股息率分析法(自問自答)

for:初心者

股息率同派息率有乜分別?

股息率的計算方法係 每股派息/股票現價

例子:3988中銀.佢上年派息0.1,現價3.65,上年股息率=0.1/3.65=2.74%

如果中銀股價插到2.95,上年股息率=0.1/2.95=3.39%,即係佢股價插左24%之後,股息率反而上升24%,相反,如果股價上升24%,股息率會下跌24%

但係有一點要注意,無論股價同息率點變化,你手上有1000股就可以收到100蚊,唔會多唔會少

派息率的計算方法係  每股派息/每股盈利

例子:3988中銀.佢上年派息0.1,盈利0.237,上年派息比率=42%

好此中銀咁,佢派息率在35-45%之間,係公司政策,唔會因為股票變動而改變

唔好將兩者混淆

 

for:初心者

點解3988中國銀行06年派息咁少?

佢06年盈利0.185,派息比率係40%左右,咁佢會派0.074左右...

咪傻啦,佢06年6月上市,做佢幾個月股東想收佢成年息?佢只係派左半年份量的息,所以先得0.041咁少,匯豐實行倒扣手贖費(簡直係利益輸送)

07年盈利0.237,派息0.1,咁就正常

工商,中交建第一年派息少都係咁

 

for:初心者

將來3988中國銀行的派息有多少?

08年中銀很可能派0.13,咁現價3.65的預期息率係3.56%,而唔係上年股息率的2.74%

自己買嘅時候要同時預測一下來年派息

如果佢的派息每年增加,例如0.1   0.13   0.16   0.2   0.25   0.31

咁3.65買入,5年後預期息率為8.5%

如果2.95買,5年預期後息率為10.5%

順便一提,如果可以保持增長25%,第20年該年3.65買的收本金237.6%的利息,2.95的收294%,類似以前的匯豐

 

for:超級初心者

239白花油的股息能維持嗎?

例如白花油07年的現金流係3000萬左右,但係佢派左4000萬息,公司的現金於是少左1000萬,咁落去派多幾年就派咸鴨蛋了,點同你派多80年?唔可以一直維持

 

for:超級初心者

560珠江船務的股息會成長嗎?

我以前提過,珠江船務的收入分兩部分,一部分係佢自己的收益,係可以自己控制的,另一部分係盟友分的豬肉,唔係自己可以控制的,珠江船務只為自己可以控制的收益用於派息,同樣收入結構的好多公司都會咁樣

珠江船務的自己可以控制的收益佔總收入的一半,如果佢總收益上升50%,但係可以用於派息的只有其中的25%,加上珠江船務自己的收益增長唔係特別快,而且佢又唔改派息政策,揸幾年息率冇未升6%都唔出奇

 

for:超級初心者

572中國包裝集團的股息能維持嗎?

佢07年的現金流有1.2億,扣2000萬稅都仲有1億,佢派息先派得2300萬,現家唔係佢能夠派幾多,而係佢肯派幾多的問題,佢冇任何派息政策,想派幾多就幾多,由於雞碎咁多的股息(都成7厘*o*)對公司的財力唔構成壓力,立即加三倍都冇問題,問題係想點派先對管理層最有利

股息維持應該是沒有問題的,甚至有機會投機性升幾倍添

 

for:超級初心者

1076第一天然的股息又如何?

財政同572一樣,唯一不同點係佢有固定的派息政策,派盈利的33%,如果佢要係派息度做手腳就要修改盈利數字,例如07年佢設計左一筆特殊支出(真係支出嗎?)令盈利下降5000萬,基於33%的派息率,佢可以慳返1667萬的股息唔洗比,雖然我唔覺得佢係特登咁做,不過股東的現金收益確實因此受損(正常應該派5.4仙而不是4仙),下一年應該能回復至5.5仙以上

 

for:超級初心者

2317味丹的股息能維持嗎?

佢07年現金流5500萬(美元,下同),但由於味丹有世界最強的折舊,所以公佈出黎的盈利會少3000萬,再減去400萬的銀行利息,再扣稅450萬,剩1600萬,佢派息政策係條文化的派盈利的50%,即800萬,(實際上派左650萬,其餘150萬唔知去左邊)

由於佢的派息佔現金流的比例很少,就算業界喊生喊死的05年都有3000萬,所以佢有足夠能力維持派息

不過有能力維持同可以維持的意思差好遠,主要由於佢條文化的派息政策同佢龐大的折舊,如果味丹的現金流微增至6000萬,由於要減3000萬的折舊,咁佢的稅後盈利可能會係2100萬,比1600萬上升31%,派息肯定會上升31%;如果味丹的現金流微跌至5000萬,,咁佢的稅後盈利可能會係1200萬,比1600萬跌33%,派息肯定會跌33%,係呢度,折舊成為增長率的槓桿,所以味丹的股息必然大起大落

我認為味丹業務微增的可能性比微跌大

不過無論佢盈利幾多,由於佢用折舊收埋左3000萬,佢公告賺定蝕,公司本身都無關痛癢,因為起碼收埋左3000萬的營運資金,根本唔怕財困