增加派息比率

如果佢借銀行20-25億,咁佢今次會減派,下期開始增加派息比率兼每年還銀行4億

如果佢發債35億以上,咁就係係國家任務,佢今次唔減派,下期都唔增派

如果佢借銀行35億以上,可能性不高

佢平時25億現金流時會派10億息再外加每年還幾億債,現家佢現金流可能得23億,派10億本身係冇問題的,睇佢想優先係邊度

而且CTM還有幾十億國家的債要還,政府唔會係佢未還清之前特登搞死佢,上次CTM無牌經營純粹係澳門公務猿工作效率高

呢篇同投資無關

呢篇同投資無關,但相信味皇的資訊可以造福廣大特定群眾,特此

是咁的,味皇有部PS5,但係個手制1年保養期佈已經整左兩次漂移,相對地ps4高強度玩芒亨4年都仲未壞,只係中間噴過一次WD40,其實這都是硬件問題,天生的不良品,即使最新的PS5手制也沒有真正解決問題,亦無心根本問題,其實SONY係呢方面記錄非常不好,好似xperia5祖傳的綠線芒咁,咁多年也不去解決(如果比味皇坐果個位係可以解決)

其實不良品好常見,遠少少的有碌7手榴彈,LG底板,高通810,win8,早少少的三星綠線芒(S20-S22,xperia5ii-V,iphoneXR,1+8-9,oppo reno5-6,vivo X50-70),高通888(zenfone8),switch同ps5漂移,近期的intel13,14代,好似sony咁堅持用完D存貨的真係比較少有

索尼罪大滔天,搞到百姓怨聲載道.jpg

早排去日本兩星期,趁此味皇將ps4同5的手制送去淘寶改裝,你係淘寶度打"ps5手柄維修"就見到,送去的係叫章魚哥的傢伙,人工應該係咁多間維修之中算平的,地點係順德運送距離也較近,味皇整的係一個兩邊改裝霍爾,另一個就普通換新,收費係90同60,淘寶睇兩粒普通冬菇14蚊,兩粒霍爾25蚊,因此手工費算好低,味皇之前試過拆PS3手制想自己先DIY實驗下,冇吸錫器下失敗左,做手工始終有D麻煩,日本掛過"職人"名號就可以收很高手工費,呢度同樣做手工一技之長只能做三和大神,真可嘆也,不過味皇作為消費者還是先考慮價錢,另外味皇係廣州動漫星城的舖頭問過價,普通換單邊都90,淘寶係平好多

整出黎的結果就咁,換普通冬菇手感同之前一樣(廢話),可以再戰幾年先再漂,而改裝左霍爾的就可以根治漂移,但可能唔抗跌唔抗磁石,至於手感,大致係咁:

1.點都比之前漂移好100萬倍,為可以用的水平

2.速度偏慢,以原神安柏弓箭描準為例,原先普通冬菇垂直用3的速度,霍爾要設4先可以做到之前類似效果,以滑鼠為例,類似普通冬菇dpi1000,霍爾dpi600,同樣的施力霍爾行程較短

3.感度3000倍,輕輕摸一下冬菇頭以經有反應,急轉彎之類很快方向很準,至少方向很準

4.ps4的冬菇沒有而ps5獨有的問題除左壽命之外,仲有憤性殘留問題,以原神為例,每日撿狗糧有時停在箱子旁邊,甚至停一段時間都好,你有時轉頭行的時候佢會奇怪的向前爬上箱子,即是你向後行佢也會先向前行一步先再向後行,以口臭為例,你想吸氣,但你吸之前會先噴一口先再吸的樣子,ps4原裝冇呢個問題,ps5換成霍爾也解決左呢個問題,夜蘭撿狗糧發發聲

5.慣性大,以原神為例,你很難係地圖準確的點到傳送點,會拉過龍,以CS為例,你開6.0反應用46甩槍,點都打唔準,原因出自施力,舊冬菇傾角45度反應最大,細力D傾角30度反應中等,霍爾30度就達到最大反應,傾角45同30度冇分別,但鬆手由45度變30度變0度時,45-30度回收之間的部分沒有施力但佢依然有指令而形成慣性拉過龍,要習慣細力是不實際的,解決方法味皇想到有兩種,一種是縮細冬菇的洞限制傾角,另一種是加粗冬菇的柄限制傾角,第二種理論較上易實行,卷一些膠帶又好鞋帶又好,應該會有些效

6.基於上面特性,霍爾係解決傾角問題之前,是不適合用於FPS或即時戰略呢類的,劇情驚或者動作驚就冇問題,那些本身就設計用霍爾的貴價手制,想必設定過參數,要不就物理的粗大洞小,而PS5手制的殼設計唔係咁,幼細洞大唔係準備比高級冬菇用

總體而言90蚊是抵換的,至少根治左漂移唔駛子龍任務,但是如果有兩個PS5手制的話,一個換霍爾,另一個換普通好了,為FPS之類留後路

PS5的壽命比PS4短咁多,可能係設計miss,因為ps5手制為左加一些無謂的功能而變重了4成,玩家可能在唔自覺下用左陰力,令損耗變大,另外switch同ps5手制幾乎一樣重,可能也是因此而漂移,最新的PS5手制加強版,由於更重,合理推測壽命更短

另一件事是味皇8100円買左日版老頭環連DLC,實際秋葉原可以退稅6900買到,唔係間間有退稅

於是味皇手上有中文版同日版老頭環+日版DLC,測試結果係咁

1.中文版同日版老頭環的save是共用的,中文版save可以係日版度用

2.PS5口裏不說,原來是有鎖區的,港澳賬號即使有下載碼也不能下載日版DLC,不過唔係硬件層面鎖機,而係ps賬號鎖區

3.因此需要另外註冊一個日版專用賬號,註冊用黎區別地區的關鍵係,日本的郵政號碼,味皇呢度填左今次行程印象很好的溫泉酒店郵政號碼,佢會自動識別自動填上例如河口湖乜野村咁樣

4.用日賬下載日版DLC,之後切回原本賬號,成功安裝能用,但味皇未打到DLC劇情未知DLC能不能真的用到

5.日版安裝左DLC之後,原有的中文SAVE依然能用

6.以中文版基底用日賬裝DLC,會彈出錯誤,中文版唔可以裝日版DLC,日版先可以裝日版DLC,原來有分DLC各種文版

7.日版+DLC玩過之後,個save再不能係冇DLC的中文版度使用,但味皇估計中文版+DLC應該可以同日版+DLC共用

8.日版的特典道具碼也要由日賬輸入,但中文版也能用

9.不能安裝中文版,但用日版黎碟啟動

以上情況有可能也適用於其他語言版本的其他驚

第時去日本買二手驚時要注意一下,碟都能用,但要下載的可能不能用,至少不能直接用

靜岡的駿河屋總部非常值得一去,但即使日元平,很多東西的價錢也不及大淘寶

另外星期六山梨的豪華露天溫泉酒店湖景大和室10800,也比東京邊皮的煙味單人房12000平

再有一件事是係申請google play日本版賬號,味皇去到日本,拿出舊手機,用溫泉酒店的郵政號碼,按毛彪01台灣網友的方法填成功左,似乎返到澳門都仲用到

https://www.mobile01.com/topicdetail.php?f=423&t=6442597