592堡獅龍

妖!堡獅龍賣盤,股價急升4成,我原定於8月3日出糧後買入的計劃打亂了,唔通連過天都唔鍾意我?

堡獅龍先前的股價一直在大約0.315左右,我認為佢合理估值為0.9,有3倍水位,係全部成衣零售股之中最最抵買的一隻,但現在0.495,估值仲高過金利來,仲點買得落手?

我認識堡獅龍始於日常生活,佢係噴水池有間巨大的舖頭,客流比對面的佐丹奴加上包浩斯再加G2000的合計仲多,南灣又有間兩層的舖頭,客流比對面的慕斯的多50倍以上,威尼斯入面又有間舖頭,舖租冠絕港澳,還有冇其他舖頭就唔知啦,剩係知澳門街有三種市面流通的膠袋--屈臣氐,八百伴,堡獅龍,只要一出街,就梗有個膠袋係左近

而且我非常非常鍾意佢綠白樹仔的設計

因此我對堡獅龍的評價極高,這是也是林奇的日常生活選股原理

(百萬)      08           07            06             05

盈利        63             9           105           181

存貨      230          306          254           215

盈利看來是體無完膚,原因是存貨賣唔出,08年開始清貨,盈利好轉

股價以0.315計,市值5億,到底是多少市盈率呢?現在疑問在於盈利不明

(百萬)           08           07            06 

港澳盈利  140         111          122

大陸盈利   -38         -28              7

台灣盈利   -16         -54             11

深入研究其財務報表附註,得知07年起的慘蝕源於分支業務,而港澳業務盈利一直很好,合乎日常所見,那麼我假設堡獅龍分拆3地業務,根據市場計價,港澳堡獅龍盈利1.4億,市值18億,大陸堡獅龍虧損,市值1蚊,台灣堡獅龍虧損,市值1蚊,三間野合計市值18億零兩蚊,為原來市值的3.6倍,即是說堡獅龍立即宣佈大陸堡獅龍同台灣堡獅龍破產,公司股價就會升360%,邊有咁嘅道理

按資產淨值0.412計,因為係成衣零售,毛利率高,可以比佢pb2,即是合理值為0.824或市值13.1億,而按盈利計,港澳盈利起碼1.2億以上,而分支業務又唔會一直無止境蝕落去(一直蝕自然會將佢摺埋),因此用1億計,市盈率15,合理值為0.943或市值15億,平均合理估值0.9左右應該相當均真

而且當盈利1億時,3年盈利為900萬,6300萬,1億,扮到好似好高成長率咁(再下年更為1.4億),可以騙下人,隨時陰到個30倍市盈率