增持激成

今日以3.48排隊買左1手激成,剛好湊夠10000股,而動向3日間跌回原價,血肉模糊的大脾突然發現有些結焦的蹟象

買激成時主要是用左30秒大法,年報只睇左2010年用2011年半年的,今日先番睇以前的年報,原來2000年時激成的盈利只有600萬,之後也不過是2000幾萬,仲冇息派,手上的資產僅有氹仔的海洋花園咁滯,激成暴發的原因是賣掉海洋花園,用那些錢買酒店,現在也是這樣做,同玩大富翁冇乜分別,我印象中海洋花園賣成十幾廿年都賣唔曬,以為佢好似龍園同大明閣咁係爛尾樓,原來佢係學老甜甜咁丟空十幾年唔賣等升值,見好價先揤一D牙膏出黎,吹漲,近兩年激成買左間舊金山的酒店同兩棟日本的宿舍,買入價的回報率6%多D,比起+X哥的估值師厚道得多了,另外我以前說過大酒店(45)的折舊年限是150年,原因說不再多講了,而激成的折舊年限是25年

題外話,用那個炸鑊煨番薯相當唔錯,做法是選一些幼細的番薯,貪佢快熟,上次係拱北買個半一斤,用水喉沖住水,用百潔布,鋼絲刷都得,用力刷佢捽佢,捽甩佢左層表皮,甩唔曬都冇所謂,橫掂都食得,之後索左D水佢,150度叮佢20分鐘就食得