美蘭業績

機場收費增加1成,希特拉都阻止唔到佢加價

店面收租增加兩成半,希特拉都阻止唔到佢加租

海南島的客量是增加的,但來自三亞鳳凰機場的貢獻反而下跌左1成,本來海口周圍係乜都冇的,游客首選的自然係近景點的三亞鳳凰機場,但現家海口起到幾個新景點,咁美蘭機場的立場就大為改善了,今期的業績增長大半都係搶鳳凰機場的,客量增加店面自然可以加租,而且今年冇上年咁猛嘅台風

9月新翼用得,到時可出租面積增加一半,估計每個月多1000萬收入,同時停機坪多1成幾,可以容許更多飛機同更快上落,多少能提升機場收費

新翼起好之後立即就起138億的新新翼(美蘭出72億,每年利息支出要成4億),資本支出仲未停得到,還是說變得更離譜,今期由於常規收入多左多而利息支出冇變多而多派息,但下半年開始又變返疑問,當美蘭全年賺5億幾6億,但下年開始要比4億利息的話就有排餓,當然錢係分期比的,唔會話一次過借曬,假設分三期比,初期的利息支出就1.5億上下,第二期3億第三期4.5億咁,或者會強徵旅客機場建設費圍皮,每年1500萬人每人搶10蚊就有1.5億,成本10新翼的工期兩年,咁成本7倍的新新翼的工期起碼唔會少過兩年,新翼佔地125公頃,新新翼佔253公頃,看來3年差唔多

(138億253公頃,平過邊度邊度條跑道)

新翼10億成本,回報15%就會賺多1.5億,即每股0.31人仔,新新翼唔起的話美蘭全年每股賺1.3人仔,而新新翼上馬後,當利息分別是1.5億同4.5億,每股只賺1同0.4人仔,N年後新新翼用得而回報15%就會賺多11億,即每股多賺2.27,理論上,總體計美蘭係值得養的幼齒,幾時先到收成期就一件事

投資十幾廿億係機場外面起商場,臨門撻Q政府唔批,慳返筆資本支出,現家缺水應該唔會上馬住

今年美蘭股價試過9以上可以發A股的,加上鳳凰機場賺少左,正是收購鳳凰機場的好機,不過股市虛火完之後打回原形,阿爺亦禁止公司IPO抽A股水,咁又有排等

REIT業績

823領匯

唔講其他,領匯賣咁貴係因為佢係惡業主,租客係綿羊,比業主剃完毛仲要捉去羊當奴度油炸

而領匯開始賣公屋商場,買大陸樓,同其他REIT同質化,咁仲可以維持到惡業主的身份?維持到高溢價?

778置富

派息增至23.38仙,現價6.3厘,負債比率31%

利息支出1.3億,毛利為利息的約5倍

財政好好,又有得加租,驅蝗短時間未影響到佢

魔鬼出國,置富有機會做垃圾桶

778>823

1270朗廷

驅蝗後入住率同房租少左,派息減少到11.7仙,財技效果未到期,到期後會再少至11.1仙,現價7.8厘,負債比率39%

利息支出6500萬,毛利為利息的4倍

1881富豪

驅蝗後入住率同房租少左,派息減少到7.4仙,現價7.4厘,負債比率39%

利息支出1.1億,毛利為利息的近5倍

同1270一樣全部酒店都係香港冇法分散風險,由於美國唔加息,未需要考慮利息支出增加,如利息加一倍富豪毛利少1/4,而朗廷則少1/3,所以富豪值得有一D溢價

同樣的負債比率但富豪毛利更高說明富豪的酒店質量較高,又或者是朗廷的物業比富豪更高估,冇相熟估值師搞過的話實際朗廷負債比率超過45%

暫時1270派息更高於富豪,但美國真係想加息的那個時候,就富豪更佳

1275開元

派息減少到10.75仙,現價7.4厘,負債比率33%

利息支出4000萬,毛利為利息的近3倍

好彩利息唔加,毛利低只是資產作動不良,由於借貸是美元,所以同上面兩隻冇分別,講旅業前景邊個衰D係香港衰D,1275都叫話有老鼠樂園開張

人仔貶值會減少幾%租金,但成長可以填返,負債增值則為一次性,有人鬼崇放臭屁索到都冇乎,但聖斗士係唔會聞兩次臭屁的,在預料以後有人會放屁的前提下,自然可以做預防措施,做張人民幣遠期其實唔難

1275>1881>1270

808泓富

派息增至8.7仙,現價6.7厘,負債比率28%

利息支出3700萬,毛利為利息的約4倍半

現時的形勢,寫字樓前景姑且比酒店好,因此808會優於1881

這種負債比率說明估值師隻手非常滑

778>808>823

(陽光未出業績就唔寫了)

2778冠君

派息減至9.6仙,現價只有5厘上下,負債比率23%

利息支出1.7億,毛利為利息的5倍幾

朗豪部分毛利5億上升中,花旗銀行自身則跌至4億,假設朗豪之後升5-10%會多2500-5000萬,花旗銀行升5-15%會多2000-6000萬,就算最其上限的1.1億,毛利增加也不過是1/9,現價的5厘價值全無

405越秀

派息增至15.37仙,現價7.7厘上下,負債比率31%

利息支出1.7億,毛利為利息的3倍幾

大陸減息雖有利405,但佢78億債入面有幾十億係美金,呢兩日仲借多左添

今期用左4000萬補貼,剔除服務或乜叉的毛利為4.3億,假設增長3%就多1500幾萬,全年3000萬,派息16仙冇乜問題

服務或乜叉到補貼到期前應該有些少機會填到果4000萬空缺

東塔就起好,加價唔睇特別睇好,如有增長都只會由白馬大廈同書城提供,新買的上海樓亦會有不明的貢獻

6139金茂

派息23.4仙,現價看來9.6厘,負債比率38%

利息支出2.2億,毛利為利息的4倍,但一扣左佢奇高的"管理費"後得返兩倍

果23.4仙原來有6.6仙係老母比的零用,扣除後得16.8仙或6.9厘

補貼上限3億,今期用左1.3億,剩下的下年頭就搾乾而變返7厘,你可以理解為折讓3億賣比你

債84億,半年利息2.2億近5厘,看來人債美債各半

前景上海比廣州好D,因此6139>405

1426春泉

派息增至14仙,現價9.3厘,負債比率34%

利息支出1300萬美,毛利為利息的2倍半

全美債加息會重傷,好彩唔加息,聞屁後估計已進入聖斗士模式

債重,所以多數唔會收購

前景幾好,但今期揩左野要靠下半年的成長填返,想加派息不太實際

但9.3厘贏曬

87001匯賢

派息增至13.63仙,現價8.9厘,負債比率18%

利息支出8400萬,毛利為利息的10倍都黎(考慮到李家估值師同東方廣場的有效期,嘻嘻就算)

前景很好,前景好的比前景差的大份得多,加租冇乜問題,債少貶唔貶加唔加息影響都唔大,有力搞收購

如果無視有效期,87001>1426

SOHO業績

最終今年只能收到微量的股息，相當失望，不過味重倒很歡迎佢轉營為收租佬，因為時間一般都企係業主而不是租客同賣主一方，等幾年對味皇好閒啫，集優新廠等佢3年，美蘭等擴建又4年，奧普都揸左8年啦，只是soho搞到味皇看起來買貴左7到冇朋友

soho大把人有貨，要睇業續分析雪球度大把人寫，去雪球睇啦，味皇補充d冇人寫的內容就算

佢個3Q乜Q,轉換成香港的日常說法就係搞劏房，租比個體戶，由於soho寫字樓個名貌似可以增加屬性點，如果騙徒的登記地址係甲級寫字樓，咁佢行騙成功的概率就會大幅提高，好似澳門d千幾呎豪宅好多時租比賓賓廿幾三十人住一間，日日去會所坐，話比人知住係豪宅，身上噴的臭水都變香水

就咁，本來應該空置的地方，以不正常的高價高價高高價租出，結果而言會令呎價強烈扭曲，爛床位king's cube呎租仲高過天璽一樣，於是你睇落soho層寫字樓呎租超高，就以為佢神靈附體而作過度評價，將來如果出現天價租金唔好過度反應，好賺就自然多人跟風最後就回落返似樣少少的呎租

soho最近唔買地唔起樓，因此資金需求唔多，加上佢財政好，有高派息比率的動機，當然只有動機並不足以包生仔，現時點根本估唔到佢肯派返幾多出黎，現家講呢d同毛利小5郎講“你就係兇手”一樣不可靠，“你就係變態”之類的都係等臨完場比瘟神黎講啦

雖然佢唔起樓，但唔代表佢唔會買現樓，現家佢欠200億負債比率先25％，現金流又強，因此再借一兩百億不成問題，但現棲一般得3幾個％淨回報，在借港元會有風險而借人仔利息又高的前提下，佢冇動機進行收購，現時高回報的投資手段以回購普通股的回報最高（加上可避稅），其次是優先票據，現時主席持股63％，公司市值200億以內，回購12％到持股上限用20億左右就得，而優先票據7億美元利率5.75-7.125％，而現家大陸銀行貸款利率已降至4.6％，相信有足夠的水位進行轉換

但有劏房呢招的話（實際係搭檯，冇必要一定要話間開），現樓回報可能翻倍到6％以上（需要地點同名氣），因此soho有機會用貸款收購一d寫字樓，專門用黎劏，1開2，2開4，4間變8間，8間變16間，之後就上市納錢鬆人

如果佢有好似上面果d明確的駛錢途徑，恐防佢會派唔足息

佢今期大跌主要係冇賣樓同停派息，但唔一定以後都唔賣，例如同復星領導班子打緊8-1地皮官司，仲有機會打輸，無論輸贏，打到終審判埋出黎，就多數被法院強拍塊地皮，soho冇法掌實權的話多數會收返拍賣錢算數，咁就會出現一次賣樓收益

soho的風險是，如果味皇係主席，現家可以有好多方法玩到小股東一棟都冇，例如利用呢次人為低價（停售同減息完全是主動行為），先用人頭收集股票，收到乾再用貸款私有化，想低價私有化成本百幾二百億絕對借得到，或者放風老吹高價私有化比人頭出貨然後告吹就得（類似48小時系列，險簽系列之類的），或者人頭收完之後，特登賣樓同派特別息，拉高股價後比人頭出貨，高完之後又停售同減息向下炒之類的，睇炒家就少掂soho較好，收息只要影响唔到租金就話之佢玩，舞高弄低反而仲好，只要唔好私有化就得了

電腦網業績

盈利跌15％，嚇死人咩，個心離一離呀

營業額同毛利增加，照計是很好的，應該好順利咁達成10厘股，不過問題係支出忽然大升，如果係一次性，咁現價的電腦網就係神仙股，就唔知係一次性定常規性

於是味皇試下回憶下上年電腦網同今年電腦網，個網有乜分別－－係有分別的，不過唔係pc版，而係手機版，同上年相比，電腦網多左個app，以前手機版係用百度現成的生成系統，而現家卻更似淘寶的外形，簡單講就係搵it重新寫過曬，呢d支出唔可以計入有形資產，咁唯有用黎扣減盈利囉，因此味皇憶測為一次性支出

如果唔好彩支出成為常規支出，一年大概派0.15的水平，如果只是一次性支出，以後就派到0.22，至於今年，估計派0.15-0.19

現家應該要改口叫汽車網？

汽車網的好處係每個零件同周邊背後都有間公司，唔止成架車咁賣廣告，避震，音响，潤滑油都可以賣廣告，以前電腦網都係咁，主板，顯卡，聲卡乜都可以賣廣告，幾百幾千間公司，自從時代流向手機一體機之類後再唔興散賣，幾百幾千間公司合體成幾十間公司，咁廣告商就出事了，好彩汽車好多人當玩具玩損耗又大，零件有得散賣，汽車網還算安全

電腦網冇得救，比起以前，小米華為果d座大左，少左好多山寨廠，打廣告的公司變得更少

女人網有得搞，大陸賣易容產品比之前平左，但都要有多d正貨入口，d人先有野可以比較，大陸大城市或者有莎莎咁多品種的舖頭，但細城市就冇咁多品種貨，最多都係商場有d不知名物體，上網睇左都買唔到，於是，隨物流業的發展，女人網由大城市的小眾讀者擴展到小城市的腐女只是時間問題，只要多d推介網購就可以

家居網就同樓市相關，近期應該冇乜人有心情睇

春子網就麻麻地，啪啪啪的確係多左，但叉燒數量反而少左，有菊花冇結果，好在基數細仲有成長空間，不過佢最近收購d類似小霸王學習機類似的物體進入實體經營，但電腦網的重要賣點正是佢非實體因而佔用資金少，佢一旦進入實體經營後可能產生更多的固定支出同預留營運資金，進而影响派息比率

匯賢以股代息

今次呢篇係用手機寫的，帶有試驗性質，篇幅會短d

匯賢出左以股代息價為3.32，即持有50000股就可以進行Lv1,98000股就可以進行Lv2,148000股就Lv3咁，假設使用的是手損同痕身，買賣手續費分別是5蚊同100數

1仙差價Lv1的2000股為20蚊，Lv3的6000股為60蚊，用手損就有肉食

同理8仙差價分別是160同480，痕身都有肉食

味皇用的永亨Lv2的打和點需2仙以上的差價，即匯賢低於3.3味皇就買4000股收現金息，高過3.34就沽4000股收代息，不過大雞被銀行食細米，為左有足夠的水位同唔益咁多比人，味皇打算有8仙差價先行動，由於不太認為匯賢會點跌，因此區間暫時設定為3.31～3.39，但不一定嚴格遵守

N年前寫過現家寫多次，如果第一擊觸發左，即係味皇已買/賣4000股,而之後股價反轉，第二擊就轉為賣/買8000股，第三擊又買/賣8000股咁,具體例如3.31買左4000股準備收金，好彩的話3日後升到3.38就沽8000股變為收代，2日後跌到3.32就買8000股又收金，6日後升返3.37又放8000股咁，狂食波幅，玩到股息真係到手的日期為止，呢招對匯豐相當有效，但對匯賢呢d死人心電圖有幾大效果就冇乜底，果如果唔好彩一升/跌冇回頭或一直牛皮，咪食得一次咁多多

人仔貶值

學者：中國領導班子不懂經濟

oh no。。。。唔好呀

雖然味皇沒有做人仔定期，但組合有4成是借美金的chi na reits，加上仲有個大陸舖位，咁唯有用生命值硬接

鑑於澳門把大部分身家做人仔定期的人相當普遍，至少味皇公司入面己經屍橫遍野，屍山最底果浸係應該係澳門借錢買大陸豪宅果批，咁講起黎味皇也算是墊屍底的一員了，雖然是舖位

人民幣晨早就應該要貶值，東莞d廠執粒之前黎貶先有效，拖到現家先黎，廠都冇曬就算救都救唔返，之前一直都唔貶，搞都睇死中國領導班子有齊中國人的生活習性，議而不決，決而不行，點知今次發下瘟，就咁燒焦

今次貶值，資產上損失的人居多，但是相對的，收入變相增加，出拱北買菜多返一兩條，茶餐廳斷唔會減價益你，但都叫冇左加價理由，姑且通漲變輕（抽中埃邦有105仲唔快放就會出事了），對有糧出的人是好事，對供樓的人也是好事，因為咁樣一搞美國佬就加唔到息

兩日跌6％似乎過左火，好多細公司純利率都冇6％，萬一去銀行搞左信用證之後整個匯損就收皮了，基於中央一啖砂糖一啖屎的尿性，跟住好大機會穩住匯率後，減息呵返

有乜行業有利同不利？本地旅業同零售有關的會不利，大陸人本身唔想黎現家d野貴左更加唔黎，對香港個碼頭不利，d人會更加傾向用深圳，對香港科技行業不利，大陸人材更多人工更低左，咁計香港4大支得返金融同地產兩支，塘水炒塘魚好了，反過黎對水電公司有利，可以平價同大陸買更多水同燃料，變成更依賴大陸，味皇完全不認為大陸是存心針對香港，只是施政時偶然地順便地收左香港皮啫，澳門的話就完全不用擔心，d人爛賭的話用掘頭掃把趕都唔會走

香港唔係唔可以反抗的，只要將港幣兌美元調為8.1：1就可以了，又可以同步返兼冇破棄聯匯，完全是有自主能力的，不過香領導班子有齊中國人的生活習性啫

去返股票度，死剩的出口股有d會返生，只要原料不是進口就可以，當中以汽車同手機最明顥，貶值同時令出口增加同入口減少，內需出口都食正，汽車毛利本身少會反彈多d，其次係紡織，出口價不變但成本少左，至於之前死得勁快的東莞一類，由於廠要搬一早去曬印度印尼，做起左今時今日也不會搬返黎，大陸貶值人地一樣貶得，只可以話貶得太遲，而且大陸計劃生育令適齡的民工比以前少左好多，冇得斗命賤了

大陸reits就派息少左6％先，美元欠債增加倒不會有巨大影响，一黎老細此時應該已踢廁門，員工褲都唔休就沖去銀行搞匯率對沖，二黎reit的債基本是永遠不還，而是無限續借，咁最終體現出黎的是負債比率增加同利支出增加些少，派息影响唔算太大，但冇得玩收購，美元加唔到息算佢執到，越秀今次執返身彩，借錢買野時撞正，有得反口，早排買落的領匯就食蕉蕉了，其他本地reits，由於之後旅業更唔掂，難寄厚望，reit算是流年不利，同樣公路股都係，今時今日d股票好難唔同大陸拉上關係，如果呢個時候先黎追求真本土的收息股，係得返新意網算是獨立王國

最大影响的是乜野？就是果d無視核心盈利，只是用盈利數字乘固定派息比率的公司（新創建是典型），如果出現重大匯損或耆其他一次性項目的話，即使核心盈利再好，還是會按盈利數字扣除派息而不是按現金流來設定，最終顯示出來的是盈利下降兼派息減少股價插水，陰到人的，講開呢樣，好似奧普，莎莎，維他之類的是相反類型，佢地用現金流黎設定派息，因此好輕易就會出現100％以上的派息比率

題外話，雖然味皇買左舖位而歸類為墊屍一族，但收緊租同交緊管理費實質上有相當的差異，今日去左個舖位果頭食飯，見個商場終於轉返定位，由廣東道轉為mk，變左食街當堂旺返好多

撿齊

上次8.18沽778筆錢，近日換成3.41匯賢6000股，2.47電腦網10000，4.79soho5000，0.85佳寧娜10000，0.59世城20000，味皇燈己不是一次半次，己習以為常

9000蚊雖仲未到手，但今次出糧收左果兩份，己達成最終目的，味皇隨時也可以辭工了，現在差個良辰吉日

屋企裝修仲未搞掂，仲未可以上網，唔多開到pdf，寫業續呢d大工程暫時都未得

冇野寫就講下個組合，現時味皇的食飯倉就咁：

春泉20％－－65000

匯賢11％－－38000

開元7％－－25000

－－－－－－－－－－－－－－－

惠記9％－－25000

奧普8％－－25000

電腦網8％－－22000

隹寧娜6％－－10000-30000

貿易通5％－－18000

美蘭5％－－6000-24000

soho5％－－13000-22000

新創建4％－－10000-15000

川河3％－－8000-15000

世城2％－－5000-12000

晨鳴2％－－4000

建業2％－－2000-7000

新百貨1％－－5000

－－－－－－－－－－－－－

派息281000-352000

樓果d唔理先，味皇現時每月來自股票的股息收入予料最低都有23000，都夠去大陸同台灣做大爺