內地樓

當係回應上一篇讀者好了,反正味皇本身有大陸物業,講下都冇所謂,認唔認同一件事,只是個人意見

是咁的,買大陸樓根本是傻的嗎,因為大陸樓有原罪,買大陸樓的過程唔係碗入面剔走甲甴,而更像沱屎入面搵豆,任何時候都有新樓無限起出黎,而人人又傾向住新樓,你放二手樓唔會有人優先想買,業主無時無刻要同呢條原罪抗衡,等於未開舖先交租咁,層樓D優點必須強到超過原罪,否則踩屎屎臭唔甩身

就先要搵D馨香的城市,例如深圳,北上廣之類的,唔係深圳馨香,而係D其他人一入深圳就自以為馨香左,而深圳人睇其他地方D人會白鴿眼咁(當然味皇冇話埋香港人),總之人爭人住湧入去以為有金撿咁嘅地方就最好,至於珠海仲未至於咁樣

或者跟住需求搵,D人一定會住呢度,唔幫襯呢度唔得咁,例如某大學門口,D學生唔可以係宿舍啪啪啪,咁就一定會租出面的樓啪啪啪,租情一直都幾好,咁嘅樓先不過30萬多D,味皇一直都想買黎宰班狗男女

另一種對抗原罪的方法,就是令佢失效,佢原因係因為有新樓可揀,先唔買你2手樓,因此只要令人冇得揀就可以,例如2047後香港的財政儲備全歸國有的話,咁甚麼全民退保就冇必要爭論了,所以只要令人冇得揀新樓咁你層舊樓就放得出,所以揀發展成熟的舊區,或許直接去買D45689手樓就冇賣出問題,樓齡唔一定係問題,因為新樓個殼新,實際材料唔一定似新樓,舊樓起碼比你見到仲未冧先,揀唔怕舊但唔好殘

另一種就係特色戶,例如記憶中吉大有一棟野面積只有一房賣一房價錢,但樓底高到可以改復式,改左賣唔到兩房但租到近兩房,又例如關口的樓間間都可以劏到幾十百間又比佢租得出(雖然租親都唔方係好人),諸如此類

珠海樓的話,味皇上次考察過,拱北,夏灣,灣仔,北岭,吉大,舊前山,舊香洲,金鼎可以,其他地方唔太推薦,橫琴強烈不推薦

舖的話,味皇當年買左北岭舖,當時商場是以貴價唔等駛商品作招徠的,味皇知佢實做唔掂,但又唔怕變死場(同時認為3年後,即係今年中有機會較大幅度減租,原定上年已賣的,但現家仲揸緊),原理係上面係大型住宅,而周圍冇其他商業點,大陸起樓的規劃是咁的,好大塊地皮,規劃一片綠化面積,然後再玩商住分離,起幾棟超高的純住宅,再搵一角仔做純商場,而唔係港澳咁老馮樓底都係街舖,如果周圍另外三面的樓宇都冇乜商業面積,咁4個方向的住戶都逼住要幫襯呢個商場

北岭舖最近貴價唔等駛走曬現家全場變左食野,停車場由於少人租改左用途做商用,暫時個招租情況同人流OK,估計租金就算減都在可接受範圍,之前車位對住宅比例1/3正常都租唔曬,賣20萬先租300,現家車位少左可能會好D

同樣情況的舖有現家幾多人包括讀者想買的心海州,由於味皇屋企的的回遷房正是心海州(味皇並不承認某樓盤是味皇的鄉下,所以被拆鄉下的味皇已沒有鄉下),所以多少都聽過D情況,心海州舖位的優勢同北岭一樣,樓上係大型住宅,周圍冇其他商業點,心海州商場玩獨市肯定唔會變死場,仲應該幾旺添,但有個問題,早兩年有人去威尼斯人度搞展銷會,巧合地展銷會當日有人係威尼斯人度輸大左,巧合地心海州跟住話冇錢停工左成年,換左老闆先開得返工,當然這只是道聽旁說,心海州D舖位自體味皇不認為有問題,仲覺得幾好添,只是覺得同業主簽合約的管理公司有多大的財力這有點疑問

另外呢,內地樓味皇認為冇持續性,唔係指樓價冇持續性,而係指你買左一層樓--然後呢?

然後呢,你未必可以買到第二層第三層,你或者可以做到賣一層換一層,但好難在同一時點並行推進,借貸呢方面唔支持,抽稅又多,租金亦唔能夠提供足夠財力,連細換大都未必做到,老實說,大陸稅務政策唔支持換樓,到你有呢個財力時,你又冇必要買大陸樓,相較之下呢方面日本樓也許更有持續性更多玩法,如大陸搵唔到荀盤時還是等港澳是但一邊取消雙辣椒更實際