2024半年結

恆指半年升4%,而組合由年初599萬變成現家633萬,當中已收16萬幾息,另外仲有95000的在途股息,扣除生活費抽走約4萬,總數約係646萬,增長8%,頭3個月市升最多有雙位數,但3月業績味皇好多股出完業績見光死,即使業績好,之後就跌落負數,係最近四天王為首拉升先開始慢慢爬返上黎,好多都要靠主動交易先得賺到,港股想舒服坐定結果都非常艱辛

最近幾日做左D交易,大約5.38出清50000股煉化,0.127增持40萬股地勤,2.02-2.04換入10萬股能投,另外今日國銀插水3成,於是1.34入返60000股國銀

國銀租賃由2個幾一口氣插到個三,應該都算市場大事,值得寫大堆字講,而插水的原因,似乎係用5.8億接左一汽擺係鋪位賣唔出的存貨車,圍起黎每部15萬,味皇個人認為,當然不是好事,國家任務,鐵拳呢D野唔到你迴避,但是,換成其他公司也是要食拳的,不過,點解要賴上國銀呢?味皇個人認為,強國有好多公司,就算係腳企,都唔一定容易借錢,即使是續之前的循環貸款,有時由正常途徑係冇銀行肯借的,咁就需求由不正常途徑借啦,最好是不是銀行,但又像是銀行,腳企唔借得私貸,去借公款就冇問題,銀行怕上身,就讓佢不上身,腳企借唔到錢但政府非要借錢比佢,就需要灰色路徑,於是最好的目標就是銀行旗下的基金公司投資公司,類似的情況看起來是壹氣財政過唔到審查借唔到錢,於是把銀行旗下的基金當成當鋪,把一埋存貨典當比基金代替正常借銀行,留意返當票的日期係6月27,因此相信佢是為左6月30日半年結做數而借的,有機會7月2日就續返,隨時12月28又黎借過,佢當左D存貨多左筆錢會點入數呢?可能借錢當盈利,好似XX政府咁,做過好D的業績數字(順便加埋人工),然後用呢張好睇的半年報告,由唔合資格變勉強過審查合而從正常途徑借到銀行(順便配股),然後用銀行錢續回銀行旗下的當票,簡單而言就是搭棚,財技,同XX王子一樣,對三方而言都有好處,借款人可以用利息數字增加的代價延長左貸款期限順便加埋人工,貸款方可以唔駛計不良貸款賺些利息又可以應付上頭的壓力順便加人工,政府方可以唔駛計不良貸款增加GDP今年任期內唔駛爆,實際上國銀何必用15萬的高價買一埋擺係鋪位的車?把散落在全國各地的車搬到指定倉庫拍賣成本高做起黎又麻煩仲大機會蝕錢,只有有人會黎續返張當票的前提下先叫好生意,續當票的人不一定是本人,可以是獨立親戚朋友第三方,也可以是絲襪套頭的本人,當然,也不排除公財到光棍手,腳企坑害腳企的情況,到時就有人頭物理落地

回到味皇組合,四川能投己進佔第二大持股,第一依然是CTM,第三亞太衛星,之後是筆克遠東

筆克業績幾好,代表某政府全力掙扎,上期派7仙今期再派5.5仙,在味皇預料之中,但是某政府全力掙扎到發現一直無效只是燒錢,財政又有壓力時,掙扎力度就恐怕減少,今期筆克業績好,唔代表越來越好,政府掙扎只是提早把筆克的產能用到上限,唔代表需求有到上限,未來筆克自然成長加上政府的補貼減少,筆克應該會在一個平均水平,予計下期派息9仙,之後筆克就會進入相對停滯期,味皇由羚邦換成筆克應該算近年難得比較成功的操作,當時100萬股羚邦現家能收12000,而換成14.4萬股筆克能收18000,而且能換回160萬股羚邦,但換回羚邦時機大概不在今年

地勤停左一年終止派返息,派2仙一般般,關鍵是睇到佢有派息的心,3年前味皇最高是0.22買的,佢中間停左一年先有一毫的價錢,雖然入到平貨,但中途停派結終對心理不好,3年前味皇覺得佢頂天派4仙於是兩亳買可接受,當然佢疫情後到現家都未實現到,即使佢係香港機場獨市咁滯,但現在味皇認為佢已經冇得點進化了,不是佢的問題,而是香港機場的問題,香港機場在恢復,但總體衰落時佢市佔率點提高點加價最後數字上也是原地踏步,香港機場點恢復也是叫恢復,但看不出佢會恢復得比以前肥大的將來,當然地勤肯派息的話依然是營養豐富,美金相對升值招外勞也容易D,希望佢下年開始能連續派3仙左右就滿足了

保濟丸業績還算不錯,未夠10厘都差唔多了,比較肥美,增長看起來還可以持續,主要是產能增加左

幫味皇賺美金的主要持股業績比較不錯,去中腳化的策略還算成功,但其他留係上面的股就有D不明朗,今次味皇除左見好價沽出煉化之外,其實考慮過要不要賣埋恩達的,唔係恩達有乜問題,而係最近傳聞有D倒查30年的鐵拳,上面的人治不了洋大人,還治不了你?這樣,對於一些人來就,最易打,打了不敢嗌痛,痛打完一輪下次還企定定可以再打的,無非就是港商台商,對於冇乜後台又冇咁出名的,會唔會又捱打的,例如恩達呀,力勁呀之類,會唔會倒查30年,又或者地皮升值?賣左地(即使未收到錢)?都先上徼左先咁樣,德昌呢D賺出名唔敢打啫,但小型港商可能頭頭有個紅色危字,另外好似神冠呢D地方政府窮的也是高危,但神冠係支柱企業應該唔方便直接打,最多叫佢捐款

最近買的京投由於係國企,所以絕對唔會有倒查30年的問題,派息好似越來越奀,但味皇覺得佢足夠平,而且下年會開始加

CTM由於澳門政府冇planB,唔會有乜問題的,之前無牌時,佢咪一樣要光纖客簽兩年死約,問題係詐騙短訊,但詐騙短訊都恢復左唔少,另外一提,永亨的痴銀線IT係6月23號改系統,每次登入都出一條短訊要你入認證碼,係每一次,應該唔會減派息嘅

衛星今年有新衛星的收入,足唔足夠拉平衰退的部分就唔知,但至少唔會再有支出,6D同新的6E同以前的唔同,係通訊衛星,亞太衛星的母公司係中國衛通,中國衛通的母公司係中國電信

雖然大陸加電費,但四川能投有冇得跟住加是未知的,但電費加咁電網一定也會申請加價,咁能投多少能增收,而且挖礦班廢人仲未倒,最近香港受制裁入唔到顯卡用唔到openAI,咁只能去越南同蒙古邊境挖地道越境搞,蒙古網速慢,越南會近D,雲南果邊如果用電大,咁四川的電力就會流出支援,間接增加些少用電,今年只派0.13人仔,味皇比較希望佢近期能派0.17

齊魯上半年仲未好,但下半年會好轉,東瑞上年業績麻麻,今年有好轉的希望,四環是明顯的好轉,但能好轉到乜程度就唔知,其他但凡同地產有關的唔死都半條命唯有繼續捱,大致係咁

味皇下半年可能會收集CTM,周黑鴨也有興趣但冇足夠的資金,同樣因為資金問題冇買的還有舊僱主,今期能夠有較大換馬都係煉化之類的四天王呢半年無端端係咁升,其實呢半年升得最多的其實是青島港,可以睇得出基金呢半年的喜好係派息多比較出名的收息型國有實業,大家都不敢犯錯,現家上落市也不期望有邊隻爆升黎換馬,繼續隨機應變,現在組合的成份味皇是比較滿意的

舊僱主插得比較甘,主要係佢停派息,而味皇覺得佢會在1年內重新派息,理據是,舊僱主的股東權益是負數,係東權益負數的情況下派息是不正常的,至少銀行不會同意派,而今年佢的股東權益會重新變回正數,咁佢派息就唔需要比債主限制,至於周黑鴨則是呢半年回購的規模甚大,而且財務改善左好多

上半年收廿幾萬息,但全年收四十幾萬感覺還是不易達成,另外味皇開始解禁外遊,下個月會去富士山果邊兩星期,為左今次旅行,呢排味皇特登玩人中7,咁去橫濱玩時先有題材,都係永亨的痴銀線IT狗的問題,收唔到短訊就登入唔到,到時味皇就不能買賣

老頭環出DLC,味皇搵勻澳門都冇老頭環ps4版,ps4可是好東東,在ps5能選用ps4手制,能夠用返原版OX,而且傳說比ps4版更順,痴銀線IT狗有事做埋D有的冇的限制,完全唔考慮用家,新不如舊經常在IT界發生,於是這個ps4版逸品老頭環味皇只能在淘寶發注

PB折讓理論化計算

是咁的,連登偶然有人提念慈菴枇杷膏英國爆紅而母公司係1110,咁令味皇要不要睇下佢有冇比手上的2348同2633更好呢?於是用呢個題材臨時寫一篇文

味皇自己偏好現金多冇效率到貪還債的少少利息的折讓公司股票,安全性應該是較高的,但係唔係最易賺就係另一件事,市場入面的是人類,比例上人類當中起碼80%係唔理性的水魚,比起分公司的盈利遠不如聚集水魚同騙水魚來得快賺得大,不能強求市場理性,比例上市場理性的時間也許只佔20%說不定

先唔理呢點,今次試下純理性純理論純數學計算

以下假設PB0.5,經營純利率10%,利率3%,借錢利息雙倍,有4間公司基本淨值100

A--100+100   (額外閒置100)

B--100+0    (冇欠債)

C--200-100  (借100經營)

D--300-200  (借200經營)

-------------------------------------

基本盈利

A--10+3=13

B--10=10

C--20-6=14

D--30-12=18

以下是經營效率改善至11%

A--11+3=14   1/14=+7.1%

B--11=11   1/11=+9.1%

C--22-6=16  2/16=+12.5%

D--33-12=21   3/21=+14.3%

係經營改善的情況,例如大環境景氣改善,例如3年零8個月過後,例如駕崩之類,借錢的公司增長率較高,估價較高,有錢的公司反而唔值錢

反過來經營效率變差至9%

A--9+3=12   1/12=-8.3%%

B--9=9   1/9=-11.1%

C--18-6=12  2/12=-16.7%

D--27-12=15   3/15=-20%

係經營變差的情況,例如大環境景氣不好,例如開始動態3年零8個月,例如太監上位之類,咁樣就越借錢的公司賺越少,PB越低

好的時候有錢同太頭鬼的差距7.1%同14.3%之間約1倍,差的時候有錢同太頭鬼的差距8.3%同20%之間超過1倍,即係有錢的公司好的時間只算賺少一些,但差的時候大頭鬼見鬼更快,長期揸同一隻股的話有錢的公司安全一點,如果反覆橫跳的話差的時候有本事就跳走,有本事的話

基本盈利

A--10+3=13

B--10=10

C--20-6=14

D--30-12=18

以下是加息1厘到4厘,借貸加1倍加2厘由6厘變8厘

A--10+4=14  1/14=+7.1%

B--10=10       0

C--20-8=12    2/12=-16.7%

D--30-16=14   4/14=-28.6%

加息的情況下,算兩頭尖,借得多死得快,通常加息減息會持續好幾年,借錢多的公司醫治無效估值會越來越低

以下是加息1厘到4厘,借貸只加1厘由6厘變7厘

冇營運資金的B100%同借營運資金的D71.4%的差距是28.6/71.4=40%,D比B可能折讓40%

A--10+4=14  1/14=+7.1%

B--10=10       0

C--20-7=13    1/13=-7.7%

D--30-14=16   2/16=-12.5%

銀行大發慈悲的話影響會細D

以下是減息1厘到2厘,借貸加1倍減2厘由6厘變4厘

A--10+2=12    1/12=-8.3%

B--10=10        0

C--20-4=16    2/16=+12.5%

D--30-8=22    4/22=+18.2%

同加息時類似,大頭鬼的變化較大,最有錢的由加息~減息時+7.1~-8.3%,上落15.4%,最窮的由-28.6~18.2%,上落46.8%

加息周期大頭鬼雖然最平,但因為周期持續,有閹死的可能,點都唔適合買,減息周期有錢的公司唔駛死,但4間公司得佢賺少左放係街市度對比就顯得好樣衰

基本盈利

A--10+3=13

B--10=10

C--20-6=14

D--30-12=18 

以下是再投資多100增產,回報率10%借貸利率6厘

A--20=20    10/20=+50%

B--20-6=14  4/14=+28.6%

C--30-12=18  4/18=+22.2%

D--40-18=22  4/22=+18.2%

越有錢的公司投資效果越好,但公司幾時想投資係隨機的,要不你就趁佢邊年投左錢入去而業績報告仲未出先買,前題係佢係投資而唔係食回佣

如果佢開始投資的時點是在市場景氣時,即是A估值最低而D估計最高時,咁A是最低買最高賣,D是最高買稍高賣

如果佢開始投資的時點是在市場不好時,即是A估值最高而D估計最低時,咁A是最高買最高賣,D是最低買稍高賣

如果佢開始投資的時點是減息周期,即是A估值最低而D估計最高時,同上上

如果佢開始投資的時點是加息周期,即是A估值最高而D估計最低時,A可以賺,但D係自殺

景氣改善同加息的效果相反,咁同時景氣改善兼加息會典呢?

經營效率提高10%,D+14.3%,而加1厘D-28.6%,對於非常大個頭的公司經營效率提高得再多,加息周期死的概率看似都較大,當然,最終還要視乎效率提高幾多同利息加幾多,而A呢個時候係+7.1+7.1%=14.2%

景氣差同減息A總共要-8.3-8.3%=16.6%,而D則-20+18.2%=-1.8%,即使係C都-16.7+12.5%=-4.2%,似乎D比較好,但都係冇一隻掂,即使減息都係揸現金好D咁

景氣唔好時央行班人去減息,就是為左拉平上面個數字,起碼要減到大頭鬼能夠持平先叫救市開始見效,景氣好時減息就是打劫A的14.2%去救大頭鬼個負數,起碼要減到大頭鬼能夠持平先叫多謝A大人有大量

如果好似埃爾多安咁既經濟大師,景氣差又加息,A會-8.3+7.1%=-1.2%,D-20-28.6%=-48.6%,還冇一隻正數,再狠點再加息,A會正數,但其他的都負數變大,目的是令有錢人變更有錢

至於聖上咁英明,景氣好又減息,A會+7.1-8.3%=-1.2%,D就+14.3+18.2%=32.5%,結果是鼓勵借錢,高大威,型英帥靚正,厲害了你的覺,谷GDP,然後鐵拳存戶

基本盈利

A--10+3=13

B--10=10

C--20-6=14

D--30-12=18

基本資產

A--100+100   

B--100+0    

C--200-100  

D--300-200 

以下是貨幣兌美金貶值,例如貶10%,利率3厘借錢6厘

資產

A--100+90   

B--100+0    

C--200-90  

D--300-180 

收入是本國內需的話

A--9+2.7(-10)=11.7(1.7)  1.3/11.7=-11.1%

B--9=9       1/9=-11.1%

C--18-5.4(+10)=12.6(26.6)    1.4/12.6=-11.1%

D--27-10.8(+20)=16.2(36.2)   1.8/16.2=-11.1%

賺少的比例一樣,但計及一次性的匯兌收益/虧損,借得多帳面賺得多,但是,如果計派息的話,D會好似賺多左錢但一樣派少左,而且好似賺多左錢卻掩飾了賺少左的事實,如果貨幣升值,也是主要都是帳面數字較實際大

收入是出口美國的話

A--11+2.7(-10)=13.7(3.7)  0.7/13.7=5.1%

B--11=11       1/11=9.1%

C--22-5.4(+10)=16.6(26.6)    2.6/16.6=15.7%

D--33-10.8(+20)=22.2(44.2)   4.2/22.2=18.9%

實際上邊間公司大概也不會100%內需或100%出口美國,多少直接間接受影響而在位於全內需同全出口之間,例如貶值而出口量多左或加價,貶值而生命值硬接,介於兩者之間,硬接的方面4間減派息一致,加價方面大頭鬼的加派息多D,大頭鬼的表現比較好,如果貨幣升值大概會相反

總括而言有錢的公司有防止變化,不歡迎變化,變化去死去死的傾向,除左個別情況,基本會比人話係廢老股,這個變化是環境的變化,而那個別情況,是公司自己變化

大頭鬼公司則是跟隨變化,歡迎變化,吸食變化,死於變化,反正唔係生就係死,主要是有人賺就代表會有人死

大頭鬼相比於閒錢公司好的限定期間:

1.景氣改善限定期間

2.減息周期限定期間

3.幣值變化期間

買入552

5/22再沽多10000股已除淨5.25的2386,換入10000股1.67的筆克同10萬股0.32的神冠

5月29一次過賣曬除淨後5.44的5萬股2386,0.315買多10萬股1522湊夠100萬股,剩低的3.8換入64000股除淨前的552,係永亨度落單大手指打錯數字賺少左幾千

雖然買左552,但轉頭又賣返出去的可能性還是有的,都係睇相對價格

*6月6日4.05-4.06賣出64000股552,再5.1買返50000股2386,算係賺左果10萬股1522

雖然買左2386,但轉頭又賣返出去的可能性還是有的,都係睇相對價格

1522京投交通

建設鐵路的唯一目的係將人或貨便宜迅速安全的運送到目的地,嘛,正常的情況下

不過有D地方會想係各種行業包括鐵路上面加入原本沒有需要的其他偏離主旨的功能,於是洐生一D例如撩鼻之類奇形怪狀的行業,特別係最近呢10年,好似1522就係出於呢種原因而產生的公司,可以說沒有聖上的登基就不會有這公司存在

1522的業務係起同保養地鐵站,  ---的入閘機,售票機,充值機,電視機,wifi點,監控,人臉識別,安檢,數人頭,自動門,警報,估計係呢類名曰大數據AI維穩野

呢類野係估計係唔會真招標的,而是事先指定某人做,再成立公司,再扮投標,然後內定,因此經營者唔會點變更,而地鐵公司開公數,除左呢幾年地方政府可能開始會拖數之外,穩定性應該是有保證的

成長性的話,上面係大地鐵時代,會有人為左追求GDP,加上炒地皮,會不斷起地鐵,對地方官來說簡直是魔戒,除左呢幾年地方政府可能開始會拖數之外,成長性應該是有保證的,本來商用鐵路係應該追求快速便宜易保養,但來到執行果度就會變成追求高大威,變成更多無謂多餘浪費燒錢丟空的建設,這樣也會變成1522的成長養份,而且天朝獨自的無謂技術可能會輸出到某D有需要的國家

"將CCTV的密度再加多一倍","鼻毛呢!我要看到鼻毛","廁所也給我往死裡裝","角度噠!由下往上的角度"之類應該唔會嘅,如果上面出台呢類政策,也會是1522的收入,1522相信就是這樣的公司

由於係唔招標的,會唔會分派到比佢就是概率事件,好似1522的公司似乎是分好多山頭的,可能母公司都係同一個地方政府,但每個仔都有各自的豬肉,可能係二代,可能係退職幹部之類,例如1522揸注京師兩個機場線咁,如果環狀線加站那是其他二代的山頭唔到1522插手,只有加長機場線先會100%輪到佢,如果京師新建全新的線路咁就有幾十%概率輪到佢

成長性來說,1.來自原先的地鐵延線,2.低概率接新路線(包括高鐵站),3.收購

收購的話,收購同級的二代肥肉相信比較困難,即是說1522有帝都政府撐腰,但1522唔可以向其他同樣帝都政府撐腰的二代出手,相信也不可以向力量相當的魔都政府的爪牙出手,但1522可以用狐假帝威向四天王實力之外的中boss著手,招攬一些豬頭人將軍,哥布林薩滿,寶箱怪之類二三線戰力

建設收入是一次性的,賬期長,近年仲有可能拖數,但保養應該會穩定,毛利率高,而且一手錢一手貨,味皇主要係貪佢的保養收入

2386起同保養煉油廠,門檻是技術,1522起同保養地鐵站,門檻是權力,除左產品形狀唔同,內裡其實都差唔多

PB只有0.25,但是公司的實際財產其實唔多,所謂"資產"大半係商譽之類溢價,真資產主要係價值不定的經營權

派息0.25,比之前兩年低,相信是政府唔找數,就好似唔找核酸數咁,不過話曬係京師,應該有拖冇欠,如果係徐州揚州荊州果類地方就大機會唔找數

損益表營業額十幾億,盈利大約1成,但佢稅率普遍都比法定稅率低,代表盈利比賬面高,現金流表顯示已交稅項每年都極高,代表佢稅基也很高,但相對佢經營現金流最近幾年好少,"賺左錢"所以"交埋稅",但冇錢袋仲要掏存款出黎交稅咁樣,現在睇政府肯幾時一次過找一大筆數啦,拖緊的尾數起碼6億以上,派息5000萬,交稅4000萬,盈利同派息其實都很好,尾數到手就升天,如果一直拖就二年後會出大問題,不過味皇假定京師為顏面最終還是會找數的

市值唔夠7億,資產淨值27億(偽),盈利1.7億,派5000萬,交稅4000萬,看起來生意來源穩定(除左政策變化時),一定有成長性,唔駛點錢升級,hea做,派息比率高,1522應該係很不錯的出糧股,對股東來說,更加是對安插來的高層來說,唔駛點做,唔駛揹鑊,係辦公室食下秘書,就有糧出,如果味皇冇理解錯的話

缺點主要係拖數問題,仲有就是高層如果想刷存在感亂收購的話,可能會高溢價買野,錢賺唔到反而多一堆商譽要攤銷令盈利數子減少,呢類公司好多時都是基層中層同副手很會做野,但高層是白痴

雖然由登基而來,但佢應該唔會怕萬一駕崩的影響,無論繼任者係乜人,當權力者得到一樣很好用的控制工具時,是不會放手的

1713四川能投

寫之前先講下AI股

點解NV會當成AI股炒到咁高,而同整樣晶片INTEL同AMD又唔可以呢,IT狗味皇認為並不是因為NV的晶片計算能力比較優勝,而是因為軟件問題,正確來說是OS問題,無論win定linux,可以支持一部機同時用好多張顯卡,但唔支持同時好多粒CPU,習慣上底板廠可以設計成支持插100張顯卡的底板,但唔會設計插100粒CPU的底板,CPU的功能可能包括南北橋總線內存總線之類雜物,插100粒就有100份雜物,而顯卡就相對純度更高只有運算功能插100張就單純增加100倍算力,並唔係用顯卡搞AI更有效率,而是用大量的CPU並不會增加效率

如果AMD當年唔收購由香港人創立的ATI,或者唔鏟除ATI個牌子,咁齋ATI可能炒得貴過現家的AMD+ATI整體

咁100張顯卡帶來的是什麼呢,是100倍的功耗,一張高級顯卡起碼450W,100張就是45000W,一個鐘燒45度電,100張顯卡放埋一齊降溫的冷氣可能要6000W,即使用80puls的火牛的高級火牛,耗電應該還是超過60000W,如果其他國家冇又新又貴的顯卡又想彎道超車,咁450W的新卡實際上係可以用10張3年前的300W二手舊卡黎超越的,即係用300000W耗電的1060的新時代算力黎超越45000W的4090外國反動算力,1000張新時代顯卡的機房可能要500000W,一個鐘燒500度電咁樣,AI係帶來美好的J圖時代之前,太概會先帶來人類毀滅吧,所以其他國家想彎道超車的話,就必需帶上毀滅全人類的氣勢,智慧可以輸,但氣勢不能輸

簡而言之,味皇想說的是,發展AI是假,搞AI的公司大多並無生產出有多實際的東西,不是用AI產品黎盈利,而是炒賣集資製造財富轉移的籍口,真正係AI發展上有直接相關的除左晶片股,就是電力,而電力股卻不被市場視為AI相關,可能是太實際了,冇得發夢,所以沒有利用價值

電力市場好多地方是依靠政府補貼的,所以凡是發展高耗電而又唔會盈利的行業,例如半導體,只是會拖垮政府財政,反正小學生不會懂,同樣搞AI也一樣,如果用火力發電黎搞,只會邊度搞邊度死,所以味皇先話真係有心搞就去冰島搞,慳返煤炭同散熱,類似這樣的原因,要搞AI最重要的是穩定強大便宜唔駛補貼的電力,可以是水電,可以是核電,唯獨不能是火電,受地理條件同政治因素限制,全世界只有極有限的指定地方可以搞

呢度有幾間電力公司,可以發現火電好易奉旨蝕錢,只有其他接近免原材料的先易D賺錢

現家就話搞AI啫,而AI其實是第二代藉口,上一代藉口是挖礦,如果排除了名稱,你會發現炒買的方法,炒賣的人,目標的群體,消耗的資源,是完全一樣的

挖礦高峰期火力發電廠好易蝕到媽媽聲,特別係離偷電黑點多的地方的電廠,(836可以睇落最近增長咁多,是因為火力發電蝕錢變成中間有個氹),1713同1816由於發電唔駛本賣一度賺一度,即使偷電也是偷市電,政府找數都係賺,而火電發一度蝕一度偷一度蝕一度

點解全國挖礦的基本都集中曬係四川呢,因為全國只有四川果邊的地理條件適合大量做水力發電,全世界冇幾多地方有咁密的斷層,咁高的落差,咁大的水量,咁窄的河谷,所以四川的水電廠名義可能只是山卡啦鳥不生蛋地方的的電廠,但佢卻是服務左全國的礦工,所以你就算幾唔鍾意幾唔想承認都好,只有地理是冇得呃人的

1713是四川不算大的城市的水電廠,但需求不需視乎不算大的城市有幾不算大,反正只要挖礦有利可圖,礦工頭子就會好似蟲族咁蜂擁而至,變成不算大的城市有奇怪的高耗電

基於呢個理由,味皇果幾年就想買1713了,不過直至最近先買到,而現在升左咁多已冇乜加注的動力,雖然仲係平

係各電力公司之中,1713盈利算相當穩定,而財政可能是最好的一間(早幾年想買果時),味皇認為佢可以無視疫情影響,就算唔增長都至少唔會衰退,當時味皇將佢當成是投資組合出危機時的換馬退路之一

最近期的業績所示,佢營業額/固定資產增加相當多,同時現金減少/債務增加,可能有GDP鐵拳成份,叫有增加投資,由於是營業額增加多而盈利增加少,是前期投資或低回報投資都有可能,當中有50%概率盈利之後會追上營業額比例,如果唔計自然成長同額外投資,5年次中佢盈利大概在營業額的7-10%, 50%的概率3/10的成長

另外佢5年的經營現金流是8.2, 8, 6.2, 6.6, 4.9(億),增長應該是算多的,現家市值先16億,派6厘幾,仲係平,又平又穩定,又有真AI加持,係冇得發夢啫,至於礦工,由於挖礦同AI是同一班人,重覆左的舊題材效果會比早幾年差

搞假AI同挖礦是邪魔外道,但水力發電卻是真環保,味皇唔拍拖唔生仔,係真☆環保份子

買入1522

早排5.09同5.29賣出各20000股中石煉化,之後0.305-0.31買入90萬股京投交通,1.21買入20000股東瑞,股息應該提升返一萬,之前講想買粵海時仲係3.4,轉頭就升最後左冇買到,有D野就好似杜拜王子咁,過左就唔好提咁

2386由原先冇乜成長性的10厘股變成現家冇乜成長性的6厘股,冇乜成長性的10厘股同有D成長性的7厘股相比可能10厘股較優,但冇乜成長性的6厘股同有D成長性的6厘股相比就後者較優了,要搵的話點都會搵到,搵野比新資金買比較困難,但搵野同原先的做比較會相對易少少

1522做的生意同2386一模一樣,只是產品不同,一個做煉油廠bot同保養,一個做地鐵站bot同保養,相對1522比較平同唔駛股息稅咁解

如果2386再繼續升,味皇應會繼續賣,買返乜就要視乎其他目標升得有幾少,另一方面2386下星期就除淨,比其他股早差唔多一個月,如果除淨後同其他三天王除淨前同一水平的話都值得轉換類似道理

股市大升,也唔代表乜都升,之前股市大跌,也唔代表乜都跌,例如之前買過的2230咁,上年跌市時升幾成到2毫,而現家升市時跌到0.17之類咁樣,不過想要味皇由752換回2230,感覺還是太早

之前3亳賣的6119,果然左一巴右一巴,特登唔派息令股價大跌再收貨,現家升到差唔多6毫,不過要留意,佢就算點講都只係一個蚊型的地方港口,之前市值1億幾啫,現家升到3億幾,如果私有化一個蚊型的地方港口可以出幾錢呢?合理價唔會話好高,特別係佢衰到特登唔派息呢點就已經唔覺佢會益外人,係除非佢收到剩好少街貨,咁D貨尾就會出高價收

相傳移英的香港AA就專門呃返香港人,買英國樓無論靠中國人家靠香港人,似乎都係信唔過,正如杜拜王子咁,當年味皇買日本樓點解要咁強調避開中國人而直接去搵日本當地地產買,就係怕中國人隨時比味皇更聰明

四天王

呢度有4隻股,質量幾乎完全相同,前景也類似,屬於成長性微妙又唔多會衰退名氣又差唔多的物體

甲現價5.14,PB0.67,派0.34人仔,乙現價3.83,PB0.61,派0.25港幣

丙現價3.77,PB0.56,派0.22人仔,丁現價3.15,PB0.69,派0.17人仔

差距基本都在誤差範圍內,大概揸是但一隻結果都差唔多...大概,但資本市場並唔會對完全一樣的東西比完全一樣的估值,何況只是類似的東西,現實並唔講道理,但我們文明小市民的心中一般都唔會忽略道理嘅,以後會唔會比現實毒打就係另一件事了

如果相信道理的話,可以嘗試係甲乙丙丁之間反覆橫跳嘅,只要股價超出其他的太多的話換馬也是一種選擇

甲係2386,乙係934,丙係552,丁係3969

不過四天王有五人係常識,味皇正在買其他

沽清遠航

上星期0.305左右出清剩低的8502,之後0.39買多40000股唐宮同6.82買多3000股中信湊齊頭數,今個月味皇係其他地方有較多意外支出,補貨會緊手D

8502係屬於味皇有機會再買返的股,但現在感覺留唔過,佢今次唔派息,味重認為原因是關閉礦山斷佢衣食的影響,煤炭股之前升好多,但再之前煤礦可是比聖上關停左好幾年的,學得煤礦咁,石灰石礦山要關閉幾耐睇唔到上限,環保政策一件事,主要係現在的水泥無利可圖供過於求,如果不是好似齊魯呢D搞咁多無謂的工程黎消耗水泥,隨時海螺都要走數,至於8502碼頭的旁邊,正是海螺的主基地,8502味皇要等以後佢邊期的季報營業額恢復左先會再考慮

味皇是散戶,散戶通常會有為自己的蟹貨找理由合理化的傾向

唐宮原先諗住現家就已經食左糊的,味皇預測佢會恢復中期息--恢復左,會大幅增加派息--增加左,會虧轉盈--轉盈,結果呢段時間跌左7000點,倒跌一半,由食糊反而變成賣唔過,另外佢下半年業績變差左總盈利不夠高,本來正常今年就用完的免稅額用唔曬有剩,所以增持些少,佢生意主要係帝都同魔都,前景麻麻,屬於食唔飽死唔去要知足感黨恩的樣子

中信算係冇乜選擇時知足的選擇

疫情解封是一次性事年,題材己經用完,再冇其他確定性的有益事件,現在想找一隻前景很好又平又靚又免捱打的選擇實在有點腦力大挑戰

減派息統計

味皇唔係咁想做呢種統計,一黎要睇曬千幾二千隻股的痛苦,二黎會喚起自己被打拳的痛苦

標準姑且就咁設定,今年派息比上年少的計-,上年唔派今年唔派的唔計,上年唔派今年派的計+,今年派息比上年多的計+,新股唔計,下半年比上年下半年減的計-,全年總數增加但下半年減少的計-,全年總數比上年少但下半年加的計+,中期唔派但恢復末期計+,恢復中期末期減少人總額比上年高計+,末期一樣但全年減的計-,未出末期業績的唔計,但因為減派息係下半年顯現的問題,主要是味皇想知道第4季呢個時點發生左乜事,由於數量多眼花或者大手指症,數字唔一定準確,統計數據係上商的同業分類

廣告及宣傳--有4隻計算,3+1-

航空國防--有3隻計算,2+1-

農產品--有1隻-

空運及物流--有4隻計算,1+3-

航空--有2隻+

酒--有3隻+

再生能源--有8隻計算,3+5-

鋁--有4隻計算,3+1-

飼料--冇

衫--有18隻計算,13+5-

衫零售--有1隻+

軟件--有5隻計算,3+2-

汽車零件--有13隻計算,8+5-

汽車--有5隻計算,3+2-

銀行--有28隻計算,20+8-

生技--有6隻計算,4+2-

廣播--冇

承建--有11隻計算,6+5-

賭--有4隻計算,3+1-

中藥--有5隻計算,3+2-

煤--有9隻計算,2+7-

貨車--有12隻計算,8+4-

電腦--有4隻計算,1+3-

綜合企業--有9隻計算,6+3-

建材--有12隻計算,3+9-

消費電子--有4隻計算,2+2-

電力--有8隻計算,6+2-

銅--有2隻+

奶--有7隻計算,1+6-

百貨--有4隻計算,1+3-

電子商務--有17隻計算,10+7-

教育--有12隻計算,8+4-

電子零件--有8隻計算,2+6-

電池--有3隻計算,2+1-

環保--有11隻計算,7+4-

肥料--有3隻計算,1+2-

放貸--有16隻計算,8+8-

添加劑--有6隻計算,3+3-

鞋--有6隻計算,5+1-

木材--冇

game--有8隻計算,4+4-

燃氣--有11隻計算,7+4-

金--有4隻計算,3+1-

工程機械--有12隻計算,9+3-

重型機械--有7隻計算,5+2-

家電--有9隻計算,6+3-

家裝--冇

酒店--有4隻計算,3+1-

家具--有7隻計算,3+4-

工業器材--有18隻計算,8+10-

保險--有12隻計算,8+4-

基金--有5隻計算,2+3-

鐵--有6隻計算,3+3-

珠寶--有2隻計算,1+1-

文娛--冇

整容--有18隻計算,14+4-

保健--有14隻計算,10+4-

藥品分銷-有5隻計算,3+2-

影視--有2隻+

新能源物料--有2隻計算,1+1-

飲品--有7隻計算,5+2-

核-有1隻+

油氣設備--有7隻計算,6+1-

油商--有5隻計算,2+3-

服飾配件--有6隻計算,4+2-

其他金融--有1隻+

礦--有7隻計算,1+6-

其他零售--有2隻計算,1+1-

支援服務--有12隻計算,9+3-

食品--有12隻計算,6+6-

紙--有2隻計算,1+1-

護理--有3隻計算,1+2-

藥--有25隻計算,11+14-

肉--冇

印刷--有12隻計算,5+7-

地產--有30隻計算,7+23-

收租--有15隻計算,7+8-

物管--有30隻計算,17+13-

出版--有1隻+

路--有12隻計算,7+5-

地產經紀--有1隻+

reit--有10隻-

飲食--有8隻+

陸運--有1隻+

衛星--有2隻,1+1-

劵商--有15隻計算,5+10-

半導體設備--有1隻-

半導體--有5隻計算,2+3-

航運--有18隻計算,9+9-

採購--有4隻計算,2+2-

化工--有10隻計算,3+7-

超市--有2隻-

IT--有12隻計算,7+5-

電訊設備--有8隻計算,5+3-

電訊--有6隻+

布--有2隻+

煙--有1隻+

玩具--有2隻+

客運--有2隻+

旅行社--有1隻+

水務--有5隻計算,2+3-

如果好景的話,照計大半都係+,但現家多數一啖砂糖一啖屎,你話佢市道差定市道好都啱唔曬

當中量大偏向大比較有統計意義的係呢D:

地產7+23-,reit10-,建材3+9-

銀行20+8-

劵商5+10-

電訊6+

飲食8+

衫13+5-

整容14+4-

保健10+4-

奶1+6-

化工3+7-

礦1+6-

煤2+7-

油氣設備6+1-

支援服務9+3-

個市跌咁多日日有新聞好似好驚嚇,似乎係因為中國特色股市主要係由地產股組成,地產股不是股市的全部,但每次都嗌得最大聲,同地產相關的係全面食屎,但其他行業還可以用一啖砂糖一啖屎黎形容,至於水泥公司就賒數到等銀行call死為止

銀行大致未死得,但下端的死唔少

劵商執好多,現家應該叫整合

電訊股係清流,賺三賺四最後還是救了你

放監出黎,飲食,衫,整形,大保健返生,放監效應是一次性的,有冇持續性就唔清楚

冇人飲奶,味皇推測坐監幾年期間冇人熱衷於繁殖

化工應該係需求減少自己用少左同鬼佬入少左應該都有關

礦同煤意外地唔掂,味皇一時想不到能套用的理由

油氣設備主要係之前簽落的多數係長期訂單

支援服務內容太雜唔知點形容

另外

航運--9+9-

佢又將船公司同碼頭視作同類,如果拆分返出黎,船公司大半係-,運費由上年高峰回落左,碼頭大半係+,7+2-,唯獨味皇的兩隻遭精準定點要害打擊,到底要說味皇選股有問題定係個天都唔鍾意我?味皇其中一隻係忽然冇理由唔派息重插然後有劵商狂收爆升,另一隻係主要做海螺的水泥碼頭,第4季水泥唔賺錢全國關閉石灰礦山

藥11+14-

政府用乜藥都要招標,每次招標都會重新洗牌,味皇算是死於概率

今次特登做個減派息統計,係因為股齡咁多年好少好似今次咁狠,味皇中招率咁高,想知死因,今年感覺應該是比較特異的,可惜以前冇做統計冇得參照

味皇不每項都評價,基本每個行業的屎入面都有豆,有心搵的話唔係一文不值,總體而言,平時一D叫做穩定,穩賺的行業,今次都有叛徒中出,有今次,可能也有下次,但果個行業平時都是穩定,穩賺的,另外現時運氣的作用相對較大,好多公司不是漸變而是突變,屎豆各半總有一半機會中,暫時地產唔見起色,好似水泥股化工股好多都還在賒數過程中,賒數期限倒數,總會倒一批,銀行下端輪完大米之後就到中端,債務多的私人公司難續期,債券少的私人公司也難借,地方政府公司視乎地方的財力決定借幾多錢駛,而中央企業會因鐵拳下繼續大放出,進行多餘的貸款無謂的收購浪費的投資盡量的派息,由於回報率低,中央會減息或扮減息,水,電的政府對內收購價亦可能會減

經過今次統計,並沒有得出甚麼乜非常特別了不起的結論,味皇的死因欄求其填"死於不幸",感覺浪費精力白寫左一大篇文

沽清茂名港

0.32沽清6119,仲未換馬,有可能換1883或270或3315

本來業績期之後味皇應該寫一批業績分析,但是味皇現在可能需要賣股時而D股冇成交量,咁寫出黎只係揾自己笨7,雖然有幾多關於下半年特別係第4季的想寫,但最多都係由唔關事的開始寫

最優先賣的唔係6119,但佢有奇怪的成交量而且有奇怪的人托,所以賣到先,佢好地地忽然唔派息,味皇思疑佢係唔係學1270咁先收小股東皮,再黎私有化,可能會左一巴右一巴,不過味皇還是決定唔博,佢無論係好地地忽然唔派息,定係想先收小股東皮再黎私有化,邊一樣都係顯示佢係有問題的獨裁者,友誼的小船話翻就翻,失去信任只需一瞬,想恢復信任則要幾年

明明尚書大人說股票CP值越來越高,股市表現不錯,聖上又要求A股帶頭派息,但現時味皇係上商個網度批量睇,發現10厘股係字面上大量消失,似乎減派息停派息是非常大面積的事情,個個食左熊心豹子膽,唔通存錢入銀行會提唔返出黎咩?比如說中石煉化,現家升到8厘左右,味皇想換馬睇下有似乎冇更高或更高品質的,居然搵唔到咁滯,無論對味皇呢種垃圾佬,定係唔想再蝕錢的散戶,投資目標都變得相當細範圍同集中

之後味皇會試下統計一下派息情況

味皇早兩日又開始收到密集的垃圾詐欺短訊同電話,CTM恢復似乎意外的快?感嘆變變變生命力,果然只要有人類就一定擺脫不了

另外上一篇去的地方,味皇住的酒店價錢多介於85-119之間的垃圾房,上面無論不同地方例如A市或附近的B市或幾千公里外的C市,市內景色可能都千篇一律,特別係夜晚,去得幾次就覺得冇乜好行的,大概第時港澳都會變成咁,於是行左食左大半日,夜晚留係酒店睇西片CP值比較高

冇比較冇傷害

月尾2.57增持多20000股CTM,另外8502業績後0.3賣出32000股,0.31換成30000股829

原本以為今年解封之後會有好結果,點知還不如上一年,連帶味皇也要陪上面共度時艱,上面唔係落左政策叫D公司能派息就派息?結果個個都當聖上冇到,唔係減派就停派,班人的心態都變了,估計味皇今年的收入應該比不上上年,近期的選股好多都出現了不如預期的結果,不過嘅然是味皇自己親自指揮親自部署的決定,結果當然應該由味皇自己承受返,冇乜好賴的,之後唯有自己想方法解救

原本事隔左幾年,味皇開始有外遊計劃,不過收入不如預期,局長又話港股性價比越來越高,頓挫味皇的外遊積極性

香港由治及興的好處越來越多大6人睇到,特別係深圳人,味皇不禁想起10幾年前,澳門人工極高,珠海人工極低,之後珠海物價比澳門人買到越來越高,珠海當地人反而買唔起的情況,現家深圳睇起黎有類似的情況,香港人上去買野嗌好抵,事實真係抵咩?

係呢度比較一下,味皇近期出大6食的價錢:

1月係湛江食的雞扒意粉,19蚊

1月係湛江食的雷州羊雜粥,10蚊

2月係英德食的燒鴨粉,1隻脾1邊胸,驚異的16蚊

同店23蚊燒鵝粉

2月英德食的雞扒意連野飲,19.9

3月珠海食的焗飯套,24.9

3月珠海食的焗飯套,25.9

3月珠海食的咖哩雞套,24.8

3月廣州食的牛腩淨雲吞,23蚊

另外廣州的大悅城已經起好,租滿,但人不多

3月廣州大悅城食的叉飯,16蚊

3月佛山食的扒包套,23蚊

3月順德食的冬陰功拉面套,29.9

3月西樵食的肉餅飯,19

3月順德食的咖哩雞套,20.9

(以上部份價錢包含優惠)

若以哩個價錢為基礎,深圳貴50-100%,澳門貴150-250%,香港貴250-400%,深圳不能說平,只能說相對平

雖然原料產地一樣,澳門食物唔一定比大陸食物差,有人留澳食,雖然原料產地一樣,香港食物通常比澳門差,煮的時間更短,份量更細,又要搭抬,又要趕時限,對於乜乜幣物物幣呢D不可視的東西人類不易分別,但食物之類可視的物體是經不起比較的,想阻止就是要阻止人地比較,例如想比較A同B就需要接觸A同B,要不就資訊封鎖令A或B"不存在",要不就行動封鎖阻止接觸A或B,要不就經濟封鎖令比較的媒介消失,不過救國大於救港,唔駛惗

另外淘寶雞扒原料先2蚊一塊,所以先有平雞食,雞命不是命

1883業績

業績好差,上半年賺7.3億,而全年總共只有12.3億,即係下半年只賺區區5億

有兩種情況,上半年成長率25%高得有點出奇,於是有可能係下半年的生意分配左去上半年,例如集中曬係上半年轉plan之類的,咁下年盈利會同今年比較持平,另一種情況係下半年真係好唔掂,咁下年可能繼續維持在低盈利水平,咁全年就會大跌到得10億

下半年盈利大跌的原因,味皇認為主要係10月尾的緬甸內戰,突然冇曬詐騙電話同詐騙短訊,相信在坐各位都實際感受到呢幾個月收少左垃圾電話,

CTM比較利好的係淘汰左ADSL,可以掉曬D陳年存貨,執左維修部,炒咁D老年IT狗,經營成本少D

營業額細分:

                           23全年     22全年      23/22上半     23/22下半

移動通訊服務         967        827         457/417         510/410       -下半年成長

(電話月費)

互聯網業務           1427       1331        705/649         722/682       -下半年成長

(光纖同數據中心)

國際電信業務       2954       3453      1951/1715     1003/1738    -下半年腰斬

(IDD)

企業業務              3079       3069      1506/1538     1573/1563    -下半年成長

(VPN同雲端)

所謂國際電信業務呢個分類係2022年由24億忽然爆升到34億幾的,現在只是回到原點而已,由於澳門係果D實力團體的係地球上的第二大據點,因此影響不會細,同樣道理,相信台灣大哥大也會有影響,如果今次連根拔起,到下次勃起之前呢D垃圾電話是不會再收到的,因此CTM下年係呢部份相信大概率唔會恢復,而且緬甸是10月尾打起來的,只佔半年的1/3時間,因此影響可能更大,當然這只是基於味皇個人推測

數據中心的營業額味皇推測是9.3億,而光纖5億,同業新意網營業額成長16%,因此CTM算長得慢,企業業務微微增長,月費也是,除左做詐騙呢行之外其他比較差但都叫穩定成長,整體是好的,只是中左一拳

假設IDD跌回2019年水平,即是18億,2019當時賺10億派20仙,2024年按比例最差賺10.5億派21仙,希望估錯啦

今年CTM實際是衰退的,但CTM還左5億利息支出減少,又炒左D服務詐騙的人,所以派息仲可以微增,現家CTM債務還剩大概35億,予計7年就還清,可能減少派息,但債務少可能增加派息比率而維持,兩邊都有概率

2348東瑞製藥

味皇睇中佢時仲係1.01,當時沒有閒錢買,現家已1.3,如果不是1606中途突然爆升有錢換出黎,味皇應該錯過左佢,業績前寫一下,費事馬後炮

用30秒大法黎睇:

1.固定資產增加,特別係上年大增,應該有搞頭

2.現金大增,大概率增加派息,或者是特別息

3.有回購股票的習慣

根據上面3點,東瑞已經有投機價值,至少一年前就可以通過睇呢個表知道,至於有冇投資價值就睇價錢了,1.01的話是PB0.57,派息8.7厘,味皇覺得非常可以接受,不過在15000點的時候也唔一定輪到佢

之後中期後呢個表冇寫出黎的事情係,佢又有子公司賣左比人,現金再度增加,派特別息的機會再增大,不過也是味皇買左之後的時情,非常近期

於是東瑞有多個好處,股市特低而佢有回購,借錢極難而佢有現金,生意唔好而佢好轉,行家縮小而佢增產

唯一壊處是增產請人賺唔賺得到唔一定,但折舊會先增加

佢經營現金流連續5年增加,疫情下仲想點

通過30秒大法的東瑞有睇年報詳細了解的價值,佢固定資產增加是因為舊廠搬新廠,而新廠今年己全部投入使用,無論好定唔好,都會在今年表現出黎,現金增加是舊廠地皮收地的收地款,由於是非經營收入,所以派的話是歸類為特別息,當然現金多身痕胡亂收購也有可能,但東瑞有回購的習慣所以收購外人的機率低一半,雖然想這樣說,但近年並沒有回購

按呢5年經營現金流的數量黎睇,經營現金流大致係存貨的2倍,折舊的7倍,佢折舊率約10%,最新的8億固定資產應該會產生8000萬折舊,因此東瑞下年的經營現金流估計4.8-5.6億之間,由於最近賣左批子公司變現,經營現金流可能少過估計,但相對地利息收入會超出正常

最近賣左子公司之後,現金應該已經超過10億,味皇不清楚佢想留幾多現金為之合理,根據以往記錄,佢3年前現金7.3億時,就派了特別息,現金跌回5.8億,因此東瑞如果派特別息的話,預計連同正常派息合共派總額1.5-4億之間,即每股0.1-0.27

如排除呢點,係大6賣藥不確定因素很多,想穩定地長長久久地賺錢可能比較困難,在組合中只能分散不能柯煙,要形容的話,好似球會咁,你可以推斷佢的實力係行家當中算強定算弱有冇優勢,但對賽結果同排名同實力並無必然關係而不太能準確預測

新地圖一游

早幾個星期由於未搵到新目標,於是1.65入多30000股1713,之後果個星期1.7再入多54000股,另外0.39再入多80000股8502,沽1606的錢大致都買返曬

最近某神又追加了新地圖,原型物理距離比較近味皇又得閒於是去左幾日,咁上下:

攝自三叔s10e,都唔應該叫叔,5年前的老爺機應該叫叔公了,地點係英德,味皇買左包三無茶,英德紅茶好似好出名,但是無論是車仔立頓還是蜜雪冰城,我們每週飲的廉價茶葉也就是英德紅茶,對我們同英國佬來說也不是甚麼希罕珍奇野,英德紅茶能夠出國無非是物理距離,400年前葡國佬上岸的是澳門,而離澳門最近的茶園剛好是英德而已,如果葡國佬上岸的是泉州,咁現家沖奶茶的茶底可能是鐵觀音了,好多時只係咁啱撞正係你而唔係你有乜特別

不過英德的重大景點味皇沒有去到,因為沒有前往方法,可能係地方政府缺錢?定係本身就係咁,英德甚少巴士路線,遠少少都去唔到,來回大景點的方法一係打車一係併車,荒山野岭狀甚可憐的味皇點會鬥得過彪形大漢,不信任人類特別是其他國家的人類的味皇自然沒有上車(而且又貴),結果味皇只能去市中心比較近的景點,同桂林相比,好處係人少全程廣東話少老實商人,壞處係交通唔方便,英德的話,市中心街市學校旁邊3房1廳唐樓月租800售20萬,燒鴨20蚊斤,人工3-4000

講開茶葉,茶園遠睇落去係幾好睇的,味皇去過有D以前產茶但現在不產茶的地方,會有展示用的茶園,好睇係好睇但實際上只係燃燒稅金,完全唔覺得游客買紀念品可以回本,而英德的茶園是實際產茶的,D茶樹葉有D比蟲咬到一個窿二個窿,修剪也不甚齊整,唔似專人杜蟲修錢的咁靚,但產值起碼可以交到地租同養埋自己,反正實用的係講效率,自然不及不計成本的美觀

維多利亞港係天然深水港,澳門的淺水港由木船一轉到鐵船年代就被市場淘汰,以港口來說進入鐵船年代,維多利亞港比澳門的港口優勝,維多利亞港好係邊呢?水深港闊,有山擋風,有島擋浪,海岸線長,直出直入,不用疏浚,相比起周圍現家更先進更多船的例如南沙港蛇口港鹽田港,維多利亞港依然是最優,優點在於不怕被海浪侵蝕不用派船挖泥,不用在維護上多出1個仙,地球會自動保養,然而在硬件上全面勝出的維多利亞港比其他人造港取代,也就是上面的人頭腦不行,係度燒煙花喎,好睇係好睇,好似茶園一樣,起個茶園係用黎睇定係用黎種茶架?維多利亞港係實用型的港口,遠比周圍所有港口都實用,你不去實用,而是用黎觀賞,不是用黎抽稅而是用黎燒稅,這就是現時社會的狀態

味皇覺得,維多利亞港如果要回碾上面的港口,只要找個地方劃成三不管,不當成香港不適用香港勞工法,入面全用外勞,食強國科學飯,開專門的路直連強國,收工運返上去,在人力成本上強行同周邊拉平,就好似新加坡剝削外勞唔當佢地係人咁,官已不講人道,何不更加地獄?

2020年剩蔗

上期2019年上市的股票入面揾唔到托付的目標,退而求其次,係2020年度搵,舊文係果年寫早左,11月寫的,懶搵資料,11月後上市的的就算

好多上市前的數字都已經可以看出端倪,但4年後再回頭看,2020年上市的股質量低得令人髮指,好多都是沖著詐騙而來,之後幾年唔係蝕錢就是增發,實際上當時的社會風氣確實如此,正如乜幣乜宇宙咁,講返係生意難做股市低迷的時候上市圖甚麼?一係想騙錢,一係缺錢到連賤賣股權都唔放過,可以預期2021年到現在上市的股票目的大都係咁上下

2020年119隻海量的老千股入面,味皇現家30秒大法齋睇負債表,初步剩下9901, 9995, 2132, 1455, 9987, 9633, 9913, 6968, 1163, 1502, 6078, 9997, 9999, 2381, 1936, 1953, 1463, 1343, 9916, 2263, 9919, 1416, 3718,共23隻

9901新東方

公司還好,怕鐵拳

9995榮昌

又增發又收購,唔知好壞,唔知算唔算合理,財政仲可以,唔派息,估計唔係老實人

2132譽燊

規模相對固定,現金略有增加,但最近冇派息,PB1.9,唔可靠

1455利利

規模相對固定,現金略有增加,有派息,幾肯派息,但有增發,PB0.6,馬馬夫夫

9987百勝

5年如一日,派利低PB高,冇利用價值

9963農夫三拳

固定資產增加現金增加存貨增加,成長中,PB18.5,垃圾

9913智勤

現金增加比較快,好似有點暴利,但唔派息,PB6.9,佢現金咁多都唔派,之後估計多數唔派

6968港龍

地產股之中比路勁好一點點啦,有努力掙扎,也就是比路勁好一點點的程度

1163虎視

大致上原地踏步,現金多但基本不變,唔派息,變相蝕緊錢,垃圾

1502金融街

現金多但基本不變,固定資產同投資多一點點,有派息,PB0.6,吸引力不高

 6078海吉亞

財政看起來不好,不好是佢呢幾年買好多固定資產同回購股票,狂戰士一樣,姑且有派息,PB3.1,經營作風冇話對錯,味皇覺得不太可靠,而且又貴

9997康基

固定資產增加,回購股票,財政又好,又肯派息,個底相當好,問題是PB2比較貴

9999網易

以佢現金增速黎講,163其實係好野,但PB5說明一切,而且佢全身金光閃閃,好似中移咁,一臉揍打的樣子

2381蜆殼

比較平穩,有派息,pb1.2算貴

1936唔知叫乜

現金增加,有回購,但冇派息,PB0.7,博唔過

1953又唔知叫乜

現金傾向增加,有派息,PB0.8,太貴

1463 C link

固定資產增加,現金傾向增加,冇派息,有拆細,呢種程度PB6.2硬膠

1343偉源

還在還債途中,等佢還到咁上下先算,冇派息,PB0.3,未駛急住

9916興業

雖說財政超好,但是管理公司...最近唔派息,PB0.45

2263富石

現金增加,但冇派息,可見的將來也唔覺佢會派,PB0.4,利用價值不高

9919艾德韋宣

淨現金,連續回購,有派息,pb2.2....平返一半可能會買

1416CTR

規模不變,冇派息,現金只是微增,冇乜料到

3718北控

係咁借錢收購,有派息,PB0.55,馬馬夫夫

結論而言,2020年的垃圾堆入面仲未有一隻可以吸引味皇,2019的也未有,因此味皇的錢增持原先有留意開的可能會比較好

2633保濟丸

就係那個傳說中的保濟丸,上市後集資所得用左黎收購左賣西藥的何濟公,最近幸運傷風素又炒到百幾蚊,見TVB賣何濟公的傷風素廣告,結果濟公能醫百病都只係用西藥,唔係用漢方老泥丸

味皇睇中佢主要係高息,跌得耐唔算貴,產品連老母都聽過,有南洋收入,移民潮會帶動東方神藥去到西人地方流通,好似潘高瘦枇杷膏咁

細部黎講,係資產負債表到睇,好幾個好處:

1.股本下降左兩次,有回購股票的習慣,加上佢本身派息多,輸出大

2.固定資產平穩,冇增產需要就冇資金需要,閒錢可以用黎派息或還債

3.現金增加,特別係最近大幅增加,之前存貨同現金咁上下時有周轉壓力,現家冇

4.存貨大致平穩,固定資產也差不多,看起來近期不會大變

5.最近1年現金狂飆,佢增派息,有回購,還算老實

6.可能係保就業筆錢?一次性收入也可以作特別息或回購,反正已解決了周轉問題

7.明顯經營好轉,要買就呢一年

不好的部份是欠債冇點還,欠債來自收購,每次都收購欠債公司

基本上單一張表就可以結案了,姑且睇埋現金流

1.近7億現金流,只派1億其實姑寒,20年能派1/4,之後有周轉壓力派少,今期現金大增,可能增派

2.(其他)應該係回購股票的支出,上年用左3200萬

3.稅4700萬,稅率17%計賺2.8億,比現金流少得多,佢低估盈利,也可能代表佢折舊同攤銷高,至於折舊是否有效,味皇對於佢生產幾十年老泥丸的設備應是無效,但收購的專利藥的有效期減損就可能有效,總體而言盈利多少會有低估,於是佢能存到錢

4.佢自稱盈利2.5億,同上面2.8億的差距不大,明面上冇點厄人,2.5億派1億還算可以

5.收入增加可能係保就業筆錢?一次性收入也可以作特別息或回購

6.明顯經營好轉,要買就呢一年

結論就咁,呢年股市大跌,應該話年年都大跌,但佢今年跌得最多,而佢呢年經營好轉,會增派,會回購,股價低回購又有著數,未增派息時都7厘8厘,味皇睇中時,佢派息係醫藥股中排第二,仲唔駛抽稅,如果冇增長學白花油咁全派OK,好似扮增長咁學利豐咁收購也可以接受

市值12億,pb0.4多D,子公司2161都8億市值,2161經營情況同佢相似,相比之下不算標青,但貴得多,pb0.9

另外中期顯示,呢張表之後的半年,一如上面結論,盈利再增加2成,而股價卻繼續跌

移民潮會帶動東方神藥去到西人地方流通,好似潘高壽屁杷膏咁,BNO算英人唔算外勞,16年後可能有香港人球星踢英超,食老泥丸,就好似將來港隊成隊巴基斯坦人咁,唔食豬扒

2019年新股剩蔗

本來冇呢篇文的,忽然味皇手上多左筆錢,忽然就有搵股需要,於是即席揮亳寫文

現家過左2023年,比5年時間D新股收水,時間黎講本來想寫2018年的半新股的,睇下發現味皇好多觀察名單都係呢年的上市的,為左搵新野避免重複,退而求其次寫2019的

舊文有雞立的2019年新股列表2019新股,30秒大法睇,初步判定可以留的有,6049, 9928, 1553, 8216, 3348, 8617, 8627, 1401, 6186, 1987, 1853, 8441, 3601, 1876, 1839, 3798, 1935, 6117, 3692, 2230, 8635, 1780, 2682 ,3316, 1785, 2885, 當年上市164隻,留底26隻

另外2019年下半年RF死server,味皇當時寫唔到文又留唔到言,遺言都做唔到,有半年空窗期,好多讀者唔知味皇之後搬左google,以為執7左,之後味皇就冇乜人睇了

6049保利服務

貴,唔抵買,對於發展商的物管股,味皇認為是一大市場陷阱,也括藍籌果批,同外判管理公司唔同,佢地唔駛招標,自己出糧比自已,成本可以開公數,唔夠人可以問老闆借,用避稅的術語叫轉移訂價,例如味皇開間動畫公司,母公司係病大,拍一套26集的每集24分鐘的玩具廣告,正常賺100萬咁,病大想將間動畫公司上市,同味皇講,墨水夠唔夠?我1蚊二手讓比你,地方夠唔夠?我1蚊租比你,上網用唔用?我比你痴WIFI,肝夠唔夠?我同你捉帕魯返黎,你套廣告片要上CCTVB播?本來要比錢CCTVB的,我病大大代比,CCTVB同你買套片,錢你照袋,這樣味皇的動畫公司盈利就平白增加到1000萬,然後10倍以上的價錢上市,然後病大袋返,對於成本數字能夠任吹的公司,味皇會迴避

9928時代鄰里

也是物管,如果是外判的就仲可以,如果是開發商旗下的也是迴避

1553邁科

看起來比較OK,有還錢意向同能力,不過存貨比較高,周轉需求大毛利率相信也不高,派息約9厘,PB0.44,呢個市上看一般般,唔夠平

8216豐城

看起來經營良好賺錢多存錢快,但不派息,也極貴

3348鵬飛

財政也算是不錯,冇欠債的習慣,但存貨比較多,有周轉壓力,壓力可能仲不少,短期內唔會派高息,PB0.6偏貴

8617永聯豐

現金大致是一味增加的,冇欠錢,看來相當不錯,pb7倍幾,買果個傻

8627旅橙

同上,但是冇派息,唔派息下的存錢能力也未見非常優秀,PB0.7不低

1401唔知乜叉

最近情況很好,清理大量存貨,也還了債,但有幾個缺點:1.情況很好是因為清理存貨,但存貨清理是有上限的,2.佢冇派息,3.PB4.8買果個傻

6186飛鶴

現金每年都上升呢樣好,積存大量甚至過量的現金,也有派息但相對較奀,pb1.2還算OK,但個格似姑寒財主,3年前已能增派但佢冇

1987新加坡乜叉

還債的途中,想要買等佢還到差唔多先,而不是現在

1853春城熱力

已寫過,pb0.8有點貴

8441國際永勝

公司好似好,但集資過兩次,唔好

3601魯大師

味皇IT狗也不知道佢點賺錢的,冇派息,pb0.3,唔知點形容

1876百威

現金大致年年增加,冇固定資產投資,派息比率相當偏低,pb2比較貴

 

1839中車

財政不差,也不叫好,有存貨壓力,pb1唔抵

3798家鄉互動

感覺似炒股的公司,比唔到一種長久的感覺,pb1.6,叫有派息

1935嘉宏教育

財政上係好,但怕鐵拳,pb0.5

6117日照港

寫過買過,pb0.3平係平,但味皇親身驗證過佢有幾姑寒

3692翰森製藥

pb3,唔見得有相應的暴利

2230羚邦

寫過買過,pb0.7,有成長,但現價吸引力不大

8635

微量的上進,非常微量,微量的派息,非常微量,pb0.2,老闆咬糧股

1780 B&D

有賺有蝕,只派特別息,pb6倍幾

2682潤利

寫過買過,pb0.8,平穩中帶少少貴

3316濱江服務

又是物管

1785成都高速

品質很好,但好價錢己過,pb0.8

2885彼岸

差唔算差,好又唔到好好,pb0.5,小貴,唯一好處係博亏轉盈咬一啖

結論呢年上市的164隻對現在的味皇都唔夠吸引力

換出國銀

之前跌穿15000點都費事出文了,估計大家都冇閒錢買,冇成交量也換不了馬,我們專心做帕魯好了

但係呢兩日有d動L,成交多左,味皇自已幾年前買落的國銀忽然爆升,尋日1.82-1.85沽出一半25萬股的國銀,分別0.59換入11萬股保濟丸,1.62換入66股筆克,0.52換入26000股唐宮,2.14換入14000股衛星,1.67換入146000股怨念的四川能投,大重組下國銀由第二大持股跌到第四,衛星升上第二,筆克第三,組合的派息應該多6-8千

國銀收返契哥沒收的飛機錢,盈利增加財政變好可能回撥,要說增加派息呢,應該會增,但又唔會話多成倍,話派特別息呢,可能會派,但頂盡咪多1亳幾子,話減息呢,阿爺又冇聲氣怕人仔貶值最多味吸乾港紙,現價水平國銀要做10厘股未輪到佢,相對而言四川能投派息應該高D成長好D,而筆克呢D就免股息稅

之前CTM的問題,呢度一次過回答,味皇關於CTM係橫琴部分有謬誤,尋日味皇去CTM門市度問,橫琴新街坊關唔關CTM事,給論是橫琴唔關CTM事(用澳門號碼另計),果邊係大陸,叫雞找上門的是公安而不是警察,至少廣東冇放棄橫琴的稅收,果邊係用中國移動,不好的是CTM冇得分盈利增加少,好的是CTM冇必要花冤枉錢投資可以派息,要花錢鋪網的係填海地A區,咁牌照問題係點呢,CTM經濟係有復數牌照,固網牌,流動牌,之前到期展期的應該係固網牌,而流動牌之前續左,同中國電信一齊25年到期,另外搞數據中心唔需要牌照

*冇訓到,今日見升,繼續賣,賣左先算

*剩底的25萬股1.91-1.96出清,再1.68補多20000股能投,4.1補多20000股煉化,1.11買入20萬股東瑞制藥,剩下的遲下先決定點買法,賣完訓覺

穿萬6

香港己不亂,股市非常好,大市升穿16000點,下一個目標是不是要超過納指呢?

呢兩日1.4沽出26000股國銀,1.98-2沽出61000股齊魯,0.56-0.57換入278000股保濟丸,繼續去中腳化

之前齊魯2.2左右現在只有2,但之前睇中保濟丸時是0.63現在插水到0.57,大家都跌咁上下比例因此賤賣齊魯換馬還算可以接受,相反同時睇中的東瑞當時是1.01現在反升到1.1只能放棄

香港政府似乎又話想加乜稅物稅,如果學味皇話齋突襲式調聯匯掛勾價就起碼解決一半問題,包括公務員有加冇減,物價有加冇減,同上面物價差距有加冇減,機場同碼頭使用費用高之類的,相反如果加開一D常設稅種,最後又是請更多的公務員,只能叫做解決政府問題而不是解決社會問題,無論郁聯匯定加稅,社會都不是無痛,一樣都要痛的話選治療而不是拖延應該會更好?

味皇比例擔心的是班傻佬,搞搞下最後整個股息稅出黎,理由是度度都收股息稅自已照跟就唔駛用腦了,同樣理由是不是又要收埋遺產稅?味皇覺得調聯匯是扣HP兼上一個時效中毒buff,而加稅種是扣最大HP上限,一個短時間的傷害,一個是永久性弱化,香港競爭力唔夠還要踩多一腳,可謂極品,就好似之前寧願捱餓成年係都唔肯食夏威夷薄餅咁,有時會咁諗,如果係劉江華做情況會唔會好D?然後就等於話現在的人連劉江華都不如?到底香港人希望要甚麼人才,股壇要大C,政壇要劉江華張建宗?

要降決問題,味皇覺得呢,調聯匯到8點幾,將監獄外判去境外,收銀行利息稅,裁走大半駐軍,基建蘇聯化(超實用主義),減少光污染,貨櫃碼頭搬去機場跑道,搬上面70年地權黎對付丁屋之類