2015年回顧

回顧2015年,味皇的組合回報率7%,而同期恆指由23600點跌到約21900點,姑且叫跑贏恆指一成半,而RF龍鳳果邊有個點醬淥的物體,味皇果邊的回報率卻有25%,差別在於佔組合近半的REIT年內下跌,另外電腦網,佳寧娜同SOHO相對現價買貴左唔少(始終搶攻同防反打法是不同的),不過D股提供的大量股息所買入的部分為下年防反提供基礎,,綜合唔駛蝕主要係由奧普,美蘭同晨鳴三隻力挽狂欄,同埋有幾次走得快的記錄

年內買入49次,賣出21次,其中20次是同類換馬,新增資金只有76000,因為用左廿幾萬裝修舊居,到年尾合共大約收到24萬的股息,真係到手的也達到上年設定的目標,至於年中增設的30萬進階收息能力目標,算勉強達成,不過人仔貶值可能影響到最終的入手數量,由於下年將失去工作收入,因此成長只能由派息同換馬著手,下年收息能力目標暫定為35萬

重大交易有:

1,2月將8.37同8.71的置富換成3.69的春泉同0.84的路訊通,4月0.89路訊通換13.88新創建--置富換馬後跌1成但春泉跌2成,結果硬膠左,但好在派息多50%,路訊通跌3成加置富1成幾共跌4成半而新創建只跌1成半算走得快,股息則差異不大

2月將4.09同4.17的越秀換成3.52-3.46的匯賢--股價變化不大,派息多1-2成

3月2.41的廈門港換成5.38的SOHO,2.062的唐宮換成1.116的佳寧娜,3.2出清CTM換成1.94的貿易通--廈門港跌2成半SOHO唔見3成,股息SOHO姑且叫有增長空間,唐宮跌2成佳寧娜跌3成,股息佳寧娜大有增長空間,CTM同貿易通跌幅相近,但股息貿易通佔優,總體呢個月冇乜即效性,造型又7

4-5月6.24的晨鳴換成15.66的建滔,再於14.46換成1.7的建業--兩方實質作用不大

6月2.29出清匹克0.7換世城--股息下降的交易,咁都去馬是因為懷疑匹克有古惑

7月7.49,7.73同8.18出清置富,換成2.37,2.55同2.85的電腦網,1.1出清龍翔--股價差異不大,但股息上升近倍的慨率較高,沽龍翔是因為天津爆炸會嚴查同行水表,而且寄主塞拉尼斯在中國的前途成疑

12月0.395出清川河換成1.75華南城--用管理費予測常規盈利增長較快,相較之下川河則比較平淡,當然華南城負債奇高,風險亦成比例的增加

其餘時間10.16-12.14主力搜集新創建,兼增持其他下跌的持股--比較看好飛機收租

持股中下年特別看好有得剪羊毛的佳寧娜同建業,核金盈利增長的新創建,世城,貿易通,SOHO,可能爆炸式反彈的電腦網同晨鳴,至於美蘭,川河同惠記唔一定有表現,奧普預計唔到,REIT受人仔下跌影響未必多派,而新百貨就詐睇唔到,除左電腦網,晨鳴同建業外,下年其他持股未必有足夠支持賣出的動機(如果晨鳴有好價的話將換入第一太平),先不論股價,大半持股派息增長應該唔錯,可能有2隻做到現價的10厘股

壞的消息是,美國加息,如香港跟的話味皇一家每月將供多500,同時由於美金吸引力大左而令人仔貶值,例如貶5%好似現家咁,北岭舖位每月少收300租,更主要的是來自REIT的股息可能收少7000,再加幾次的話最大潛在損失預算為每月2500左右,至於澳門的情況是,有D樓花就起好,有D業主借好多百萬故然要佢供,而人工唔增加(除非公墓員),每次加息要供多成千,唔否定出現銀主盤的可能,更大是可能好多業主要放租黎幫補而劈租,樓倒是不會減價賣

而好的消息是,摩連奴被炒梅開二度,花生啪啪作响,一門4杰,另外愛隊居然坐左阿仙奴專用的關愛坐,可能係眼花(現家仲榜眼添)

唔知算好算壞的消息是,過幾日澳門出最低工資,管理公司乘機加價3成,進一步減少租金收入

到今日為止,味皇仲未辭職,本來定左上個月就唔撈的,但公司係果個月開始係咁逼人放假,借下年D假,放人提早放工之類的,於是味皇日日都冇點開,變相HEA六日就有1日有薪假又好似性價比唔錯咁,於是仲咬緊份糧,咁唔爭在咬過年

逼人放假同借下年D假,財技上係用黎減少當年的負債同調整盈利,例如員工有5日大假變欠5日大假,日薪500咁計,未放假前公司欠員工有5日大假以2500蚊欠債或應付帳入帳,而放佢10日變成員工欠公司5日大假以負2500蚊欠債或應收帳入帳,前後差5000蚊,當成今年行政開支少5000蚊公司賺多5000蚊(相對下年行政開支多5000蚊公司賺少5000蚊),調左5000蚊盈利到今年,可能因為公司又轉左總經理,為份工扮賺錢,話說公司換總經理同皇馬換教練一樣咁密

*659最多派9000字誤,13000左右,825最終派唔出,呢D只係予測數目