2008年11月29日 星期六

分析前討論

我係6月例行考查高息工業股時發現奧普的,當時仲賣1.1,我已經覺得超抵(現價0.52...),由於hiking向來對工業股素有研究,因此向他求教

hiking:
味皇,奧普上市不足兩年,我沒有興趣,我的想法是,新上市公司好似新樓的牆,要三年時間收水,除非有大大的誘因,否則將銀紙鋪在新牆上,很容易會脫落。你似乎對奧普非常熟悉,何不像阿Jay把資料公開討論?以下是我睇奧普的次序及想法,以及一堆問題,給你參考。

1. 公司業務:主要業務為製造、銷售、零售及批發供浴室及廚房使用之浴霸、排氣扇及電器。

低科技產品,要睇品牌市場佔有率及定價策略,身為消費者,要問自已點解唔買Panasonic要買奧普。

2. 邊際利潤率17.07%;資產回報17.99 %;股東權益回報24.30 %,三項數據都好好,但不能與工業股相比。

3. 每股賬面值0.64061.12,接近上市後低位$1.1,我成日都會問的問題,點解要比溢價?奧普有嘜比對手強得多?

4. 無長短期負債,現金3.6億(from yahoo),無得彈。2006年11月上市籌兩億幾都未用到,2006年尾現金3億,2007年尾現金有3.6億,噉好賺,無端端點解要上市同小股民分享?搞到2007年每股盈股要倒退?招股書當時點寫?d錢籌了唔用,為求一份安全感?

5. 2005資產只有1.06億,2006有3.75億,增幅絕大部份是上市籌得果2億幾現金,非流動資產只增加1.24千萬,2007年資產4.26億,非流動資產大增,但都唔夠一億,同年股東應佔盈利1.04億,我會覺得有點怪,一定要詳細解釋。

6. 去年尾中國房地產已開始淡靜,會否對奧普今年盈利有負面影響? me: 感謝前輩回應
照道理工業股不需要溢價購入這點是同意的,我亦傾向買折價貨例如味丹,勝獅等
尤其係好似奧普,每股1.1,現金佔了0.5,而有形資產卻僅有0.15,溢價0.45,相當高
但"有形資產卻僅有0.15"這一點才是重點
一般工業股係由產能去決定營業額的,即公司的成功同有形資產的投入成正比例相關
而奧普卻很奇怪的,營業額不是由有形資產的投入而決定的,即營業額同有形資產的不成比例的成因是由於它在銷售網絡上的成功而形成的,因此公司的資產負債表上出現固定資產少,存貨多,賬款多的奇怪現象
即係分銷商,品牌同專利先係奧普的生命線
佢嘅賬款構成,幾乎都係30日內的為主,看來奧普將滯銷同其他流動性風險轉嫁曬比分銷商
即係佢的溢價包含了看似強大的銷售網絡的價值,作為工業股的奧普,能夠拥有像化妝品公司的財政特點,就連我都覺得出奇
由於公司成功的決定性特點唔係固定資產投資而係分銷網絡的擴展,因此招股的錢冇地方去就不難解釋
早幾個月,大陸抽查左同類產品的安全性,奧普的合格率暫時係全國第一,而這情報的提供者是同奧普無甚關係的新聞網站,姑且可以相信
對於奧普的投資目標,在下僅沖著佢強勁而且看似可以持續的股息而來的 hiking: 太好,你對奧普有相當的認識,若果不介意,我想繼續問。


奧普溢價購買成功的銷售網絡及品牌專利,我認同。但我會問,什麼專利?至於銷售網絡,看到奧普資本開支不多,銷售應該不是在全國電器百貨中加設專櫃,那麼,奧普這個品牌效應應該是相當相當強,好似電飯煲想起樂聲牌。

「滯銷同其他流動性風險轉嫁曬比分銷商」,呢句說話代表奧普只做工業生產,送貨比分銷商後便無風險。我認識一些百貨的運作不同,我對這句說話存懷疑態度。百貨公司點解要冒那麼大的風險(先比錢,後銷售),為奧普出售產品,點解那麼多(強大網絡代表得到很多認同)百貨公司願意作賤自已?我想到的可能性有二,其一是奧普超好賺,無奧普賣等於便利店無可口可樂;其一是當中有貪污成份。我認為「強大網絡」與「風險轉嫁」並非兩個優點,而是有機會互相茅盾,除非,奧普品牌是無與倫比,超級無敵。


「招股的錢冇地方去就不難解釋」,這個答案不接受,招股時的資金使用分佈,之後出了兩份全年業績,年報必須交代,如果集團賺錢比預期多,那是合理解釋,但無端端唔駛用,我會問點解要上市?「噉好賺」唔解要益小股東?

「強勁而且看似可以持續的股息」,在yahoo顯示,奧普派息比率六十幾%,佢d錢好似完全無出路,睇翻招股書,http://www.hkexnews.hk/listedco/listconews/sehk/20061127/0477/CWP119.pdf22M79M在杭州建廠2008-2009年,24M31M用作增強產品開發能力,唔知依家進度點?

要小心的是,內地樓市轉淡,成本上升,可謂前後夾攻,邊際利潤無可能唔跌,今年建新廠,資本開支上升,現金終於有出路,是否可以持續派高息?我意見保留,因為我唔熟。 me: 根據奧普自稱,佢嘅專利係產品的外觀設計....可能係類似賣酒咁,浸酒本身技術性唔強,要賣得貴最重要係個樽靘
佢話佢係第一個生產果類產品的公司,不過由於產品容易仿冒,要人買一定要有突出的第一印象
銷售網絡確實係百貨公司度開專櫃,同埋係d"家居設計一條街"咁上下嘅地方開分銷中心,前者係博宣傳,後者先係黎料,由於產品唔係d容易裝或者即買即用果類型,似乎唔會有人特登去買,類似沖水馬桶咁,因此可能同其他野一同梱挷銷售,例如裝修果陣順便裝埋咁,即係同設計公司關係好就會好賣,地產市道唔好可能真係會有影響啦
奧普收左一成按金先會出貨,貨物到手就30日內收尾數,由於客戶唔係一定係用戶,類似批發商同零售商咁,即係佢地入左貨,自負盈虧,如果滯銷就最多收後唔賣;因為分銷商好可能係裝修佬,,接一個客同時盡量向佢捆綁銷售一大堆唔等駛嘅野賺錢,所以奧普只係佢地創收的其中一環,所以只存在賣得出同賣唔出的問題而唔係收賬問題

佢資本支出主要係人工,廣告費似乎比想像中少,可能因為其他競爭對手打廣告令更多人關注該產品,但係正式買果陣都係買返個質量最好嘅,變左冷手撿個熱煎堆,廣告都慳返;佢最建新廠,由於佢唔係需要巨大產能的類型,所以只需一次投入就可以,最中要的係同分銷公司的關係(賄賂?),以佢佔毛利一半的分銷支出,我唔覺得少
招股嘅錢用左一半係新廠度,不過當年立即賺返返黎,結果現金並無少到,如果佢冇上市,錢一樣可以賺,但係新廠就不能立即興建,除非借貸,所以上市可能只是乘好市一時之需同埋博出位
佢d錢好似完全無出路,事實真係無出路,如果佢今年唔營業,剩係收舊賬,最多可以收返3.3億的錢扣除人工同其他應該有2.5億剩(唔營業分銷支出係0,如果都扣埋就剩1億),而佢派息支出係5400萬,所以今年的派息應該可以維持
如果佢肯派息就最好,研究埋d無聊產品都冇所謂,如果佢亂買衍生工具就唔放過佢 hiking: 現在更加了解,我上個月換馬桶,由於在6星級酒店見過KOHLER,所以我都選擇KOHLER,心想衰極有個譜,在一些不熟悉的品牌中,我會選擇有品味的人的選擇。如果奧普是品味之選,我相信設計師也樂於使用。由於奧普是品牌,在網上應該可以搜尋到大量用家的評語,上深圳的時候不防到家居廣場八卦八卦,搵d靚靚售貨員傾o下市道、品牌、設計,甚至買件回家用。

之前在信報投資者日記中睇到,因為去年樓市興旺,發展商以低價出售傢俱助業主買入五星級的家,令傢俱業出現設備空置上升,遇上樓市轉淡,情況愈見嚴重。現時情況未見好轉,樓市的影響對奧普有幾大?加上股市近半年大跌,會否影響業主裝潢的預算,由以前「無限預算、質量優先」,變成「慳得一蚊得一蚊」?

上市對公司印象有正面影響,尤其兩個品牌都未聽過的話,在香港上市的一間比較令人安心,起碼有信心一年保養期內唔會倒閉。十幾年前香港都有唔少廠家無端端上市,之後成交疏落,股價低迷,低PE派息高年年有增長。

之前曾對皇朝傢俬有一段討論,有興趣到www.kennylim.com睇o下價值投資咖啡館
o下。   呵呵...hiking兄的問題真係尖銳,估唔到當時我未開始詳細研究都仲可以對答得出,如果有人對工業股有疑問,應該搵hiking解答 hiking的blog: http://hk.myblog.yahoo.com/kennylim-blog hiking做版主的論壇: http://www.stockfans.net/forumdisplay.php?fid=65&page=1

沒有留言:

張貼留言