1812晨鳴紙業

事緣早兩年返大陸(珠海),坐巴士時睇見隔離有架貨車車住幾卷紙,每卷可能有200公斤,卷紙上面印有"晨鳴",於是味皇咁就記得佢了

山東的公司勢力去到珠海都算唔簡單,早兩日我研究先知佢係第一隻A+B+H都有上市的公司,全世界都有股東,可以話係掛住阿爺的面皮做人

雖然我買入了晨鳴,但我首先要說明風險,知道風險比知道賣點更優先

晨鳴的風險是債務,公司現金29億,總負債卻有97億,今年都要還34億,佢有幾十張卡可以碌就冇問題,但我們都知道大陸銀行將來有可能出現災難,到時信用一收緊就碌爆死人,晨鳴是淨負債公司,就算當埋底褲入面層皮都係還唔起,仲有現在是加周期,假如利率+2,利息支出會增加返一兩億,對淨利會有幾十%的影響

這是開宗明義的投機,大道理就不說了,講值唔值博了

晨鳴呢幾年現金流都超過15億,利息支出5億,即使加息1倍都仲可以支持,只要銀行肯比佢繼續碌卡,既然是掛住阿爺的面皮做人,係外國人面前唔衰得嘅,四大銀行應該當底褲都要比佢面,另外佢有幾十億的貸款是15年按揭,唔駛即時還,最起碼現時的財政足以支撐到今年4月,個人認為過到4月就算冇問題,因此暫時視晨鳴為安全

公司固定資產155億,狗紙315億,規模是狗紙的一半,都是龍頭股,另外晨鳴有生產新聞紙而狗紙冇,政治成份晨鳴較好(傳媒冇自主權,做乜都要人指定),而現金流方面,兩間公司的營運現金流一般都超過固定資產的一成,有幾%的利差,因此先咁落力借錢投資,到現時還未見產能過剩,即增加固定資產就一定有錢賺,戲肉來了,晨鳴呢幾年投放巨資設廠,現在還是工程中,投資規模竟達163億!而工程完成的時間就是之前一直提到的4月,到時晨鳴就一舉超越狗紙成為全國最大,以後的營運現金流估計會超過40億,就盈利多幾個開呢點應該已值博

其他賣點同上面相比基本可以忽略,循例都講下,當中有涉及94億的湛江項目當中包括大面積的人工林,從自有林場採集的成本會極低,而且農林牧漁是免稅行業,同系的工廠公司可以利用高買低賣來避稅(去唔去做就一件事),而且項見位於廣東,人口多消費大,在海邊亦不缺水,地理位置優越,另外山東本部亦有52億的項目,產品比較高端咁話

合共163億的投資項目,除左27億係由早兩年超高價認購H股的水魚提供外,其餘都是由銀行貸款的,係上兩年金融海嘯,狗紙理文都要靠抽水先唔駛破產,而晨鳴卻可以同招商銀行借到錢,十幾億幾十億咁,借完仲可以再借,而且利息得3厘低過正常水平好多,佢地d人脈關係到底點架,後欄通到炮口咁闊乎?只可以說明晨鳴是中國公司中的典範

另外有幾個項目的投資佢都列明預期回報是多少,僅作參考:

山東52億-預期回報8.5億,4月投產

湛江17億-預期回報1.9億,4月投產

山東26億-預期回報4.3億,下年5月投產

利潤率都超過10%,估計係純利,扣左利息未就唔知了,加上同樣是4月投產的湛江94億應該都超過10%,大致可以判斷4月之後盈利會增加幾多

仲有個小小的風險,因住星火燎森,小小的煙頭可以引致山林大火,晨鳴的員工當中實有煙剷,另外唔關事的希望大家不要吸煙

假如盈利翻倍,股息應該會有6厘以上,市場相信會過度反應,例如升上18蚊,這構成一個邏輯矛盾,公司是淨負債的,理論上自己買入越多就欠債越多,但股票又有個不知從何而來的資產淨值,同時股價又超高溢價,將負數當成正數,真不知市場是用甚麼道理來運作的