股票的道德審查

大部分人買股票,有錢賺就好,話知佢老唔老千,不過總會有一些奇人異士要只要賺良心錢而放棄很多機會

對我來說,買一萬蚊股票同打本一萬蚊做生意一樣,即使唔係自己揸fit,都想搵返正行黎做,由於我自己在邪惡的公司打工,賺的錢都係黑心錢,就算澳門政府合法化並用那些錢派糖也改變不了黑心錢係黑的,也許澳門人唔賺就真係要等乞米,況且其他地方一樣會去賺果d錢,因此作為對地球生產毫無貢獻的一份子,我總想做番d維護世界和平,刺激生產市道的活動,而且仲要顯得正大光明咁,所以我先咁熱心中國消防一類的股票,相比一些類似澳門博懵股份有限公司或者嵩山笑林寺旅遊控股咁上下的股票,除了代表熊市前夕之外就引不起我的注意

因此我願意買某類股票即係代表我樂意投身該行業的意思,反之亦然

所以,我不想買地產股,因為地產商係邊度都令人討厭,除了政府,因為佢唔係人,好似領匯算是投資者的恩物,而我卻覺得佢為富不仁

我不想買保險股,因為我認為保險是數口精的人騙數口差的把戲,銀行都有做保險,所以我也不太喜歡銀行,不過我卻未能排除銀行股在我的組合中,不喜歡銀行同時又不討厭銀行,比較矛盾

我不買博彩股,因為我成了幫凶了,不想再做埋主謀

相反係我就好樂意買工業股,農林牧漁股,水喉電燈股,安防股,食品及加工股等等,例如中國消防如果有日轉營成了中國軍火(頗有可能)我就不可能再有決心永久持有了