大啖砂糖多啖屎

由於唔派息,於是星期一再0.62沽出80000股日照,業績前1.43換成次選50000股秦港,之後佢出業績減派息跌到1.36,左一巴右一巴

過埋今日業績差唔多全部出曬

燈神味皇今期買的情況係點呢?

原地爆炸:

1606-減左派息

602-冇派息

6117-冇派息

1230-丁屎咁多息

2868-冇派息

207-減派息

3369-減派息

460-丁屎咁多息

87001-大減息

螺絲升天:

90-十鳩幾厘

預測範圍內:

1576-十鳩幾厘

610-業績差冇減派

1883-加丁屎咁多息

8502-業績好冇派息

694-業績差冇派息

659-唔太差隨意

1812-唔太差隨意

405-業績差減派息

味皇新買13隻當中出左業績的起碼6隻比預期差,4隻合預期,1隻超出,所以燈中之霸也

順帶一提觀察名單的幾隻,常茂差,鐵建差,電腦網普,京客隆普,利米特普,華滋普,通號普,基本上味皇睇中的都冇乜好事

總體黎講新買的組合收息大頭的1576同90派得多,而6117同1606就爆死,幸好6117賣左部分換成90拉返條數,由於1576同90都十鳩幾厘,應該好快飛天,特別味皇買90買得有咁上下,因此佢有可能在今年超過100萬甚至爬過CTM成為最大持股,剩係CTM惠記普星齊魯4隻大頭已經差唔多夠頂上年全年的派息總額

普星味皇有兩篇舊文,當時予測佢派得幾仙,斷估唔到佢派1毫,這代表佢冇打算用盈利優先去還債,如果佢將來改心態,派息比率可能下調

過埋聽朝再更新

*1395也自爆了,再燈一隻,現家剩下的要到年中先出業績

*第二日下決心34.05沽清美蘭,0.98沽清首創,8.22-23賣左7000股新創建,本日市跌,齊魯有點郁,但普星升40%,味皇還是決定一反常態高追,0.87-88買入112000股普星,2.41-43買入40000股齊魯,首創的部分換成0.49的70000股大悅城同0.88的50000股的華南城,組合大比例優化

好似首創,以前的佳寧娜,再之前的集優同更前的中國消防,揸得耐蝕到媽媽聲,棄之又可惜,這時就需要契機,比如你你街都有D急屎,你將來必定需要廁所,但你唔一定立即搵廁所,如果此時你同時又D尿急,你就一定會去搵,無論急屎尿急單點的話推你唔郁,但疊加的話就會郁,蝕沽一隻會心痛的話,同其他加埋一齊就會變成唔爭在了,應該算是精神管理的一種

收入日本樓年幾加埋的3萬幾蚊租,也買了股票

齊魯今年關於股息稅文字好似同往年的解讀不同,風向又變?味皇打算實驗性提倉試下有冇得避稅

齊魯高速同成都高速業績

味皇覺得公路股得呢兩隻可以直接比較,其他的性質太雜了

齊魯營業額16.9億,成都20.1億,但齊魯基本100%純公路,成都有一半係油站

只計公路,齊魯營業額15.4億,成都10.1億,其他毛利率低忽略不計

停收費的日數大概係79日,唔考慮成長,咁下年收足時齊魯20億,成都13億,假設純利係營業額1/3,咁齊魯賺6.7億,成都4.3億

欠債的總數味皇費事計,等上商以後計,現家齊魯利息支出1.1億,成都1.4億,暫時睇成都的債圯碼係齊魯的1.3倍

齊魯的掘路營業額1.5億,齊魯營業額15.4億純利1/3的話,掘路賺1億?

成都的油站營業額9億,成都公路10.1億純利1/3的話,油站賺5000萬倒

齊魯每股賺0.31派18仙,成都每股賺0.208派12.1仙,派息比率皆58%,由於成都欠債更多,因此齊魯的保留盈利比例上比成都多

齊魯現在0.31派18仙,人民幣當佢1:1港幣好了,按5%息率的話每股3.6,此時PE11.6,計上年PB1.7,成都賺0.208派12.1仙同按5%息率每股2.4,此時PE11.6,計上年PB1.1

下年將79日加返上去的話,齊魯可能每股賺0.40派23仙,成都可能每股賺0.265派15仙

如此一來,齊魯到時0.4派23仙,按5%息率每股4.6,此時PE11.5,計上年PB2.2,成都賺0.265派15仙同按5%息率每股3,此時PE11.3,計上年PB1.3

由於現在齊魯股價是2.13而成都2.1,相對上齊魯估值具壓倒性優勢

假設令齊魯借多30%以同成都同一標準,可能借10億上下,咁齊魯按6%回報率利用4厘貸款的話,賺多2000萬,姑且會賺多1仙同派多半仙息,股價上影響1亳多D

因此2股齊魯換到遠超過3股成都的話,才有轉換價值

回到自己同自己比,齊魯上年冇賺少,原因是有收購,由於果79日,下年必然有起碼3成增長,這點所有高速公路都一樣,佢之前現金多,但現在已經駛乾淨了,之後借都唔會再借得多,如果變身做狂戰士是味皇所不願見到的,佢新收購的路是新通車的,因此一年內利用率會成長較快,齊魯最終增長應該會比3成多,味皇樂觀的估計下年比現在會派多8仙,現金流不清楚,應該都保留到6億7億,可能會有一D小型收購

成都高速的話,就只有果79日,由於借貸多,應該冇本錢再借,下年活動應該比較平淡,就得3成,佢上年收購油站,結果而言不是非常好賺,純利率比不上公路,油站如果同公路相比,優勢在於油站是無限期而公路有限期,就資本市場而言,回報率高的市場估值傾向較高,反之亦然,另外油站是要買存貨的,因此成都高速的現金需要保留一些,另外油站的折舊會多出黎,令盈利下降但又不損害現金流,相較公路保養,味皇覺得油站更不需保養,成都高速保留的盈利或許說還債能力會較高

惠記路勁利基業績

240利基

營業額76億賺4.4億,派7仙共8700萬

佢今年污水廠同蒸汽廠的營業額係6000萬,而上年不足3000萬,這部分是穩定的派息來源,類似的滇池水務純利率18%,春城熱力10%

佢現金減少少,負債多少少,固定資產也多少少,總體冇乜大問題,但係佢增加左大量"無形資產"同"按公平值計算的金融資產",量非常大,味皇預想佢將來有50%以上機會會在將來作出大減值

今年收左1億保就業津貼,下年冇,建造業疫情影響相對細,近白送的

8700萬派息,假設700萬來自污水廠同蒸汽廠,其他的共8000萬,如果下年抽走果1億幾保就業,咁可能只派5600萬,合共6300萬,約5仙,假設未來污水廠同蒸汽廠的營業額增至1億,可以多派0.6仙,下年利基減派息概率較大

惠記持有利基56.76%,同上年一樣,惠記收息4900萬

1098路勁

高速公路營業額31.62億降到27.25億,今年有好似79日高速免費,按比例下年營業額起碼34億

例如齊魯咁純利40幾%,今年佢高速的純利都超過10億,下年應該有13億

今派75仙,共派5.6億,假設地產1個仙都唔派,只派公路,今年5.6億下年就是7.3億,即98仙,依然比上年的108仙低

利息支出由8億增加到9億,增加相當多,只計公路賺的養全家,利息保障比率1倍多D

存貨也多左85億,佢地產營業額240億,上年209億,存貨478億,上年393億,今年存貨係營業額的199%,上年188%,如果只計營業額多出的31億,多出的部分比例為274%,不好賣有積壓

路勁在清貨前再拿錢買地不太現實,也不太安全

利息支出增加1億,大概就是借多10億廿億,路勁感覺頂多借多兩億的利息,當佢30億,做唔到乜

路勁未必會派返超過1蚊的息,現在整合期,唔計公路的79日,應該唔會有高增長

惠記持有路勁43.76%,而上年42.62%,惠記收息2.45億

610惠記

由利基度收息4900萬,路勁度收2.45億,合共3億好了,而惠記派維持派32仙,只派番2.5億,路勁減派息減得多,而惠記冇減,原因正是如此

惠記買左路勁860萬股,每股當佢10蚊咁,還駛多左錢出街

假如下年利基度收息3600萬,路勁度收3.2億,共3.6億好了,惠記可能一樣派維持派32仙,頂多比35仙你

惠記下年用於回購的金額應該在9000萬以內,考慮到路勁PB0.4而利基超過1,因此只可能回購路勁

惠記的礦場下年可能賺也可能蝕,賺的話就是賺走了利基的錢,蝕的話就是送錢比利基,左手交右手,惠記名義上盈利十幾億,來自礦場的影響+-一兩億倒

美國REIT的派息比例低忽略不計

今年惠記多左個証劵牌,估計係用黎炒買自己路勁的債券,未來應該都係蝕人工同牌費

另外惠記同利基開始直接同間接炒股炒債,不知是禍是福

惠記同路勁除左跟大市上落以外,暫時應該冇乜改變形象的力量

沽出部分日照港

早兩日0.65賤賣左90000股日照,0.68換成88000股普星

日照的業績比味皇予期差,買入目的係發水災財,糧食係入口多左,但結果發得唔係特別多,雖然佢係折舊度又隱藏左些少盈利,更主要係今次佢唔派息,味皇極失望,不能達到最初目的挑戰失敗的味皇也要想一想替代方案,收息收息收息

佢財政一貫強力,今次仲一口氣還清債添,如果說什麼時候有派息動機的話,照計現在應該是MAX的時候,但佢卻唔派,不否認佢之後會有大額資本開支,但都唔會5000萬都派唔出,味皇擔心佢分享盈利的態度,另一方面,佢上市後換董事換秘書換財務總監換核數,味皇也是有眼見的,一係佢權力斗爭,一係味皇眼挑針,雖然在財務數未上還不存在比佢好的港口股,但味皇覺得換一些次優品種做後備都得,於是打算換部分秦港,但考慮到成交量同成交價的問題,最後先換成普星,跟住應該仲會再減量,但由於財政數字始終係好不打算全走

日照出業績當日,味皇係係深圳巡視,當日係星期4,簡單結論係,深圳華南城鹹魚翻生,大概就是千年兵馬俑爬起來唱跳RAP籃球的水平,佳華就放學先多人,佳寧娜東莞的出租率由40%跌到10%咁,另外就係深圳周圍都拆,商場相當飽和,周圍都招租,外圍城區隔一條街新舊相差好遠唔統一,車又塞,學生多而且唔用書包都係拖匧,好多城寨,特別係坐巴士路過一個叫水斗富豪村的物體,遠看已經比九龍城寨更加完全體規模更宏偉,如果不是一個人真是想入去見識見識

1883業績

業績同派息都在味皇一年前的預期之內,而預測失敗的部份係IDD同短訊,味皇以為賭場冇左電話投注IDD就會大跌,點知疫情夾硬拉起左呢忽業績,另一樣係數據漫遊,疫情演變成封關結果漫游電話卡賣唔出,味皇估唔到漫游佔CTM盈利咁大比例

漫游對CTM的盈利來說原來非常重大,IDD同外賣短訊增加都再多都補唔返,今期能夠保盈利,全靠新開的數據中心

總體來說CTM的盈利今年叫持平,疫情一直維持的話,IDD會維持在現在這種不正常的高位,同時會漫游一直冇錢賺,但是疫情一收歛,IDD就會跌回正常水平並持續下降,而漫游卻一開始會維持在低位,之後回升得比較慢,鑑於CTM的盈利有增速快的數據中心頂住,但此味皇預測下年CTM的業績只會微量上升,而再下一年可能微量下降

佢有個非即期貸款56億,上年59億,今期還左3億,這個貸款是N年前佢仲叫中信一仆一碌時,蛇吞象借左唔就得100定80億黎收購CTM產生的,而現在剩56億,這貸款的借出條件好似是這貸款存在時必須限制派息比率,這有排還,因此味皇估計10年內CTM的派息比率唔會提到好高,唔可以學數碼通果D咁,不過這應該是比例性的,多少的債限制多少的盈利,少D債自由現金就多D,派8億,固定資產增加3億,還債3億,現金冇少到,算係咁

上年預測今年派20-22仙,再下年派27仙,今年姑且中左,但疫情關係下年應該要下修,漫游下年都未好得返,今次估24仙啦

另一邊廂,新意網固定資產增加13%,營業額增加13%,現金流增加17%,而這一邊CTM的固定資產增加11%

"這是替身攻勢!",政府背後靈越來越明顯,無形之爪越來越強大,偷渡城牆冇以前咁易,CTM作為城牆衛兵的作用會越來越高,新意網如果不跪的話,會被限制帶貨,但跪的話,貨主又可能走,而CTM就冇呢個問題

數據中心唔知佢做乜咁鬼祟提都唔提,單項列出黎有幾難?總之佢連網費的總額係11.2億,照以往慣例,數據中心營業額味皇推算是6億,比上年多8000萬倒

CTM固定資產增3億營業額多8000萬,新意網固定資產增加17億營業額多1.5億,2年前新意網固定資產63億營業額14億,3年前固定資產46億營業額11億,而現家固定資產144億營業額17億,如果不是質地改變,就是進入了一個低效率的燒錢階段,味皇估計新意網近期的錢去了搞地產而不是買主機,而CTM短期仲有樓面可以用,所以高效率還可以稍為維持一陣子,近期澳門的商業樓宇丟空左好多樓面,其中不少係政府的,如果有需要時轉租比CTM是很有可能的

短期CTM的增長還是要靠數據中心,幾年後的增長還要視乎澳門的填海狀況

草史萊姆

一D發音如果有幾千萬人都識聽,咁應該算係一種語言,如果說一提草史萊姆音樂,全世界大概會有幾千萬人有反應

"吔"

"好嘈"

"有聲POST"

"草スライムどこ"

"刻師傅又來刮痧了"

"草史萊姆音樂播放器"

是咁的,味皇也是二次猿,味皇當然不敢在手機同電腦上裝後門,味皇很怕屎的,但PS4度感覺仲可以嘅,味皇指的是某話題GAME

味皇到現家仲記得廿幾年前超任聖劍3同世嘉格鬥3人組的音樂,這樣的人在地球上復數存在,但終歸是少數,而且都在同一個年齡層,國際性也低,但是如果是說水管工遊戲的話,全世界會有幾千萬人有反應,而年齡層亦較廣,而且不分國藉,水管工可以說是一種共通語言

無論係紅白機,超任世嘉,GAMEBOY,PS,XBOX,甚至係電腦,終究是少數人的玩意,但是現在,手機人手一部,而且不分年齡國藉

現在的情況是,某二次猿遊戲的玩家數量匹敵玩過水管工人的數量,而且仲持續增加中,於是地球上又誕生一個新的國際語言了,第時出到外國,係快餐廳櫃檯前面點菜,橋埋手講,"i will have order",9成會有店員偷笑,"原來you也玩猿神"

味皇作為玩家,覺得這是個不幸的現象--隻GAME太受歡迎了,這將改變整個世界的遊戲生態

例如當年KOEI的三國,信長,太閣,大航海系列,單機GAME時代都是神作,但後來流行線上游戲,流行不是因為好玩,而是好賺,開發成本低回收速度快,市場上不存在單機GAME時,線上游戲想唔流行都幾難,結果通通變成糞GAME

以經濟角度來說,用過億整個所謂3A大作,然後賣幾百蚊一隻碟,玩家會諗過度過或者等二手,賣幾多隻先回本,而ONLINEGAME,特別係手機GAME,冇邊隻話特高成本,而課長課起來一疊一疊咁課

於是OL手機GAME>OL家機GAME>單機GAME,作業消費者,味皇覺得是一種品質倒退,是具有必然性的劣幣驅逐良幣

游戲開發商習慣性躺賺,自然會不思進取,不斷炒冷飯,更習慣低成本玩法,例如日本game廠呢廿幾年咪話原地踏步,分明在倒退,除左畫面好左之外,遊戲性似乎變低,缺乏創意

而現家出左一隻超自然的妖孽,遊戲性嘛...差不多全部抄別人的,遊戲性暫時來說不能叫佳,但美工遠超幾十年不思進取的傳統日商,世界級的音樂水準吊打其他低成本的遊戲,多語言對應,差唔多全部可以用的平台都能玩,開發成本可能比人地幾十年成系列加埋仲多而且仲增加緊,表面上免費,然後用鬼佬未見過的課金手段兼無上限,放個更新予告好比荷里活大片的製作成本,工具人員工收的福利花紅可比美GOOGLE總公司,而且不斷加入小遊戲進行喜好調查作為將來的開發方向,有時唔係條友做得好,而係其他人做得差,秋香同一班如花咁比較出黎

簡單講就是龜兔賽跑

實際上二次猿不是每個人都愛,但這遊戲在某些情況變成了珍奇音樂播放器,睇風景遊戲,二次創作遊戲,共同話題生成器,加上佢可以手機玩,令玩家的年齡層異常地廣,好似日本細路同巴西阿嬸之間變成可以有共同話題咁

味皇擔心的是,抄人的因為太成功,將來反而變成全世界都炒佢,結果而言更加創意倒退,更加冇人整單機GAME

人地頑皮茍用3億美元開發隻GAME賣500蚊,但出黎全部都係BLM女權教育,人人話糞GAME,賣得500萬隻,呢隻成本幾億人仔,D人課金十幾廿億,美元,錢紙不斷流入開發成本可以每日增加,姑且羊毛穿在羊身上,而且開發時完全不用學西方去考慮BLM同女拳,如果快手咁都有1萬億,呢隻仲唔10萬億?和那個猿神不同,那隻抄大菠蘿的馬騮精好似恆大造車咁純為吸水,而呢隻猿神實打實QE緊

每人每日的時間是有限的,也就24小時,如果1隻GAME擠壓了每個人的時間,那其他開發商能切入的時間就更有限了

猿神一時爽,一直猿神一直爽,但味皇好像感覺到遊戲玩家的未來每日都會更黑暗

番鬼佬國家二次猿濃度本來是0的,但未來應該會隨處可見,文化是會延續的,也許要說成精神污染?如果第時有IT狗開發得個腦的培養液世界,話唔定世界觀會用呢個

起碼作曲條友同英文配音員由不知名物體一下變成世界知名

味皇不離題,如果佢上市,味皇也不會抽,但是在投資上,有種情況係咁,好多人收息又好少賣又好,賺雞碎咁多,如果市場上出現一條友,平地一聲雷,看起來無端成功咁,叫股神又好契媽又好,反正本來唔關究的其他人,開始羨慕開始妒忌,恨應該未至於,結果呢,其他人開始自作解讀股神契媽的成功之道,自己行緊的果套拋開去模仿佢去抄佢,首先,一味抄自己很難進步的,因為總結唔到經驗,第二,人人都行同一條路,物資必然會比先行者取光,也必然會同時產生失敗者,只有走不同道路才可以避免無謂的競爭

另一樣想講的,課金一時爽,但爽完之後過一段不等的時間後,應該只會感到空虛,課金王少唔會飽肚,精神上得到的滿足唔一定能和勞力上所付出作比較,在味皇的角度來看,課金的人同飲醉酒差唔多,至少在衡量價值同代價這一點上缺乏理性,價值投資者需要的是高度的理性,同埋冇乜起伏的心態,簡單的講,在課金上缺乏自制力,追強追新的人,首先就不合適做價值投資者,和這派系的相性不合,技術分析也許更合適?感覺緊貼潮流通曉人心之所向

順帶一提,味皇是白嫖的,1個仙都冇比

應該幾多鬼佬係腦內無限再生

買入遠航

早兩日9.12再沽出10000股新創建,價錢冇早幾日咁好,0.244換入208000股遠航,味皇包曬果日的成交,呢隻創業版,味皇唔肯定佢會否派息,另外想買些漢國或建業的,由於沒有人放跳價好大,因此改買20000股華南城0.91同30000股大悅城0.51

燈神味皇,今個月的業績唔知又有幾多隻會炒車?反正選股時要做的都做了,之後就盡人事聽天命了

業績之後應該多少都有D股會價值回歸,例如冇息派的派返息咁,咁原來的坑地面升高左就有機會跳去另一個坑,當然留住收息都可以,但要視乎圍唔圍持到

下一波如果有換馬機會的話,換收租股廣告股應該好D,零售同飲食唔肯定係之後半年會好明朗,但出租率同廣告在時間上應該會行先一些,酒店同旅遊應該好遲先起步,公路同碼頭之類冇乜周期的找相對低位的同業之間彈出彈入就係,數據中心呢類的話,暫時未有比CTM更抵的坑,現在已準備左少量名單,等業績期後再睇用唔用得著

今次買的遠航上市以來從來未派過息的,味皇判斷佢如果不發展不投資只還債的話,今年是會有一點點動機破天荒派息的,由於今年佢有掟錢投資,因此今年多數冇息派

跟住呢個月好多股出業績,2020年的業績在各種意義上是獨特的,係業績出之前寫上年的分析好似不妥當就先不寫了

汽車之家上市咁多人抽,感覺硬膠,有咁多閒錢點解唔去買太平洋電腦網

味皇射程股的財務特徵

算是續上文好了:

資產負債表

現金流表

共通點自己找好了,按市場評價,呢D全部都係濕9股(隻460係1年前都係濕9股)

最後能不能賺不賺錢是成敗論英雄了,唔包100%不是老千,要中招也是要中的,反正就是照程序選股

30秒大法簡易說明(圖)

原理之前講左就唔重複了,總之就是排除法

上次應該講得好白啦,但好似仲有人唔明,今次試下上圖,再唔明都冇辦法

下面是齋資產負債表,先放一兩秒搞掂的:

係咁增發,立即排除

欠債多,立即排除

爆存貨,立即排除

存貨這一點,味皇有個標準,正正常常的公司現金應該要比存貨多,正正常常的公司應該限制存貨,存貨越多的公司毛利率越低,存貨越多的公司周轉率越低

下面是復數項目:

欠債多,如果有咁多現金何必又借?立即排除

順帶一提,有種叫福建股的東東,普遍都有錢又借錢

1.係咁增發,2.存貨多,3.欠債多

存貨多,欠債多

下面是出現變質的,可能需時長些:

19年同18年估計已經轉手

19年同18年估計經營性質已經改變

15出售資產,16年清貨,同時有還債,17年財政大有好轉,18年估計派特別息,19年改業績結算期

而下面是味皇認為理想的資產負債表的形象:

冇欠債現金一直增加的先有動機派得穩,就算去投資都有錢

肯還債的先有增派息的動機,而且還債起碼能預測還清的時間,確保進場點

之後是齋現金流量表的:

現金流少,利息太高,換算成資產負債表項目就是負債高,資產有限

現金流又正又負,冇交稅,集資,換算成資產負債表項目就是股本增加,現金減少

另外現金流表可推測出損益表做假,但損益表冇法逆推出現金流表,因為已交稅項係現金流表獨有項目,所以中銀網的資料廢就係咁解

現金流表同資產負債表同通的項目是,利息/欠債,收息/投資,集資/股本,增添固定資產&投資增加/固定資產&投資,所以兩表好大程度上通用,壞左的股邊邊睇都是壞的

現金流表主要係睇呢幾項,要排除的話幾秒的事

下面是可能超過幾秒的情況:

呢間係投資公司,主要是把收來的息轉派

如果稅率是16.5%,咁佢交的稅X6就是稅基,如果稅率是25%,X4就是稅基,如果經營現金流同稅基差別不是非常太,咁佢的現金流就是真,如果冇得別情況的話,任何數字都有可能假,就是上檄左的冇得假,這是最有效的損益表打假武器,有時帳期長現金流要用平均值

理想的現金流表味皇覺得係咁:

現金流要平穩可予測,有交咁上下稅,年年有派息最好有得加,利息唔重,唔增發,唔好咁多少動作,經理位放個西瓜係度

兩表詳細睇落去仲有好多野睇,第時變老屎忽自然識睇,但味皇想這是最低限而又足夠有效

所謂30秒大法,即係垃圾一陣就可以排除出去,可以猶豫係唔係垃圾的水平的才會超過30秒,而港股遺憾地,大半都是幾秒的事

有D股兩表非常難睇,30秒大法用不上去,例如金融,控股,科技咁,好易啫,直接唔理呢類股就可以,識睇邊D就剩睇邊D

順帶一提,30秒大法是味皇自創自家用的,外面唔係讀者應該聽都未聽過,問人冇用

係出面呢D叫基本分析

開始沽出新創建

上星期9.31沽出10000股新創建,還剩40000股等機會賣,1.14換入80000股國銀租賃

新創建現時的股息嘛,還不算非常低,而且味皇的賣價其實未返家鄉的,但總是想著歷史價是冇用的,價值投資者共通的技能是會比較,當年4rsenal時代的實力一定夠炒國足,現家霉香鹹魚咁嘅Arsenal,比較之下應該還是好過國足的,情況隨時間變化,每個時段的決定當成獨立事件就好了,唔爽的歷史唔回望就好了

查實味皇賣新創建,主要是理念不合,當年買佢時,佢的業務有公路,租飛機,水,電,污水處理,碼頭,貨倉,巴士,船,工程,就算齋計上年味皇增持的時候,佢都仲有公路污水海陸空耡大地的業務,而現家呢,得返公路,飛機,工程,貨倉,其他變成保險,得5樣,然而,味皇是從來不買保險股的

例如新創建味皇以前貪佢的業務,因為市面買唔到平,但上年有平貨,貪佢公路的話,味皇直接買公路股就好了,買了齊魯,新創建有租飛機,味皇直接買租飛機股就好了,買了國銀,貪佢工程的話,味皇直接買工程股就好了,味皇想買應力,但0.245時買不到,現在升到0.35就算了,貪佢貨倉的話,味皇直接買貨倉股就好了,上年有加倉華南城,貪佢的保險的話,貪條毛,一向不買,各單項業務都有更平的上位互換的話,何必留佢,這樣來看,味皇一直持有的惠記,又有公路,又有工程,又有污水處理,仲有賣樓同收租添,更像舊時代的新創建,味皇沽新創建,因為味皇已集齊新創建的成份

新創建的管理層向來都是辣雞,經常操縱盈利同派息,但舊新創建的現金流有如鐵壁,而新新創建就難保證到呢點,所以同樣派息水平的話還不如中信泰富

味皇掟的其中一支飛標強泰,0.11以下買左3萬幾蚊,早排某一日,佢忽然發瘟升到0.65--幾秒鐘,幾萬變廿萬,當時味皇仲等緊太陽曬屎忽,後來發現時已剩0.29左右,起身原因是湯財無端恭喜我,照計3倍應該賣啦,而味皇當時是發懵的,不知如何是好,因為太突然了,味皇沒有事先準備PLAN B,味皇原定計劃是出左業績再決定下一步,而佢冇事冇幹平地一聲雷,嚇7死寶寶,幾個鐘後整理好對策時,己經打回原形,橫財化水,不過以掟飛標來說,娛樂性倒是非常滿足,咁大個仔未遇過,截圖留念

話說回來,誰遇過像今次的疫症,至少近100年都冇人遇過,因此,在100年後的人事後看來,現在是特別的時代,他們不會想像我們的困難,只會知道股票是低位,而泡沫化的就分別對待,反正妒忌死未來人,現在股市的亂象,說是亂象好了,一生人可能只有唯一一次

現在泡沫的在平流層,結石的在地核,100年後的未來人會點睇呢?嘩,優質股好平呀,如果俺在當時的年代一定買爆佢,嘩,泡沫股好大呀,如果俺在當時的年代一定食花生

提醒一下,這在08年次按時味皇就提過一次,估唔到現家居然可以再攞返出黎講,企業蝕大本後,第時會賺返,而且賺到不正常地多,原因是蝕本後有免稅額唔駛交稅,所以之後業績報告出左黎樂觀一兩年就算,再耐D會縮水,唔好投資投機不分陪人癲