7月31日

終於完成買樓的手續,今日起我就欠銀行周身債了

欠國家錢的是上流人,而欠人錢是下流人,你今日下流了未?

樓價124萬,經紀佣金12000,律師收左41000,原來律師報價計理印花稅,律師費只需28500,區區是香港的4倍而已,抵到爛

向中銀借左94萬,利息p-2.375,供15年每月6200,淨租金為3200左右,任何角度都算唔上精明,係得位置係正巴士總站呢點好

買樓資金有部分係來自股票沽款同外幣存款,最近兩者急升,多少都會因提早沽左而懊惱

律師費比預期少,因此新華文軒的沽款可以慳返,由於bossini升左超多買唔落手(雖然仲係好抵),其他目標好似味丹德昌錦江等都升到不似人型,於是改為買入上海集優8000股,作價1.47,現在共持有22000股,其實我可以再買有10厘息的奧普都得,不過佢升得太多,心理會唔平衡,越溝越淡就可以好爽手,越升越買就唔多自在,買貨資金來自新華文軒的沽款同中銀的股息,我持有中銀13000股,有股息1916蚊,提左實貨,所以免稅,不過相對地浪費了換馬中信銀行的機會

最近逆市急升兩成多的錦江,估值終於追到大酒店同香格理拉,再加上上海慨念,同復星一樣,應該吸引左唔少散戶買,但是在現在這價位,冇賣出的理由,但也不應再買入

投資組合在上年12月中因為第一天然自爆,縮水至15萬,到今日升到36萬以上,最大貢獻係中海/東方,錦江,中銀,匯豐這幾件垃圾之中的垃圾,中海由10蚊跌落黎,跟住兩年仲要蝕錢,錦江就由5蚊跌落黎,之前係1蚊以下浮沈左半年,中銀被譽為最垃圾的內銀,上市至今都係3個幾,匯豐跌到33蚊整喊師奶,供股減派息,到底跟大行的研究買有前途的股票,效益會比買垃圾好幾多?仲有嫌買正股冇發達的人,有幾多個發左達?

投資之道,無非是人棄我取