人生映畫戲

應讀者要求,做一下呢幾年的人生回顧,首先是大事年表:

2004年夏:扮畢業

在妓男大學讀軟件的屎片,重修大王讀左4年都唔夠分畢唔到業(論文都冇寫),索性唔讀,讀左4年畢唔到業所以叫扮畢業,君子報仇百年未晚,我發左達先同妓大算帳

2004年夏:失業

當時金沙已經開業,市場大量招募牛荷,由於味皇強烈反對賭博,所以好有骨氣的去搵幾千蚊的其他工

2005年中:讀牛荷課程

寄左N多求職信,見過7000蚊的馬拉松sales,6000蚊的冷氣機售貨,5000蚊的製衣廠文員,3000蚊的船公司文員,1x蚊一個鐘的7仔,都冇肯人請(人地話:等消息啦;講幾句英文啦;大學生呀;咁屈就呀諸如此類),最後好冇骨氣的去讀牛荷課程,期間做過幾日八百伴vip日的臨記18蚊一個鐘,一日返15個鐘,著裇衫皮鞋,搬搬抬抬又要售貨,半夜放工冇巴士要搭的士,冇得camp錢,經歷了呢份工之後,味皇自信以後再辛苦的工也能承受,順帶一提,人生第一份糧有1500蚊,我比左1000家用

2005年秋:做兼職

好冇骨氣的去讀完牛荷課程後,等運到,失業多一排有中學同學介紹做補習老師

2005年10月:落火坑

做左冇幾多日補習老師,金沙就招人,最終味皇下海,做到現家

2006年春:入門

上面果個同學借左本"巴菲特實戰法則"比我,味皇一睇,恍然大悟,原來有此一著,之後開始找巴菲特相關的東西,最後找到佢師傅的著作,入埋師門添,由初心者轉職成一轉

2006年夏:開始買股

抽中國銀行的新股,開始投資生涯,後來偶然找到南洋商業銀行的網,對以後的選股幫助很大

2006年夏:味丹

經研究後買入味丹作為人生的第一隻股票(抽新股中銀冇用腦),因此味丹對味皇很有紀念意義,當時所謂研究只是看南商的數字,年報主席的信同管理層討論,當時味皇還不是很精通財務數字,但味皇發覺味丹的文字說明非常詳細,相當責負任,而且令人感覺到是老闆親筆而非秘書代筆,因此選擇了味丹,另外開始每月一本咁睇書,總共睇左十零本

2007年冬:月供匯豐

作為定期儲蓄以代替澳元的定期存款,睇鄧小閑知道匯豐可作抵押品,有息收時亦可備不時之需

2008年:寫blog

不得否認,味皇是看了火燎森的blog相當成功自有樣學樣寫的,當時還會尊稱佢火兄,由於本博寫過老千股,所以blog廢了武功,味皇只能專注做神秘人了

2007-2009:福建股

中國消防,第一天然,展鴻控股,不用重覆多說了,經此一劫後,味皇察覺到市場上有一類股票專門是吸引味皇一類的價值投資者,第一天然出事後,香討有人提到陳葉馮的大名,為了避免再犯同樣的錯誤,於是味皇開始研究用陳葉馮的所有公司的共通點,後來研究伸展至其他核數師,就是"核數師研究"由來

2008年冬:乾坤一擲

好慶幸第一天然在07年出事,而令核數師研究在乾坤一擲前完成,避免了以後買到地雷的情況,當時14000點左右,味皇將所有定期存款都轟進股市,其餘時間亦有一直用人工買入,該年最大的發現是奧普

2008年?:認識湯財兄

唔識真人,但唔知點解好欣賞佢,正義感作祟?受湯兄刺激,對老千股有更深了解

2009年夏:首次置業

股市回升,味皇有日睇澳門報,上面話美國印銀紙,見屋企d儲蓄實會縮水,因為睇過yc的blog,於是味皇提案買樓,提案獲得通過,首期味皇出左一半,由味皇供,通過賣出乾坤一擲時的股票同一些存款籌集

2010年春:

見太多垃圾新股上市,同時亦為左支援湯兄的論點,於是進行新股的所有人事研究,個人認為成果非凡,只要是在2000年後新過的股票都有得評價,新上市的未上市就知佢以後會唔會二次三次N次集資,呢點應該是味皇blog最有意義的東西,沒有之一,通過研究,味皇轉職為二轉職業,好打好多

2010年夏:二次置業

恆指紋風不動,但股票升值不少,偶然在CTM討論區見到層爛唐樓,於是再次提案買樓,提案獲得通過,首期味皇出左一半(因為味皇的家用比得多,屋企存錢的速度也不低),由味皇供,通過賣出月供的匯豐同一些存款籌集

2011年:等運到

股票仲未發市,由於工作上已出現玻璃天花板,所以要更依計劃行事(被動收入計劃),現在離辭職仲有段距離

由有記錄開始股本由07年中的8萬,每月投入5000買福建股,後來升一級多賺些少,每月投入7000,幸好不再是福建股,讀者可以點樣有5000呢?

1.同屋企住--就算買屋租屋,你完返工都係訓,訓覺有幾大要求啫,床位之嘛,住大屋邊個比管理費,住大屋邊個掃地,同屋企住食又有人煮,地又有人掃,錢又有人慳,哦又有人哦,病都有人睇

2.冇車牌--澳門養車甲天下,每月慳幾千蚊訓的士都得啦,雖則冇可能截到,但澳門行路快過坐車是常識,另外定期交牛肉乾要排好長的隊

3.無欲--好似味皇呢d唔鹹濕的青頭仔世間罕有,但冇人叫你學青頭,叫你少欲啫,冇咁姿整,衫褲鞋襪剪頭扮靚交際應酬支出都會少,好似味皇今個月到現家只駛左35蚊(12盒檸檬茶+1隻炸雞脾),月用500蚊的目標相當有難度,不過咁慳得咁變態就唔推薦

4.記帳--味皇有記流水帳的習慣,雖然冇整理過

話說08年開始股災,味皇開足馬力增加每月投入(如圖),越溝越淡,在09年中股本30萬,虧損一半,舉例說,股災前4蚊買的德昌跌到1蚊,乾坤一擲買的錦江幾日再跌一半,都冇影響計劃的決心,後來股市回升,開始抽資轉去其他渠道,當然月月買股的計劃還在施行,到現在盈利已超越股本的數量

由於現在味皇未辭職,只有呢點存在就會持續買股增加派息,派息再買派息,即是淨投入,當味皇唔撈需要駛費時,即是淨支出,就會收派息使用

以經歷來說,味皇只是隨街可見的大眾臉宅男一個,讀書唔成,又冇職升,只是平時睇多d課外書,唔想亦唔打算靠現家個老闆,於是按自己的計劃同打算而行動而已