2021年9月2日 星期四

收息再買

收左不少息,1.08買入20000服國銀,2.2買入16000股齊魯

上年年尾設定的收息目標是35萬,到今日為止已經收左30萬,幾大機會第一次達成收息目標

上年完結時組合的收息能力上限是48萬,唔知今年可以去到幾盡,至少四環首機之類肯定唔會輸出到出黎

提出黎的生活費7萬,即係買左23萬股票,如果買的股票PB都是0.33,就相當於買左成70萬嘅資產,如果買的都係8厘股,即係等於每月加薪1500

10年前味皇仲打緊工時,一年買到14萬股票(10萬本),5年前辭工時一年買22萬(8萬本),現家半年就23萬(0本),而且折讓比當時仲高

總括而言主要有幾點:

1.日子有功,聚沙成塔

2.借錢套息,愚公移山

3.鐵打的營盤流水的兵

4.好似細菌咁自行增殖

5.揮刀自宮

財務自由起碼要幾錢呢?就算10年前跌吉D人都話起碼一千萬,而味皇果時寫要幾多呢?260萬,而味皇自己5年前係300幾400時就炒老細魷魚了,咁味皇算是安全還是硬膠呢?

總括而言主要有幾點:

1.對自己的認知

2.對手上的東西的認知

3.計劃

4.時間

5.唔受外界影響

味皇算是yahoo年代僅存的少數價投blog之一,如果收息為主軸的恐怕只有味皇一人,味氏理論是很早期就寫的文章,主題就是增加股數,這樣的計劃味皇也花了起碼十年時間黎完成,實際上有幾多人有耐心有決心進行一個冇人氣的計劃?學龔成咁開班賺橫財仲快

實際上想要有耐心對某一件事,專注唔一定係最好,業餘工餘咁玩玩下,當成興趣咁,先冇咁易厭煩,因為要很長時間,精神健康好緊要

嘛,反正短期決戰的人不會睇味皇


比起增加收入,現在反而現在點留種先係問題,話比10年時間你慢慢養慢慢生長,但當下的環境唔一定10年都能人財安全,以前味皇寫日本樓一開始就寫日本樓不應當係投資,而是算人生的保險,現在隨時保險都唔比你買,因此,味皇認為,與其大聲D講,不如靜雞雞贏,有咁雞得咁雞,螞蟻搬家咁周圍放D谷種,將來自己一個食也應該餓唔死的

味皇覺得,西洋國力再強,改朝換代也不過幾十幾百年,相對來說,有些行業可以延續幾百幾千年,呢類舊到唔舊經濟股,通常最能渡過時代的變化,如果資產有一定程度,應該多分散去呢類,何況估價又唔高係冇成交啫

20 則留言:

  1. 敢問味皇最後一招 揮刀自宮 為何解?

    回覆刪除
    回覆
    1. 難道是不再繁殖下一代?

      刪除
    2. 以前邊篇舊文寫過,大概咁上下:
      你除條褲睇下,肚臍下面幾吋有揪野,只要係拿起鉸剪,好似剪牛雜咁剪落去,你往後的一生支出起碼少3成
      不過我們都是斯文人,無必要乜都訴諸物理手段,剪牛雜只是一種過程,要的只是在精神上的效果,如果只是追求效果,我們也可以採取魔法或然者幻術之類的非物理手段

      刪除
  2. 作者已經移除這則留言。

    回覆刪除
  3. 味皇大可以詳細研究下大部分內房服點解派息有成十幾厘咁高嗎?

    回覆刪除
  4. 多謝味皇分享,好好味:)

    回覆刪除
  5. 最喜歡:好似細菌咁自行增殖

    回覆刪除
  6. 我都睇左你10年了,拜讀過你本日本樓攻略,雖然睇完講唔出咩大道理,同埋好似有D野落袋但又好似無咩得著,可能味皇你寫既係攻略人生版咁。坦白講,十年前睇你純粹覺得你好似做人生實驗咁,十年後感覺原來差距咁巨大。
    我呢十年炒下東炒下西,炒黎炒去都係得個桔,資本仲要冇咩點增值,普星仔見你買又跟買過,之後短炒又沽左,炒出炒入倒頭黎都係輸手續費。你呢篇講得好岩,就算我買得平過你,但我獲益都係無味皇你多,可能這就是鐘意炒功課既果。哈哈!
    希望你身體健康,長寫長有!
    總括而言主要有幾點:

    1.對自己的認知

    2.對手上的東西的認知

    3.計劃

    4.時間

    5.唔受外界影響

    回覆刪除
    回覆
    1. 同感, 10年了, 味王已自由, 我仲係ON99 咁

      刪除
    2. 我也睇左味皇十年了,都係收息系,算係有少少成績...

      刪除
  7. 支持~
    難得既係:
    並冇搵得越多洗得越多既習慣,
    大部分人都係搵得多洗得仲多。

    回覆刪除
  8. 味王你好!
    第一次拜讀,多謝分享
    想請教下倉入邊最大嗰隻佔幾多%?
    想重倉1883,返璞歸真,一年目標收6-8%, 唔求去股價升值,淨係望佢10年這後唔好低過而家。
    咁我收息就己經達標😂

    回覆刪除
  9. 謝味皇兄分享,十年了,味皇兄的自律同堅持真心佩服,
    一般人很難做到,不受外界影響,需要很大的自信心同清楚自己在做什麼,味皇兄仲要揮刀自宮

    回覆刪除
  10. 味皇兄, 有時間可以分析普星中期業績嗎? 謝謝

    回覆刪除
  11. 多謝分享,雖然平時較少留言,但味皇都有不少讀者呢

    回覆刪除
  12. 我由相信價投,到近年覺得短炒才是王道,之後又一籌莫展,再睇返味皇呢篇嘢,真係萬分感概。
    味皇既建議充滿智慧同哲理,我真係要反省自己。

    回覆刪除
  13. 5. 揮刀自宮 才是買到23萬的重點

    回覆刪除
  14. 7萬是全年使費嗎?
    即係每月使5千幾蚊左右?
    利害,佩服。
    如果無自宮,我估使費會多3倍

    回覆刪除