雜談

月初再2.14賣多18000股能投,1.81換入20000股筆克,本來諗住繼續再買多D的,不過之後都未見機會,繼續等運到

收埋中信泰富的息,今年收的息總數已確定,45萬多D,離上年定的47萬目標還差一點

最近華農兄弟出竹鼠片,美國總統係當奴侵,感覺好似回到2017年,雖然恆指差左10000點

疫情之前味皇同朋友去肇興,係去高鐵站的巴士上見到有檔口可以食竹鼠138蚊隻,當時冇食之後也冇機會試可能永遠也冇得試,結果現家又放寬返,大概上面又開始想恢復返個體戶經濟,企業不行了,放返D自由度比人自己搞,華農有本事捱過左死唔去,當時幾多脫貧項目重點扶持特種養殖,尋日仲政府支援貸款,聽日就變直接打死收數,養竹鼠養蛇養乜養物一哭二吊三刪片,袁國勇不是說倉鼠有病毒的嗎?現在又冇毒了,動物邊毒得過食齊元素表的中國人

過得污糟邋遢唔係日日沖涼防禦力高的味皇,好似到現家都冇中過招的症狀,而屋企堆積如山的快測都過曬期,連快測果間公司也不復存在,當時話搞的核酸產業園現家都唔知點樣了

ps5出左pro,係呢一刻,基本上可以講家機行業已完,呢度味皇引用一下某芒亨Vtuber的原話:"12萬円哦,的確同高階電腦比相當著數,電腦的話要40萬...但12萬円哦,連埋PSN要13萬哦,唔係講玩的價錢哦,比房租還貴哦,game業界收皮都似,已經唔係細路可以入手的商品了,你試下同聖誕老人講"我考試全部100分了,我每日幫手做家務,做乖孩子,聖誕老人我想要PS5pro",聖誕老人大概會開始表演顏藝,唔解決呢個問題以後都唔駛出game了(  不過呢度應該冇人聽得明,姑且貼埋link,34分到37分果段,https://www.youtube.com/watch?v=0doZID39fto   )

係華強北現家可以見到之前禁運的4090,係唔係走私就唔清楚,淘寶度4090要賣13000,幾年前的2060二手都要900幾,1060呢D古代野都要成600,的確成個行業對打機非常之唔友好,而game廠基於政治壓力又要養政治廢人拉高成本,侵上台後,特別係伊隆火星克上台後,game廠的風氣應該會有所改善,但硬體依然係貴

係呢度順便講下味皇用緊的設備,味皇部電腦係自己砌的HTPC,全部淘寶貨

18年買的機箱,個箱係幾好,但電源唔係通用型有問題時配唔返,

https://www.taobao.com/list/item/588975344351.htm

底板係映泰b350GTN,18年的貨,原先用R3 2200G的,前年換左R7 4700GE ES版,更新左bios先支持到ddr3200同新U,魯大師分數CPU分數16萬7,顯卡分數58000,CPU的性能仲非常現役,3D性能只能說比intel好,打機帕魯要順只能開1600X1024以下,整機功耗2200G年代時係90W,換左4700GE後降到60W以下,而且味皇是降壓超頻,一般用唔駛40W,顯卡性能同2013年的GTX660比較接近,但齋一張GTX660的耗電係150W,GTX660工藝係28納米,而4700GE係7納米,所以話用舊顯卡挖礦非常不化算,工藝改進1納米,耗電上就能把舊晶片的全淘汰了(商業上),由於比特幣高企,比特幣=歷年電費,新顯卡能慳幾多電費同產量多幾多,就會係比特幣的價錢上間接反映在顯卡售價上,3080淘寶售價2800蚊功耗350W,4090賣13000蚊功耗450W,即是說3080超頻到450W賣3600蚊時,4090相比可能挖多9400蚊的礦的意思,硬件本身用黎打機時係唔值錢,因為有人用黎挖礦的關係,4090產生左9400蚊以上的溢價

(CPU的ES版,即係代表係送去太平洋送去中關村做評測的樣品,測試版,比商品版平兩三成,有賭人品的成份,但味皇買過兩粒都冇問題)

味皇部機現家買要1700蚊人仔左右啦,700蚊4750GE,400蚊B450ITX,200蚊兩條8G,150蚊SSD,200蚊細機箱電源

個MON係philips230S,基本絕種的16:10的MON當時搵花了不少功夫,現家淘寶賣650蚊,日本居然賣緊24000円,飛利普只要係IT老屎忽一般都知道就是福建AOC,而AOC比飛利普再平少少,有果個版本的話,例如賣特別貴的碧泉檸檬茶,你只要拿上手仔細睇,就會發現代工生產商係深暉,1蚊1盒菊花茶的深暉,所以貴價野同平價野好多時係冇分別,就好似股票咁

淘寶:  "philips230S"

味皇用左好多年都覺得OK,不過16:10同埋唔係4K2K的MON應該已經係非主流,味皇覺得作業用的MON,大概離50厘米睇咁樣,超過24吋的反而唔方便一眼睇曬,除非擺遠佢,味皇實際試過24吋時要轉動條頸,22.5吋就轉眼核就得,所以作業用的反而不要買太大

上星期雙11,味皇為左改善生活品質同就返部PS5,於是買左部28吋4K MON黎代替部1080P舊電視,牌子係叫genlove的濕鳩不知名牌子,雙11時賣814現家889,味皇大概離開2米遠黎睇,32吋會太大而24吋又有D嫌細,27吋到30吋較好,現家28吋應該是4K能買到的最大尺寸所以買佢,實際用起黎都幾好,起碼真係做到4K唔係吹水,係條HDMI線要求高D,意外效果比1080P好,好的程度超出味皇想像,有點低估了4K同1080P係28吋上的差異,缺點的話暫時冇發現乜明顯缺點,功耗的話100%亮度係40W,味皇現家用緊35%亮度27W

淘寶:  "genlove28英寸4K"

用左之後先發現缺點,佢冇喇叭,實際上MON冇喇叭先係正常,但味皇要用黎代替電視機用左發現冇聲先知失策,唯有用10蚊買多個筆記本內置改裝喇叭,另外味皇變成要另外用機頂盒,機頂盒係DWX860,淘寶賣90蚊

被淘汰的文物係philips24pff,用左超過10年的老傢伙,耗電才16W,味皇的評價不可能再高了,特別係易用性上之後都未曾遇過比佢好的,因此味皇對philips或者是AOC的評價很高

用老頭環黎講,1080基本睇唔清每條流蘇的分隔(當然24吋同28吋都有影響),腿甲的鏡面質感4K明顯比1080高級D,全黑時4角漏光有D嚴重但實際用起黎唔多覺,亦唔見有殘影,主要係咁,800幾蚊,另外sharp手機的鏡頭的確不錯

本篇姑且不是推銷