清理匯賢

早兩日0.86沽清71000股匯賢,2.03換入25000股越秀同0.82換入20000股四環,而再早一個星期用日本樓的錢2.67買左40000股CTM

兩三蚊成本的匯賢,3月時1.39賣出似乎是個錯誤,但是用0.132同0.144換成潤利羚邦的話,現在看起黎唔似錯誤,1.39唔賣拖到現家0.86先賣似乎是個錯誤,那麼犯錯時有乜方法處理呢?1.認錯,把佢沽出,2.唔認錯,把佢沽出換成比佢跌得更慘的,強行扮正確

匯賢跌4成,相對四環同越秀突然都不惶多樣,品質可能好些少,也是扮正確的例子

逃避問題也是一種方法,例如之前的太古,現在的路勁,味皇不想或想不出點處理,只能先擰歪面

美國加息,呢邊的銀行結餘又要變少了,假設Z子公司有30000億儲備,7成美金3成其他金,Z子要用錢時,1.拿美金黎用,2.拿其他金黎用,假設Z子上面還有Z母也要錢,A.借美金比母用,B.借其他金比母用,如果當美金不變而其他金下跌1成時,30000億儲備會貶值成29700億,此時母子都想要2000億現金,之後其他金再跌1成,咁呢度有4種組合

1A--23000億美金+2700億他幣+2000億Z幣>27700億>27230億(貶)

1B--25000億美金+700億他幣+2000億Z幣>27700億>27430億(貶)

2A--25000億美金+700億他幣+2000億Z幣>27700億>27430億(貶)

2B--25700億美金+0億他幣+2000億Z幣>27700億>27600億(貶)

然後到第二回合,母子都想再要2000億現金,但是Z幣被母下了命令不準賣

1A--19000億美金+2430億他幣+3800億Z幣>25230億>24607億(貶)

1B--21630億美金+0億他幣+3800億Z幣>25430億>25050億(貶)

2A--21630億美金+0億他幣+3800億Z幣>25430億>25050億(貶)

2B--21700億美金+0億他幣+3800億Z幣>25500億>25120億(貶)

如果一直下去,Z幣佔的比例會越來越重,另外Z幣可能是一種死資產,易入難出甚至不準出的類似日本樓的資產,這樣Z子的能用的自由資金會越來越少,當Z子開始用Z幣做扺押貸款時(因為不準賣),就大概可以推測佢血條見紅,有好多低權限玩家時在外打野怪時,但血瓶都鎖在公會倉庫中,就好易比小怪打死,Z市面臨的怪圈是美金升時儲備會貶值,美金跌時儲備也會貶值,而且自由資金會隨時間變少,雖然Z幣也會發利息,但萬一用Z幣做扺押貸款比的息可能會比收到的多

年初,味皇玩原神時,冇錯,味皇玩原神,當時聯機經常組到俄文名的玩家,每一場組3個人,大概2場就會組到俄文名,而最近幾個月都冇再見到俄文名了,傳說中的米將軍同master,在直播時味皇聽到米將軍課左400萬円,master課左米將軍的1/10,而相對的是味皇到現家1分錢都冇課過,打機應該不是理性智慧型的表現,但打機自制課金卻是理性智慧型的表現,當中的智慧可能同如何把屎煮成咖哩味差不多,但是如果連這些無謂的智慧都冇的人,好難會管得好錢

不過世間也不是只有錢,雖然錢很重要,上次東莞的人類大遷徙再一次在莫斯科上映,之前同味皇一齊打本的俄文玩家現家要去rush b或者去rush a,總之就是rush,gogogo,fire in the hole,俄文玩家後面是車臣的督戰隊,車臣的督戰隊後面是正規軍的督督戰隊,正規軍後面是憲兵的督督督戰隊,你督我督,而兵不加增,無窮匱也

兵力少左戰力少一件事,事頭婆一死就作反,開口核戰平,人類才剛經歷史上最大的戰力減損,是咁的,只要想一想就知道,如果外星人或者地底人侵略地球,係呢個地球上,除左事頭婆,人類史上就冇任何一個人類可以向全人類叫得動例如"停一停,聽我講"呢類議題,換轉係史上邊個總統邊個主席邊個教宗邊個有錢佬都冇效,事頭婆不是最有權,不是最有力,不是最有錢,但是最有面,好多野要多年累積的,面人地比假自己丟,面子果實能力者就只有事頭婆,現在的地球人,就只會內亂自己人搞死自己人,在這種亂世信人不如信自己

順帶一提,味皇部名牌爵士人生華為1100賣走左,部雜牌唔入流LG先700買返黎,賺左幾百

國銀業績

                            2588中銀      1848中租     1606國銀

固定資產之類          229鎂          316港            296人

營業額                  12鎂+8%       19港+19%    116人+19%

現金流                    7鎂+29%      14港-2%        ?(30人)

利息支出                 2.3鎂           7.6港              40人

減值                         8.5鎂             5港               23人

盈利                      -3.1鎂            3.1港             19.5人

2588中銀租賃用報告數字係美金,1848中國租賃係港幣,1606國銀租賃係人仔,匯率姑且用7.8:1:1.12計,變成咁

                            2588中銀  1848光大  1606國開

固定資產之類        1786          316           332

營業額                  94+8%       19+19%    130+19%

EBITDA               55+29%      14-2%        ?(34)

利息支出                 18             7.6             45

減值                         66              5              26

盈利                        -24              3             22

-----------------------------------------------------------------

每股淨值               55              8.1             2.9

股價                      60                5               1

債券評級                A-              BB-            A

一級資本率             ?                ?             9.6%

撥備率                    ?                ?             523%

三份報告之中得1606有資本率有撥備率冇EBITDA ,按固定資產同營業額的比例黎睇,1606也相當異質,相比而言營業額極高,即營業額大半是毛利率極低的非出租類型

2588同1848,營業額分別佔固定資產之類的5.3%同6%相差不算大,利息支出佔營業額分別19%同40%,相對而言光大銀行似乎比中銀危險得多?債券評級姑且斬咁認為,光大營業額增速比中銀快,賭命好唔好見仁見智,中銀呢半年減值66億,其中62億係比蘇聯共產,光大5億中4.5億比蘇共共產

回到本文1606的正題,相對而言國家開發銀行正文中一句都冇提過蘇聯,輕輕帶過,只係會計師備註到提到17.5億飛機被共左,中銀的減值9成以上係咁,光大9成,國開不足7成,但如果按人地9成計算,國開的17.5億對應的是19.5億,咁23億減值當中就有3.5億是其他類型的常規減值,上年同期減值11億,上年下半年減值24億,因此比起上年任何時間,今年的減值都較少

撥備率523%,而上年年尾847%,同期不良資產分別是50億同33億,不良率分別是0.91%同0.78%,撥備率523%如果對應50億是262億撥備,847%對應33億是280億撥備,消耗左18億撥備,因此佢雖然表面上只作出3.5億的常規減值,比上年少美化左盈利數字,但同時也燒左18億撥備資產,上年中撥備率710%不良34億,前年尾626%也是34億,咁上年中撥備是241億,前年尾是213億

               22中       21尾        21中       20尾

撥備        262        280         241         213

減值         23          25           11           20     

------------------------------------------------------

差距         -5          64          39                     (假設減值會扣減當期撥備)

差距         -7          50          48                     (假設減值會扣減下期撥備)

即是說只講盈利數字的話,今期高估左5-7億,可能撥飾不足粉飾太平,而前三期都低估幾十億超額撥備扮低調

2588的營業額是94億,分類上自稱是經營租賃,1848就自稱是經營租賃同融資租賃都有,但冇分開的數字,2588的EBITDA超過營業額的一半,1606齋經營租賃都72億,看似同2588差距未算大,照道理應該也有幾十億的租金,1848經營租賃同融資租賃都有EBITDA超過營業額的7成,咁1606的融資租賃的58億是否更賺?也許只是光大的EBITDA不實

相對而言1606利息支出極高,固定資產之類異常低,但營業額異常高,可以推斷佢真正的固定資產大多以貸款的形式入數,撥備變化咁大,但如果是由龐大的貸款當中扣減的話,就好難發現,另外1606的債券評級是A,反而比別人更高,因此真正的貸款可能較少,更多似乎的是難估值的"借"固定資產資產

2588經營租賃營業額佔固定資產之類的5.3%,咁同樣1606經營租賃的72億營業額對應的是1358億之類的固定資產,當然,飛機出租呢行的回報率好多年之前味皇就推算為9%,但是如果是水庫出租路面出租的回本期可能就不及飛機

再次回到國銀本身,味皇留意的是佢營業額上升較多,現金流應該上升不少,好多錢收唔到雖然唔講,但上年前年都扮收唔到其實冇差別,假設下半年冇再共產多次,營業額上升至少業績不太會差過上年,派息應該不用擔心,撥備率523%足夠中和不良資產,不過如果下半年也營業額是增長2成的話,佢撥備要去到近30億先可維持撥備率平穩,資產增加而撥備不變的話%數會下跌到470%左右,雖然味皇不否定即使是470%也是偏高,但這就是中國

最近4年1606的毛利率都是25%左右比人地低好多,當佢維持到,今年可能有70億人仔毛利,稅後49億,派11-12仙,不過折返港幣己貶值不少

不過留意,美國加息同人仔貶值,飛機之類是固定定額收入,加息的話佢同新美債相比,相對價值會變低,理論上會貶值,同時因為通漲令建造成本同劏機價值上升,理論上會升值,因此把飛機之類包裝成基金的話會貶值,將基金拆返實物出黎會升值,估值師可以為所欲為,但不變的是會變成高成本低回報,只是接新單先可以接新租約,而加價困難同建造成本增加的話可能難以接新單,航空公司會比較觀望,只買或租二手飛機,呢類公司增長未必維持到,另外1606借美債不算多算偷笑

之後可能會出現個代理行業,專門去貨幣貶值國家拆飛機收廢鐵,再將零件賣比美國,波音的原廠零件變貴而空巴的零件變平,二手波音737會賣返去美國,換空巴320,GE的引擎退返比美國,換勞斯萊斯的引擎,慳維修費,以後世界飛機的版圖對320NEO同E2非常有利,737同919同MC21應該冇運行

信息量巨大

今年勁爆新聞有點多,由1小時22分,暗殺首相,死事頭婆,到一戰封神之類的,信息量有點多,味皇本來想說些什麼的,想想下還是不要說好了,雖然味皇最近係淘寶買左部LGg8代替現在的華為P30,稍為擺脫了明張膽的截圖偷窺,但不代表味皇有本錢變勇敢,至於P30正在二手放售

收到日本樓的尾款了,結果比買樓時更少,是咁的,味皇又被抽多左稅了,本來可以請稅理事申請退稅,但拖幾個月日圓貶值可能更得不償失直接收尾算了,味皇買時日圓105,現在收錢時貶到145,實際上味皇賣樓成交時是132,之後的過程中時間都是味皇的敵人,至於回收的錢大半買CTM算了

全世界差唔多乜幣都跌,基本得美元升,連人民幣呢個月都跌左1成,咁呢段時間有乜幣比美元強呢,居然是古巴幣同盧布,契弟爭氣點好冇?回到重點,味皇又開始危言聳聽覺得聯匯遲早有問題了,香港有幾千億外匯儲備,照計應該冇問題,但是出面D幣個個跌幾成,你要補倉就要一直補,銀行結餘少時,外匯儲備度賣D美債補倉就係,沒有一點問題,然後不是問題的問號就發生了,如果上面有人有補倉的需要,要政府買佢發行的債券比佢補倉,咁政府就要一邊賣美債,一邊買佢債,再一邊賣美債先,可以補到自己個倉,同時外匯儲備唔係只得美債,仲有其他貶值中的其他幣債,唔賣到期理論上可收足,出出入入會即蝕,當外匯儲備不但數額減少,成份大半都變成不是美債時,說港幣同美元掛鉤還不如說是同一男子貨幣掛鉤,當然,如果沒有命令要買外債的話,就冇問題,想買時就買,想賣時就賣,出面跳樓的多是正需要儲錢的時候比人逼還錢咁啫

味皇自己已留好左3年份的現金準備,未來應該會有部分改成美元定期,手上的股票大6股部的份,因貶值關係價值也相應下降,結論而言味皇上年起一直增加本地公司比例的策略還算正確,如果佢地都派息的話,至於大陸股當中能夠係貶值中例外的股,是國際港口,因為能夠收美元,打擊最大的是借美元債賺人民幣的公司,如果有錢贖回因加息而貶值的舊債就可以賺錢,否則就要蝕錢,不過銀行冇錢冇得借冇錢贖,除非命令境外政府買債啦,咁銀行先有錢借,味皇每年的10000蚊長期睇危危地

改朝換代,加拿大澳洲呢D可能會退出帝制,帝制不是潮流,係女皇本人就是德高望重這個詞的體現,人地比面女皇先稱呼帝君,換個人隨時就把宣誓條文改了

雖然乜幣都貶值,但人民幣還是比較有優勢的,因為外國人基本都入口能源,用貶值的貨幣買升值的能源,但是在呢堆人當中,大陸缺電的情況是相對比較少的,因為有水電有核電,一個唔該可以係西藏四川起多一百幾十萬個水電站,一滴水都唔留比泰國印度,一個唔該核電站可以學核酸點咁遍地開花,紫色的水也可以同你海水化淡,一皮天下無難事,只要不講武德就冇人夠佢打,其他外國人都冇呢個優勢,基本上能自給自足的人形蜈蚣都能夠保持穩定的,雖然現在不能自已

雜談

上一篇提到36隻股,盈利上升的20隻,下降的16隻,表面向好的佔56%,可能加派或己加派的22隻,己減派10隻,冇派的3隻,似乎加派的佔61%,雖然味皇不知道港股同A股整體業績變化比率係點,不過齋恆指都已經一堆變面垃圾,結論而言,有人做不到,但也會有人做到

講返味皇自己,早幾年味皇預計今日組合應該已經有60萬息,寫左第一個一千萬文,結果呢幾年侵侵之後就大感冒再加速師跟住仲打埋仗,情報量太多,今年到今日為止味皇只收到約31萬息,月薪26000咁上下,同30萬人工的中產薯片還差得遠

不過比上不足比下有餘啦,精工印書局賠人工即走的重要核心員工還不是18000都冇,現在相比幾年前,收入平均線是下降左的(雖然物價還是上升),在餓死的道路上,味皇還是可以50步笑百步

回想06年入職時,人工13000,戶口幾萬都冇,到16年辭職時人工25000,但股票三幾百萬,味皇整個職業生涯的勞動總收入頂多200萬,比家用應該比左有80萬,剩低的老本應該不足100萬,種瓜種到今日都叫小有收成

相對於2016年,今日社會的生活水平應該更低,收入更低,物價更高,生活品質平均線下降,咁味皇個人的生活水準應該相對浮上左,味皇在家耍廢,人地就做3人份的工作量也尤有不及,同樣在家耍廢的其人在餓死的道路上離味皇越來越遠,現在味皇得到還算可以收入,而且還有私人時間

應該有人羡慕嫉妒恨,但味皇也是10年青頭奴動的歲月慢慢積落黎的,至少味皇可以肯定自己到16年的工作量時是至少是06年的三人份量,正是佛都有火,同現家的好多人一樣,但沈默中爆發還是在沉默中滅亡,還是得考慮考慮

10年儲不足100萬的老本,好多人做到,但同時估股票的業績而成功率長期有51%的卻不多,老本可能變多變少賺到的帶唔到去聽日,但至少經驗值可以,現在味皇的等級會比16年高,即使世界周圍都是秘境迷宮周圍高級怪中boss,至少能還應付

不過要知道外面的世界是秘境迷宮周圍高級怪中boss,不是幾年前森林隨便打史萊姆打野怪就有掉落出寶箱,隨便出去死還是留在村入面採石種菜,現在的情況就好似韓國的情況傳染都呢度咁,但賭命不是很好的選擇,要有心理準備要龜好幾年,好一段青春同夢想已經唔再現實,人生的上限可能要下降咁樣,目標由發達改為唔駛捱餓已經能提高存活率,只要站在這土地上,野心可能危害生存

大意就是有幾龜得幾龜,想辨法增加經驗值,同埋降低期望

稍為派一下冒險家的經驗,味皇生涯一次過增加經驗值最的多幾個特異點,其中一個係大學人地宿舍度睇左本窮爸爸富爸爸,另一個是睇左祖師爺的證券分析同智慧型投資人兩本書,另一個是比火燎森啟發寫呢個blog,另一個係比福建股福清青幫水左一半身家之後進行復仇調查,結果四次有一半都同傳銷黨有關

對傳銷黨要聽其言觀其行,覺得有用的聽下,覺得唔啱就跳過,心靈雞湯唔好飲咁多,先思考再入腦

證券分析同智慧型投資人味皇認為值得睇,味皇睇的是70蚊的大陸版證券分析同170蚊台版的智慧型投資人,巴曰,有人睇5分鐘就會明白當中的道理,有人睇極都冇用,是咁的,味皇是屬於5分鐘派的,實際冇5分鐘就認同同知道大概的道理,這是人格同認同形而成的,有相同電波的人先可以感受到,味皇估計,如果不同電波的人,會立即排斥祖師爺的系統,相反對圖表系統的就可以5分鐘認同之類的,即是說,入乜門派是睇人的,唔適合就適合,如果啱自己的,就一路走落去,唔啱的就唔好掂,味皇覺得按一條路走到極致比所謂好聽叫吸收百家所長難聽叫博而不專好,個人認為價值派同圖表派是南轅北轍,互不認同,相斥的,都學只會互相干擾,還不如專精其中一方

報仇果度,味皇採用的是很基本的小學定初中的技巧,名為"統計",舉例說,港股隻1000,你唔知邊D好定壞,邊D係老千

於是被仇恨蒙蔽的味皇把當時所有股都番過一次,係"所有",之後把股的成份分門別類進行統計(當時是南洋商業銀行的資料進行30秒大法,相當於現在的上商),例如--1000隻股入面有邊批用某會計師,1000隻股入面有邊批用某律師,1000隻股入面有邊批用某保薦人

然後得以例如1000隻股入面有邊批都用某會計師咁,列表之後,偶然發現用某會計師的股出現例如--剛好地址都是福建,剛好都是多現金但同時借大借錢,下一個接手的會計師剛好一定都是誰,剛好都是用某律師,剛好都是用某保薦人,剛好都是某黑社會,剛好都是馬主,剛好都很快配股,剛好都很快停牌咁,好似有D會計師極冷門,剛好都用佢的股都搞怪的話就好容易睇得出

於是味皇可以在以後的人生中使用類似的逆推論,例如某公上未上市,味皇可以通過佢其中一個奇異點,例如一見律師是誰,即場就推斷佢是否老千,是甚麼類型的老千,上市後準備幾時停牌,要換邊個核數,係邊個賭廳咁

統計>列表>對比>聯想,只是煩,不是難,係個人都能做到,就算老千也是在太陽底下

同理,只要做統計多左,大概率加派息的股有乜共同點之類也不是很難睇得到,冇工開可以做統計加下經驗值,例如存貨多的股的共同點,存貨變少的股的共同點諸如此類,不過冇必要學味皇復仇咁針對人黎睇