少量增持

6.92還是6.95咁上下增持多4000股美蘭，另外1.09增持多10000股佳寧娜，當時恆指27300,現家得返26300，一買就跌，話說港股點數奇景地比道指反超，咁下一個目標係比日經超埋?

所謂國進民退，范冰冰變犯冰冰，無非係求財，順便劫埋色啫，如果利益唔大，郁手又麻煩，咁就江洋大盜都費事劫你，如果覺得你係肥羊，或者係魚肉，江洋大盜先會捉拿你，話你勾結江洋大盜，強姦母豬

如果話邊D企業容易招來大爺，就係控制基本物資的公司，例如以前鹽唔比民辦咁樣，官老爺喜歡插手的係礦產砂石水泥，碳水化合物同製作白色粉未，水電能源，海陸空港，情報渠道資金渠道宣傳渠道，教育醫療交通，邊境漁船管制，敵國的主要行業的國內山寨咁上下，而服務業，飲食業，娛樂業，零售業就唔會插手控制，目的是求財而已，抽重稅就可以，地產同科技，表面上唔插手，但可以用水泥，貸款，服務器，基站黎鍊住個春袋

味皇買入的美蘭機場名義上係民企，但應該會收歸國有，母公司海航周身債除時爆，但有事時子公司應該會拆出黎賣用於填氹，母公司窮子公司就較會派息，母公司係政府就更加會派息比人分，美蘭的派息現家雖然少但也是安全的，公司長期前景也明確，佳寧娜就每半年吸碧貴園成億現金，現家樓市雖然唔好，但佢好快就由負債變成身現金，加息周期成身現金應該有各種好處，不過味皇自己就冇現金，本來想買少少嘉士利的，佢係食品廠唔會比政府充公，但萬稅爺眼金金咁，會有機會唔捨得派息，所以買唔買有D猶豫

股市跌而你又唔敢郁或者唔知點郁但又怕執輸，長江基建同新創建應該可以無痛止癢

味皇現家係中山用電話寫緊呢篇文，似乎早排低估左中山的稅收，似乎係坦洲政府特別窮，石岐周圍的予算應該比較充足，市容同珠海基本一樣，係綠化帶修剪得漫D,路面標誌暗D,未見過行人天橋咁，大致還算繁榮，之前係咁sell港澳人買的大信新都滙，人流在生同死之間比較傾向生少少，人流是有的，是個唔錯的商場，但能否產生滿意的回報就有些疑問，好的資產如果不能用好的價錢取得，就好睇唔好食

實際上味皇呢幾日諗住去睇下126同160的新場開成點，新年果時去睇未開冇野睇，現家再去睇多次，有時間味皇還打算去海口睇埋357，無論實地觀察定財務分析，也不過是一種確認手段而已，一般實物資產，你能確認佢的價值時，可能已經存在相對應的價格，不過證券好多時會唔同，你確認到佢的價值時，佢的價格可能和你的認知有很大的乖離，唔係超前就係滯後，睇定黎食一般都係証劵先可以做到

憨99,行路上坦洲

最近活動少,於是打風前搵左日行下遠路,由澳門行路到中山,一條友飲茶,行左26KM左右

坦洲係中山入面應該係繁榮度排第二的地區?第一係石岐

由珠海行到入中山,味皇得出的結論係,中山財政預算非常不足

具體的講,行珠海同行中山的分別,中山的道路破損嚴重,斑馬線得地面標誌磨損到差點見不到,行人路沒有很好舖裝很多碎石,沒有任何掃街的人,一路上未曾見過一條行人天橋,珠海的綠化用上了花,中山的綠化係下面上了白漆的老樹,很少巴士,路上都是電 單車同電單車係咁砵你去不去,由南溪行到坦洲南坦路頭2.5公里,路上只有4輪同2輪而冇出現過任何行人,總括而言就是中山稅收似乎很少,沒有預算流入公共設施,市容大概係90-95年的珠海咁上下,要入到相當市中心的部分,先有舖裝過的行人路,斗門水平啦

於是買中山樓係唔係一個好主意呢?蛋黃區以外有點保留,說到底,邊度邊度現家的稅務法相當唔友善,特別係將來出遺產稅的機會唔係0,雖然話有人看上的你財產的話隨時可以帶你去洗頭洗足半年抽你遺產稅,但人地既然唔主動出擊你又冇必要自己鐘埋去

咁延伸了一個問題了,好似橫琴之類的地方,歸屬未定,算租界定係算屬地呢?如果條友準備要比人抽1億稅,住橫琴算境內就冇分別,但算境外就可以慳返1億,咁橫琴的信箱地址豈不是值1億?味皇不太認為橫琴會變開曼群島,未知數太多了,就算今日做到開曼群島炒高1萬倍,第二日又可以改政策變波多黎各打回原形,正如侵侵牙齒當金駛咁

中山感覺概念>實體,投資最好一係全力概念路線,一係全力實體路線,唔可以大搞中間修正主義,掃除一切牛鬼蛇神,具體的講就是,一係搵北上廣之類成熟的,一係搵確定能成為特區的,澳門地方不夠,很可能向大陸要求領土,香港地方可能也不夠?不過澳門政府敢開口,而香港政府唔敢,可以土改的地方必須要係無人的,如果有人也要清洗(物理)乾淨先,類似咁(查戈斯群島),於是地點就基本限定了係墳海地了,地理來說磨刀門口的橫洲較大可能合要求

轉一轉題材,回到稅法本身,對味皇有切身影響的恐怕是大陸公司的派息比率會降低,因為公司派息比老闆,雖然公司係香港上市外國注冊,但老闆一樣要上貢一筆,備戰備荒為人民,殺牛宰猴燉羊肉,誰反對抽稅,就砸爛他的狗頭,咁上下,味皇不認為智能正常的老闆咁樣會很有動力派息,例如巴菲特就不派了,好似味皇咁樣的財技淫如果係老闆,一於一個仙都唔派,改為拆細股票然後用本來派息的錢回購,咁樣就唔駛比人剝層皮,上市公司除左派息政策訂下的最低派息比率的部分,例如35%咁,應該會照派外,一D非常高派息比率的公司,很可能會大幅減派息而改為保留盈利,借很多很多錢黎比利息減低盈利,買樓買車買底褲都盡可能入公司數,經常性比境外公司騙錢進行資本減值,每日都有人出差外國開會係總統酒店玩兩女一杯,味皇非常不願意面對這樣的情況,下年開始股息收入的目標可能需要下調

對抗手段就時換成更多的非大陸老闆公司,換成更多派息比率為下限的收息股,換成冇個人名義老闆只有集團名義老闆的收息股之類的

大陸証得失

新聞話可以申請大陸居住証,味皇大陸有劏舖,應該可以申請

不了,狗都唔屌

是咁的,這基本上是一個單向的過程,你申請左張証,估且叫居住証啦,申請左佢似乎同時會取消回鄉証,而張居住証恐怕會同華南城的舖位或有線的合約一樣,請神容易送神難,點甩都甩唔走,即使比你甩走到,你亦未必可以重新申請回鄉証

另一方面,住大陸要抽全宇宙的稅,當你攞左居住証,你就取得的係大陸的便利,但同時你會失去大陸範圍以外的宇宙,雖然自古以來月球都是中國領土咁話,即係咁,你有居住証後,你唔會再係香港買樓收租,買股票收息,炒股票賺錢可能要抽增值稅,係澳門賭錢買六合彩中左要批多層皮,係其他西人地方都要係咁,將來可能仲要增加遺產稅等其他稅,簡單講就係為左一個森林而放棄另一個森林

你可以話唔係大陸住半年以上就OK嘛?咁你的生命又被限制左唔能夠係大陸留半年,逼住要時常留意,另一種極端的方式,如果你足夠地有錢而又冇權力,或其他原因,愛國商人可以請人的你去高鐵站,你在站內,警察在站外,皇家警察只能在站外你眼望我眼卻不能進入,你在高鐵站,或被精壯男子拖入高鐵站更深入的其他地方,留夠半年,你就要被抽稅,如果有遺產稅的就要抽遺產稅了,居留大陸半年,文字解釋也許包括拘留滯留失聯等各種意思?味皇沒有解釋權

雖然你有冇証都有可能出現在高鐵站

又唔係得大陸係咁,好似日本也要抽全宇宙的稅,所以日本人也不好做,但姑且日本冇高鐵站係度

回來正題,居住証係為左一個森林而放棄另一個森林,二選一,咁要點揀呢?           點解要揀?唔揀咪得囉,又未開始逼你揀,乜都唔做最靈活,例如比人問你係唔係XX人,你話係會比人批斗,你話唔係又會比人批斗,你最好就乜都唔講,或者話去打醬油

路勁業績

買路錢多左15%,14.7億

奇妙的公路的營業額居然計0,然後盈利2.7億,前後不乎?公路資產44億半年賺2.7億12厘,上年公路資產45億,每年折舊1億,估計係收費期限-1

14.7億同2.7億差距有點大?按子公司100%拥有的標準計得2.7億掛,約每股2毫半

子公司間間都唔係100%,數字又前後不一,睇死人咩,投降

係分佔合資公司部分由2.3億增加到4.4億,約每股4毫,加埋上面共6毫半的派息能力

咁佢每股1.08的盈利,來自地產的其實不算多?

如果只看資產負責表,負債冇乜增加,但現金多左一截,固定資產同投資冇乜變化,策略保守

現金多左14億,而債務多左似乎係3億?唔係好肯定

派息3毫,按6毫半的固定收入黎計派一半都冇,所以應能維持

報表睇唔掂咁就睇文字,文字講起樓大致向好,公路好掂,另外開始用路勁名義買REIT買基金之類的,總體係向好的,係

大半資產都係人民幣,但又欠70億的美元還本債,另外要為世界末日債每年比4500萬美元的利息,人仔貶值會出盈警,不過對派息影響相對不大,由於有盈警因素,業績難予測

惠記將會收到1.36億的路勁股息,相當於每股0.17,會唔會全部轉派就一件事了,相關公司的業績公布日不在同一日好嗎?比人睇住黎食

SOHO業績

半年租金8.5億,毛利6.4億,行政費其他費用加埋2億幾,利息支出2億幾,剩得比較少

固定資產570億收8.5億租,圍起黎3厘都冇

還左25億,剩185億,唔知幾時起SOHO由淨現金變成成身債,每年派下派下續下續下大家都唔覺佢借錢

185億利率3厘7-5厘3之間,比租金回報率高,還錢比收購好

如果佢的債一路續落去,每年剩的錢不多,必須賣樓先可以還到債

有兩個項目未完工,按面積計,完工後可增加近3成半租金,8.5億變11億,全年22億,毛利17億,而利息支出不變,咁就有錢剩,剩5億左右,依然是有排還,必須賣樓

佢連續兩期唔派息,以前佢今期派,原來囉左黎還債,MOLA MOLA,佢傾向還債而不是養債,因此派息動機大減

想佢鹹魚返生,必須賣樓,實際上用3厘以下的租金(仲要唔係淨賺),去養好幾厘的債務,實在是愚不可及,佢老總個頭唔係比門夾了就應該諗緊點樣賣樓,至少維持現狀是不智的,佢有賣樓動機,以前有傳過佢想賣左望京樓,但總金額太大冇人食得落,因此佢可能出售的應會在天出廣場,銀河SOHO,凌空SOHO同兩個地盤之間產生

比佢陰左一次的教訓,SOHO變現價值>收租價值,SOHO返身只有靠特別息,SOHO可能繼續唔派攞黎還債,SOHO係收息只限冇欠債時

CTM業績

舊文予測CTMSERVER部分,營業額上一期推算為2.9億

現家呢半年,包含SERVER的互聯網收入由4.7億升到4.9億,由係唔係SERVER營業額只增長2000萬,並不是,因為CTM減左網費,所以SERVER營業額增長是在2000萬以上的,但多幾多則未知

另外長途電話都減左4成半收費,所以座機收入由1.5億減到得1.2億,應該唔會再點減掛,基數細都已經唔形成影響

新聞就咁講: 澳門電訊商務副總裁湛寶儀於記者會上回顧業務時稱，2016年10月互聯網服務減費，平均減幅27%，年收入影響約為1.29億元；同年12月國際、本地專線及互聯網接駁服務減費，平均減幅49%、37%及51%，年收入影響約為9200萬元；去年10月下調內地跨域服務資費，平均減幅46%，年收入影響約為580萬元；同年12月下調IDD服務資費，平均減幅45%，年收入影響約為1600萬元。今年業務發展計劃方面，4月1日下調國際及本地專線服務資費，平均減幅為11%及7%，年收入影響預估約為770萬

同總額相比影響好似有限啫,當1000萬好了,SERVER營業額增長3000萬咁先

另一個方向可以咁睇,CTM的營業額,賣手機,上網,打電話之類的,都係收葡幣,因為本體係澳門,能夠收港幣的業務,只有SERVER等少數業務可以以收港幣,至於同大陸做監控超誠實使用電腦就收三幣都收,估計

因此只看港幣收入的變化,也能若干的估算SERVER收入變化,佢由13.7億增至16.2億,相差2.5億,和諧企業服務一項由13.3增王14.6億,相差1.3億,同港幣收入的2.5億相比差1.2億,因此SERVER收入增長在1.2億之內

粗粗地上年2.9億,半年就1.45億,因此今期SERVER收入在1.75-2.65億之間,差距有點大,平均2.2億好了,全年固計4.4億

賣電話收入增長好高?0.6%同60%毛利率的東西分析不要混在一起,剔除佢,剔除,無視佢,無視

現時CTM的收入分布是咁的,17%手機上網,14%SERVER同網線,24%話費,42%和諧,3%座機

當中手機上網,話費同座機的業務應該悲觀咁睇,呢度佔38%,SERVER同網線就一啖砂糖一啖屎,4.9億中SERVER佔2.2億的話,分別就是6%同8%,悲觀的部分共佔52%,剩下大利好的部分佔48%,悲觀部分的主要係市場飽和,兼有政府逼佢減價的可能,話曬當年澳門上網的收費試過長期係香港同類的12倍以上,賣電話的部分嘛,正常應該要大衰退先啱,不過多數唔影響盈利

假設兩方各自向上向下10%,20%咁,10%時,下年52變47,而48變53,係20%時,下年52變42,而48%變58,總數都係100左右,因此第一年CTM的業績是持平的

但同樣10%同20%: 

                 10%                                  20%              合計

10%      47>42/53>58              42>38/58>64       100/102  

20%      47>37/53>64              42>36/58>70       101/106

即係話CTM係第二年起開始成份逆轉,前景好的比前景差的佔比大,越拉越闊

有人成日凝住CTM借錢借得多會還唔起咁= =,咁姑且講一講,CTM的半年盈利約5億,另一方面,佢資產負責表包括左16億幾無形資產同97億商譽,這都是虛假的,CTM的資產負責表一文不值!好了,這半年佢攤銷左無形資產同商譽9700萬的減值,咁呢個開支又是否真實呢?按現金流來說,CTM可能有6億的現金流,如果年年派埋果1億豈不是派息超過盈利?梗係收返埋係公司,用真實的錢填虛假的窿,幾咁硬膠:),而利息支出是1.7億,全年是12億同3.4億,派5億6億,應該有錢剩掛,愚公話,水水魚魚,無窮匱也,而債不加增,何苦而不平?

味皇估計CTM今年會派18-19仙,下年唔增長,後年先再增加

最近交易

上星期2.21增持左10000股CTM,因為估佢派息會加,又係賺葡幣,所以用收返黎的息增持,結果而言CTM係增加左派息

另外近日沽左30000股開元2.02-2.06,換入20000股首創3.04-3.1,開元係REIT都好少成交量,賣左一排都冇人近價接貨,由於首創跌得仲甘,所以開元折價賣都可以接受,這次換馬的理由係,大家都係賺人仔,大家都貶值,大家都衰的部分一樣,開元股價居然唔跌,而首創則碌落山咁,所以換馬,現價而言首創派息仲高兼有保留盈利,開元形容係硬彈弓的話首創就係軟彈弓,大家都壓到咁上下扁時軟的似乎會彈高D,味皇手上仲有7萬股開元,順帶一提,首創味皇最初買入時是4.44,現家跌左1/3

SOHO唔派息,這不科學!於是味皇的如意算盤打不响,當初仲用405換過去添,當係予料一個很好的機會出現時,你會訓身落去定係稍減支持一下咁呢,味皇不是訓身派,總是會留一手,405->410的只有1/8,如果味皇如意算盤真係打响了,後面睇返就會覺得--點解唔訓身,因此味皇1/8的收益也可以阿Q一下,反過來好似現家咁(暫時)失敗左,味皇1/8的也可以阿Q只是損失1/8的部分,訓身會導致金錢同精神的大起伏,如果不求波瀾壯闊的人生,阿Q精神係精神管理的重要手法,實際上唔係全係負面野

投資的方法好多時係反人類的,如果你不能控制自己的精神狀態,賺錢就無從講起,如果將精神狀態想像為正弦曲線余弦曲線,波幅大到達一定程度時,人就會失去理智,如果你能將波幅收縮到比較平緩的程度就可以一直保持理情,例如壓低波幅後,睇笑片唔會笑,睇喊片唔會喊,睇咸片唔勃起加多句媽媽咪呀咁,這是副作用?反正成功的XX者從各種意義上都是非人的,總會有些人性欠缺,所以沒有相應的覺悟同代價是唔掂的

業績評價後補

買左電單車,冇工開又少出街冇必要揸,除左練習之外基本冇揸,實際上出街仲係慣常行路,唔熟路大橋口炒左一野,附近冇車,奇蹟咁連輕傷都冇,澳門路窄車多,其他人又心急,想休閒慢揸都難,以後想係台灣或者日本租電單車行下