2009年9月9日 星期三

味丹09半年業績

我想味丹是不會令人產生任何興趣的股票,讀者也不會看我的分析,但我卻很喜歡它

由於越南工廠全面停工,本來以為今期業績會見紅,整個上市以黎最唔見得人的成績表出黎,跟住股價大跌入貨,點知業績出黎居然賺830萬美元,仲有息派,大失預算,唔知好嬲定好笑,不過由於出左靚靚業績出黎股價都照跌,所以我係笑緊的

營業額1.33億美元,純利830萬,派息0.273美仙

排污事件係上年9月發生,10月停廠,今年第二季先可以限量開工,當時味丹有2個月存貨,即味丹最困難的時期應該係12月至4月,味丹話排污改造會係第三季大致完成,即係現家,應該下個月就可以全面復工

今個業績期係1月至6月,即期內停工4個月,08年至今的半年營業額為1.83億,1.66億,1.33億,假設今期平均產能為以往的50%,即正常營業額為2.66億,銷售情況其實很好

主要原因係山寨味精廠因為金融海嘯破產(如果阜豐唔係上左市集資,佢都破產),一時業界產能不足,價格上升,味丹由於台灣同大陸都仲有生產線,生產的味精可以高價賣出,營業額同毛利率自然高,不過味精的高價是有限期的,當味丹恢復產能,味精的價格會下跌,另外味丹亦提到"中國味精業者近來的大肆擴充產能,不僅對國內味精市場造成沖擊,並且對國際市場競爭更加激烈",指的中國味精業者就是阜豐,其產量擴充後並不會少於味丹,不過競爭情況也會好於05年的時候

阜豐的原料係粟米,全部為採購所得,而味丹的原料係木薯,一部份為自己種植,在成本上味丹佔壓倒性優勢,不過作為台資的味丹,產品在中國銷售可能會有奇特的阻力

味精同谷氨酸(味精原料)因產能不足,味丹放棄直接銷售原料,全部產能同原料用於生產味精,而且只足夠賣比日本的長期飯票,客戶似乎冇因為味丹的環保問題而放棄長期的合作關係

其他產品方面,牛飼料暫時不再生產,原因係佔用產能同跌價,對大成生化肯定不是好消息,而薯粉亦因排污未完成而停產,可能益左中國面粉,不過現家味丹應該恢復馬力,肥料產能伴隨排污工程進行,今期營業額為650萬,由於係有機肥,而且原料本來就係廢料,因此毛利率應有70%以上,當工廠恢復生產,廢料亦會增加,肥料銷售亦會增加

成本方面,糖價v型反彈,已比上年同期加價4成(大成糖業?),木薯因為味丹突然停產而變成供過於求而跌價一半,基本上全世界係得味丹用木薯,當味丹復產自然會加價,氨跌價26%,原因係國際化肥跌價,氨係尿素(氮肥)的原料

09半年毛利率24%,上年18.6%,今年毛利率上升係因為業界產量少左,仲可以再升,但高價情況唔會維持太耐,因為毛利率會引入競爭,例如阜豐都擴產左3倍,09半年純利率6%,上年5%,味精唔係高增值行業,純利率不會太高,但以現時的利率計,6-10%是合理的,如果純利率太低,買美債就算

用固定資產計,味丹歷史的現金流/固定資產比例應為25%,現在看不出下半年味丹會惡化

存貨水平同上年一樣2個半月存貨,應收貿易賬亦等於上年水平,即7-10月的銷售應等於上年同期,証明味丹的銷售情況恢復至上年同期水平

現金減1359萬,大致等於短期借貸減少的1472萬,長期借貸增4121萬,770萬用於交罰款,2200萬用於排污工程,其餘還短債,淨利息支出60萬,現金流足以支付,總借款由去年底5300萬下降為4060萬

上年臨時中斷的買田計劃重新啟動

員工3710人,越南2872,中國823,台灣14,香港1,行政費1363萬

上年尾3697人,越南2836,中國848,台灣13,行政費1211萬

味丹似乎沒有裁員的需要,罰款死唔去,金融海嘯都分毫無損

派息比率為50%,居然有派息,証明管理層信守上市時的承諾,公司應該幾需要錢的,加上有金融海嘯呢個籍口,一般公司都會乘機減派息唔派息,味丹仲可以保持派息兼減債,公司上年創上市新低,貪心的董事很可能乘機發認股權,不過味丹冇咁做,似乎味丹的管理層係市面難得一見的正人君子,雖然能力看來不太突出

味丹的號碼係2317,係台灣,2317係鴻海的號碼,說明味丹係有野心的,希望佢做得到

總體來源,味丹的業績令人驚喜,下半年肯定仲好,但長期要留意阜豐的競爭

我持有少量現金,現在頭痛緊買味丹定奧普還是集優

沒有留言:

張貼留言