其他業績簡評

新昌管理(2340):

營業額上升,毛利持平,可能大陸的毛利率較低,兼被cut的領匯合約毛利率較高

行政費用一如預料大幅上升,一黎洗潔精貴左,最緊要係最低工資兼請多500人,支出增加但已簽訂的合約金額是不會提高的,另外大陸開分公司的前期支出亦令支出增加,而且董事一般都會好厚面皮地收超高薪

領匯的合約已經全部cut曬,收入唔會再低,低潮已經到底,之後的更多的新合約都會加價,只是大陸業務可以賺到幾多還是未知之數,如果擴張得太快,前期支出會極多,將影響派息,不過呢一年新昌都攬左唔少大陸定單,說明是有市場的

估值不算太平,冇因為業績差而下跌,如果收入唔多返1倍,純為收息就不太化算

味丹(2317):

又回到05年的高成本情況了,業績下跌其實只是上年賺太多而已,味精的毛利率超過20%本來就是異常的,因為太高就會有人大量生產,毛利率15%左右就比較健康,上次油價過百乜野糧食都貴果時味丹的毛利率最低好似去到8.9%,味丹並不是特別好賺的公司,只是拥有不死身而已

賠償是一次性的,味丹亦無視賠償損失繼續保持派息,雖然少左d

日本海嘯,咸蛋超人最終都冇出現救人,相反海中爬出哥斯拉破壞核電廠的可能性卻更高,在缺電的情況下味丹最大最強的對手味之素因此停產,就算比佢生產,都唔會有人敢買日產的味精,最終味精的價格可能會再次上升,咁就益左做出口的味丹,不過只是可能性而已

估值不貴,如果唔怕毛利率下跌的話,其實下年業績到底向好向壞都不太確定,兩種因素都有

旭日(393):

上半年營業額2.8億,下半年6.2億,據稱是上半年行政失當,如果相信的話今年上半年的業績起碼會同上年下半年相近,咁全年毛利升少少到起碼2.8億應該可以

今年總體業績比教一般,1/3盈利來自賣股,多左的股息算係特別息,剩低的IT要賣就晨早就賣曬,冇賣即係以後都唔會賣,呢個收益應該冇下次

只是預付款項同按金比上年升較多,講價地位較弱勢

總體比較馬馬虎虎,前景是有的,估值也不貴,派息亦夠闊佬,只是年來完全冇乜點擴張咁滯,欠缺野心,而且澳紐業務有d拖後腿

文軒(811):

少左5億現金,仲有18億,所以先派高息,原先仲以為佢會用大半添,增加左7.5億"股票投資",只令"股息收入"多2000萬,而文軒增加了5億商譽,而且本身的按金都大增,味皇很想評擊其理財能力

其他收益有4000萬來自政府補貼,剔除後文軒只賺4億或0.36每股,同股東權益比起黎得8%多d,而上年都有9%

不過文化產業太好賺並不是甚麼值得慶賀的事

文軒的盈利比較有保證,算係打政府工,現在扣埋稅都有7厘息,現價唔算貴,想盈利上升,駛錢就得,只要唔駛過龍派息就不會減,我想10億之內的資本支出應該不會損害到派息

錦江(2006):

仲搞緊股改,而且進行了較大的并購,業績用以往冇乜可比性,加上錦江的業績報告相比年報極其精簡,現在唔適合作定論,但留意到入住率是65%左右,而上年55%上下,房價亦上調一兩成,但酒店入住率唔超過80%就算不上好賺,現在的入住率代表上海旅業不如想像中的好,即使有世博,沒有旅業差的地方敢同人講景氣的,看來中國的經濟很大部分是由不明的行業所支撐

反正我很有耐性,入住率只要等佢上升到一定程度就會好似樓下咁有質的改變,如果齋講星級酒店部分,錦江站在盈利爆發點上

富豪信託(1881):

呢其租金保證是半年派0.085,現在僅僅是入住率上升至85%,其租金就立即升至浮動水平,今期是0.085的保證租金同0.019的浮動租金,雖然下年的保證租金跌到0.06左右,但一出動到浮動租金就冇意義了,之後的租金就是 保證租金+總租金/2

以後的租金波動會很大,但下限是0.06半年

出租率已相當高,想再高就唔實際,而且多出的浮動租金要同富豪(78)對分,因此增長不會太大

即是說其股息率在5-9%之間,香港流動人口數量還是較多,因此偏向9%的可能較大

群星紙業(3868):

搞gas之作,畢馬威似乎突然唔信其商業奇蹟,唔通世界文教基金將佢剔出世遺?

現在核數師保留意見,同舊文3868群星紙業相映成趣