隨機分析

我分析個股一般是無視損益表的,雖然我會留意折舊數字,現在嘗試僅用資產負債表而無視損益表同現金流表,隨機對一批股票進行初步分析,對我來說亦是新奇的嘗試

今次求其選左由100-119之間的20隻分析

100白馬戶外媒體

固定資產奇少,廣告公司咁樣唔出奇;流動比率07年只有2倍左右,唔算好,現金3.7億,債又還得7788,盈利不明(因為其他兩表無睇),但淨流動資產只有4億上下,而所有現有資產(我的"資產"的定義是"自己的東西")加起來只有區區2億左右,以佢35億市值一d都唔吸引

101恆隆地產

固定資產500億左右,其他資產基本上冇,而地產公司的存貨我唔認為有人會收,所以總資產都係500億多d,地價有幾多水分唔知;淨流動資產150億,佢市值1000億,咪講笑

102安利控股

流動比率2倍左右,淨流動資產年年有唔錯增長,而存貨冇點增加,管理得幾好;無負債,現金7400萬,加上固定資產同投資約5600萬,再加不明的其他資產合共2億,而淨流動資產約1億,因此3億的市值是偏低的

103首長寶佳

流動比率表現一流,淨流動資產約6.4億,現金4億無乜負債,佢11億的市值對佢唔住

104冠亞商業集團

07年的流動比率惡化,生意難做呀...不過存貨同樣減少,算係唔怕財政突然惡化,但係佢之前幾年的儲備都急速消失,唔知發生乜事,有問題,出局

105凱聯國際酒店

現金是足夠的,而且淨流動資產都有唔少,但係長債太多,冇必要選佢

106深圳科技

奇高的存貨,其他數字再好都冇用,出局

107四川成渝高速公路

淨流動資產嚴重赤字,一d都唔似正常公司,不過考慮到公司的名聲,有問題的可能係我...唔識睇,出局

108建懋國際

06年的固定資產只有1000蚊!?老千股,出局

109榮德豐

得幾十萬固定資產的公司.....咪搞

110中國長遠

固定資產奇少,存貨奇多,數字變化奇大,流動比率低,公司肯定有問題,出局

111亨達國際控股

近兩年的流動比率下降,生意難做,所以最近要舉債,公司算係困難當中,淨現金3億多d,市值5億都算係咁,不過佢唔肯講存貨,我唔鍾意,出局

112查無此股

113迪生創建

市值19億,淨流動資產10億,流動比率2左右,淨現金6億,可以接受

114興利集團

流動比率極佳,而且數字都唔少而且年年增加,代表生意好做,存貨管理尚算可以,現金又多,我相當有興趣,記低佢先

115鈞濠集團

流動資產年年縮水,唔可以接受,出局

116周生生

固定資產冇點增加,即係冇新分店?而佢存貨增加係指金價上升?現金比負債少,似乎唔係太好,07年作出了巨大投資,成效未知,表中數字唔係咁好,都唔可以話好差,齋資產負債表似乎不足以作出決定性的結論

117宇陽控股

先新上市一年,表中數字不足採信

118大同機械

劣質的流動比率,而且存貨水平相當高,姑且算係資不抵債,如果話最近幾年材料上升成慘淡經營都可以原諒,但03年都材料未升都差成咁....出局

119保利香港

我暈了....同05年相比咁高存貨嘅,出局...講返轉頭,公司可能重組過,變左身,睇佢股東權益就知,但我對變態(指由幼蟲變成蟲的過程,唔好亂惗)的公司冇乜興趣

現在嘗試僅用現金流表而無視損益表同資產負債表,隨機對一批股票進行初步分析

今次求其選左由120-139之間的20隻分析

 

120四海國際集團

現金流為負數,冇交稅,蝕錢貨,出局

121正大企業

現金流不穩定,有巨額的利息支出,成身債,唔抽水就會破產,出局

122鱷魚恤

現金流為負數,有3年冇交稅,即有3年蝕錢,而且又成身債,出局

123越秀投資

只有今年出現負現金流,但有交稅;同時因為佢財政惡化,所以大量借款,而佢將來應該有能力回復正現金流,因此巨大的利息支出可以看作"盈利回復的潛力",或者係一個買入機會,佢有大量股息收入來自盟友,07年約2.8億,可以想像佢有非常強大的盟友,可以係佢有難時加大股息救命,市值77億,同"正常的"現金流16億相比,比較吸引,加上肥大的盟友,價錢相當吸引

124金威啤酒

只有今年出現負現金流,但有交稅,同時因為佢財政惡化,所以大量抽水,但同越秀唔同,佢盈利就算可以回復但股票已嚴重攤薄,而且公司管理不善就向股東抽水係老千所為,出局

125新興光學

現金流為03年1億,04年9400萬,05年8000萬,06年8300萬,07年1.4億,由於05年開始工業股因為成本上升而大出血,但佢似乎有走出困境的本事,盈利回復了很多,而"盈利能力"明顯提高,因為公司成本已經不是03年可比的,即07年的1蚊比03年的1蚊更多血汗;有交稅,財政上冇明顯缺點,市值10億,貴左少少

126達成集團

現金流係正數,但衰退緊,唔同因意外受損的公司,佢係自然死亡的,連投機價值都冇,出局

127華人置業

現金流不穩定,但有唔錯的盟友股息支持,佢現金流冇乜可預測性,放棄

128安寧控股

現金流為負數,冇交稅,但有唔錯的盟友股息支持,而且有一d銀行利息,但佢卻靠債券維持生命,借新債還舊債,好似卡奴.....出局

129泛海集團

利息支出未免太高了,而且仲年年抽水,出局

130慕詩國際

現金流同稅款都表現幾好,相當平穩,但未必可以再進一步,息率1分,如果可以長期維持,利用戰術或者可以獲得令巴菲特滿意的長期收益

131卓能集團

現金走得快,交稅又唔大,欠人一身債,破產好痛快

132中國興業控股

近年業務好似唔錯,收入多交稅多,但佢06年之前唔駛交稅,因為蝕錢;06年轉盈時可以使用扣稅額令盈利暴力的上升,股票應該升左天(我冇睇佢股價而作的預測),因此最好的時機已經過了,不用再管它

133招商局中國基金

比起財政狀況,基金經理人品先係重點,我唔識睇相

134查無此股

135中國(香港)石油

無論本體同盟友都相當有實力,財力強橫,無明顯缺點,因此無機可乘,冇平貨撿

136馬斯葛集團

現金流係正數,但衰退緊,利息支出唔算太多,但公司再衰落就應付唔黎,出局

137金輝集團

03年現金流8400萬,07年10億,暴發戶,而且佢的稅金奇少,有d可疑,放棄

138中建電訊集團

經典中之經典,請你觀賞一下它精美的財務數字,我做核數師一定辭任

139越南控股

唔肯公開稅額數字已經係死罪,出局