外出偵察

出去行左一陣超級市場,百佳同天客隆,一個香港日本系,一個大陸台灣系

紙包飲品方面,兩間都係陽光同維他佔左大半,陽光我都係鍾意以前深綠色包裝果陣嘅味道,現家分明變左糖水,我已經改飲維他了,百佳其餘部分係道地,楊協成,qoo,同雀巢居多,天客隆就統一同康師傅較多

陽光同維他係宿敵嘅話,就唔可以唔提珍珍同卡樂b啦,兩者鬥左幾十年,到現家都仲爭緊貨架,卡樂b手下仲有熱浪同粟一燒,珍珍得牛仔片,數量上始終卡樂b佔優,不過味皇一向都覺得佢地貴夾唔飽,人地請我食就好,自己出錢實會肉赤,所以剩係買過媽咪麵

杯面方面,百佳以日清,農心為主,其餘為壽桃,統一,康師傅,福字等,天客隆斬係日清最多,但數量不再是壓倒性的,其餘統一,康師傅佔了不少,壽桃,農心佔了一少部分,另外四洲的比例亦不少,這一點和大陸華潤系的超級市場一模一樣,而百佳沒有四洲賣的,同樣,天客隆仲有極少量的是味丹及綠色食品的杯面,綠色食品系列在澳門係第一次見

鼓油基本上只有淘大同李錦記,兩者的母公司都係日本味之素,所以本質上無乜分別,傳統的珠江橋牌死左去一二角,都係佢管理不善的結果,浪費了一個名牌

另外見到展鴻的其中一個客戶,銀鷺牌牛奶花生,都唔知佢幾時黎左澳門,至於第一天然的產品仲未見有,還需努力

最後我只係天客隆買左3罐味丹的綠力黎飲,10個半,盡一下股東嘅責任