收息再買

收左不少息,1.08買入20000服國銀,2.2買入16000股齊魯

上年年尾設定的收息目標是35萬,到今日為止已經收左30萬,幾大機會第一次達成收息目標

上年完結時組合的收息能力上限是48萬,唔知今年可以去到幾盡,至少四環首機之類肯定唔會輸出到出黎

提出黎的生活費7萬,即係買左23萬股票,如果買的股票PB都是0.33,就相當於買左成70萬嘅資產,如果買的都係8厘股,即係等於每月加薪1500

10年前味皇仲打緊工時,一年買到14萬股票(10萬本),5年前辭工時一年買22萬(8萬本),現家半年就23萬(0本),而且折讓比當時仲高

總括而言主要有幾點:

1.日子有功,聚沙成塔

2.借錢套息,愚公移山

3.鐵打的營盤流水的兵

4.好似細菌咁自行增殖

5.揮刀自宮

財務自由起碼要幾錢呢?就算10年前跌吉D人都話起碼一千萬,而味皇果時寫要幾多呢?260萬,而味皇自己5年前係300幾400時就炒老細魷魚了,咁味皇算是安全還是硬膠呢?

總括而言主要有幾點:

1.對自己的認知

2.對手上的東西的認知

3.計劃

4.時間

5.唔受外界影響

味皇算是yahoo年代僅存的少數價投blog之一,如果收息為主軸的恐怕只有味皇一人,味氏理論是很早期就寫的文章,主題就是增加股數,這樣的計劃味皇也花了起碼十年時間黎完成,實際上有幾多人有耐心有決心進行一個冇人氣的計劃?學龔成咁開班賺橫財仲快

實際上想要有耐心對某一件事,專注唔一定係最好,業餘工餘咁玩玩下,當成興趣咁,先冇咁易厭煩,因為要很長時間,精神健康好緊要

嘛,反正短期決戰的人不會睇味皇

比起增加收入,現在反而現在點留種先係問題,話比10年時間你慢慢養慢慢生長,但當下的環境唔一定10年都能人財安全,以前味皇寫日本樓一開始就寫日本樓不應當係投資,而是算人生的保險,現在隨時保險都唔比你買,因此,味皇認為,與其大聲D講,不如靜雞雞贏,有咁雞得咁雞,螞蟻搬家咁周圍放D谷種,將來自己一個食也應該餓唔死的

味皇覺得,西洋國力再強,改朝換代也不過幾十幾百年,相對來說,有些行業可以延續幾百幾千年,呢類舊到唔舊經濟股,通常最能渡過時代的變化,如果資產有一定程度,應該多分散去呢類,何況估價又唔高係冇成交啫

路勁惠記業績

基本上就是唔爽,不可思議咁,味皇預測惠記唔加派息或者加少少,而路勁就大加派息,結果還是燈左

路勁:

                   2019上    2021上

公路營業額   16.0        19.0

公路盈利         3.4         3.0

公路資產       56.4       61.4

---------------------------------------------

公路每股盈利0.32         0.2

中期息           0.3          0.15

全年             1.18            ?

冇收幾個月的2020年唔理佢,19年公路盈利/營業額21%,21年16%,19年公路盈利/資產6%,21年5%,效率都是下降的,味皇推測佢新增的公路要不是效率差,就是未開發,嘛,公路的效率沒有競爭的話通常都隨時間改善

假返用21%同6%計,19億營業額兌4億,同埋61.4億兌3.7億,平均3.85億,即每股0.26,似乎派息也不會比19年多

                                  2020上    2021上

利息支出                        11.5        11.9

其他利息同財務費用       1.4          1.1

銀行及其他貸款(長)       268         246

銀行及其他貸款(短)       165         134

普通債券總額   18.8美+15人 26美+15人   4.7-7.875厘

永續債                           9美          9美       7-7.95厘

債務增加左,但利息減少,其他財務費用增加,看起來發新較低利率債券,續回較高利率債券,雖然平均利率下降,但佢維持同樣的利息水平借更多錢,而不是維持同樣的債務減輕利息的方針

而2019上半年利息是7.8+2.3億,比現家少,而今年公路盈利未必比2019年多,因此派高息的機會較低

賣樓方面一言難盡,味皇在這方面也不在行,硬係覺得賭錢咁,不過路勁近年的分別是,路勁係香港2022年交樓,香港樓貴,全部交樓可以回收較多的資金,如果說派息回愎,2022年交樓之後有D機會,不個佢2022年屯門仲有起緊,只係預售,唔肯定幾時入數

現家土地儲備740萬平方,上年701萬,前年791萬,如果佢肯賭細D財務還有改善機會

今年可能只派7亳

惠記:

利基的污水廠應該半年可以賺一兩千萬,蒸汽廠下半年完工,以後賺一千萬應該冇乜問題,工程賺幾多就隨機性較大,利基上年派6000萬,超過污水廠之類的穩定收入,工程賺的都有派出黎,假如其他不變,只是污水廠同蒸汽廠加價同完工的收入加入去,派息應該可以去到8500萬,也是2022年,按比例惠記會分到4250萬

石礦場應該係香港有工程單價貴先賺到錢,屯門完工之前應該都唔駛蝕

REIT應該下半年同上半年差唔多

証券牌應該係用黎炒賣自己發行的債券,慳些少手續費,唔會賺錢

路勁如果派7毫,惠記會收到3.6億,加埋利基共4億之內,理論上惠記依然可以維持派息,但惠記還是減左1仙

利基:

利基2019年淨現金14億,20年減到11億,還算高

惠記有同利基併表,但冇同路勁併表

路勁淨負債2百幾億,如果路勁有乜冬瓜豆腐,利基派曬出黎都救唔到,頂多就是夠比一年利息,因此如果惠記有財技要玩,就會要路勁發換股債,利基或惠記出錢認購,現在路勁街貨有限,直接回購應該買不到咁多億

利基16年淨現金4.5億,17年6億,18年10億,19年14億,20年11億,現金屯積,如果想抽路勁水,一切會係利基作起點,要不是直接買路勁,就是派息比老母買,如果某日忽然派5毫味皇也不會出奇,相反主席應該唔會有令路勁變高價的動機

估值成個系之中最高,但前景也是最好的,至少息率上會比老母同兄弟高不少

早前味皇(燈)將惠記換成路勁,雖然有短暫期間成功,但似乎破局的機會也不低

3969中國通號

寫埋剩底呢隻,今次係火車的信號管制,相比起火車賣票賺錢,服務合約應該比較穩定

如果要找的話說不定還有飛機排隊,巴士排隊,泊位排隊之類的公司,電話排隊同衛星排隊之前寫左

佢市值寫55.5億,股本106億面值1蚊,即係106億股,總市值300億,PE7倍,PB0.6,派8.4厘,最近3年派息冇加,起碼也冇減

2年前發新股集資,而之前盈利都係30億左右,交稅7億,派息10億,淨現金相當多,並沒有集資的必要

可是連續現金一直下降,負債上升,現金流也是對唔到條數,固定資產一直45億左右,投資十幾億,結構來說是輕資產公司,可是佢市值都幾百億,咁資產係邊呢?有個叫流動資產的項目400幾億,500億,600幾億,800幾億咁係咁上,簡單黎講佢的資產都係文件上,郁黎郁去傳黎傳去,連續3年現金流出說明佢的流動資產並唔係話收就能收回的東西,要不是帳期長,要不是有人擋,集資前的淨現金有90億,流動資產650億,之前每年現金會少二三十億,90億看起來也是能撐幾年的,但相對於佢的'流動資產"未必叫多

佢主要風險在於會唔會被拖數甚至唔找數,2年前發新股集資某種意義上是救急

              20   19    18(集) 17    16

營業額  400  416  400     344  294

盈利      38    38    34       33    30

現金流   51    59     9        -2    35

稅          21    25     25       7      7

1.按盈利同現金流黎睇,佢賺錢差不多,但18年前有人唔找數,18年後先肯找埋D數

2.按交稅來說,25%稅率計,1617年賺30億以內,18年後起碼賺100億,否則佢就是白交稅,營造同盈利冇上升,代表佢藏富,9成又係藏係流動資產果D文件度

3.營業額冇上升,稅就交多左,代表當中賺的錢同本業是完全異質的存在

4.藏富唔一定會係將來反映出黎,如果反映出黎估計會是特殊項目或者一次性的,另外唔一定反映在當下的現金流上

5.將來現金流同盈利對不上號的概率極大

佢搞乜副業味皇唔理,回到本業上,營業額現在400億賺近40億,將來增加的概率不算低,現金流平均下來也有30億,而上年的派息是26億,看來維持有點困難,但也不排除50億以上的現金流以後會常態化,也許是1415年收數收過龍呢?咁樣,但是50億現金流派26億也是比較重本的,除非佢真的是在賺100億

佢集資後淨現金超過200億,但是現金流看起來超收,到派息下來,淨現金還是在下降,實際上佢正在用集資回來的錢派息,搵新股東老襯

結論是味皇對佢維持派息的能力有點保留,但是派15-20億的話味皇覺得還可以,這水平的派息約4.8-6.5厘,減唔減5050機會啦,總不會不派

味皇對佢作兩個推測,1.維持派息幾年不加,幾年內用些財投分批升高盈利數字,不派特別息,2.減派息,派息每年變化,然後來過盈利大爆炸,派特別息

大陸鐵路的運量連續幾年都唔好,但佢起碼賺到錢唔縮水,看起來也不像強力部門會注意到的行業,OK的,5年的派息記錄都好

PE10-12的話值470-560億,PB1的話535億,比較接近,每股5蚊上下,此時按現在派息是4.7厘,如派息下降會在2.7-3.7之間,因此合理價5蚊應該都差唔多,水位不足1倍

比上一篇的552抵一點,如果552看起來像死水潭,咁佢就似係可能有鱔的泥潭

552中通信

澳門都破防了,另外中招的人去過的餐廳味皇事後也去過,現家都未開得返舖...味皇算唔算濃厚接觸呢?如果味皇都中招的話應該早兩日驗完核酸就比人捉左返去,現家澳門既然未有人驗出,潛伏期又過左,應該都算順利過渡,疫情過澳門不入

阿爺係度點指賊賊,恆指9選股的副作用開始顯現,味皇估遲早會點到快遞

相對來說不起眼又冷門行業死的機會會較低

業績期又到,係出業績前再寫一寫,今次講3隻信號管制另外一隻,552中通信,感覺佢應該是分包商,向中移聯通電信提供下欄服務,而且似是獨市,財務報表上估計是佢地計入折舊之內的現金流的一部分流入中通信,但是中移聯通電信自己賺錢的毛利率也不是很高,中通信能賺到的也是有限,中通信已經上市,唔係回A的話給更多錢養大佢冇意義,抽走中通信的錢對中移佢地也是九牛一毛冇佢用,因此比蚊盯的機會應該比較細,大陸的電訊覆蓋率應該已經飽和,不增不減,中通信會得到穩定的保養收入,而沒有幾多安裝入收

結論就是佢現家賺幾多,之後也是賺幾多,疫情賺幾多,平時也賺幾多,因此,關鍵在卡能在多低的價錢買到佢

市值84億,佢股本69億每股1蚊即69億股,股價3.5,即總市值242億港幣,盈利31億人仔,PE6.6,淨值5.3,PB0.55,派息5.5%,總淨值366億,用淨值計佢賺錢能力10%派息能力3.6%,同飛機出租差不了多少,佢超過PB1味皇覺得比較難,0.84會比較合理,PE是10

派息11億,佔盈利31億的1/3,佔現金流57億的1/5

                20       19      18      17      16

營業額  1227   1174   1062  946    884

固定資產  69      68      50      48      48

現金流     57      52      47      74      57

折舊         14      13       8        8        8

已交稅     4.8    5.3     5.8     5.7     5.3

自稱稅率%11    13     15       15     16

-----------------------------------------------------  

投資         58     53       41      11     10

收股息       3     2.1      0.6     1.3    1.2

--------------------------------------------------

現金流     57      52      47      74      57

派息        11      11       10        9      8

---------------------------------------------------

淨現金    220   202    177     163   162

固定資產/現金流,除左17年奇怪外,一般都在50億以上19年加大左固定資產,未見功效,可能遲D見效,也可能變無用功

18年前的折舊率15%,19年後如果舊的固定資產不變,新買的固定資產折舊率近30,似係短命設備

設備折舊似乎損害到稅基?交稅少左

自稱的稅率可能不正常,如果用25%稅率,佢盈利起碼比現在低一半,除非佢係高新科技分類稅率15%

佢18年後買的投資,收5厘息

派息佔現金流的1/5,似乎派得起

淨現金增加較快,20年派息+現金増加=29億,同盈利接近,19年36億,比盈利多6億,18年24億,比盈利少5億,佢盈利數字同實際有相差,但相差也不算大,1/3的派息率看起來可以維持

佢現金很多,有動機淘空,佢大股東係電信,電信很需要呢筆錢,中通信盈利同營業額相比,只係微利,因此比起降佢毛利率,更大機會是派特別息或加些少派息比率

營業額,固定資產,投資,盈利,現金,派息,都是每年上升的,佢以後上升的機會不低,現金流同交稅顯示出有些少問題,但未至於有整體影響,新買的固定資產能提升以後的現金流還是好似現家咁只產生折舊的概率是各50%

假如佢新買的固定資產生效,現金流去到例如70咁,1/5的派息是14億,比起現在也不是爆很多

佢好多現金,但是下欄市場飽和,味皇不認為佢有多大的投資空間,69億固定資產已經能滿足全中國,佢不太可能有地方再220億轟落去,頂多就是再買多些5厘息的股票

這股是不錯的,合理價的唔駛7折就買到,如果恆指公司用佢取代果D所謂藍籌會很好,但是,現家這市況,合理價7折並不能滿足貪婪的智慧型投資者胃口

大炒

又唔係冇方法嘅,第時補習社可以明面上非謀利,然後同另外開經紀公司同補習老師簽獨家代理合約,補習老師出勤要比經紀委託費同車馬費,補習老師轉去其他公司要出轉會費,諸如此類係咁蝕盡量蝕比非關聯公司,然後用其他名義係非關聯公司度收美金回佣,冇錯,就好似foot球咁,正是世之日常

舊文盈富基金廢的寫的野最近係咁顯現,砣拉味皇頭5個月的盈利幾乎冇曬,趁此時候,味皇1.74沽出10000股匯賢,0.44換入50000股大悅城,跌1000點原來第日又1000點,聽日可能又跌,基金贖回申請點都要幾日,因此抽資應該會維持一排,根本原因還是恆指公司老是選些鳥股,基金先會贖得咁快,上面的事,不便評論

金融風暴金融海嘯之後,今次要叫乜野?金融鐵拳?係味皇比較熟知的股入面,例如四環同美蘭咁,今個月跌一半,呢兩隻都係熱錢多的公司,相反國銀同京客隆呢D,今個月基本冇升跌,因為向來冇成交,味皇手上無成交的股多的是,損失應該比人少,味皇10幾年前已一直係股市上保持防疫距離,而且早知道我們立於浮沙之上,站在人少的其實地方更安全

2010年時睇中信銀行的業績時,佢不良比率不增反降,味皇就即時沽清了內銀股並從此不沾手,事實上佢經過10年有多了,仲係冇爆到,咁代表味皇是錯的嗎?咁只係代表味皇信自己所想的並堅持下來而已,事實上一日唔爆味皇一日都可以應該係錯的痴9左線佢

也不是第一次講了,以維穩的角度看,銀行股東可能有幾百萬幾千萬,但銀行存戶會有幾億十幾億,甚至手上的兵也是存戶居多,如果必要在兩方之間犧牲一方,要選那一方不言自明

至於存戶同債仔之間的話,味皇覺得兩方都麻煩,但是相較之下存戶會緊要D,犧牲債仔會製造失業,最終會影響存戶,但即效性黎講,犧牲存戶即時會控制唔住,而犧牲債仔,至少可能頂多幾日先發作,而且債仔同佢相關的人數點都比存戶少,但是,與債仔同存戶相比,股東同投資者(包括債券),實務上是屬於能收割的部分

摸摸的茶上市先有幾耐?話咁快噴左一半,外賣鐵拳下受傷最大的唔係美團,係利用美團的下線

這是早兩日味皇飲的爆汁檸檬茶,上面寫的金額是15蚊,即是15蚊營業額,間野睇落有5個店員,味皇爆汁也整左5分鐘,至於味皇比左幾錢呢?答案是5.99,味皇用美團特價買的,5.99同15蚊營業額之間似乎有個相當細的差距,味皇比5.99,間野係唔係收到5.99呢?未必,用美團叫單一定會被抽水,美團也有成本,5.99甚至還可以叫外賣仔外送,簡單講呢一單是賺唔到錢的,賣一杯蝕一杯,這就能解釋摸摸的茶空有營業額但冇盈利的情況啦,當然呢間唔係摸摸的茶

5.99同15蚊的差額中間有乜事情呢?上面有個12.9,表面上15-12.9=2.1係美團比間舖的回贈,12.9-5.99=6.9表面上係間舖比味皇的回贈,果2.1,美團有冇比呢?還是羊毛出在羊身上?由於美團也是蝕錢做,因此5050機會,至於果6.9,係間舖比味皇,定係美團比間舖再比味皇?咁就要視乎邊間想係股票市場上殺水魚了,假如是美團要的話,可以比錢間舖,間舖回水返去(生成營業額),假如是間舖要的話,間舖先比錢美團,美團再比返錢間舖(生成營業額),味皇的出現只是令佢地一個有生成營業額的機會,齋吹,猜想而已,不能排除有人就愛做蝕錢生意

有時把戲老土,但有效,好多好似恆指公司咁甘心樂意上釣,正是姜太公釣魚

如果堅持從資產負債表同現金流表上選股,就不會犯呢種正確了

味皇推介有本書叫"智慧型股票投資人",叫格拉咸的人寫的,1949年

如果美團受限,下線的人就不能繼續以往的手法,如果唯一的解套方法是打算上市抽水,美團之類團體萬一用唔到就會破局

在這個時候叫撈底,實際上不講明天繼續跌之外,經過疫情,味皇也不認為大家會有很多閒錢,有閒錢的人估計很多也被之前的各種誘惑割韮菜,是咁的,先活下來,食飽飯,搵份收入來源先再講,好似D港股基金近期應該會各種抽走,平時大成交的股會跌多D,味皇反而覺得類似惠理基金806第時可以留意,呢次之後好多基金資產規模應該會大減,股價同時受市場風氣同本身擠提二連擊,份受影響業績公報時間可能在一年之後,味皇要講的係乜野呢?今日又好,下年的今日又好,能買的目標唔會走左去,冷靜下來整理好現時的情況較為重要

亞太衛星1045

上一篇提到3隻信號管制其中一隻,在世界範圍中也算奇妙的行業,至少港股中未必有第二隻,wifi中繼知道冇?佢的原理也非常類似,只係中繼距離比你想像更遠,資產只有幾粒太空衛星,好處的係佢唔太會有新投入,就算佢想投入門檻太高也投不起,因此一味只會派息,缺點係唔排除下一秒佢的衛星就會受撞擊變成太空垃圾,同埋現家打炮的成本比蘇聯時代平左,最近維珍亞馬遜老闆都大氣層上一遊,射垃圾上天會越來越平,舊時代的垃圾加速變成太空垃圾

講返1045,佢固定資產...隨意就好,關鍵係佢現金增加很快,冇集資,派息肥厚,近10年基本都有派息

資產數量實際上不能確認,也許下一秒就減值,但資產能用的情況下至少會有現金流,看起來現金流7億左右,交稅不多,味皇推測佢的收入來自外太空,由哪一個國家抽稅都會出現法律問題

最近生意好似越來越縮,而且用埋加速折舊,業績顯得非常難睇,可是相對的,佢的現金最近像蟲子一樣係咁滿出來

反正佢的資產不是0就是1,因為最好從現金流方向黎評估

佢派息1.7億,以5厘計,值34億,7厘計就24億

佢現金流7億,10%回報率計70億,15%計47億,20%計35億,30%計23億

而佢市值22億,按上面標準就係派7厘幾,資產30%回報率的公司標準,這種程度怎樣也叫算係好搵的公司,那樣就試下咁假設,1.佢資產好快唔用得,佢會用3-4年時間將手上資金全部折換成現金,2.佢資產好長壽,佢派7厘幾息,每隔幾年會派一次特別息

如果佢市值44億時,同樣標準就變成得3厘幾同15%回報率,這樣公司算唔算好搵就非常微妙了

簡單講,味皇認為佢的固定資產會折舊到0,期間會搾取出很多現金,當固定資產折到0時,佢還有50%機會繼續搾得出

如果不是天意弄人天動萬象的話,呢個價錢估計蝕不了本,前途就冇乜,但有可能派特別息,佢累積資金再射垃圾上天的可能性相信不高,做呢行應該很難轉行,到衛星唔用得冇收入的時候,私有化退市或者賣殼的可能性較高,這是味皇的個人推測,冇乜根據

伯爵茶

收租樓租客走左,味皇搞裝修少寫文,一黎冇錢買股也就冇乜想寫

最近來來的維他6盒無糖茶特價9.9,維起黎1毫子買到15毫升CP值高,買左幾種口味,烏龍茶一般,鐵觀音比較合味皇口味,佢仲有隻叫伯爵茶的物體,名就好霸氣,飲起黎一言難盡...

臭,成陣化學味,似飲洗清精,是否廁所香水?上網查一查,疑似是加左佛手柑皮,據說是高級紅茶咁話

味皇應該算是紅茶黨,對味皇來說咖啡就也就是泥水而已,可是味皇也HOLD唔住,只能這樣解釋了,青椒是不快,薄荷是惡意,榴連是貓屎,芫茜是行刑,食煙是服毒,可是偏偏就有人愛做抖M,兼講野大聲過味皇,伯爵茶估計也是奇人異士的口味,佛手柑皮大概同芫茜差不多,有人甘之如飴,對味皇就似落毒,並不是味皇杯茶,味皇對於口味可以力排眾議的堅持,因為味皇尊重自己條脷

這沒有乜野對錯問題,只是個人口味,但有時會有人吹噓有幾高級幾有品味,然後又貶低其他口味低級不入流之類,通常一個人嗌得大聲係因為有愛,但一堆人嗌得大聲多數係因為商業化有利可圖

市場上吹噓得最大聲的項目,是否真的適合你口味呢?味皇看見好多吹噓的人發大財,齋聽人講的被毒害,係咁換口味,也許多些經驗不是壞事,但不是自己口味維持唔得耐自己又辛苦

韮幣又好科網又好造車又好,能夠足夠長期賺錢的多是不起眼的行業,靜雞雞贏

今日齊魯出左盈喜,也不是甚麼意外的事,多3個月同多左收購的收入而已,一年前就知,但佢唔派中期息,價值唔一定近期就足夠地反映出黎,不過下一步要點也可以提早想定一下

神冠也發了盈喜,味皇覺得自己已不太可能用滿意的價錢買入就算了,好似齊魯咁,如果升多倍,下一步味皇可能會換成成都高速之類比較低債的公路,一係換成青島港之類比較低債的碼頭仲有幾隻做信號管制的公司都幾吸引,齊魯到價需要一段頗長時間,那些PlanB股唔一定比味皇真正買到,好似神冠應力之類中途升左就不想買了,呢兩個月味皇組合的表現也一言難盡,但看起來指數股熱炒股似乎比味皇更加慘,股市低估值的股票應該會存在一段長時間,要找總會找了的

紅茶口味的話味皇會比較鍾意落糖的平價英德紅茶同阿薩姆紅茶,其他就壽眉