2025年1月29日 星期三

deepseek

先夾帶講一下筆克業績,筆克業績向好同增派不出味皇所料,話曬叫味皇最有信心的一隻,但是呢種爆炸增長就到今期為止,下一期會否增長甚至會唔會下跌就講唔定了,今期增長來自計兩期業績,而且應該有來自政府的無謂掙扎,但今天的政府仲有冇錢黎掙扎呢?筆克的營業額按地區分類的部分

            24      23

大中華 255  254 

南洋    133   115

中東       63   62 

英美       93   81 

其他       88   21

佢來自"其他"的部分異常地高,如果平時有咁高,果個地區晨早就會作獨立分類,因此味皇認為來自"其他"地區的營業額不太可能重現,如果排除呢一點,筆克仲係相當優秀的,但升左之後不及早幾個星期優秀

味皇以為佢會爆升咁就可以換回能投,但佢算升得少,但上升的概率仲係大,因此先留到除淨時再決定

反而保濟丸爆升,可能如味皇之前所講1蚊以上乎合基金選股資格,1.3時有諗過賣唔賣好的,但味皇目標係1.47咁上下,反正佢就除淨先留住,結果又開始跌返落去

 回到本篇題目

2023年2月的舊文AI

2023年6月的舊文AI

冇留意原來發左兩篇一樣的題目,另外炒AI概念唔經唔覺原來已經炒左兩年以上

2月舊文內容總括而言就是,AI唔一定話越先進就越好,要糊弄愚蠢的人類隨便弄些東西就可以了,反正愚蠢的人類一般分辯唔出,何況係暫時唔多實用的NPC生成器,舉個例子,你用一個高性能AI生成一個高智能NPC扮演蠢人,另一個是低能AI直接生成一個低智能NPC,消耗的電力差距巨大,而兩個NPC講話一樣蠢,哪人類會分得出來嗎?反過來高性能AI生成一個高智能NPC,同一個低能AI生成一個低智能NPC扮高深,咪一9樣,再舉其他例子,高低性能AI的飛機都能安全升降,高性能AI能在飛行過程中非常平滑地飛行,低性能AI震下震下S型飛行慢10分鐘,一樣能到目的地,咁航空公司選用高能AI多定低能AI多呢?又例如高性能AI的robocoop能0.1秒開槍,超高性AI能終結者就0.01秒開槍,如果放在皇后廣場上射人,反應速度少過0.2秒就能對人無雙,robocoop同終結者根本冇分別,只有robocoop同阿諾豬華互片咁,先會顯得終結者的高成本有點意義,即是說劣幣夠用就係,人類世界並不缺少劣幣阻礙文明發展

6月舊文內容總括而言就是,訓練AI唔一定話硬件越先進就越好,2023年的5年前已經有很合用的訓練引擎,1970年代好多的機械人卡通已經都有自我學習型電子頭腦的概念,最近有人超頻5090性能破世界紀錄,整機功耗1760W,達到兩張4090或4張1080的性能...咁對其他國家來說直接用4張1080不就可以了嗎,反正某組織入股了之後電費就免錢了,出一隻英雄威力強大,但人地爆5000隻投石兵一樣可以暴力拆家,美國佬以為係用5萬張H100?其實隨時係大量租之前幾年荒廢的掘礦場

這兩篇大概就是講解呢幾日發生的事

其實AI無論算法同硬件並不是最重要,例如2023年的5年前的訓練引擎己能很好的訓練雙足步行,有時新的軟件不一定能淘汰舊軟件,大軟件不一定能淘汰細軟件,例如微軟強推WIN11之下依然有人仲用緊WIN7,至於硬件嘛,基本好快淘汰,INTEL都就快成間公司被淘汰,即是說算法同硬件的將來都不確定的,價值現家好高第日可以唔值錢,味皇認為係AI概念中有價值的,是電力同數據庫先係,有穩定的電力係根本,如果有比人平的電力仲可以暴力拆家順便拆埋地球,而數據庫呢點對洋人非常不利,不同公司之間商業上就不會分享數據庫了,不同國家之也不會分享數據庫了,荷蘭公司浪費大量電力訓練隻AI出黎,不及比利時公司訓練的AI優秀商業上唔成功,咁就會浪費了一份電力,而兩公司用的軟件不同數據庫又未必通用,咁又浪費了一份碟片,類似咁樣,互相收購不是吸收其數據庫,而且阻止人地阻佢發達,實際上就是互相傷害同順便傷害埋地球君,相反有D其他國家特色的其他國家,人口多樣本多,而且不用管樣本的感受,可以偷可以搶,不同公司之間只要有某組織介入就會共享數據庫,灑了金坷拉一樣,產量多,零浪費,咁樣即使運算力低,耗電多,但都比外面的互相傷害少浪費,例如你聽電話,用通訊軟件,回討論區,你不會為意你在不同的APP的交流對象全都是NPC扮,在外國不能想像,但其他國家可以咁玩

而味皇想像其他國家的終極玩法,可能是網速超進步後植入式偷用你的手機你的電腦的算力,CPU使用率長期100%數據流量每秒都幾百M咁,電費你埋單,連顯卡都唔駛自己買,外國人識閃電五連鞭都好,講武德最後一定唔夠打,年青人不講武德玩偷襲,外國人耗子尾汁

2025年1月2日 星期四

2020年新股剩蔗

差唔多時候睇返以前的新股現家點樣,過左5年呢批股味皇現家睇返,標準係冇發新股,財政好,咁會剩底下面幾隻

2107第一服務--冇發新股,現金回升,冇欠債,有派息

1455科利實業--冇發新股,現金回升,基本冇欠債,有派息

1502金融街--冇發新股,現金多,基本冇欠債,有派息

9997康基醫療--冇發新股,仲回購,現金多,基本冇欠債,有派息

9999網易--冇發新股,仲回購,現金一直增加,欠債少,有派息

2381蜆殼電器--冇發新股,現金多,基本冇欠債,有派息

1936利特米--冇發新股,仲回購,現金多,基本冇欠債,第一次派息

1953RIMBACO--冇發新股,現金多,基本冇欠債,有派息

6063智中國際--冇發新股,現金回升,仲還債,有派息

2263富石金融--冇發新股,現金增加,仲還債

9919艾德韋宣--冇發新股,仲回購,現金多,基本冇欠債,有派息

1416CTR--冇發新股,現金多,基本冇欠債

9998光榮建築--冇發新股,現金回升,欠債少


2107第一服務PB0.37,派十幾厘,因為是物管公司味皇有保留,但財政好派息高是不假,至少經得起疫情考驗,睇落OK

1455科利實業PB0.48,疫情停派息,見佢現金回升,因此有較高的重新派息可能,有機會是10厘股,但PB或者未太吸引

1502金融街,一直有派息,現金也基本一直持平,賺幾多派幾多,PB0.57,派約9厘,但睇落冇乜進步,吸引力一般,而且是物管公司

9997康基醫療,有回購有派息,PB1.87,以佢盈利水準派6厘左右,可能有成長,但現時算貴

9999網易財務報表表現好頂,但PB3.22,派息3厘,冇吸引力

2381蜆殼電器PB1.58,派緊10厘,佢現金多,但連續在下降,代表佢派息超越其盈利能力,公司本身唔覺有成長,因此太貴

1936利特米幾年前味皇舊文就預測話佢之後會破天荒派息,現在真是派息了,雖然是特別息,佢現金一直增加最終派息的概率會變高,但是,預測成功也不代表可以賺到錢,例如當時舊文寫完冇幾耐佢就盈警咁...現家佢PB1.28,就算佢真係常規派息也只是3厘,太貴

1953RIMBACO之前現金增加,但上年插水,派息也停左,PB0.63並不低,假如博佢能夠恢復派息也就5厘左右,似乎也不會爆升太多,不吸引

6063智中國際現金增加有還債,但是冇派息,佢曾經疫情前派過的,不排除現在重新派的可能,但PB3.45,唔覺得有任何投資價值

2263富石金融近年現金一直微量增加,但上年爆多,一向冇派息,佢也冇派息記錄,PB0.39,貴是不貴,有派特別息的可能,派息可能達0.12,同現在總市值相當,但咁買就有賭博成份

9919艾德韋宣財務上同行政表現完美,冇做奇奇怪怪的事,PB1.75,現在的特別息不是可以維持的水平,一般派息可能得8厘,成長性不明,算有點貴

1416CTR類似利特米,之前從未派過息,不過佢PB得0.22,而且業績似乎正在反轉,前途不可限量,至少現時評估唔到,問題係佢係新加坡股,唔知果邊D股的生活習性點,最後會唔會真係派出黎益你,味皇以往買的南洋股的成績暫時未見理想

9998光榮建築也是業績反轉,PB0.39,同上面比就有所不如了,1416係泥水,9998係起樓,似乎相當類似,不過地盤老闆平時刻薄開工人,估計也不會想到益股東,講唔埋,但可能性點都...呢兩隻真係派左出黎先算,最多咪飲唔到頭啖湯

2024新股

例恆的新股,趁雞立仲未執粒,繼續用佢的資料

味皇對保薦人的印象仲停留係2010年咁上下,現家行業已經相關大的變化,好左都執左或改名,味皇的評價唔一定合理,冇乜參考價值,現在只是基於中國人去到邊都係中國人的冇乜理據理論黎評估啫