大炮巨艦主義

期待的事沒有發生,股市氹聲跌落地心,味皇覺得粗糙言論duck不必

一號同二號的學歷感覺都不高,根據二號之前係魔都的作為,大概是魔鬼執行者呢類次世代機械人,根據歐貝斯坦的二號無用論,完全體是不需要老二的

是咁的,味皇推斷,未來的風氣應該是大炮巨艦主義復辟,雖然嘴炮的口徑很可能擴大,但味皇不是指軍武的巨大化,味皇認為以後的指導思想會更直線式,更核心式,舉例來說,有一森林的木頭要運,以往是大量的卡車在運,運得出去就是好車,無節操無規章鬥快運,司機互相撕殺,板凳士巴拿地釘都出齊,車係咁壊但實有另一部會頂上,木頭全部能運出去,現在則會製造一頭巨大無比的火車頭黎拉,所有人去維修同扮維修個火車頭,貼滿安全標語但一日到黑壊,好似掘路工程咁,養的維修人員比想像多,森林運剩的木碎搵人用手拉車拉走,火車運好多木頭,但不能達到宣稱運能,會改稱每年運能都能增長,森林有木頭剩,但新車扶不敢加入同埋舊車伕不能同不敢全部運走

簡易言之,未來會強化巨型國企的市場地位同官員數量,不再讓利於民,爭利的直接打死,巨型國企交稅比例增加,個人同民企交稅減少,稅金先集中,再用派飯派糧的形式派出黎,如果某行業有足夠大的上鏡率就會被火車,股票作為資本主義的遺毒,某行業要足夠小足夠低調足夠被佢地忽略,先可以以私營的形式享有自由度,大炮巨艦主義放係軍械以外就是大軍團同游擊隊的分別,將帥無能大軍團可以由1小時22分變成大半年,游擊隊小隊長廢,也就是團滅一個小隊而已

一般來說除左是第幾級子公司之外,市值是比較通用又可視的觀測基準,公司市值巨大的話可能要被承擔做善事的工作,如果老千公司冇實業冇盈利借錢刷市值充大頭佛,被盯上的話就會變成銀行被善事

類似以前3桶油的暴利稅咁,將來應該會用捐款,罰款,建設基金,官方債券之類形式向巨企回收資金黎補充社保基金

聲明一下,呢度唔係暗損其他國家,係指俄羅斯都未定呢

最後味皇0.915賣出30000股國銀,0.67換入40000股四環,另外用日本樓的錢2.98再買左12000股中石煉化,1.87買左30000股亞太衛星,近期應該再冇乜錢再買了,亞太衛星味皇原先時諗住等佢下年衛星發射失敗封被鎖消息或長城火箭發射成功厲害了佢的國時先再決定買,但現在跌左咁多就算發射失敗都唔見得會蝕,而且佢賺美金又唔駛收股息稅,呢個時候可以接受

又換馬

上次4.5換入的首機現在已跌至4.0幾了,18.92換出的美蘭現在也跌到14.7幾,跌勢似乎點都無法阻止,不過尋日味皇在4.21沽出60000股首機,15.2換入15000股美蘭,再次回到原點,由於地勤唔見人放,套出的錢0.3買入30000股茂名港,另外再加一D錢2.42買多10000股CTM

如果以市值來看,8月時味皇的15000股美蘭19蚊市值28萬5,來回換左兩次又變返15000股美蘭,中間換多左70000股地勤30000股茂名港同近6000股CTM,加埋市值都係25萬6,掙扎完依然是跌,但是以股數的方向黎睇現在是比8月多左的,8月時的15000股美蘭資產淨值是14萬4,現家加埋是19萬1,同埋無論美蘭定首機都唔會派息,而現在卻有少少息

之前有篇舊文40蚊匯豐VS40蚊渣打,內容是匯豐40渣打又40,兩隻都係辣雞,但由匯豐換成渣打可以多賺兩成,當時香港未不亂,股市應難好,恆指是23000點,而現在香港己不亂,股市非常好,匯豐40.55,渣打48.6,恆指負升市到只冇17000點,味皇想說的是,市場情勢唔到你管,但把股票放上天平只係你做唔做的的問題

剛剛收到地勤同四環的息,之後到年尾應該都唔會再有息收,本年收到的股息總額是38萬5,比上年仲少左,44萬股息目標未能達成

現在雖然有一點點現金,股市又大跌,但味皇加注比較謹慎,因為味皇冇勞動收入,而且等緊下星期的結果

四環業績(偽)

講返以前味皇買四環時是20年8月,當時股價0.82市值約76億,每股淨值1.02,佢業務只有現在似乎唔想的仿製藥,並沒有其他,所以味皇單純買佢唔想要的業務就出左0.82黎買

十幾年前味皇寫過的舊文有類似的題材,現家大概重覆一下,假設味吉陽一經營緊食堂,每日賣300份炸豬扒飯,每份賣800円的話營業額是24萬,賺1成的話每日賺24000,當佢每年只賺800萬好了,假設食堂的資產是2000萬円,回報率是40%,股市會對股東權益回報率40%的公司比幾高的估值呢?也許不會比奈雪的茶低,而現在假設味皇慶祝食堂生意好呀,送左個1公斤純金飯碗比陽一放食堂做裝飾,這樣食堂的資產就變成是2800萬,回報率大幅下降為22%,而股市卻會對這樣的公司比低得多估值,有可能少一半以上添,如果PE40倍變PE22倍,咁市值分別是3.2億同1.8億,收左送禮味送的800萬純金飯碗,陽一反而會因此唔見1.4億以上

以常識黎來看2000萬+800萬>2000萬,但市場先生來看2000萬>2000萬+800萬+1.4億,以曼聯來看麥龜>達高斯基,而常識黎來看2800萬>2000萬

現在的四環就類似咁,呢兩年新生的業務似乎成長好,至少能在發夢時成長好,相反原來賺錢的舊業務冇夢可發,舊業務每年賺幾億,資產幾十億,而新業務微微能賺一千幾百萬甚至蝕緊錢,資產幾億,但是可以發夢每年成長幾倍,假設95%盈利同70%資產是舊業務,5%盈利同30%資產是新業務,加埋PE同PB分別是10同1的話各100%,如果把5%盈利同30%資產是新業務單獨分出黎,PE同PB分別是100同10的話就是500%+95%同300%+70%,即是說四環派完每股6毫的特別息後,每股資產只剩2毫幾,盈利只剩原來的5%,但股價仲會剩1-0.6,看起來完全是垃圾,味皇呢度模擬一下財演的口吻:呢隻四環,係中國的美容龍頭,中國14億人口,美容產業現在先起步,每年起碼增長3倍,100倍PE上市不貴,當炒暗盤實升,乜乜乜基金係戰略投資者,超額認購,有機會入恆指,云云

中國公司四環的年報封面已經改成西人同化妝品了,舊業務本業務已不知何去,甚至覺得本業務是累贅,乞衣趕廟祝

本文講業績倒不如說是睇吹波,四環原來賺幾多已不需注意,四環管理層已無心係公司,個心都係資本市場了,四環舊業務應該會出售成功並派特別息,可能賣比外人,但也有可能是管理層用子公司係大陸上市集到的錢用另一個名義同四環買,左手賣比右手,特別息的金額味皇估計6-8毫之間,此時四環可能向股東放陷阱,比子公司的認購權你買或供,如無論你有冇認購認供,你供就特別息就會比佢用100倍PE吸返,你賣認購權供股權出去,就會有別人代替你用100倍PB送錢比四環班人,佢地大概率能吸回大半派出去的特別息,因此如果有特別息時務必收左就袋好佢,堅定決心,唔好入佢的抽新股遊戲,如果想100倍PE抽新股然後搵下個水魚接,一般都會悲劇收場

味皇覺得佢會派特別息,時間未知,現在四環淨現金幾十億固定資產幾十億,接近一半一半,四環派特別息時可能派賣出金同埋現金的部分,可能派賣出金同埋現金的全部,可能派超過賣出金同埋現金的全部再借錢,三種都有可能,第三種減少資產之上仲借錢,回到食堂的假設,陽一如果上市前把200萬的碗碟送比人,資產跌到1800萬円,回報率會升到44%,如果借貴利800萬送比人利息100萬,資產跌到1000萬賺700萬,回報率會升到70%,做實業的最好唔好有呢D財技腦啦,但是有財技腦的傢伙通常會周圍搵做實業的去做精神污染

0+0

早幾日18.92沽出15000股美蘭,4.5換回60000股首機,首機同美蘭現家兩舊屎邊隻好D比較可疑,但套到現金的話再買回同類別的話至少會顯得大篤D,夜鬼味皇呢個月基本都訓到收市,如果早起身首機可以4.3左右就換到的,套到少少現金以0.172左右加左70000股地勤,星期五可以用4.6幾同18.0幾又換回來的,想了想還是先不要,另外1.24沽清揸左8年的52000股建業,1.12換入60000股恩達,揸8年都要蝕,恩達除左0成交的缺點外,應該算是建滔的上位

0同3之間就好似小太監拿住聖旨咁,係咁手震一直未敢攤開,難道就找不到一個大太監企出黎嗎?之前係咁發言忠誠的廢物按現家講的內容都變反革命的廢物了

0+0應該不敢的,不過0+3時已經好多人訂左機票,即使不是進來,出去也叫成交,就算之後唔+0甚至反而+7,訂左票的應該都唔會全部退訂,結論而言,航班至少會多一丁點,雖然同大陸機場無關,但香港機場會好返些少,比起太古國泰,港機工程會好好多,未私有化的話,而現在香港航空有關的股票得返地勤了,雖然不至於井噴,但多少會噴下水

盈利大增先不要想,佢要盈利爆升增先要租下屯門的倉庫,單靠現有的容量能增長的頂多是叫增長的水平,不過派息破20%可能不難,比起航空公司,薄酬請人非常難,因為航空公司的定義大部份靈長目都唔算人,但地勤公司可以薄酬請到各式張超雄的遺產

大航海時代由於大明鎖國,而有國際航班的馬交就承受全世界的運量,日本的白銀,大明的磁器茶葉,非洲的犀角象牙,西洋的火繩槍玻璃都會經馬交上落,同樣理由,上面冇國際航班而香港有的話,香港就要承擔埋上面的需求,甚至承擔埋俄羅斯的需求,如果有私人公司買入晶片,然後運去高鐵站,然後失竊,都是不可抗力,保險公司應該會賠,香港可能會開通去海參威去阿拉木圖之類的航線,做帶貨可能是香港現在還能走的有限路線,與其三跑養蚊,還不如改成碼頭,海空合一,想一想,在整個世界范圍,大機場同大碼頭直線距離最近的可能是深圳寶安機場同蛇口港,要不是不可描述原因臣妾做不到,深圳貨運早就吊打香港,要不是青馬大橋停收過路費,新加坡早就吊打香港,不過現家都開始吊起黎打了,還不是香港成本有加冇減,俄羅斯同歐洲交惡,香港應該會食埋遠東的貨運轉口,唔一定直航,運上廣州都是一選,但一定會由香港落貨,東歐同西北亞香港就食唔到,因為果邊手套會由土耳其做,如果香港唔先做好準備繼續敗家,人地就唔會直接落香港轉口,而會運去新加坡,再由新加坡運香港,咁個餅就會比新加坡分薄,走大量的話總不能全靠車手走私

總之香港的轉口貨運應該是近期相對有前景的,在各種敗家子的行為當中

最近情況

香港己不亂,股市非常好,隻手離夏威夷薄餅似乎越來越近,實際上只要唔固執於瑪格麗特正宗之類,2月就可以伸手拿黎食,不必餓到骨包皮仲要夏威夷薄餅比人食曬

味皇半年結時組合是661萬,現在只剩520萬咁,今次就跑輸恆指,樓同租都下跌,就快見負資產咁,味皇收入咁低都要面對中產的問題

這時候要回憶一下當初投資的目的,無非就是改善生活,然後你就要想下:

你願意犧牲現在的生活品質嗎?

    不願意>咁你你投資時起碼要保證現在的生活品質不受影響

    願意>你願意犧牲多大的生活品質?

        有限度犧牲>咁你你投資時起碼要保證現在唔會餓死 

        不惜代價>吔屎啦你,唔係真係吔,至少要做好隨時吔屎的心理準備,先做好心理建設

如果因為投資而造成生活品質下降,就是本末倒置,分別在於生活品質下降的時間同程度每個人自己設定都不同,現在周圍都係平貨,但是你要自覺自己現在是需要生活還是準備好吔屎也能活下去,IFC排隊的人就是冇做好心理準備然後被喂屎受不了的,自己的選擇自己承受結果

味皇自己如果有閒錢的話會繼續買,但味皇在買之前是先確保有閒錢,而不是把錢擠出來,因為味皇知道自己冇勞動收入,而且仲要養屋企人,任何時間賭錢的人都多,好似今期威尼斯又爆滿咁,但是賭錢前先想一想,你的籌碼是錢,還是命?

講起賭錢定賭命,界限可能好難界定,不過世間有乜可以將所有錢公正地標準化,唯一的標準是時間,小學雞一日24小時,聖帝一日也是24小時,大粒癦一日也是24小時,耕田兄弟一日也是24小時,所有人都一樣,如果人人都耕田人人都有米,前面都唔耕田,兄弟就要養曬前面3個口,有錢人本質只係食左耕田兄弟的時間

現在世界的經濟現狀,同之前相比,差別在於有更多人口不務正業,只食不種,人類即使不做野,食量也不見得會減少,減少的只是產量,想想也知道,世界70億人,同之前相比,現家多左十幾廿億人在例如鎖在家中不準出門,例如拿住飛行道具互射,例如在廣場聚眾不回家,例如成班人泡在水中或在水邊扎營,例如宅在家寄求職信,例如老而不死,例如勞動人口異世界轉生之類的,呢個世界有兩種人,一種把時間用在種菜,另一種把時間用在重覆挖洞和填洞,即是生產同浪費兩種,種菜例如種椰菜咁,種好大棵外面D葉唔食然後搣剩個芯黎食,都可以養埋那些挖洞的人,如果種菜的人減少,挖洞的人就要食外面深綠有渣的菜葉,種菜的人減少到一定程度,就有人冇菜食了,而現在的通漲的本質在於浪費的人多,生產的人少,菜唔夠食,最終要生產的人回到原位,或者浪費的人下流為生產者,要不就叫生產者減少睡眠時間,無論如何,產量短期是不及之前的,即使浪費的人下流去種菜,靠浪費而產生的GDP也會下降,另外叫生產者減少睡眠時間相信是一定會實行的,因為浪費者會用飛行道具指住佢地

當然,不事生產的味皇也屬於浪費者

講返組合,如果是靠"賣出"來回收資金的人,在這種資產下跌的情況下,要維持同樣的生活水平,會覺得蠟燭兩頭燒,無論組合有幾多錢,而靠"收入"來回收資金的人,要維持同樣的生活水平,收入減少可能維持唔到同樣生活水平,要加上"賣出"先得,就同上面一樣,但如果收入夠多,即使減少左也能維持同樣的生活水平的話,心理還是可以保持健康的,相比之下靠收入的會比靠套現的有多1/2的心理健康優勢,另一方面,靠"收入"的人如果收入減少可能比較願意減少同比例的生活品質量入為出,但靠"賣出"來的人要不是不肯降低生活品質,就是不成比例的降低生活品質,精神上的落差應該較大,加息周期收息比人話不智,但在外在不變只將自己的認知調成收息狀態,心也會好受一點,伙食顧唔掂至少精神狀態顧好佢

當然,不是要揸住老千股跌左就話收息