2023新股

也許味皇寫的最後一篇新股系列?今年好似執左70間證券行,味皇也不知道明天雞立仲係唔係度,如果冇資料就再冇得寫了

唔計綠債,全年上市58隻,近年最少,保薦人排除18隻,合格率69%,史上最高,雖然少了很多牛鬼蛇神,但上面依然有一眼睇得出的微信女體系

首先我們回顧下,公司上市的目的:

1.想要錢,但想唔借錢,上市代替借錢

2.欠錢,想要錢還債

3.想掛上市公司的頭銜

4.做假數,想要圓左條數

5.特登做蝕本生意,次後上市抽水一次回本

6.公司用開公數支付巨大的上市開支,之後券商回佣比老闆個人

7.公司消耗大量本地貨幣,由上市兌換成大量的境外貨幣

大致係呢幾類,如果作細部說明,類似會係咁:

1.想要錢,但想唔借錢,上市代替借錢

A.公司33%機會係淨現金公司,B.33%機會上市前派息派乾塘比老闆的公司,C.33%機會係借左錢冇能力再借的公司

A類有現金流,又唔想借錢,一般用"想收購乜乜"的名義上市,呢類公司幾年後值得買,派息通常一開始就甚高

C類可能現現金流也可能冇,上市的名義乜都有,但目的都是還債,集資直接還,或向老闆本人收購垃圾比錢老闆還,呢類公司有時好垃圾,過幾年再睇條數先

B類有現金流,上市前派曬D現金比老闆,空殼上市,有D仲借盡黎派息,上市後由股東一齊還,呢類公司,呢類公司頭幾年唔派息,還清先開始派高息,因此臨還清先開始買

2.欠錢,想要錢還債

50%爛泥扶唔上壁,50%救得返,過幾年先考慮

3.想掛上市公司的頭銜

老闆愛虛名,50%係好公司,50%壞公司,公司的質量由上市果一刻已經確定,但愛高大威的領導人一般好極有限

4.做假數,想要圓左條數

好似福建股咁,有專用的保薦人律師核數師三位一體做良性審計,說公司好故事,劇情像童話一樣美好,內容物也像童話,上市集資的錢有入冇出,金流應該都流入三體人而不是老闆同公司度

最近國家要求大家要做更加良性的審計,作為弱小投資者,係迷霧入面搵路,有兩個路標無論以後點良性,點進化,都仲可以參考,一個係派息,一個係已繳稅項

5.特登做蝕本生意,之後上市抽水一次回本

殺頭生意有人做,大6特有的蝕本生意也有人做,呢類公司會將"市佔率"呢個詞一直掛在嘴邊,借成身貴利,貼錢做生意,比錢買人頭,請公關公司吹,落本賣廣告,係咁收會員,佢地的理論是"開頭蝕錢唔緊要,搶到市佔率,逼退競爭者,之後加價就賺得返",實際佢地要不是呃大筆按金之後走佬,就是用離譜的估值上市,一次過抽水把維持蝕本生意借的錢都討回來,呢類公司垃圾到唔垃圾,但會做公關,是市場焦點,甚至連藍籌也能做,風摩萬千股民,改良社會風氣,刺激金融市道,GDP係咁升,但味皇認為仲衰過賭魚蝦蟹

按照味皇對老千股的定義,只要賺錢目標不是賺消費者錢,而是賺股東錢就是老千股,呢類100%符合味皇的老千股定義

6.公司用開公數支付巨大的上市開支,之後券商回佣比老闆個人

早幾年開始,好多公司上市集資,但上市開支超過集資額的一半,即係集資來的大半錢都係比券商,上市集資上市開支是必要支出,必要支出比券商再變成券商的必要支出,例如炒藝術品現在已經落後,現在最當炒的係炒球員,值800萬的球員只要開價8000萬,就可能有6000萬回佣空間咁,反正銀行錢不是錢,銀行不能走,但老闆可以成日換,以前普度斯基話中超出高人工簽佢,去簽約時,各種經紀十幾二十人在場最後嚇L走佢

例如最近一隻新股上市,下面一堆寄生蟲,這也是刺激經濟的一環,一年執70間券商,大雞也要食細米,只要篤屎入面有未消化的豆也要爭住舐,咁代表一半機會券商準備超水平發揮,一半機會券商係會回佣

假設集資額50%係上市開支,公司最後只會收到一半的錢,咁代表收一半的錢老闆都認為制得過,即是上市價是老闆制得過的雙倍價錢

於是上市後跌一半非常合理

以前上市開支最多十幾二十%時,少有插得咁離譜

公司50%機會好,50%機會壞,但是等佢先跌一半,再跌多一半,咁先好買

7.公司消耗大量本地貨幣,由上市兌換成大量的境外貨幣

公司老闆集資之後就會去拿外國護照,公司本身會做大量投資,以立即浪費為目的的居多,投資回報隨緣,一般聲稱是長期投資回收期長點冇問題眼光要放遠D云云,呢類公司100%會借借很多錢,即使集左資也會越借越多

大概係咁,所以味皇咁抗拒新股,呢度7種,得3類中的一半比較有投資價值,折合出黎凡是新股,也就得21%是投資級,79%都是垃圾,而果21%也要等好幾年插過番尋味先再買

經驗而言,味皇沒有買新股,但買親的大半是半新股

2023年結

月中1.47出清路勁,0.64換多90000股保濟丸,味皇對賣出路勁的價錢甚是不滿,但想不到之後低處未算低,保濟丸雖然想再買多D的,但齊魯的成交量非常唔爭氣,月尾還要再插水,味皇對換出齊魯已不抱太大期望,味皇之前提到,看中兩隻醫藥股想換馬,姑且保濟丸算收夠數好了,而另一隻是東瑞,齊魯未賣得出所以未換到馬

香港己不亂,股市非常好,香港金融業正處於風生水起的時代,指數唔係越高越巴閉嘅,恆指最後一個交易日升穿17000點,全年微跌14%,味皇組合由上年年結時的613萬跌到現在599萬,補返提取的生活費21萬共620萬,全年回報1%,勉強力保不失,收息41萬多D,未能達成收息47萬的目標,要不是年初人仔負升值,收息目標都叫有多D希望

味皇今年買的股,跌多過升,而且都是大跌,大跌的部分例如:

美蘭由22.6跌到6.9

路勁由年初4蚊跌到1.4

大悅城由年初0.38跌到0.2

地勤由0.17跌到0.1

信德1.5跌到1

齊魯2.5跌到2

中信泰富9.7跌到7.8

其中信同地勤味皇今年是看好的,結果反高潮,今年買入而又升的唯一得筆克遠東

反而是之前買落的抗跌:

CTM由2.8升到3.3

國銀由1.1升到1.4

煉化由3.6升到4

而呢3隻分別係味皇第1,2,5=6大持股,主要係咁啦,年中潤利同羚邦食糊也不無小補,越秀同華南城算走得快

現時組合順序主要包括CTM,國銀,衛星,四環,齊魯,煉化,筆克,中信,建滔,大悅城,地勤,唐宮,保濟丸,拖頭,池州港,茂名港,信德,恩達,神冠

同上年相比,羚邦/潤利>筆克,華南城>信德,越秀/齊魯>衛星,晨鳴>建滔,路勁>保濟丸,味皇覺得是進步左的,至於青島港>中信泰富,現在看起來結果不算太好

今年解封左,本以為地勤會大好,結果香港的飛機要到拖下半年先好轉,預料下年先出到好業績,唐宮同大悅城應該業績反轉,信德姑且比還唔到錢的華南城好,恩達同建滔普通向好,煉化同港口平穩,筆克,拖頭同保濟丸是持續性向好,國銀是賠保險一次性的好處,衛星有好有壞偏好,中信向好?齊魯被鐵拳,CTM普通向好但可能要大出血,四環同神冠轉營短期內就會出結果,大致係咁

路勁同華南地清除後,味皇組合已經比較少沒有貢獻的死貨,成份比上年健康,係差在沒有成交,套現手段較少,組合呢幾年唔算防禦特化都差唔多了,人人以為買出名大藍籌就是防禦,誰知名牌國產避彈衣塞紙皮,還不如味皇揹兩隻生鐵鑊

升左的幾隻如果想換馬都係郁佢地,但細股味皇也不應太分散朝三暮四,點都有批大股座底,未來可能會提高例如衛星之類的佔比,降低國銀的比例

味皇由0開始,人生第一個50萬寫在2009年,第一個200萬寫在2011年,第一個500萬寫在2014年,原本預計在大前年就能寫到1000萬,結果咁多年都一直到破唔到沈大C的水平,質疑影帝,理解影帝,懷念影帝,十常八九之不如意事也

就一般而言味皇組合下年是樂觀的,但味皇組合的結算貨幣卻比人感覺算是沙上樓閣,實在不敢言過其實也,如果下年隻隻成交低到換馬都換唔郁,咁味皇的聰明才智就同西瓜一樣冇分別,下年目標唔好蝕錢就算,難保唔會又貶過,收息目標同上年一樣47萬就好了,另一方面,味氏理論的觸發條件現正生效,實在發夢都都冇想過,恆指連續跌4年了,有幾耐折墮就有幾耐...但是都要睇你仲有幾長命,會唔會生長生長下就被割,以前唔會想像有刀子進來,但時代進步了,勇者也要有斬擊抗性

雖然味氏理論生效長遠是好事,但味皇倒是希望估值快D升返,因為股票CP值太高,味皇就不太想要去享受生活,習慣性乜都放在天平上,味皇鼻毛變白了,就快不是阿叔而是老叔,不能長生不老又不繁殖,數字除了當模擬game意義不大,現時的數字說少唔少,多又唔算多,如果很少就貪財有理,如果很多就可以放飛自我,現在的金額比較尷尬,而且尷尬左好幾年,尷尬到人都老了,人的青春有幾多年呢?十年?廿年?感覺最近幾年都白過了,揭日歷的速度就好似F1開全速係阿婆旁邊飛過咁,寫50萬時味皇仲係2字頭,轉眼現家4字頭了,嗚呼

穿萬6

好似D皮套人咁,本來冇打算出面的,直播時隨口一句話點點點,就女裝,一旦講左出口收唔返,最後真係要露面女裝,結果打開了新的大門,咁樣

寫上一篇時提到係時候決定路勁去留時,本來完全冇諗住賣擺爛的,但寫了出來後就下決心真係賣,寫blog係決策的成果上可能冇乜作用,但對行動力還是有影響的,結果第二日成交量有限下,1.57沽左23000股路勁,還剩39000股,之後幾日插水同起身晏未清得到,齊魯也在2.17出左5000股,再多都賣唔出,之後0.63換多76000股保X丸,成交冧價出黎睇下,跌下落下,哈嚏,幾乎嚇親媽媽,股市非常好,由治入興啦

湊下字數,本來應該在年結講的內容搬D上黎,前年年尾開始,味皇就開始嘗試將入收來源是大陸的股票轉向入收來源是本地的股票,上年中更開始轉向外國入收來源的公司,年初人仔貶值的鐵拳由扣100血變扣95血,人被打,就會痛,不過努力也是有限度的,味皇就好似加沙的平民咁,被哈馬斯行為綁架,要說味皇無辜啦,也不全是,話味皇抵死啦,正在受死,可憐之人必有甚麼甚麼,味皇認為外人食花生就好,味皇本人自力求全盡量平常心不假他人

現家組合入面,煉化,筆克,保X丸,國銀,衛星,拖頭,恩達,中信,建滔的收入至少有部分來自外國,佔組合1/3,CTM同地勤呢D就本地,又佔1/3,即是匯率變化扣血少左,但扣血機率大左,由於收息股會回升,味皇現在是上了自動回復,傷害減少,回避下降,兩種buff同一種nerf

港股應該叫比人整到衣冠不整定係自己反轉黎著,先不定論,至少港股是被嫌棄的,周圍外國勢力股市都升得港股跌,但叫港股入面的卻大多不是香港股,當中也有外國勢力股票,外國勢力股市入面也不見得全是外國股票,即是說外國公司係外國股市是受歡迎的,狗屎係外國股市是受歡迎的,香港公司係外國股市是受歡迎的,外國公司與狗屎係香港股市是被嫌棄的,現家好多人轉買外國股市,但如果根據價值投資的理論,就應該撿香港股市入的外國公司同狗屎,然後身上一堆狗屎味

同美國有關連的公司就避免,以防政治上的風險,但例如港股入面,記憶中有一D類似柏青哥,運動用品之類的公司,留係鄉下可以一齊升到3萬點,離鄉別井反而要下跌,如果有人買人地鄉下股市,為何不買離鄉別井的呢,之類的,雖然會冇交,只可以說人離鄉賤,雖然留下也不被當是人

(之前哥爾夫的台灣的友商火燭,味皇算幾睇好哥爾夫)

外國勢力的股票審計是很可疑啦,要聽其言觀其行,當然其他國家的審計更加可疑,以外星人的角度黎睇,也可以假定地球人都信不過嘅

傳說深中通道己經建成,味皇記得大灣區好多重要交通都設定會係2024年結算,東莞地鐵呀,深中通道呀,南沙中山線呀,廣州火車站呀,澳珠輕軌呀,珠海機場線呀,江門鐵路呀,橫琴圍封呀,之類的,下年地方政府財政壓力仲係大,仲要結算,宣傳同炒作是一定的,但可能要2025年之後先有D錢,另外仲有個西水東調,之後香港飲的不是東江水面是西江水了,記憶中西江的抽水站都是北控的,唔清楚會唔會影響粵海

近幾個月味皇發現澳門的水質好了非常非常多,唔臭了,有時甚至可以用清澈黎形容,這代表上游河道兩岸的...

倒退嚕

全年最低位,有人說行三步退兩步好正常,咁按比例700萬人的的話,是否可以解釋做420萬人前進280萬人後退的樣子?又或者42萬人前進10步658萬人後退1步咁?

早兩個星期稍為陽春左一陣,手頭部分股升得比較多,例如國銀咁,中銀的出通告話沒收的玩具有得賠的話,國銀唔出通告大致都估都有得賠,不過因此淨值增加並不會帶來多少現金流,味皇不認為佢會派特別息,但會派返正常少少,之前升到1.55時,味皇猶豫要不要換成1713,最終只是停留在魷魚上,立即就跌回去,另一方面2386因為持續有回購價升,味皇也考慮要不要換成1713,姑且先按兵不動,當然,味皇手上有的股估計是冇得救的,連生蛋雞都賣埋只能擺爛了,就是講你噠路勁,上個月尾恆指創新低,味皇組合已經收曬今年的所有派息,只比上年多一點點,計一計條數,出奇地+6%,現家低處未算低,回歸解放前?解放回歸前?回歸回歸前?應該已變返負數,事實勝於雄辯之類的,保駕護航之類的,年結時味皇沒有信心正數

我感到憂慮的,不是XX的XXX會被XX剝奪,而是這它會逐點地斷送在XX某些人手裏

味皇擔心港幣也不是新鮮事,趁港幣匯價高去永亨問一問美元定期利率,一年期2.7%,須知道一年前美元未再加息前味皇存的半年期已有4.3%,即是說阿爺於大6實施的美元利率只能比2點幾%的命令也在澳門實行了?反正對上面來說壓美元匯率的成本會有其他人主動找數不是問題,結果味皇櫃桶躺了6位數的現金,仲未去存,同樣是港幣的話現金還是要和証劵作比較

接近10年前味皇買日本樓,當時的評價是作為投資項目只算可圈可點,主要功能是能作為人生的保險,日本樓呢個投資項目到現在好多人損手爛腳,但人生保險的功能係呢兩個月開始發揮出黎,對當時人來說是不幸中的小幸?其實有邊個想真係用到保險?實為大不幸也

但好似味皇咁日本樓買不多,現家仲賣曬添,金額小不夠食的話保險功能有限,同樣理由美元定期比你存3幾萬美元都好,係潮流的車輪下不過也是壓肉醬,掙扎沒有達成足夠的義意的話不如慳返D力,冇咁大動作見步行步,至少現在不是突個龜頭仔出黎的時候,真係要死時反正沒有不能切的水魚

成個11月味皇都冇交易,價格冇大變動的話之後可能都沒有交易,但年尾味皇想1而不是0作結,對於組合成份有個比較重要的決定,曾經的第二大持股,現家跌到第四大的齊魯,味皇正在換走,主要是咁的,同樣中字輩,煉化有很多淨現金而且正在按上面指令回購救市所以逆市托到價,而齊魯沒有現金按上面指令借錢起不必要的建設托GDP,唔會益到味皇,咁相對而言同樣駛錢點解要留為官洗錢而不是留為我洗錢的股票呢,對於在救市模式的淨現金公司,只要不是像中移咁食鑊撈的話,應該是值得留的,好似己証明會回購之外,上面的指令還包括派息政策,因此之前煉化比現在高也未賣,魷魚是有的

咁嘅市也沒有成交量比味皇動手,齊魯換馬目標有二,都是藥股,不是跌20%的藍籌,味皇只撿煙頭,暫時2.2左右出左13000股齊魯,先換入46000股保X丸(母),成交太少要全清可能持續成個月

路勁應該算是"大陸地產股"之中最穩的其中之一,跌到咁到已經不佔味皇組合的重大持股,變零頭了,應該不會派特別息,就算派升幾倍零頭還是零頭,到年尾味皇可能要決定要不要斷舍離

味皇 X PJ諾夫

???: 聽說閣下就是橋底講古排難解憂的味國師係唔係?

味: 呀...呀,你是..大人難道是...

???: 嘛,冷靜,先讓我自我介紹,我是PJ諾夫,只是個隨處可見的閃光魔術師罷了,剛好兼任了北境之地的村長,同現實的某大總統完全無關,不要因為現實又再為作者添麻煩了(原作漫畫三年前開始創作,期間受三次元影響而被逼改人設)

味: 呀..是的,偉大的閃光魔術師大人閣下,敢問大人為何而來?

PJ: 不用這麼僵硬,聽說閣下才智不下國師陳雲,所以我來是求教閣下的智慧的,像是對天下事的感想之類

味: 地球很危險,快點回去異世界吧

PJ: 唔,的確最近地球是很危險,能具體描述一下嗎?

味: 人類很危險,莫挨老子 

PJ: 請具體描述一下(接近)

味: 人類專做ON9事,自討苦吃,又變黎變去,燈自己就好啦,燈L埋我,就像嘛...最近有兩幫人打交,我本人是不想理的,但卻會全自動站隊,因為坐在船上,船去邊唔到我話事,而且走位非常ON9

PJ: 有點難理解,能舉例一下嗎

味: 例如有兩幫人,姑且可以言語交流,分別企係你面前,同你交好,笑口淫淫只看起來像是你朋友,某日係呢兩幫人面前出現一個看來很強的外星人say hi,兩幫人都嘗試同外星人交流,看起來很融洽,後來兩幫人面前出現一個看來很弱的外星人say hi,一幫人嘗試同外星人交流,一路傾一路打量做朋友定打劫佢著數,另一幫人見外星人,見面5秒直接搶劫,強奸外星人,大致一幫人無論點會有概率不襲擊外星人,另一幫人只要一有餘力就會血洗外星人,而呢個外星人不排除來自藍星

味: 有人說敵人的朋友就是敵人,於是逢敵之友必反,逢敵之敵就必撐,政治上同戰略上是正確的,但在這正確之下,幫助會有能力就一定會襲擊包括自己在內的人而不是有概率成為朋友的人,正確的政治正確的戰略卻不一定是正確的智慧,味皇雖然不是同性戀不會被火燒,但看起來像異教徒還是會被血祭的,結果還要用我的稅去埋單

PJ: 唔,即是說我們都是ON9仔?

味: 正確的是,人類老了就會變ON9仔,像閃光魔術師閣下咁英明神武,難保你老了也會失智,變ON9仔,當年歷代聖明聖上,只要不會退位,只要冇長生不老藥,聖上就會一直變老,遲早老左變傻仔,如果聖上本身就已經不太...,最後變超級大傻仔,苦了的還是船上的人

PJ: 即是說解決之道是退位機制嗎...

味: 才不是,是長生不老藥,以後AI解剖,AI試藥,AI園區之類會大行其道,投資就投資呢D,退位?想也不用想

味: 其實如果怕變傻仔,把事情交比仲未傻的做,不要乜都親自部署,未來傻仔不是萬能的,其他人做衰左起碼有得賴,冇咁樣衰

PJ: 的確,我再愛騎乘都好,一邊騎熊一邊淫笑時,熊騎得不會最好,笑得也不會最淫,果然分開處理會更洽當,但是投資長生不老藥的話果然還是要資金,一般要點籌集資金好呢

味: 不是交易來就是搶吧,長著像奴隸商人一樣的臉行動不是像個反派一樣

PJ: 這是誤解,我是愛好和平的平和主義者,一向以(理)服人,只是不排除肉體交流而已,那麼反過來問,反派會點搶最好,我這邊實在是人手不足,不要誤會,我身為村長,是提防反派搶才要知已知彼,不是搶人

味: 我的立場實在不好評論...咁啦,倭國,從前倭國北方住有數萬土人,自給自足,自我增殖,不交流,也不交稅,數據統計上應該計入倭國人口,但經濟觀點上對壯哉大倭國沒有任何經濟價值,生物觀點上同熊同魚一樣視為行動的蛋白質,對壯哉大倭國來說有還不如冇,倒不如說殺熊打魚吞食經濟動物有損大倭國經濟利益,土人不存在於社會,不存在於經濟圈,只存在於大自然的食物鏈上,如此的土人,大倭國狩獵土人回來,讓土人奴動,讓土人當肥料,一方面增加GDP,一方面消除破壞環境的土人,一石二鳥,雖然人口數量看起來大量減少,實際對大倭國不痛不癢

PJ: 味國師的說非是不是不太人道呢,難道不應該考慮一下人權

味: 難道我要說那個嗎?倭是官方認證敵人,只要打擊敵人,就是政治正確,無論做任何事講任何野都可以被原諒,講那個就不正確,要死人的,雖然那個係咁死人

PJ: 那個土人應該問題不大,擴張村莊反正就是利用土人就是,只要有足夠的魔力,村入面的魔法師可以用土魔法招來足夠的土偶,土偶notLM,倒是土偶用的工具要點張羅好?

味: 那個沒辦法,是消耗品,不像土人會自動增殖,你個樣嚇死人唔會有人賣野比你,你搵代理偷偷地買啦,最多以物易物,村入面有甚麼能交換的,就那來交換,但只準用產業頭尾交換,即是原料同最終成品

PJ: 村入面成地都係魔礦,但只用魔礦交換的話量會很大,恐怕沒有足夠人手生產,獨有的魔道具也能造,但缺一些零件

味: 同代理商量一下?現時你的立場是你不怕沒有代理,但代理怕沒有你,你用自殺威脅的話,代理就會派人手代你挖礦,反正代理一定不會讓賣家的你死,而代理的人手也會自己增殖,魔道具的零件代理做的話,代理不能沒有你的原料,魔道具的零件賣比你的話,代理同你互相不需要,如果反面的情況,無論如何不能沒有原料的代理地位是最低,所以賣時先收大舊上期,貨陰D陰D拖長比,代理不敢反面的,會盡量滿足你的需求

PJ: 我會認真考慮的,我的村莊老人婦孺居多,之後就是獸人戰士,生產力似乎不太理想,周邊各種社會亂源,可以計算下周邊生產力嗎

味: 我記得異種族有唔同人族的工作交化,咁設定一下各種條件啦,男女基礎工作能力一樣,工作基礎時數8小時,基礎休息8小時,基礎工作年齡18-58,基礎壽命65,人口100人計算,男女各半,年齡分布另外設定,消耗糧食100

i情況--女性不事生產,繁殖概率+,高血統工作時數-4,低血統工作時間+4,衛生非常差壽命-5,教育差工作年齡下限-5,童工工作時間-4

男性50人,隨意設定12人不足12歲,3人老過58歲,13-58歲的剩35人,總工時可能252左右,消耗糧食100,剩152

m情況--女性不事生產,繁殖概率+,每日拜神工作時間-2,交配體力+,衛生差壽命-3,教育差工作年齡下限-2,童工工作時間-4

男性50人,隨意設定16人不足16歲,5人老過58歲,16-58歲的剩29人,總工時可能162左右,,消耗糧食100,剩62,人均0.62

j情況--基本唔生,女性50%不事生產,衛生極好壽命+12,冇儲蓄工作年齡上限+7,高等教育年齡下限+2,工作效率+25%,可以兼職,兼職工時-5,老人工時-4,一般人工時+3,應酬休息時間-2,工作效率-10%

男性50人女性25人,隨意設定16人不足20歲,24人老過65歲,20-65歲的剩35人,總工時可能417左右,精神狀況異常,,消耗糧食100,剩317

c情況--開始唔生,女性也生產,衛生還好壽命+3,強行下岡退休年齡-5,退休返岡工時-2,一般人工時+2,好似高等教育年齡下限+1,工作效率+10%

共100人,隨意設定24人不足19歲,20人老過58歲,19-53-58歲的剩54人,總工時可能572左右,消耗糧食100,剩472,人均4.72

e情況--開始唔生,女性也生產,衛生還好壽命+3,高等教育年齡下限+2,工作效率+25%,is移民佔比10%係咁繁殖,一定後生,依m本國設定

e人90+m男5,隨意設定24人不足20歲,18人老過58歲,20-58歲的剩53人,總工時可能537左右,消耗糧食100,剩437,一段時間移民佔20%的話可能只剩367

以i的情況為例,性欲再加強一些,老人佔比就會減少,男性50人,隨意設定13人不足12歲,1人老過58歲,13-58歲的剩36人,總工時可能256左右,消耗糧食100,剩156,增加4,強化性欲對i沒有多大得益

以j的情況為例,性欲再加強一些,頭58年老人佔比就會減少,男性50人女性25人,隨意設定22人不足20歲,21人老過65歲,20-65歲的剩32人,總工時可能384左右,消耗糧食100,剩284,下降33,因此鼓勵繁殖是解決不了問題的,問題反而會惡化,至少在初期係咁,需要引入即時勞動力,例如i引入咁

以i的情況為例,衛生再差一些,壽命就會減少,男性50人,隨意設定15人不足12歲,0人老過58歲,13-58歲的剩35人,總工時可能248左右,消耗糧食100,剩148,垃圾強化對i沒有多大損失

以j的情況為例,,衛生變差一些,壽命就會減少,男性50人女性25人,隨意設定19人不足20歲,17人老過65歲,20-65歲的剩39人,總工時可能478左右,消耗糧食100,剩378,增加61,細菌簡直係救世主

味:例如e同m是鄰國關係的話,時間一耐e會有很多資源,m會唔夠食,由於物理距離近m人會空肚直接見到e人食飯,產生強烈比較,產生強烈妒嫉,最後爆發,賣肝星人的產量是拜神中毒者的7.6倍

味:要加強產量的話不是加強性欲,而是拉壯丁,要加強生產效率的話不是改善白魔法,而是散布魔咒,居然

味: 就咁計算一下,閃光魔術師閣下的周圍,一堆低生產的要不是家中有礦根本不用理會,周圍產能高看起來都在下降趨勢,只要引入的移民都是食軟飯佔多的話,最終會自己來亂,某D代理人即使變差,但絕對值大只要拖長時候,始終都會拉開距離,第一,只要有代理的把柄,的確有能力以抗天下,最終還是物量取勝,工作時數差距只會拉大唔會減少,第二,避免同產生is比較,至少不是最優先比較,例如可以養住is最優先的敵人,令自己至少在第二順位或之後,也能互相削弱,沒有離間計解決不了的,沒有錢離間不了的

PJ: 有沒有方法再拉開一些差距呢,成本低成效高的

味: 我記得以前和有個叫後藤的傢伙談論過,有匿名人士長期捐錢比叫海之家的極左環保團體,行動頻密保險賠大武力又要高強,要維護統治只好要用盔甲,機動警察天天要出發

PJ: 有咁嘅事,有點意思

味: 聽說還捐錢比女權之類字母系列團體

PJ: 那人也可能只是關心人權的熱心喜人而已

味: 聽說那匿名人士是籮莉控

PJ: 我絕對不是籮莉控!只是喜歡小孩子的女權支持者...咳咳

味: 這是古典的離間計,成本不高,而且非常有效

PJ: 除此之外還有甚麼,值得提防的

味: 情報管理掛,怕人乘虛而入就要扮大隻,好似動物毛管棟或者吹氣之類增加體積咁,看起來外強,加強宣傳,而且絕不能讓國王的驢耳朵事件發生

PJ: 光明正大的做可能不好看,有沒有連消帶打的方法說來聽聽

味: 有D八卦佬挖氹挖忽乜都寫,可以咁,一般來說對同一樣野,A消息講火燭呀要向左走,B消息完全相反講要向右走,咁一般人好易會認為向左或向右是但一個係真,而不是火燭係唔係真,利用呢一點,可以搵兩個人A同B同時放出兩個完全相反的假消息

PJ: 原來如些,你的意思是如,果八卦佬引述是但一個的消息,就用放假消息的罪入佢,如果冇引述也不要緊,只要八卦佬一旦講呢個題材,因為A同B是兩個相反,最終八卦佬會講出不是類似A就是類似B的消息,例如似A咁,咁只要公開認證A是假消息媒體,就可以把放類似消息的八卦佬都連帶一併打做假消息,即使唔入罪都可以降低信用

味: 無論點都有位入的必勝戰法,為之曰,認知作戰,撿得八卦佬幾劑就唔會有其他聲音了

PJ: 捉大魚還是有小魚,點樣完全封殺國王驢耳朵的小魚聲音

味: 聲音傳遞有3個條件,發音源,傳遞介質,接收方,是但斷其中一個就可以,要不就斷曬佢

PJ: 點斷最好?

味: 猴猴做歹事,就拿牛刀在猴猴面前殺雞就好,聲音由空氣傳遞,沒有介質就傳不了聲,讓猴猴知道可能吸不到明日的空氣就好,到時只要彰顯閣下非人的強大就可以,武有武道,劍有劍道,非人有非人道,站在道上的頂端老大皆專為大,要夠大,大上再加大,就是大大,據說閃光魔術師大大騎過巨龍

PJ: 噢,那是很美妙的體驗

味: 據說閃光魔術師閣下騎過魔熊

PJ: 和棕熊是不同的,和棕熊

味: 據說閃光魔術師閣下騎過人馬

PJ: 嘛,要說騎過...也算是騎過?

味: 據說閃光魔術師閣下騎過豬鬼

PJ: 怎麼覺得越來越縮的

味:  據說閃光魔術師閣下騎過80歲阿婆

PJ: 沒有這樣的事,又是後藤嗎?後藤...

味: 流言已經充分顯示出閃光魔術師大大非人的強大,加上北境之地情報不多,只要一直維持神秘,就可以保持強大的黔驢形象,疑兵之計也

PJ: 國師講的好似幾有道理,但是不可行,政治上不可行,統治者的面子一向是大於合理性的

味: 就係因為提出的計謀都看似合理可行,但就政治上不能行,先至叫國師,本味同陳雲除左頭髮之外,性質是差不多的

PJ: 村內有人要起我的石像的聲音,我死前如果不能實際做到留名的大事,是配不起建石像的,人類到某D時候會想要虛名,下面的人每日都石像,紀念碑的,說起來我好似發夢被自己的石像扑到去異世界的

味: 還在生的人建同自己石像,和已死的人被人建石像還是有一點點不同的,高築牆,廣積糧,緩稱王也

某二世祖

上個月頭0.1買多30萬股拖頭,2.38沽出50000股齊魯,2.24換入52000股衛星,當時中東還未打仗,味皇有追開俄烏同台灣選舉的新聞,後來劇情越來越多開始追唔切,資訊爆炸頭腦爆炸的情況持續左一排,最近新聞開始少返

說到底都係華為的鑊,部衛星電話一出,各地就開始活躍起來,每個部隊一部,以前不可能的事現在都變可能,以前味皇部P30比人笑稱可以用黎代替狙擊鏡,今次的直接軍品,也算適才所用,但華為用的衛星係亞太6D,中東應該在照射範圍之外能用嗎?用邊個的衛星?

現家港幣的情況令味皇擔憂,應該有10年前,以前好似仲係奧巴馬年代味皇就寫過,話澳門或香港趁仲有自主權時拿一千幾百億去北澳或者帝汶買一千幾百平方公里的地海外建澳海外建港,就可以解決產業單一同2047問題,10年後的現在當然行不通,但味皇認為創意是可以解決很多難解的問題

今次的問題是香港入不敷支而且可能是永久的,港人都北上消費,例如味皇近期也經常北上消費,兩地價差大到味皇可以另外寫左篇文出黎,呢度一個飯比上面一個凍飲套餐貴30%,味皇也許勉強尚能接受,但一個飯比一個凍飲套餐貴50%以上就不能接受,感覺完全比人當曼聯耍交智商稅的樣子,味皇會這樣想自然也會有其他千萬個味王一樣咁諗,以前互聯網唔發達消費者唔多覺,現家人人會上網,知道日元貶值商品反而加價,知道人民幣貶值商品反而加價,簡直欺人太甚,上年尾26蚊一個豬扒包凍奶茶,年中加3次價到33蚊,同樣的豬扒包凍奶茶兩地價差可達7成以上,而味皇層唐樓有加租嗎?比上一個租約跌3成,記得湯財多年前買的工廈,價錢同味皇層唐樓差不多,租金好似也差不多,現在湯財層工廈的租金是味皇層唐樓的一倍有多,加價都有分加得有道理同加得冇道理,貴從來唔係問題,有得比較先至係問題所在,澳門行幾步就出到太陸,香港都仲有d交通同時間成本,如果現在情況持續,全香港最有潛力的地皮一定是沙頭角

回到問題上,主要是香港太貴顯得上面太平,港人北上消費,香港太貴顯得外國太平,外國人係外國消費,例如香港世界頂級的機場稅,就不會吸引廉價航線咁樣,據說香港的財政支出22%係出糧比公務員而且有加無減咁,收入少,支出多,而且情況看起來不會扭轉,聯匯也是遲早的問題,支出比收入多,明天的飯也食不起,就沒有明天,想辨法令支出比收入少才有未來可談,到現在這種情況,創意的解決辦法係破產重組,香港全世界最有錢要破產重組?那個雄心壯志的二世祖是不是有錢人?是,那個雄心壯志的二世祖要不要破產重組?正在破產重組,一樣道理,你不解決問題,問題就會解決你,香港同外地物價差距太大,港幣流出,想要拉近物價又只是有加冇減,味皇提出一個辨法是,聯匯遲早要崩的話就不如立即崩,突襲式把聯匯調到例如1兌8.4咁樣,物價同外地拉近了,可以增加吸引外資的競爭力至少能扭轉港幣外流,之後市場自己調節,就是不濕公務員加薪,實現變相減薪,咁出糧支出就會拉返到20%以內,可能實現到收支平衡,匯率崩一次後在新匯率下維持聯匯,應該會比現在好,而且沒有越權在現時框架下可以實現而且尚未被阿爺注意,降匯率對包括味皇同特首在內的資本階級是重大打擊,但地方官做事應該優先地方整體福祉而唔係個人,個人點自衛是另一件事,現在香港貴上面平,上面狂吸港幣是犧牲港幣保人民幣,對上面有利對香港不利,上面是不會歡迎港幣貶值的,簡單講就是笑住睇香港去死,香港要救港實際是違反上面的利益,錢夠時大家都能快活,錢不夠時你死好過我死,一旦被上面舔記就要乖乖上交了,金管局不搞突襲早晚比上面注意到最後連自主權都被收回,收支平衡到也許仲有明日可言,不能實現財務自由就只會一路枯乾下去

講下老千股歷史

味皇認為,傳統的老千股在鐵拳下已成齏粉,走進歷史,現家班老千吱都唔敢吱大聲,味皇可以冇以前咁懼怕他們,因此稍為講一講

係香港,老千股按來源分兩種,味皇命名為馬會系老千股同澳門系老千股,所有老千股的原點都是澳門賭場,馬會系來源於馬會馬主,澳門系來源於賭廳廳主,只是馬主廳主時不時都是同一人咁解

係帝國,馬會係上流社會的核心,入面有官員,議員,皇室,有錢佬,功能組別,同時馬會俱樂部的保密環境非常好,比地球任何地方都更適合密談,以前帝國有支叫紅色的球會,主教練是馬主,佢每星期都可以同足總主席,前主席,下任主席係馬會俱樂部飲紅酒,而足總主席雖然冇直接要求球証點判的權力,但有指派誰做球証的權力,能夠決定球証以後有冇飯開,因此邊個球証得罪紅色主教練就會比佢上訪而冇飯開,就算唔直接拍馬屁,至少都唔敢得罪佢

同樣地,師承帝國的本地賽馬會也是密談聖地篤背脊聖地,入面D人不敢互相得罪,外面的人得罪入面D人邊度都唔駛去

馬主有分上流人同黑人,而廳主就100%撈黑

無論黑定白,馬主具有很高的社會地位同權力,廳主無論係唔係馬主,都有很高的社會地位同拳力

馬主能夠係邊度發力呢?

馬主可以影響銀行決策,或者銀行就是佢本人

馬主可以影響政界決策,或者議員官員就是佢本人

馬主可以影響劵商同借貸,或者佢本人就做緊

馬主可以影響傳媒,或者傳媒就是佢本人

馬主可以影響蛇齋餅糉,或者拳王廟王同鄉王就是佢本人

馬主對於老千股能夠係邊度發力呢?

馬主可以影響指派會計師,或者會計師公會就是佢本人

馬主可以影響指派大律師,或者大律師公會就是佢本人

馬主可以影響上市評定,或者上市委員會就是佢本人

馬主可以指派保薦人,或者保薦人就是佢本人

老千股要達成上市,有3個條件,1是貨源,2是人頭,3是審批

貨源有兩個來源,1是目標被迫上市,2是目標主動上市,被迫上市的是賭場賭輸錢比廳主扣押的公司,廳主做曬一條龍自己係市場回收資金,由於來源於廳主所以係澳門系,呢種老闆輸到甩褲的公司的資產假的居多,目標是一次回本,主動上市的,如果接觸的是馬會white side果邊的,就會是馬會系,佢地傾向長食密食,會用專業知識慢慢陰乾股東,如果接觸的是馬會dark side果邊(即係廳主)或是直接觸廳主的,也是澳門系,主動出擊的由於唔駛先還賭債,呢種條數就冇咁假最多吹大,仲可能轉正添,不過當中也有鄉下就欠一屁股債搵鄉親上市求救的

例如福建股就是賭輸錢的澳門系例子,果D上市幾十年唔上唔落唔派息得閒抽下水的就是馬會系

馬主廳主有財仔,有券商,識專業人士,有老闆個人,能有的資料都齊,沒有的資料也能準備

味皇發現,上市委員會起碼有個委員是專門做福建股的,非常專門,因此審批問題相信不大

老千股証市個程需要人頭,人頭有幾個要點,最重要的是人身自由受到控制,而達成全部條件沒收証件的包括:

1.爪牙

2.疊馬仔

3.藝人

達成部份條件的包括:

4.債仔

5.同鄉會

6.券商客戶

自己開財仔開券商其實非常重要,一黎肥水不落別人田,二黎放係度的股就係押係度的股,可以自由手交,或者同朋友廳主手交,自己的散客可以睇住黎劏

由於接觸邊D人,就會來來去去都用邊D人的一條龍服務,因此只要每一見到邊D人,就能夠知道老千股的來源是邊種,會點死法,味皇的會計師律師保薦人反向溯源分析法就是這個原理

現家除左班表面white side的專業人士,大半都冚曬已成歷史,味皇也可以當故事講

267的補充說明

算係另外開一篇讀者回覆啦,267有D特別性,值得稍為講一下

267手上有銀行,味皇自己並不太熱衷銀行,特別是中國人開的銀行,但味皇卻買了267

是咁的,假設味皇自己開銀行,錢一定係要借出去,下面好幾種情況:

1.味皇把存戶的錢大量借比朋友做生意

2.味皇把存戶的錢部分借比朋友做生意

3.味皇把存戶的錢大量借比自己做生意

係銀行角度黎睇,借比邊個都風險都是一樣的,1=2=3,但係味皇角度黎睇,自己袋一定比外人袋風險低,1<2<3

好似郵儲銀行,佢錢借出去,借款的一定都是外人,要兇人,人地也會兇返你,好似中信同華潤銀行,佢錢借出去,借款的一定概率是自己,左手同右手畫面幾咁和諧,中信同華潤手下應該有彊屍企業,銀行借比外面的彊屍企業有可能會爆,自己借比自己,只要自己不說就唔會爆,外面的民企好多是逼爆的,而自己就唔會逼害自己

假設中信借比自己同外人的錢是一半一半,咁中信的風險就是全借比外人的一半,中信銀行單體的風險可能同郵儲銀行一樣,但中信泰富整體黎來說小金庫有點都比冇好,係市場上有呢個特點的母公司得中信同華潤,華潤貴而中信平,華潤置地炒得大中信泰富炒得細

另一方面,中信做乜生意,外人做乜生意,中信做物流,做交通,做通訊,做礦,做能源,外人做地產,成份上回收的難度肯定比外人低,比起放貴利做信用卡呢D賺少左錢,但風險相對低,在母公司整體黎講,自己籌到錢可以自己人形蜈蚣,銀行賺少左其他子公司賺多左,咪一鳩樣

如果出面行情唔好外人越做越縮,而自己的生意還可以,咁自己借比自己的比例就增加,風險反而變細

極端黎講,銀行犧牲自己,賺越少錢,自己的生意反而越大,而且銀行自稱唔賺錢也能減少被收割的概率

現家其他國家最大的問題貸款來源地產同地方基建,貸款如果是借比礦場之類的話,現在的市道一般都會收得返,能源同埋礦石,在軍用品搶民用資源的情況下,就算唔賺都冇有蝕

銀行成行都有問題,但如果睇成是公司的小金庫,觀感就會好D,冇人靠小金庫賺錢的,但賺錢的都想有小金庫

雜談

呢段時間1.05入左8000股恩達,亞太衛星除左淨插水,於是2.3不是很好的價出左50000股齊魯,暫時2.21換入50000股衛星,由於衛星除左淨5仙,因此2.25以下換入就是今次的目標

還算比較近期的是,亞太衛星整左間算子公司還是算聯營公司?叫深圳亞太星通,估值可能比母公司成間仲高,慨念股空氣股一隻,做乜野嘅呢?做星鏈一樣嘅野,衛星上網,6D衛星射後先實用化,例如現家飛翼船己經用緊,政策獨市,6E衛星2噸咁巨大,充滿各種秘密

台灣好似有間公司火燭,消防都死人,老闆洗定8月15都得,據說間公司係生產哥爾夫球,市佔率2成,等收皮,剛好港股中也有隻日股哥爾夫球對手

另外想記錄一下大師\|/

魯大師9月11話派特別息,股價1.12升到1.94

魯大師9月20大股東狂賣3400萬股,佔股權12.77%

魯大師9月21話派特別息是假的,你眼睛業障重,股價跌到0.94

會唔會之後又話派返呢,跳出跳入深得牙侵真傳,假設賣的股大半係借錢比指定獨立劵商接貨,咁股權仲係手中,之後劵商借錢比公司買返來,咁應該係合法嘅,假設單純割韭菜,全部都係巧合,咁應該係合法嘅,監管好似假想去管一D高級手段,咁單純明快可能冇諗過

如果之後又話派返,也不意外,再之後話再延期,也不意外,再之後話真係派,也不意外

味皇平時食開果間,上年10月時淨焗豬34,係澳門其實算平,到1月加到37,到6月再加到38,係澳門其實算平,但加幅好高,人民幣升值加價,人民烯貶值也加價咁上下,明明味皇自己也未能加租,而同一時間,珠海的咖哩雞扒薯條雙腸飯+凍飲套餐23.8,到年頭時扣起雙腸變咖哩雞扒凍飲套餐,換季時加到25.9然後味皇改食另一間22.4的咖哩雞扒凍飲加例湯套餐,由於大6通叔+幣貶值,所以反而有平,而結果是,34葡幣的焗豬同23.8人仔的咖哩雞凍飲套餐(27.8葡幣)兩成差距還可接受,現家38葡幣的焗豬同22.4人仔的咖哩雞凍飲套餐(24.6葡幣)五成差距難以接受,就算食返25.9的一樣大差距,38蚊焗豬係澳門仲算係平添,味皇食開的另一間咖哩肉片飯都由36加到41,上次去食肉片冇幾多塊大半都是青椒同洋蔥,洋蔥居然仲要係生的,深圳食店咁旺冇得怪人

食物呢,好唔好食來自3個因素:食物品質,調理效果,食者心情,品質呢,可能唔一9樣,可能咪一9樣,唔評價,煮成點呢,暫定咪一9樣先啦,但心情方面,良好的心情會提高味道評價,有抖m性質的人可能越貴越覺開心而越滋味,味皇只是一般人,同樣是飯不勞而獲的飯一定更好味,如果超值會好心情味道有+x,如果唔值做水魚會覺得似曼聯不香,即是在第三點上,係最近1年開始,本地飯有debuff,大6飯有buff,本地競爭力下降

一個相當現實的問題,普遍大家收入是下降的但係呢度通漲,D野變貴,全國形勢一片大好大陸一定冇通縮,其他國家有通叔啫,面對通叔D野至少唔加,作為退休多年的人士,生活係點呢?

味皇會比較經常上去食22.4的飯,去一次感覺會賺十幾廿蚊,22.4咖哩雞扒凍飲加例湯係咁樣子,坐成個鐘上網,味皇很懷疑佢咁樣賺唔賺到錢(9月中加到28,味皇食返25.9)

至於25.9的套餐是咁樣子

味皇由於是退休人士,因此時間是相當自由的,因此可以任意時間上去,例如晚飯時間,而晚飯時間好多時有臨收工減價,本身通叔再加上臨收工,價錢就會變得極之抽像

6毫1條矮瓜,兩個半1個巨大桃,8毫1個茄,7毫1條蘿蔔,3蚊1磅薯仔,2.6絲瓜買老左,1.8一堆茜,加埋約廿蚊,去一次感覺賺左幾十蚊,加返食飯隨時有成百蚊buff,飯自然變得好食,還有飯後運動

而味皇去一次要幾耐呢,味皇行10000步是8公里,由屋企到出左關是2000步,之後會踩月票單車,當食完返黎全程行8000步好了,也不算遠,係澳門路程上能夠達成此條件的人相信有不會少於30萬,因此只是時間自由同剩餘體力的問題,總括而言,係澳門要餓死唔係咁易,雖然沒有挂逼麵,但有挂逼紅蘿蔔,挂逼白蘿蔔,雖然沒有挂逼水,但可以走挂逼水貨

香港物理距離同交通費,要咁樣不容易,能夠達成條件的,恐怕只有沙頭角,味皇建議年青中青躺平者都去租沙頭角,享受低物價同免VPN上網,仲可以走水

好了,現家睇落退休躺平好好,但當中有個條件,8000步,味皇40歲魔導士,之後就50歲大魔導士,60歲賢者,70歲大賢者,然後在當中某一時點,味皇可能就行不了那8000步,到時就要請人代行了,到達呢個時點,低支出生活就會變成高支出生活,躺平生活破綻,基本上這時點只是遲或早的問題,所以退休還是要未雨綢縿

另外還有一個經驗之談,20歲的味皇腦內活動還是非常活躍,可以隨時發白日夢腦補各種劇情,大概可以咁形容,如果把味皇放在荒島,也可以靠腦補過上精神富足的日子,單身不成問題,諗住可以一直咁OK,但到40歲的味皇,腦內活動性能下降,一落床好多時就直接訓,好難發到夢,劇情推進極慢,比較容易無聊,缺乏刺激,而且朋友也難約見面,再多10年味皇恐怕會被發夢之神拋棄,變得更加無聊,現在想來,細路有夢想,老人冇幻想,原來是生理作用,有諗過早年退休的人最好要知道會有呢種情況

雖然及唔上陳同佳,味皇現家還算風流的退休生活,但是其他人的生活唔覺得會好,38蚊焗豬老闆生意難做左,22.4蚊套餐老闆生意好啊得個做字,沒有贏家,咁既不毛情況應該還會持續好一排

沽清潤利

大約在0.236上下沽清曬潤利,由於早兩日除左淨派0.018,除淨即日有人追返價,下次息要再等一年,時間成本較大,現價黎睇佢下年不足10厘,於是決定放左佢,開始買的時候恆指好似29000點左右,平均價未夠0.18,收左兩年1.3同2仙的息,再收今次1.8仙,逆市賺左近7成,算近年比較成功的交易,當初目標係派息以外同時增加非大陸來源的收入,按同樣目的,0.56換入114000股唐宮同1.37換入48000股筆克,味皇認為呢兩隻派息不差於潤利,唐宮派息可能比潤利高,而筆克的收入很多也不是來自大陸,咪一鳩樣

潤利之前是市值2億以下的濕9公司,現家也不過是2億幾的濕9公司,賣出買入都非常困難,但最近不知為何,咁濕9的公司也有比較大同密的成交量,唔通想私有化?難得有成交,味皇順勢一次清

另外3.07把齊魯的派息增持了10000股CTM

以前換1713幾次都失敗左,近期再嘗試在比衛星高的價位上把齊魯換成衛星,又幾次都因為齊魯冇成交差價大而失敗

上年訂的收息目標即使今年多次重覆收息,恐怕也是難以達成,甚是難玩

1883業績

營業額多7%,但盈利7.2億多26%,大半分類都係持平,增長來自IDD同漫游

營業額地區分類來自其他的大增1倍至3億半年,一年之前CTM來自其他地方的營業額一直是全年3億

光纖同數據中心增至7.05億,上年同期6.5億,下半年6.8億,味皇不認為澳門光纖賺錢有大增長,繼續當佢增長5%好了,光纖2.5億,數據中心就會是4.55億,增長4%,顯得相當差,而上年有1成,相對新意網上年也是1成,即是說今年增長非常唔好,等新意網過兩日出業績就知係成個市道唔好定係競爭力唔好

澳門5G牌係上年11月先開始有的,電話費營業額增10%,賣電話營業額增9%,換機的人非常有限,例如味皇都仲用緊4G,具體數量是,賣電話營業額增5200萬,一部新機假定為4000蚊,代表賣出13000部,而且也不一定全是5G電話,最平5Gplan貴120蚊,13000部大慨多2000萬營業額,現家多4400萬,代表那些錢多人傻的可能用貴400蚊plan,壞方向看,換成5G會非常緩慢,半年13000部,而且有錢追潮流的傻人會在最開始就消耗掉,而且plan遲早會減價,好的方向看,市場上仲有起碼50萬部的5G機容量黎緊慢慢搣

企業服務應該同周圍經濟相關,之後估計頂多持平

文字方面,CTM第一次出現 "向新加坡政府部門提供數據中心託管新服務，在 印度尼西亞向多家企業、包括一家東南亞地區金融獨角獸企業提供公共雲項目， 融合人工智能技術向客戶交付無人機人工智能噴漆解決方案，提交菲律賓ISP許可 證申請，逐步落實向越南市場拓展計劃。 " 出現印尼呢個字眼,而且遙控飛機同CTM本身做的都唔關事

           2021/12    2022/6   2022/12    2023/6

商譽       9721       9700        9710      9712       

CTM盈利7.2億,現金流應該過10億,上年全年年報寫29億添,佢現金少左2億,債還左5億,至少有好幾億的現金不明消失,公司係正常冇事做情況下,商譽呢D"溢價收購"產生的物體是續年減少的,例如2022年上半年就攤銷左2000萬咁,但下半年本應-2000萬的反+1000,即係呢半年有溢價3000萬的送錢收購,今年上半年再有溢價1800萬的收購,CTM係冇通知我地的情況下鬼鬼祟祟用溢價收購左關於印尼的公司,唔知係好係壞,唔知還有冇陸續,能夠溢價4800萬,咁個收購起碼過億,至於點解係印尼原因不明,至於點解係遙控飛機原因不明,考慮到CTM並無印尼的人脈,咁可以斷估一下,母公司中信還有冇其他奇形怪狀的子公司?如果中信因某些原因需要現金的話,CTM可能會一而再三溢價接母公司資產

冇增派息比較唔好,也許佢末期一次過派夠24仙,也許象徵式只加派少少,今次唔加中期息,同埋半年前末期冇派22仙,可能係因為用左果不明的幾億

回到債還左5億上面,剩41億,當年中信1616時代蛇吞象借的100億己還左過半,41億利息1400萬6.8厘,上年46億1300萬5.6厘貸款成本加左唔少,不過下半年應該唔會再點加,下半年還到36億的話可以慳1200萬佔盈利近2%,再4年就還清

傳說中Mtel已進入橫琴,當然不是全境,但至少類似居屋的地方有可以上google的網線,反向推斷,CTM應該是現在進行式的狀態下在橫琴鋪緊網線,代表CTM會有不少的前期資本支出,因此也會影響近期的派息能力,而橫琴封關的時間是設定在今年尾

若干增持同部分業績

呢排個市又唔掂,味皇用派息再買左D,排過1.04恩達,排過8.7美蘭,排過0.1地勤,排過0.1拖頭,排過0.305遠航等等,最後成功排到的是0.25入左50000股大悅城,0.58入左20000股唐宮,7.69入左2000股中信泰富,反正錢有限排到乜就算乜

發覺味皇推測的成功率可能不算低,味皇估唔中的半死,但就算估中都往往沒有效果,好似遠航破天荒派息股價冇郁,恩達加派1倍股價冇郁,唐宮重新派中期息股價冇郁,筆克重新派中期息股價冇郁,個市實在難服侍

唐宮一如所願應該有近10厘,之前味皇在唐宮同太興二選一之中選左唐宮,結果燈神的唐宮由0.65開始跌(市值7億),而太興由0.84開始升(市值8.4億),最後兩隻的業績都反轉,現家市值分別是6.2億同9.6億,而大家都一樣係賺4000幾萬,現價派出黎係8.6同6.2厘,暫時計埋都係味皇燈D,不過味皇依然認為唐宮比較好,下期派息加幅更高,但是比起揸太興,揸唐宮是有時限的,味皇應該不會揸佢到下年8月,因為唐宮的免稅額會係下年中期食完

恩達的業績麻麻,本以為PCB個市很好的結果衰退(營業額),不過恩達今期已經還清全部債務,可以加派息比率,派息好運的話仲可以維持

遠航的業績麻麻,居然冇增長,也許今年海螺水泥唔好賣掛,全年估計派4仙

煉化的業績麻麻,營業額有點衰退,派息象徵式加一點,但人民幣跌總計都係少左,加派息的機會一半一半,由於佢現金極多,可能好似中移動咁食拳,好的可能是派特別息,不好的可能是接垃圾資產

衛星業績唔掂,營業額少15%,減派應該未至於不過己有先例,佢下年新衛星上市,但今年已出緊糧,就當佢可以平白產生多30%的營業額好了,暴利率80%,咁支出是6%,下年增30%同時又吸走5粒舊衛星每粒5%的舊客,5粒共25%成本5%,營業額增5%成本減5%上下大約10%,今年支出已多6%咁下年共是16%,即是說下年的增長大概只能補缺口,除非新衛星的成本比舊衛星慳好多咁全轉過去提高暴利率,舊衛星同舊衛星差10年,WINXP時代電腦同WIN8時代電腦成本肯定有差但差幾多好難量化

神冠賺唔到錢,但派息方面味皇不是非常擔心,因為大量還債,另外淘寶度睇佢多左好多有的無的騎呢產品,仲有佢下面多左好多可出售的子公司,應該有變身可能

大悅城出類似盈喜既野,派息應該會加返D,不過有錢首先都係還債

建滔出左盈警,睇下係唔係地產之類特別項目,派息估計又減

四環出左盈警,派息方面味皇不是非常擔心,現金流應該還是較高的,但下一年可能出問題,醫院被打拳,以國人尿性推測,醫院可能會減少用藥,只聽診唔執藥,唔堅醫,只比葡萄糖維他命拮鹽水針扮醫病唔揹鑊,拉長個病診金少食多餐直至政策再變,而咁一黎老仿製藥的用量會減少,二黎老仿製藥公司就賣唔出,三黎出價的買家也會少左,對四環賺現金同賣資產都有負面影響,四環最好就是減少支出,唔好一次過同時做幾隻藥的三期

gogo拖的業績由15號延期到25號再延期到31號,味皇有D擔心佢出唔到業績

CTM的業績另外出一篇

個市唔好,如果大筆錢冇腦灌落去大概會灌落CTM同筆克

752筆克遠東

4月21日舊文

羚邦最近逆市上升,原因可能是因為入樽大陸的票房好,可以大賺一筆,實際上今年羚邦的業績應該會相當唔錯,賣左係有D可惜,但筆克應該不在羚邦之下,差別在於羚邦是成長而筆克是恢復,上限比羚邦高,味皇覺得香港同大陸正走向衰落,政府需要外國人的錢,政府想掙扎的話,政府可能會要求筆克辦更多不成功的展覽會,政府會補貼展商去參加更多不成功的展覽會,筆克就算賺唔到展商錢,至少也會賺到政府錢,而且佢新加坡杜拜現家的生意應該唔少,另外筆克有機會恢復中期息,多一個投機理由

https://sigumdick.blogspot.com/2023/04/blog-post_21.html

筆克1月出過業績,冇留意佢6月又出業績,間隔近得離譜

如味皇所料,佢真係恢復中期息,但即使係咁筆克也未有爆升,投機失敗左,不過以息率計股價計都比羚邦賺多一些

筆克非常不好的係呢幾年借錢多,資產負債表方面算不上好目標,筆克主要的優點係由好高的起點跌落黎,就好似思捷咁,如果能恢復反彈幅度會很大

味皇不認為佢的市場會有多好,但味皇認為政府會強行灌生意比佢,客戶冇需求,筆克冇生意,政府貼錢甚至全包比客戶做無謂又不可能成功的展覽,以展示政府官員有在做野,有在掙扎,展覽越唔成功政府就再追加預算補貼更多開更多展覽,直至政府頓悟或客戶成功是但一個成就解鎖,而期間筆克不受市場容量限制,變相成為稅金小偷

疫情前營業額5億,疫情開始後得3億幾,之後慢慢恢恢到上年4.5億,即是說筆克在求生狀態仲可以回到血,麻痺狀態解除後如果補師恐慌性放大補血的話有可能補過龍

因此排除筆克的長期經營記錄,齋睇稅金小偷呢點,足以投機一波,退一步黎講,筆克派息高,派息記錄好,長期成長快,固定支出低,歷史估值高,不易被鐵拳,而且賺外幣,現家價錢平相當值博,同只有自然成長的羚邦相比上限更高

疫情前曾經試過1年交8000萬同6400萬稅,以20%稅率計,現金流3.2-4億,由於佢要還債,派特別息機會低,如果只恢復至疫前水平,現價也就10厘水平,清債要還5年,筆克曾經在市場上有點知名度,PE同PB都好高,博升值再換馬,過兩三年還左債先再換回來的策略比較合適

最新中期報告,至4月30日,半年營業額2.5億,算有疫情前水平,半年盈利1億,香港是某人握手之後先開始共赴黃泉,時間還不多,而之後半年預算會不斷充值,不會冷場,比較遺憾的是報告冇分類營業額地區,假設50%營業額境外勢力,50%自己人,境外勢力唔增長,自己人加50%預算,預算上半年食3個月下半年食6個月,上半年的50%是20%(第四季)+30%(第一季),下半年就是30%+30%=60%,年共110%,因此計算上營業額好大機會超過疫情前(盈利另計)

然後半年業績所示,固定資產多DD,租樓多DD,無形資產多DD,現金多DD,負債還左D,還派了息

假設全年每股盈利19仙,PE15是2.85,PB1.5是2.55,平均2.7計派5厘,水位只有一倍不算高,優點是確定性比較高,而且第二年還繼續有貨賣

筆克有自然增長,有自身恢復,但自身恢復部分和稅金小偷是重疊的,恢復大補貼就少,上限有定量,味皇推斷政府掙扎得最多兩年如不順利就會躺平收水道歉但唔駛下台,係官媒放聲氣話行業要轉營或者索性公開求救索要類似自由行呢類鳩藥

自然增長部分,新加坡估計是相當好的,但中東之前是呢邊的代用品,共赴黃泉之後地點會改返返黎,因此中東是一次性不可逆收縮的,兩加總體不及之前,但新加坡擺的是有市場的剛性存在,呢邊的是冇市場扮有市場的政策性存在,因此"市場"看起來會平白增加實際是重復加算,不是真增長不是持續增長,因此買入後需留意退出時間

食息的難題

好似日本城咁,今期就減派息了,味皇並不意外而且在1年前就已預料到,因為佢借錢派息,但味皇料錯的是佢現家先減而不是半年前就減,味皇不說是因為味皇燈過好多次,好似衛星,國銀,煉化,潤利,地勤呢D以為佢能維持最後卻減少的,即使有其他成功例證,但好壞參半下依然唔會有說服力

但是自己是明燈並不足以作為不動的理由,除非動不了,沒有改善的余地,否則還是要自救的,最起碼要有自救的念頭

不動的話只能等運到等天打救,自救至少能得到經驗值,自救得來的經驗將來也許會發揮作用

多數散戶的眼光狹窄,只會從很細的範圍內選股,也許他們比起只買港股的味皇還買多了美股日股債幣,但味皇看來依然是眼光狹窄,"狹窄"是指知名度,只買多人買,多宣傳,大聲嗌的東西,不會考慮"不知名"的冷門野,如果用足球講,炒到1億的是球員,踢業餘賽的就是跛的,不是一樣有手有腳的地球人,而對味皇來說,無論知名同不知名,都可以是選項

因為東西是味皇自已找的,不是由別人推過黎,無論知名同不知名都是研究過的東西,不是"知名"同"不知名",只有"研究過"同"未研究過",研究經驗只會越來越多越來越好用,除非老人痴呆

2020年疫情下,味皇組合災難性重創,2019年味皇收息29萬,原本2020年應該收30幾萬的,但出事後經過味皇計算恐怕全年只得返19萬,而且大機會無法恢復,因此味皇全年都在自救,把主要的列出來有:

賣清光佳寧娜,金額約30萬(唔派)

賣匯賢同越秀reit,金額約25萬(減派)

賣清光太古B,金額約25萬(減派)

年頭組合都係500萬左右,最慘時可能得300幾萬,上面幾隻在最低潮時都佔20幾%市值,咁呢堆的金額80萬換左乜野呢:

換入CTM金額約20萬(增派)

換入齊魯金額約10萬(增派)

換入普星金額約15萬(增派)

換入新創建金額約15萬(增派)

換入雅士利金額約15萬(唔派)(私有化)

換入大悅城金額約10萬(減派)

經過咁樣轉換完之後,有好有壞啦,但派息由1萬幾變5萬幾,而且自起來比較可以持續,咁19萬起碼變23萬,未來也冇咁愖憂,而呢堆股之中除左新創建有點知名度外,其他係股民當中都是名不經傳的細股

最低時組合330萬,比時味皇已退休靠佢開飯,供樓近7000,以19萬計也就16000月薪,而且難保19萬仲會唔會變少,魔法使味皇醬大偏治,假設16000蚊每月剩5000,一年剩6萬,自救後23萬有19000剩8000一年剩96000,呢個時候買到成街的10幾廿厘股,就會差36000的貨同每月幾百的息,而呢幾年澳門住宅租金下跌30-50%,多出的幾百已經可以係拱北買二百幾斤白蘿蔔,每年多成噸白蘿蔔,而低位果36000貨幾百息同後來也許變幾倍,儲錢本來不多的,別人都減少而自己增加,差異就拉大,330萬退休對港人是超現實,但勿以小錢而不賺,本少改善也是肉,本大就肉更大

當時有幾多人在疫情中按兵不動呢,如果不自救就世上就沒有人能救了,例如好多人都有的匯豐,唔派息果排都試過兩次40蚊匯豐同時40蚊渣打,起碼有兩次自救的機會,好多時都要自己動L

第一,收息股CTM很好,但收息股不是只有CTM,日本城不是很差,但收息股不是只有日本城同CTM,然後有幾多人可以提出10隻咁上下水平的收息股呢,散戶大多知識缺乏,第二,派高息就是收息股,咁幾高息為之收息股?派低息唔派息就不是收息股?連當時人也沒有明確標準,甚至感覺標準也沒有

收息持續的時間要幾十年,要一隻股好足幾十年,係有的,但好成咁唔一定幾十年都唔比人收購變子公司,更多的是時好時壞,任何時間點都同時存在好的同壞的

好的換成好的       好的換成壞的

壞的換成好的       壞的換成壞的

只要進行換馬,有50%不好不壞,25%變好,25%變壞,正常人正常概率

但只要你在最初就能分辨好壞,例如只能分好的

好的不用換       好的換成好        好的換成壞     壞的換成好       壞的換成壞

20%不變,40%不好不壞,20%變好,20%變壞,好60%壞40%

如只能分壞的

好的換成好        好的換成壞      壞的換成好       壞的換成壞       壞的一定換    

40%不好不壞,20%變好,20%變壞,壞的20%重刷,好40%+10%+5%+2.5%+1.25%...,壞40%+0...%

因此只要在選股上丁點的識別能力,就能把成功率提高到50%以上

味皇認為換股最大要點是,換的要比原先有進步,那怕只有一丁點,然後重覆多幾次,例如:

其他差不多,派息高一點

其他差不多,負債少一點

其他差不多,保留盈利多一點

其他差不多,現金流高一點

其他差不多,估值低一點

其他差不多,現金多一點

其他差不多,成本低一點

其他差不多,風險少一點

其他差不多,競爭少一點

其他差不多,成交多一點

其他差不多,潛力高一點

其他差不多,稅率高一點

其他差不多,歷史長一點

其他差不多,壽命長一點

其他差不多,母公司有錢一點

其他差不多,老闆老實一點

其他差不多,確定性高一點

其他差不多,趣味多一點

諸如此類

味皇一生的工資總數也就200萬還未扣支出,所有本金都是每個月少少的積上黎,每年多儲一萬幾千貨對將來都有很大影響,收息股是好東西,但味皇也踩好多屎,想說後來越踩越少,但最近好多屎是被人強行按在地上抹的,味皇也不敢說自己冇乜屎味,但自己踩的應該是有變少,經驗累積是有用的,組合每年都要抽取十幾廿萬做生活費,股本越來越細之下,味皇單靠每年的內部改善,每年都可以多三幾萬息,計算上

回到前面,選股只有"研究過"同"未研究過",不是"知名"同不知名",如果要味皇推要大C推,那就沒有經驗值,不是研究

2129gogo拖

呢兩日味皇用30秒大法再搵左一D股,例如2481,560,6812,403,1455,1587之類的,然後買的是2129

隻股冇中文名,按公司拼音照計應該可以譯做中文嘅,冇名叫咁呢度姑且稱佢做GOGO拖

2020年股情期間上市的半新股,4亳上市現家跌到1毫,保薦人同會計都極度垃圾,不過味皇也體諒佢細公司請唔起big4,保薦人有幾垃圾呢?下限定價,最後集資淨額4050萬,上市收費4870萬,手續費超過50%,之前味皇睇過的細公司可能抽兩三成,抽過半唔知算唔算一個紀錄,金融才俊下話

上市前佢有56部拖頭,拖頭牌子係日野,日本貨,每部賣68-75萬,38000平的爛地場,員工140幾人,司機40幾人,爛地場租約到22年尾同今年6月,經營地點係新加坡,當時佢最大隱憂係疫情持續時間同爛地的租約到期,因為司機比車少加上疫情,後來劏車賣車剩50部

到今時今日,味皇買佢的原因係:

1.新加坡!

2.香港...

3.員工增至190人

4.2022年的租約完左,爛地增至53000平,另有15000平的倉庫有瓦遮頭

5.2023年6月的租約完左,現在手上都是新約,到中期報告時倉庫可能比年尾更大

6.人地一早共赴黃泉

應該同倉庫增加有關,佢營業額大幅上升,相信今年也會繼續升唔少,PB0.5以下,味皇估計佢下年盈利應該超過650萬坡紙,中期應該唔會派住,下年末期有機會第一次派息派12-20仙,派息的根據是,佢上市前已經試過兩次派400幾萬比老闆而公司現金冇少到,起碼能自力賺息派息,當然燈神味皇例如係8502也有估錯的先例,8502遲左1年先派

資產淨值0.36,合理價0.28左右啦,咁嘅市都唔求佢高PB了,上市價4毫相當水魚,考慮到上市抽過半手續費,咁即係兩亳賣屎忽,當初管理層認為公司值兩亳

買入gogo拖

早排跌600點時8.73入左7000股中信泰富短炒,估唔到今日仲可以趺咁多變長揸

今日又跌400點,味皇按前文的計劃,0.1以內買入285000股經營50部拖頭市值1.2億半新股唔派息的外國細公司,頗有趣味亦頗具風險,號碼先保留一下,以前味皇也曾買過強泰環保結果不太成功,今次延續上次的劇情

另外0.34排緊幫來來新苗運貨市值1.8億的細公司,應該買唔到

* 26日0.101以內再入多240000股拖頭,算買夠應該唔會再買,現家味皇有萬分之5的股權,隨時成為10大股東

另外茂名港又爆升,上次掛0.46唔成功,今次掛0.45,不過今次應該都係賣唔成,計埋息平均價0.32多D,如果賣得成就算係今年難得比較成功的交易

*27日係52週高位1.21沽出34000股國銀,2.3換成18000股衛星

*8月2日1.36買多16000股筆克

要不捉大,要不抓小

最近新創建私有化,有唔少以收為目標的人少左個目標,唔知換乜好,味皇覺得換CTM定中信泰富都可以,新創建好多人覺得佢收息好,不過新創建本身味皇也不覺得佢是非常好的收息股

講返其他,個市如現在所見,也就咁樣了,關於未來不好描述,驢耳朵說出來也沒有人會因此幸福,現在擺在我們的問題是,如果買返落本地,覺得有前景可以選擇的項目選擇很少

呢種情況,一般處理方法係向外擴大,呢度冇前途就改去外面有前途的項目,舉例某國例如英國咁啦公司自己好唔掂,就擴大市場去全歐盟甚至全世界,如果出面有正回報整體都叫有增長,如果有200現金投資落有增長的市場回報率10%就是20回報,重復投入第二年就是24.2回報

將目標投向更大的外部世界,可以避免競爭,博市場比競爭者大,將回報同風險向外界的平均水準拉近

其實仲有另一種,係向內收縮,不是尋求更大更開放的市場,而是尋求更細更封閉的市場,舉例某國例如英國咁啦,英國整體看來唔掂,但唔代表所有地方都唔掂,好似限定在直布羅陀咁,因為狀態特殊市場封閉看起來就冇咁衰退了,就算英國整體唔掂但直布羅陀的水貨佬一樣正常生活咁,味皇聽過很多移民英國的,但未聽過有人移民直布羅陀,世上有D限定小地方,限定小行業,不知名,可以唔增長也唔衰退,可以反周期增長,可以一日就打柴,假設小市場唔增長唔衰退容不下競爭,回報率10%,200現金收購現成石油氣20回報,果20回報收購現成小巴第二年就是24.2回報

唔係暗酸邊度邊度專門走水貨啦

目標係縮骨野,也可以避免競爭,博競爭者大雞唔食細米,回報同風險都限制在原本水平,搵大同搵細相比,主要差異在例如你有10000現金,可以在全世界範圍用曬果10000萬,搵細可能用50就買起一個行業,500就買起全部行業,又9500要另外搵方案

知道很多人買美股啦,只要買的是標普而不是道指長遠也是有回報風險低啦,但味皇限定在港股買,很穩的選擇還是比較有限啦,但是香港現在也是小市場,而且看起來反高潮像尋求更細更封閉似的,咁因應潮流搵一D有各種限定條例大雞唔食細米的也許更好,更細的米係更細的市得更細的成交量變更細的股,買呢D也許更高CP值

例如CTM咁,都係大雞唔食細米,澳門市場容唔到更多的競爭,夾硬加入只會減價爭有限的客結果一齊死結果連進入成本都賺唔返,而CTM的處境是在有海關阻隔的情況下才有的,如果拆關CTM一陣就比大陸電信收皮,即是說在特定情況下(有海關)CTM得安泰,唔講直布羅陀,休達,德左,盧森堡,摩納哥呢D地球對面,附近好似澳門,香港,新加坡都有各種限定情況,就算大陸只要不出縣城食之無味,小地方的內需或者特色股細米如果能夠平買,量夠多應該也能食飽肚,而且大折讓現金流多的話也有機會私有化

最近味皇比較傾向研究小地方的小型當地物流股

日本樓災難預測

雖然味皇手頭己冇日本樓,幸好沒有日本樓,不過呢度都寫一下,補返上一篇的題材

是咁的,日本已經停滯30幾年,停滯是一種常態,入面的所有法則都按停滯為基礎完成進化,例如有種族原來是直立行走的,後來因為某D因素唔比行而改為躝,本以為會演變變為四腳爬爬,點知佢超進化成用奶頭行走的,長期下來適應了用奶頭甚至出現奶頭賽跑穿奶頭鞋搽奶頭油咁樣的生態,長期用奶頭行走的後人要佢地企返起身一定會出現適應問題

味皇要說的是,日本樓的游戲規則經過30幾年進化,完全適應"停滯"而在此條件上維持下去,而現在日本出現通漲,算是天地反轉的現像,叫出水烏魚要學靈長類生活同靈長類雜交咁

出問題的條文主要係呢D:

1. 業主要交管理費同維修基金,每10年必須大修

2. 租客唔比趕唔比加租,租客走要還原層樓

1的問題點是,第20年樓齡時層樓開始大修油外牆之類的,通縮同停滯時冇問題,但通漲時原本的維修基金會超支比唔起,因此維修基金會加,通漲時管理費也要加

2的問題是唔比加租,上面加左變成淨租金減少,極端一點甚至可能出現負租金,就租客方面來講,搬屋成本也因通漲增加,難搬走唔想搬走唔比錢逃走咁樣

日本樓進化到用債券計價方式咁訂價的,例如用6%計,淨租年收30萬的,樓價市值500萬,樓A有100平樓B得50平租金一樣訂價一樣(但是維修費唔同),同理樓齡唔同樓價可能一樣,有租客同冇租客可能一樣,現家又有一個問題出在有租客同冇租客呢度

樓A,冇租客,預計放租淨收30萬,賣500萬

樓B,有租客,淨收30萬,賣500萬

係停滯的狀態下,兩者差距不大

如果加入通漲,會變成咁

樓A,冇租客,預計放租淨收40萬,賣667萬

樓B,有租客,淨收20萬,賣333萬

咁樣兩間相同的樓,一來一回就差價一半,以後應該會衍生出黑社會趕租客的行業,出現更多職業壞鄰居

總之味皇推測,冇租客的樓會升值,最大利益化不再是租比人而是隨時加的airbnb,有租客的樓會貶值,但一趕走租客就爆升,舊大樓特別係18年,28年,38年樓齡的大樓會出現要業主臨時集資維修,戶數少的大樓會成重災區,舊樓做比較重大的維修,可能要樓價一半的維修費,木屋會因為冇錢維修而越來越殘,最終成個社區的木屋都變殘,另外通漲增加建造成本,多少會反映在樓價上,特別係新樓會出奇地貴,但折舊下來變成上下價差極大,維修成本提高及死更多人,1円賣樓會大幅增加

總之現行法例通漲對包租公是災難性影響,只要出現得幾次圍標示威,過幾年一定會研究修法(只是研究)

如果手上有日本樓,對應方法是:

1. 轉身做airbnb

2. 沽出換成美金

3. 沽出換成冇租客的樓

4. 沽出換成冇租客的樓轉身做airbnb

5. 買地皮做停車場

6. 學DIY維修木屋

如果手上冇日本樓,可能出現的機會是:

1. 業主唔想夾錢,恐慌性或欺騙性出售

2. 爛樓以更爛的價錢出售

3. 租客果頭近層樓或會大幅升值

4. 租客冇錢交租層樓或會大幅升值

23半年結

半年結前,筆克冇買到,0.53買多20000股唐宮,結束呢個回合

味皇組合現在市值596萬連同17萬在途股息,同年尾一樣613萬,計埋提取生活費10萬共623萬,增長不足2%,同期恆指跌4%,己收+在途股息34萬,而上年全年收40萬,今年應該會比上年多,但達成47萬的收息目標味皇感到悲觀,如在途股息都當成現金,味皇組合的現金水平8%為近年最高,唔係唔想買,但每次想買落去時世間都會出現各種不得不考慮的問題

另外呢度再澄清一下,魔導士味皇的身家同沈大C一個水平

現時妨礙味皇買野的問題:

1.人民幣赤字

2.港幣赤字

3.冇成交

4.一男子

5.世間情

6.自保

只要出現赤字就會貶值,冇出口仲貶值只會進口更多的赤字,二手手機同二手CPU,例如味皇部LG同AMD,比一年前舊左一年,但淘寶的賣價卻比一年前都貴左150蚊,味皇舊文一早提過,上面9成會收二手野轉賣比契大佬整飛彈,炒貴二手市場,加上上面都禁運入貨更難,如果呢度都禁運埋就難上加難,早兩年淘寶大把洋垃圾合約機,例如味皇果部,現家大半都絕種,錢幣貶值仲減息,外幣升值仲加息,普通手段係停唔到走勢,味皇考慮的是上面公司計返港幣賺少左,上面借美金賺本幣賺少左,上面可能加稅賺少左,上面冇錢消費賺少左,上面冇單賺少左,搞到你唔想買

要保匯率就要係第度吸血,孝子大把血可以吸,爽吸,吸到孝子皮包骨,但自己吸完也不見得飽,孝子有好多儲蓄,但正如舊文所言,未來儲蓄的成份由全部能流動資產變部分不流動資產再變大半不流動資產,咁孝子自己的匯率都難保住,味皇煩惱,上面唔買得,呢度又唔買得,外國又重稅,仲買乜好?

上半年有好幾次換馬的機會,味皇想掛單,但市場成交量全無無法換馬,本來成功的話味皇起碼多賺30萬以上,現時來看下半年也是冇成交量的,有價冇市眼光光,不過呢D死魚市就突顯出收息型組合的優勢,味皇無法沽出股票,無法以合理價套現,但組合能一直提供現金,呢度賣股長期遠低於資產淨值,但現金股息卻能1兌1,如果賣股是唯一的套現手法恐怕不能生存,如果能兼收息就有多一種套現方法救命

是咁的,最近CTM強制舊用戶換路由器,CTM派人上門把舊的能用的路由器回收換成新的否則唔比上網,至於新路由器的牌子是華為,由於最近立左法,祂的事少說為妙

怪事年年有今年特別多,出現能入歷史教材的真係估都估唔到,味皇能預計一些事情,但更多的不能預計,如果只在能預計的部分進行決定,難恐也會出現打亂計劃的事情,咁樣好難買落去

通常味皇交易的目標是增值,但現在目標想減少風險也算比較困難,雖然味皇嘗試美元定存但也是杯水車薪,減少人仔收入的股票增加本地收入的股票結果看起來正確,但點都有半邊身要捱打,味皇組合只能在人民幣同港幣之間游走,無論自己動或不動,如果地面自己動的話一樣係企唔穩

大致係咁啦,錢多的人走出去是好主意,好似沈大C身家的人要死還是會死大可不必,另外以前冇通漲時買日本樓收租是好主意,但現在有通漲後買,100%會變成災難結果,味皇斷言日本樓市幾年後會出現法律災難被逼大幅修法,游戲規則全變

回到組合上面,好幾隻股例如地勤,潤利,衛星等等本地股都不如味皇預期,打擊味皇的自信心,好似唐宮,國銀,煉化呢D大陸股,貶值同鐵拳也令期待值下降,齊魯一早就想換四川能投的,但成交量全無,恩達,天源,遠航如期派高息,但股價雷打不動0成交,路勁大悅城呢D尚未見好轉,但己是矮子同業中的大將軍冇得更上游,漢國唔加息,四環未賣身,美蘭冇人流,建滔怕減單,雖然祂好似金將軍咁戰勝病菌重新開放,但恢復不如預期難言樂觀

同上年相比,組合減少左地產的比例,增加左服務性行業的比例,負債比率也降些少,以前提過銀行曾向味皇sell孖展,現時實在比你孖都孖唔落手

人民幣貶值,澳門食野反而大加價,上年尾味皇食開的焗雞扒飯34蚊到4月已連加兩次價到38蚊,食開的豬扒包套餐1年由25蚊加到30蚊,曼聯感十足,結果味皇多左出大陸食,當然大陸也加價縮水,但平貴上下限好大

果D年結是3月31日的股票,業績普遍都非常差冇乜息,希望下次9月業績有大好轉

味皇好似烏龜一樣低調生活,組合也盡量以不蝕錢為目標,相對於出面的人水深火熱,味皇維持原來的生活水準已甚是不錯

AI

由狗幣到元宇宙到AI,其實只是題材的追求而已,市場追求呢D野係因為佢唔實際,量化唔到,所以不存在吹的上限,如果換成有實物的商品,人們就要考慮市場的大細,成本,關稅之類的東西,實際過頭反而見到極限吹唔得大,熱錢平時只是由A題材換成B題材,無論係呢D項目,定係唔同國家股市同貨幣之間,本來存在的只會移動去另一度,第時又移去第度,金錢本身可能價值不定,但背後的內容其實是幾十億人的勞動時間,唔會突然多左少左20億人勞動,唔會突然一日開工8小時變12小時,並不會增加減少太多,吹到幾大都好,工時不是變多的話再吹也是空話

AI好似可以改變人類的工時咁,不過其實好多限制,最主要係地理,搞AI要用大量電,最好免錢佛心發電,於是搞AI的地方一係高發電,一係勁慳電,想高發電一係有核電站,水電站,地熱泵,太陽能,有地理限制,一係高緯度,天氣勁凍唔駛咁多散熱,有地理限制,如果按現在吹捧的搞,係加州係中東係台灣呢D搞,只係消耗稅金補貼火力電廠,好似台電一年蝕2000億台幣,咁AI賺1蚊當中可能有5毫係政府貼的,不能持久,市場短炒一年半載自己袋走,手尾留比納稅人,實際上比兩個AI互相捉鬥獸棋,隨著兩個AI棋藝趁來越精湛,地球上的生物禽獸也會因此死清光,將來越來越多國家要比碳稅,包括最近成為發達國家的其他國家,唔解決對燒柴較便宜的依賴,搞類似AI捉棋呢D只係自取滅亡,真係想搞AI,唔該去冰島搞

也不排除有人不識時務,外面禁運就係呢度搞,全國的超級電話全部搬落黎,40度大熱天時開行冷氣用intel暴芯組個百萬方陣叫夭河N號上網AI捉字蝨,然後核電廠包圍城市之類的,但是AI都有分好多唔同的AI,由你老婆到後山的猴子到味皇自己都叫類人猿咁,隨時比人同隻狗差別少,比白人同白食差別大,現家流行吹緊的係C字頭定O字頭,但外面可能仲有A-Z字頭,今年出的同六七年前出的,呢度就好似美制武器同蘇制武器咁,美制蘇制一樣飛得起射得出,美制高性能成本高數量少,蘇制能用便宜數量多,美制蘇制一對一的話通常係美制吊打,贏硬咁,但是實際操作上不一定成立,例如一邊是10隻F16壽命10000小時,另一邊20隻米格29壽命1000小時,兩邊唔敢郁,如果蘇制果邊變成20隻米格29得兩隻剩500小8隻100小時10隻壞左泊係度,兩邊一樣唔敢郁,因為壽命不可視而飛機可視,只能見到"有"這個因素而不能見到"不足"這個因素,因此只要有能飛的嚇下人就足夠達成目標,唔見光死就得,平最實際,AI也許C最先進,但不是C最好就C統一天下,其他人有能用的能用就好,好似一年幾百個GAME的怪物AI還不是不同的IT狗自己寫出黎的?不是要AI一血通關天地吞食的話也要不了很高性能,如果C不能用便宜的價錢外判出去,自會有人用更便宜的將就,如果寫仙劍的敵人AI,寫刀削面機械手的AI,也不用咁高級,A牌子車AI同B牌子車AI除左牌子之外,未死之前乘客並不會感到差異

好似NPC生成器呢D用途暫時不大,J圖生成器嘛...咳,用途不大徒增失業,AI捉棋呢D簡直就像是麥加登會做的事,咁味皇認為乜野AI先叫有用途呢?例如步行學習,觸手學習呢D,不過呢D大路野人人都可以做,咁有邊D只限呢度先做到呢?AI解剖死人,AI解剖活人,AI餵元素表,AI解元素表,AI合成獸呢D,就啱大哥哥了

是咁的,關於AI,本文主題其實係想推薦一下外國youtber頻道,唔識聽齋睇都基本會明,而且是5年前的頻道,當時咪話炒AI概念,人工智能都少人提,5年前的AI軟件同C字頭相比就是蘇制,呢度睇下蘇制能做乜野,將來有冇必要淘汰或比C取代

冇實際用途的:

巨大機械人駕駛倉

https://www.youtube.com/watch?v=FDyWDOwEwfc

索羅牙骹驗證

https://www.youtube.com/watch?v=6SzZAnE6x28

界王星的生活

https://www.youtube.com/watch?v=Rl6ymf6gfxc

超音鼠模擬

https://www.youtube.com/watch?v=f8yPxjAGz8o&t=1s

些少實際用途的:

跌爛電話模擬

https://www.youtube.com/watch?v=Bkc-iiPEJXs

水上行走模擬

https://www.youtube.com/watch?v=EKFudr9FO0E

落雨跑步模擬

https://www.youtube.com/watch?v=wkP2dE0l7Qw

食面模擬

https://www.youtube.com/watch?v=Yv4IyNXZeIc

馬蹄爽模擬

https://www.youtube.com/watch?v=26lLlfyP31E

有實際用途的:

出川哲郎步行學習

https://www.youtube.com/watch?v=eVccQ82BekI

大雄游水學習

https://www.youtube.com/watch?v=zRqoRrkabAI&t=2s

飛行學習

https://www.youtube.com/watch?v=UPjmZheyYTk

炒蛋學習

https://www.youtube.com/watch?v=DDhv7biBd4o

過馬路學習

https://www.youtube.com/watch?v=ZMz2R3zs9pc

越野學習

https://www.youtube.com/watch?v=CICdCEzuXSY

單輪車平衡

https://www.youtube.com/watch?v=hQUQ79fjx_Q

說到尾AI現家同將來的差異在於軟件效率更高參數樣本更多,一次可以設定更多條件,硬件將來運算能力更高,一兩秒就完成50億次模擬學習,但本質同現在的,同5年前的其實冇分別

成交好少

呢排成交好少,味皇好幾次想換馬,都因為冇成交換唔成

地勤出左盈警,原因是佢啱啱租左阿里的倉庫,按金同分攤之類先搞到好似盈警咁,但凡新簽租約都會出現呢類現象,除左地勤之外還有一隻股叫環宇物流性質同佢一樣,只要新租倉庫現金流會增加但盈利會減少,同市億1.4億的地勤相比,環宇市億得1.7億但佢只做澳門規模比地勤細,雖然環宇都很平但地勤更平,如果以同一標準,1.4億的地勤咁環宇就要得幾千萬,反過來環宇1.7億的話地勤就值幾億,今次地勤盈警,味皇不太擔心佢減派但怕佢唔增派,反而就是佢的營業額比上年少2%味皇覺得比較失望,國際大刀會機場今年係乜玩法?不過佢業績期計到3月也冇辦法

早幾日味皇試驗之前發現的3程巴士上廣州,用左13蚊就去到廣州(南沙),不過3個半鐘,味皇去左視察廣州大悅城

未開張,大概過幾個月就可以開張

上廣州途中味皇係中山三角度行左陣,工廠未執的地方稅收應該仲可以,馬路有鋪花草有剪,但商業非常唔掂,街上冇乜人,另外三和大神咁一堆人坐係路邊日結招人,舜宇光學時薪18蚊

無論是廣州還是珠海,路樹好多時會係芒果樹,成熟時跌到成地都係,得外勞會食,咁佢D芒果係乜味呢,今次味皇挑戰一下,執左個成色不錯的返酒店咬,結果咁:

正常芒果味,比較淡冇咁甜,微酸,味道是可接受的,果肉偏硬,成口毛,果肉接近表面的部分都好似平時食到核附近咁全部都係毛,口感微妙,不是適合食用的東西,屬於能治壞血病食你唔死

味皇認為,呢D芒果唔適合食用,但味道還算正常,材料免費,如果落入國人之手,恐怕會拿來打汁,隔左渣就唔多覺,加水開稀佢,加多D糖精,整雪條整盒裝野飲,果D一蚊盒的盒裝怪味芒果汁...可能真的是芒果汁

沽清晨鳴

呢度有兩個考慮:

1.大陸工商下行,用紙量可能下降

2.大陸退林還耕,可能鐵拳晨鳴的人工林

於是味皇把2014年買的晨鳴沽出,結果還要小虧,2.35沽出108000股晨鳴,23.3換入11000股建滔,建滔除左炒燶債券外,今年基本向好

最近有個新聞係關於海參威的,如果係真的話,可以提早沽空大連港都得了,吞吐量可能少幾成

味皇發緊燒,用快測仲係1條線,繼續華麗閃避,入春後日日比蚊針到7彩,但唔似登革熱,應該係一般的甲型

*之後1.29再加左16000股筆克,0.58加左30000股唐宮

發覺匯豐同渣打又變返差唔多同價,結論同舊文40蚊匯豐同40蚊渣打時一樣,現時冇必要揸匯豐

*聽留言講,買左盒源吉林飲,葡幣61蚊,係有效嘅,感謝ching,成份最多係藿香,之前炒到一盒過百的藿香正氣,連花清瘟,睇一睇成份原來同盒仔茶基本相同,講開之前政府派的連花清瘟之前有人收購時坐貨到現家一盒都冇開過,現家蟹貨放都冇人要

唔知買乜好

由於已經指意唔到美蘭同首機之間再搾到錢出黎,於是直接0.151買入70000股地勤湊夠目標100萬股

呢個星期3.54打算沽出路勁,1.53換回惠記,結果沒有足夠的成交量未能實行

半年前的美元定期到期,有打算加買筆克同唐宮,但也未有實行,最近股市一直跌,其他股跌,而佢地冇跌,味皇陷入買應該買插水股定應該買預定股的為難之中,好多時味皇平時買的股很抗跌,同時也更抗升,趁股市差的時候買插水的貌似更好?或者啦

係呢段時間,跌得夠多,令味皇有D魷魚的股,例如嘉利物流,冠中巴士,粵運交通,361度,自動系統,太興,鴻福堂,建滔,新宇環保,大概係呢D

傳說今年深中通道就會通車,行程可以再縮短,上次味皇由南沙坐巴士去虎門要13蚊,佢應該會再貴少少,不知不覺,唔講唔多覺,廣州地鐵起到一個叫萬頃沙的地方,呢個地方居然就在翠亨村外面,緯度比順德仲南,以往的經驗是廣州>番禺>順德>小欖>中山,而現實居然是中山同廣州已經鄰接,味皇滿頭大汗,現在坐巴士,可以由拱北坐1蚊車去下柵,下柵坐4蚊車去中山,中山坐10蚊巴士到南沙,3程巴士到廣州歷史最短距離,而上次味皇挑戰的的路線是拱北>三鄉>石歧>小欖>容桂>順德>番禺寶墨園>番禺市橋,8站先入到廣州

世界肥料都漲價

是咁的,上面又180度扭腰,今次題材是退林還耕

先唔講風沙啦,google退林還耕又可以睇到人類的愚昧

不過呢度唔講硬膠野,講務實少少

上面呢,交公糧是有種類限制的,以前生產隊時代到現家都冇點變,交公糧只收"糧食",唔收"雜糧",糧食是五谷之類範圍非常狹小(但唔係用黎食的高梁卻算),雜糧是糧食以外的所有東西,由番薯,瓜子到屎都算雜糧,每個生產隊以人口為指標交指定數量的糧食咁樣

種糧食同種其他有甚麼分別呢?

   種糧食            糧雜糧

人手一定多    人手可能少 --例如一個人一畝種米會死,種一畝菜還可以

  功夫多         功夫可能少 --例如種米要插秧拔秧,種番薯唔駛理

  要除蟲         唔一定除蟲 --例如種米要除蟲驅鳥,種番薯種蔥頭唔駛理

  要肥料         唔一定施肥 --例如種米要施肥,種番薯唔駛理,種黃豆唔駛氮肥

一年收兩次    一次或多次 --例如種米收兩次,種菜一年到黑都有

廢料不回填    廢料可回填 --例如禾稈唔會直接落田,菜葉就直接埋

土地有要求      因地制宜  --例如種米最好要水田,瘦地種薯種葛種淮山

  唔賺錢           比較賺錢  --一邊人工多肥料多期限長,一邊期限短又可以慳錢

先唔講花生果樹呢D,竹荀栗子冬菇呢D唔駛打理全自動產出的還耕反而是浪費社會資源,古代日本個個都營養不良,冇米食,D將軍都會係城入面種白果樹,以白果代替軍糧,增加守城時間,簡單講調整一下大爺們的菜單就可以解決大半的問題

現家主要是出現另一個問題,外面打仗,打仗有乜影響呢?用好多炸藥,咁炸藥的材料係乜呢?肥料

整炸藥材料係鉀肥,咁其他肥料唔加?其實氮肥都會加,氮肥主要係氨,制氨要用煤,而開戰之後會全民大鍊鋼,鍊鋼要用大量澳洲煤,明白意思未?

就係咁,忽然增加大量瘦田,一黎冇咁多工人種,就算一開始用錢招到一堆臨記,但蝕得一年半載D臨記就會走曬,D田又丟空返,點解蝕呢?冇錢買肥料,糧食品相唔合格,買左肥料但指導收購價唔加,村政府冇經費比臨記,臨記有汗出冇糧出兼欠債,糧倉火蠋,村政府claim保險,銀行追臨記數,流程大致係咁推測

主要是生果栗子杞子呢D第日應該會變貴,要食栗子煲雞就趁早食

不過冇有怕,上面有肥料添加劑金坷垃,據講一粒能量等於一粒原子彈,可以吸收兩米下氮磷鉀,,雖然農業不發達,肥料可摻金坷垃,一袋能頂兩袋灑,小麥畝產一千八,糧食再不用進口啦! 媚果,聖帝啊哥,呀味妮勤星地丫哥

比較大重整

又跌穿20000點,之前的虛火又打回原形之類的,之前上升期時有得濕下濕下,而最近兩個月味皇基本都沒有交易,又過跌也不是代表動不了,呢個星期味皇對組合做左D調整,應該又再提高左一D派息

0.52沽清持貨多年320000股華南城,1.47換成112000股信德,1516年時上面咪用命令語氣話不要讓李嘉誠跑了,不要讓富士康跑了之類的,阿崩叫狗咁,越叫越走,崩口人忌崩口狗,潤了,都潤了,有種說法是鄭州=富士康,富士康跑了鄭州的稅收就會崩,華南城係鄭州投資大,現家鋪位賣唔出的話就冇得呃管理費,起碼三幾年都解決唔到,加上之前去深圳華南城度視察時,結果都相當微妙,華南蟹已經坐左係度多年,本住"功成不必在佢"的理由,因此先行換成折讓差唔多大的信德,信德除左今年恢復外仲有個好處,之前船公司之類蝕到媽媽聲,現家賺返錢不用交稅,起碼免稅幾年,反彈力度應該更大,今年兩隻都未必派,但1年後信德應該會比華南城派得多

4.5沽清剩下的青島港,9.67換成18000股中信泰富,味皇最終本意是想換成1713的,但1713沒有成交,而且味皇更希望在除淨後先買,因此先換成中信泰富,青島港同中信泰富現在的股息率相同,但中信泰富不用交稅因此相當於增加派息1成,而且揸中信泰富本身也沒有問題,青島港最近逆市得好緊要,可能是季績好,但青島港的高增長可能只是一次性,港口積壓如山的存貨一次過處理之類的

0.194沽清全新100萬股羚邦,成交少賣左成個星期,1.33換成144000股筆克遠東,羚邦最近逆市上升,原因可能是因為入樽大陸的票房好,可以大賺一筆,實際上今年羚邦的業績應該會相當唔錯,賣左係有D可惜,但筆克應該不在羚邦之下,差別在於羚邦是成長而筆克是恢復,上限比羚邦高,味皇覺得香港同大陸正走向衰落,政府需要外國人的錢,政府想掙扎的話,政府可能會要求筆克辦更多不成功的展覽會,政府會補貼展商去參加更多不成功的展覽會,筆克就算賺唔到展商錢,至少也會賺到政府錢,而且佢新加坡杜拜現家的生意應該唔少,另外筆克有機會恢復中期息,多一個投機理由

1045業績

盈利減少同埋派息減少,當然唔好,盈利2.6億減到2.3億,營業額冇跌現家9.4億

上年佢有幾個值得注意的項目:

1.還債1億,現金增加4億,利息收入增加900萬

2.匯兌損失2600萬而前年是賺1800萬,前後差左4400萬

3.現金流由7.3億增加到7.6億

4.行政支出由1.2億減到1.1億,員工數由110人增至113,另外前年行政支出是1.5億

5.聯營公司由蝕4400萬變蝕5800萬,聯營公司權益由8.1億跌到6.9億,少1.2億

6.折舊率約8.3%,折舊左3.8億,即12年壽命,每股淨值跌1%,而聯營公司權益跌15%

7.己收按金少1成至4200萬

跟住評鑑一下,盈利減少左3000萬,但是當中主要原因是匯兌由賺轉蝕,而今年唔一定會咁多,上年除左坡紙之外幾乎所有亞洲貨幣都大跌,今年暫時未見

亞太衛星的聯營公司以行業類別來說應該同本體類似,本體縮水不多而聯營公司縮咁多,有兩個可能,1.真係蝕,高折舊之外仲有蝕錢,2.分身家,高折舊之外分身家咁派身家會大縮水.早兩年亞太街星每年派完息現金咪多得一兩億,但今年卻多4億,聯營公司派特別息或者轉移定價蝕比本體的可能性不低,現在聯營公司的規模細左,下年會唔會再蝕咁多?唔一定,如果後者成立,或有可能蝕少D但本體現金增加少,或繼續蝕多多而本體現金爆增,如果是前者成立真係蝕,咁本體的現金流入有D離譜

唔計過期10年仲有人用的,衛星的設計壽命是15年,射上去測試一年都有14年用,而折舊壽命12年是比較激進

佢行政支出由1.5億>1.2億>1.1億,營業額在上升,行政支出反而一直下降,早兩年佢做射衛星的前期準備,現家己經射左,後期支出應該不多

減派息簡直難以置信,每股賺25仙派22仙而不是上年的25.5仙姑且叫盈利以內,派息比率88%,上年90%叫保持住,但在味皇視角,佢再派多30仙特別息就差唔多,話曬現金爆升

佢現金爆升唔知有冇包括新衛星的前期按金,不過測試都未完應該唔會咁快接生意,最多將舊衛星現有的信號轉去測試衛星度,舊衛星變backup,新衛星的維持成本同覆蓋範圍應該比舊衛星好

新衛星4.3噸,現代衛星中規模極巨大,10年前的尖端晶片是28納米,15年前時代尖端是60納米,以早幾年單層12納米計是10年前的18%面積同耗電,但最後體積都咁大,比幾公斤的小型化衛星應該塞更多不知名功能,一定會夾帶很多不可描述的國家任務,亞太衛星唔一定會自己接任務,但接任務的某人自然會比錢維持衛星正常,越多人分擔支出就越平,如果只是純通信衛星無需咁巨大,亞太衛星不佔有全部體積,但佔有特定功能就得

以佢的業務類型黎計,收客戶的按金同有幾多客應該成比例,2020年按金4550萬下年營業額9.3億,2021年按金4600萬營業額9.4億,佢9.4億營業額7.6億現金流賺80%,假如下年營業額按比例跌1成,現金流會少7500萬跌相當多

總結而言,今年新衛星測試期間最多是轉舊衛星的信號,唔會接單,可能會降一D經營成本同增加折舊,現金流唔錯,匯兌損失今年未必會出現,加上利息收入上升盈利反彈,派息比率90%,另有可能派30仙以內的特別息,一般情況下今年唔會有大升的理由,新衛星測試一年入賬一年要等兩年,新衛星測試完後有可能出售位置重疊的舊衛星,上年下半年開始D人窮電視轉播收入變差,今年全年窮營業額有機會縮水,就睇反彈多定縮水多了

幾隻港口業績

6119茂名港

每股盈利2.9仙,派4仙(人仔),睇落好似派過龍咁,其實又未算,好似維他奶咁長期派超過100%盈利的股也唔係冇,首先佢交稅都千幾萬,25%稅率的話佢稅基都有成4千萬,咁佢派2千幾萬也唔係唔得

好似維他奶幾十年如一日用舊機器搾汁,舊機器折舊到0一樣可以搾,能夠派超過100%盈利的切要條件是無效折舊,港口如果要好似維他奶一樣就要又殘又舊,機器唔升級唔換,一直維修,舊機器幾十年歷史,生鏽落漆甩皮甩骨,但又唔影響使用,連工人都係一堆老頭子老屎忽,越來越息微咁,舉例來說,澳門內港咁,如果內港有上市可以派極高息,但換成外港同九澳港就冇可能到咁,而茂名港就乎合又殘又舊一堆老頭的條件,甚至還乎合越來越息微的條件添,不過佢息微緊都仲想擴建,所以下次未必能超過100%派息比率

6119係茂名的舊港,位於市中心的古老小碼頭,即係等於澳門內港,茂名會係山卡啦起高大威新碼頭黎取代舊碼頭,即係等於澳門九澳港,市中心的舊碼頭地理條件同方便性取代唔到,但政府長遠的目的始終都係想舊港息微變地產項目,呢種情況下舊碼頭運量長遠會一直下降,不會再有投資淨輸出,增長只能來自單價增長而不是增量,不過佢短期還未走到澳門內港的階段,現在還有些少擴充,不過茂名已經在市外幾十里建了茂名新港,60里外還起多個雞打港,現時都係山卡啦,以成本考慮,散貨還是去市中心,礦石之類大貨去山卡啦

回到業績本身,好似賺多左咁也不盡然,只是還清債唔駛比利息,最後派埋比你咁,闊佬值得肯定,但下年冇債還錢又派清光,這種增長並不會重現,佢現金冇曬,存貨突然多1.6億,那是柴油,搞到好似國泰炒油咁,由於佢業務包括同人入油,所以問題不大,不過如果油價急跌而佢短時間未賣曬就會蝕大錢

佢話想擴建多個泊位,但好似一直攞唔到地,擴建進度停滯,最好一直停滯一直淨輸出,咁收息最好,如果佢一開始擴建,咁可能有一年減派息

佢派4仙人仔,即4.7仙,唔抽稅,下年大機會不增不減,下下年再下下年都可能就咁,大漲幾會不高,大致係咁,味皇平均0.37買,13厘,現家市值先2.1億蚊中之腿

8502池州港

以前比味皇評價為創仔殘存股中最優質,會係2020或2021業績破天荒的第一次派息後大執一劑,最後2021年也沒有派,以為是姑寒財主,味皇平手走人的股,結果2022年業績一次過派兩年份量,味皇高追大手指落錯單的股

營業額比上年上升比教多,是因為上年完成了碼頭擴建,現在收成期才剛開始

債己經還清,擴建已完成,短期唔會再有新投資,所以派高息,佢肯派高息而不是用來亂收購是萬幸

現金暴漲5000萬,盈利8400萬每股8仙派3+3仙,,好似幾派得起,交稅只有900幾萬比茂名港仲少,但池州港的稅率是15%而不是25%,因此稅基是6000萬左右,池州港規模起碼比茂名港大一半,派6仙是6000萬,如果有增長,下年派5-6仙也是有可能,因是15%稅率比政府調回25%的話,稅基就剩4000幾萬,會派得4仙,另外8502現家現金將近3億,佢用唔著,今次肯派,咁下次派特別息機會也大

現家升左咁多市值先2.6億,味皇0.24買0.25走,現家大手指平均成本0.345高追,現在看返味皇即使完全扑中,0.24到0.345也就40%,坐2年博首次派息呢D極高不確定性就算成功左似乎也不算特別肥,每股派0.3的話,0.345買是8.6厘,而且冇稅,派5-6仙的話是14.5-17.4厘,茂名港同池州港都是0負債,而池州港規模起碼比茂名港大一半,同時在收成期,而人地是息微期,因此池州港是完全上位,負面的是池州港是創板人地是主板,但市值2億0成交的股應該冇差

盈利雖說是8400萬,但稅基6000幾萬,數字其實有高估

其實地區性冇投資的縮骨港先係寶,好似A股一堆垃圾高債低息高估值大港口,但卻有一隻反常高息0債低股值的港口叫營口港,最後比大港口收購

6198青島港

青島港各方面升一成半,派7厘幾,不過要比稅

增長相信係來自跪低肯買澳洲煤而不是越南煤,下年有冇呢個增長比較迷,但青島的地理位置要大倒退也不易

任何時間呢D大港口都有工程同收購,因此有資金需要,佢債也沒有特別點還,現金也沒有特別增加,不過佢帳面近百億現金,接任務的機會並不是沒有,如果有甚麼又要買收購價可能特別高

派息比率38%,沒有特別理由去提高,7厘幾以呢個體量的港口來說已經相當不錯了,大港口當中依然是突幾個頭的存在

冇貨果D詳細就唔講了,3382天津港大減息又冇大跌唔吸引,不過開始大力還債,5年後可能值得睇但不是現在,144債比較多,1199同144一樣的債務水平,1919財務比較好但是錢來自發新股會攤薄,3369同2880都財政改善,但3369加派而2880反而減,6117成身現鈔金光閃閃但沒加派,如果排除老千人底的6117後,如果話有邊款大港可以同6198水平接近的,得934

睇返業績期

味皇比鐵拳打完之後搵左大堆新後補名單,預測大概派幾多,特別仲多搵左堆市值只有三兩億的煙頭,唔計6月出業績的,平時有比較留意的稍為總結一下:

有D預左今年會減的,冇人會期望MGM同餐廳同惠理會派,但唔理,數量夠大讓單手單腳都應該睇到方向

1883,加

1606,減

762,稍加

552,加

3328,稍加

2356,加

440,加

2888,大加

144,減

6198,稍加

934,維持

2386,稍減

267,稍減

460,減

133,減

806,大減

1888,大減

771,維持

46,加

3969,維持

3315,加

752,加

6811,減

1181,減

1045,稍減

1785,加

1576,維持

737,大減

811,稍加

829,維持

2119,大減

6858,維持

2258,大減

954,大加

543,維持

2282,冇

6083,大加

1853,稍減

1936,冇

528,大加

6119,加

1837,冇

8502,首派

1480,大加

1289,加

1713,維持

2180,大減

6616,冇

2116,維持

狂加6

加10

平14

減6

大減6

冇4

35%加比較多,30%差唔多,35%吐血,即使係史上最慘的經濟情況,能有技術地收息,65%餓你唔死

考慮到預測會減的,實際大半都預測到正確方向,派息還是有一定的預見性的,至少有人做到,平均看像穩贏,不過35%不是低,但概率壓在個人身上就是要你命,你要麼分散,要麼提高眼光,要死時還是會死

蚊滋咁大的股,可以派息的還是會派息,牛龜咁大的股,唔派的一樣會唔派,收息唔好歧視細股,大細影響的是套現難度

上面有幾隻味皇非常驚愕,即沉板以為今年軍用單多賺錢點知唔掂,肛蛋是向好的但埃塞俄比亞內戰以為會拖累點知井噴,合和以為算好地地點知死直,池州港以為姑9寒點知利是遲一年先派,燈力尚在

今年經濟似乎會比上年好,咁65%餓你唔死今年就更加餓你唔死,上年能夠有果子食的今年大概率更香

題外,舊文提過味皇認為941,762,728當中762最好要買就寧願佢,941太有錢會怕被打拳,728最窮難發圍,762中間位唔上唔落唔怕拳唔怕窮最好,結果得762加派,941真係接任務上徼450億,其實香港自己都接唔少任務,以後陸續有黎

痛苦面具

今日4.1沽出業績不錯的青島港20000股,換成舊目標池州港,味皇現金買20萬股,賣左青島港再買左20萬股,點知味皇大手指症發作,買入20萬變左賣出20萬,結果發現後之後又要改返買40萬,本來就係冇成交差價大的股,白蝕左4000極度痛苦,賺夠啦比淫賺吓咁,結果變成相當於成本0.345買入40萬股池州港,味皇的眼還是有點眼光的,估創業版的8502會破天荒首次派高息,現家終於派,但味皇的眼還是樹洞,味皇估8502是在2021年的業績最大機會派,但2021年冇派,味皇懷疑佢是姑寒財主0.25賣左,結果現家2022年先黎派,佢今次派3仙正常息+3仙特別息,其實上年派3仙今年派3仙就差唔多,青島換池州係升值度未必有咁快,貪息更高同可以避稅,另外茂名港業績唔錯派十幾厘,前年的日照大連秦皇島極燈,上年的青島茂名就冇燈,燈極而熄時來運轉?結果大手指在後

派4仙人仔,睇下之後茂名會唔大升,升左味皇會傾向換池州港

業績分析另外寫

另外補返月頭業務視察除左1480同1668以外的其他:

405白馬大廈成棟唔同左,還以為去錯地方

供股錢成棟裝修,2022

405上年派超奀,主因應該同白馬大修有關,現家重開重招租,多數今年大反彈

成棟行完,出租率應該有90%以上,但唔知現家的收入剩計收租定有營業額分成,營業額分成肯定不及以前

以前白馬好多黑人,現家一個都見唔到

1樓

1樓

2樓

3樓

7樓

7樓

6樓

5樓

4樓

旁邊棟天馬擺爛,應該唔同業主

新馬路國際酒店咁

後巷

對面壹馬

IFC...

...旁聽的商場國企友誼商店

商場只有職員,IFC寫字樓入唔到去

維多利亞廣場

利用率唔高,局然擺咁多櫈

大概8成半

旁邊書城

一面窄語錄

602幫人睇,坪山同平湖似乎一樣,成個鎮通拆,,每年看都不同樣,現在凡是摩天樓旁邊都有空村屋,雖然新高大豪,但相信會產生好多爛尾,空地隨機配置,會唔會升講唔定,但以平湖坪山光明個三區相比,感覺將來性黎講似乎坪山>光明>平湖,坪山外圍有個高新工業區,係1480再外面些少,有例如國藥總部之類的,人口唔算多人均計坪山地方政府可能係深圳稅收最豐厚的地方之一,睇鋪路同綠化睇得出過份豪華

坪山的佳華領悅

應該今年交到樓,但商場收租仲要慢慢等

樓唔關602事,係母公司的,只有商場關事

商場不算大

旁邊的商業水準鬚花鬚谷咁

坪山的佳華沙湖

規模比較大,但3年內應該唔到樓

新市鎮,周圍都係地盤

堅豪宅

白雲機場冇去,去左寶安機場

應該算租滿

去海南的排隊

其實幾多人

深中通道現家進度咁