完成第一波攻勢

7月2號以0.43買入10000股中國消防,7月7號以0.7買入10000股第一天然,7月8號以1.02買入12000股奧普,接普下星期月供買入5000蚊的匯豐,第一波攻勢完成,除左中國消防係完成被收購前都唔派息外,其他的3樣應該能為我帶來相當於每月175蚊左右的利息

買入奧普的過程頗為曲折,佢開市前報賣1.07買1.18,好明顯係冇成交量的現象,我set左1.02買12000股,1.02是因為1係一個心理位,應該唔會咁易有人用1蚊放,而且同我一樣想法的人應該會set 1.01的價位,所以我姑且set左1.02的價錢排隊,由於同現價相差比較大,我沒有抱大期望可以買到;開市後14分鐘,居然有人賣4000股比我,結果我變左大力將奧普推落上市新低,我可以想像到沽貨比我果位朋友內心一定非常痛苦的,1.18同1.02確實有一定的反差...你的痛苦讓我代你承擔吧-雖然咁講,我買的是12000股,永亨先同我買4000股,如果之後仲冇成交,唔通收我1/3手續費?邊有咁荀,如果次次都同我買4000股,要我比3次手續費就唔方唔痛苦了,結果我買到貨反而變得焦急,而成朝只有我的4000股成交.....好彩午市一開始就比我買埋剩低果8000股,似乎有唔少人午休時比我的52週新低影響了心情了,紛紛沽貸離埸,仲越沽越低,不過意料中的是最低都是1蚊,結果偶然間我做左一次mark價的大戶

呢兩日休息,我進行關於流動比率的研究,有點成果,感覺自己又升了LV了

上星期去珠海的百貨公司偵察,杯面幾乎全部都係賣康師傅,都唔知係唔係打龍通...統一同日清只有小量,今麥郎仲多過佢,農心冇杯面,係袋面有十幾包,係澳門見到的綠色食品的杯面反而係大陸見唔到,比較出奇

橙汁我見到都係統一的世界,佔6成,康師傅都有2成,美汁源佔1成,其他是qoo等,匯源似乎連1%都冇,虧佢仲自稱龍頭,我記得04年果時匯源的佔有率同統一咁上下,果陣一支含橙量好似係10%定20%,現家同一支野少過5%

餅乾最多的是太平同四洲或者說只有太平同四洲,太平原來是卡夫

味精只有太太樂同味之素,雞精係太太樂同家樂牌,味丹係乎仲有好長的路要行

上次提過展鴻的客戶銀鷺,佢佔有率奇高,拿起個罐睇下,生產日期係4月,似乎去貨速度都仲可以,我事後調查過佢原來係中國的馳名商標,難怪,咁展鴻今年的定單應該增長唔錯

雨潤的肉腸也看到,不過比起雙匯就少得多,雙匯的雞肉腸我以前食過,味道麻麻;大陸的肉腸的成分都一定含亞硝酸鹽,佢有劇毒,雖則食你唔死,外國當然禁用啦,但係大陸度佢仲係合法的添加劑;因為我知道佢產品有毒,所以唔打算買雨潤的股票,何況佢的財政都唔係特別好

零食方面,旺旺賣得最貴,但係佢全系列的產品都有咁上下的競爭對手,例如喜之郎,黑皮,康師傅,徐福記等等;紫菜是四洲,喜之郎都踩一腳,另外以前見過的波力海苔原來比綠色食品收購了

奶品方面,鮮奶伊利比蒙牛多少少,基本上只有它們,而光明改行賣奶粉同芝士了,生意好似相當唔錯

我偵察的目的是為了看奧普的產品-肉霸,結果失望而回,反而我看到老二-櫻花的同類產品,總算知道了產品是甚麼東東,只有冬天先會好賣的產品,而且夏天同冬天銷量相比會相當極端;如果奧普走的路線同櫻花一樣,遲早會做埋廚房用品

去左新華書店買左本歷史書<<1929年大崩盤>>,現時回顧歷史比學新知識更有意義