安得利2218

*本來呢篇係常茂乸埋安德尊一齊講的,不過ironforge指正後証明常茂係無辜的,原來的論點就冇說服力了,於是本文的內容唯有作出大幅度修改

最近好似又好興炒殼咁,話說回來,當年的福建股大佬超大同中綠,現家市值得返5.6同3.6億,同得返個空殼差唔多,而今次的例子係市值得返4.1億的安德利

首先呢隻,因為轉左板,保薦人已經不可考,但味皇好多年前做會計師研究的時候,記憶中呢隻人脈上好似係是安全的,總之年代久遠,但睇上去有正經做生意

(BUT,經ironforge教路,原來港交所有除牌股票資料查,返查安得利的招股書,佢保薦人係倍利同群益,人脈係呆灣的幫會果邊,估計又係欠醬爆賭債居多,所以安得尊屬澳門系)

講返安德利,唔用保薦人判定,以現時佢的財務特徵係咁

安德利7.8億存貨,而營業額8.4億,營業額多存貨7%,非常唔掂,如果要有同存貨相等的淨現金為之安全的話,存錢存死佢都似,正常情況下佢D爛橙唔值8億,當每個賣橙1蚊就成8億個仲要唔爛吹水居多

同類的海升果汁,存貨11億,營業額13億,都係一擔擔,海升保薦人同為澳門系的匯盈,感覺是親羊生果邊的,海升正在停牌中

從財務數據上而非人事上進行否定的手段,存貨算係最有效的項目之一,其他手段包括現金流兌盈利,現金流兌已繳稅款,現金兌負債,長期不動現金,發新股時有冇錢等

如果用賣殼的角度黎睇,一般賣殼成功的都係多為廳主有控制權的殼,那些上市用於還債但又冇賣斷的公司,就不在待售之列,除非安德尊走佬,否則賣殼的可以性很低

*趣味問題,8億個橙兌8億營業額係乜概念呢?

1-個橙收成之後擺1年以原價交到食家手上

2-收左2個橙,擺1年後爛左1個,另1個以雙倍價錢交到食家手上

3-收左2個橙,擺1年後爛左1個,爛橙搾汁以半價交到食家手上,另1個橙都係賣半價

4--收左個橙擺1年後爛左,曬成陳皮以原價交到食家手上

5-收個橙,其實係係用1亳買返黎的,擺1年搾汁後以10倍價錢交到食家手上,然後將D渣曬成陳皮,聲稱塊陳皮值9毫計入存貨

6-每個星期收個橙,每個橙來貨價1仙,1星期後搾汁後以2仙價錢交到食家手上,然後將D渣曬成陳皮,聲稱堆陳皮值9.8毫計入存貨----求陳皮的有效期

樓C已賣

一直賣緊樓B,但一直賣唔出,忽然AA話有人想買樓C,於是甘就賣左,而價錢麻麻,近期樓價似乎回升,若干蝕水,睇下筆錢可以換到乜樓留黎

3.24出春泉13000股,3.09買入匯賢14000股,增加些少派息

尋日日本城又大升,考慮緊換乜好,神威,祟光,路訊通都有D興趣,一時未決定到,又跌返

祟光由於平時都唔係有本地人幫襯,所以早期就OUT了,現比較傾向神威,仲睇緊有冇其他好D的

雖然近期好幾隻升,但比較遺憾,到今日仲係負數(未計派息)

上一篇流言現家5X個,離100個仲好遠,坑瓜爹

上個星期開始玩摳腳網GAME(幻想神域),雖然有一大班摳腳大漢係度玩,但味皇都仲係得一條友,唔通味皇命犯天剎孤星,連男人都唔鍾意我?

相對的,湯兄早兩日結婚,加入現充集團,味皇係度祝佢早日醒覺抖M屬性,早日爆炸,FFF團萬歲~~

買入日本城

好耐冇(錢)買貨,今日以1蚊以下買入30000股日本城,盈利下降下10厘股應該唔得的,7厘應該有,現家手頭上的股票以大陸貨居多,收息之餘想要D反匯率的股票分散下,人仔貶值,日本城的來貨價平左,但收港幣賣價是一樣的,佢唔存人仔就得,不過日本城開舖地點有限制,開係有淘寶的國家就有蝕冇賺(大陸),開係有 真.日本城 的國家亦都唔會有人買(日本,台灣),所以日本城將來都係發唔到幾大的,不過現家個價都OK,將來較大機會做一排10厘股

講開日本城,於是又提下日本樓,味皇前年185萬円買的日本樓,居然升到330萬以上,13年310萬買的果間現家都450以上,當時福岡是冇人要而低水的,但現定家開通左廉航,D香港人又爆買,於是變成高水,好多樓都唔值得買,味皇正考慮好唔好賣走佢,在呢種前提下,味皇現在不特別推介日本樓

查實是咁的,味皇呢幾年SEND下SEND下都介紹左好多人買,仲真係有幾多人買,地產都由無名變出名,不過D地產咁耐1蚊都冇回水過比味皇,果然口頭應承但身體很誠實,冇簽過字係咁上下,雖然味皇唔駛靠呢D錢開飯,但都係唔爽,鑑於日本樓的投資價值開始低下(價值唔係話全無,但係選擇難度高左,唔可以學得幾年前咁亂掟飛標都唔怕有事,而且經過幾年時間蝗蟲化,外國業主比人印象都差左好多),以前日本樓買得過唔收錢都仲可以同讀者分享下,現家味皇自已都唔多想買就冇必要推薦人買了,因此唔再介紹經紀

1443富臨&1314翠華

富臨營業額25億賺1.6億,固定資產2.2億折舊7800萬,存貨7200萬,市值14.3億

翠華營業額18億賺1.6億,固定資產6.4億折舊9500萬,存貨2300萬,市值20.9億

以盈利來說兩者同水平,折舊來說富臨由於固定資產少,多數折舊係設備,咁睇設備規模同翠華差唔多,翠華折舊率較低相信是有自己舖位,存貨管理翠華較好,存貨兌營業額78倍,而富臨得32倍,估計係翠華附近有超市,冇貨隨時可以叫伙記去托米同買鹹鴨蛋,富臨就唔可以(例如PK冇鯊魚鰭買),以管理難度來說翠華易管理得多,值得貴過富臨(相對來說富臨可以開係旅遊區,但翠華新店的選址必須靠近有雞蛋賣的超市)

翠華淨現金5億幾,富臨6.5億,差距不大,若扣除同存貨相等的現金作保險,翠華能用的現金5.2億,富臨5.8億,現金流翠華2.7億,扣除折舊剩1.7億派1億,富臨2.9億,扣除折舊剩2.1億派2億,由於現時股息率翠華比富臨高,因此翠華較好,而且翠華有保留盈利,因此淨值有增加的空間,翠華有5.2億+保留盈利的投資能力,富臨得5.8億的投資能力,除非減派息

PE14翠華值1.6,PB2.2值1.9,派息3.7厘計值2.2,平均1.9

PE12富臨值1.75,PB2值1.4,派息4厘計值1.25,平均1.5

舊文

稻香(573)VS味千(538)

富臨的特性同稻香一樣,租舖,設備多耗損大,存貨雜,冇保留盈利全派息,而翠華就同味千相近,有舖,搵D客苯,差別在於翠華個名馨香D,有增長,味千個名有時係負資產,搞唔好就冇增長

富臨兌稻香1.5:2.35,即1:1.6,翠華兌味千1.9:5,即1:2.6

現價富臨1.1稻香2,圍起黎富臨比較平,翠華1.5,味千2.8,圍起黎味千比較平

とある屍変の亜洲電視

REIT業績(大陸)

87001匯賢

營業額上升9%,可分派多8%,每股派息多5%至0.27人仔,資產淨值下降5%,匯賢聲稱用人民幣計價所以貶值冇影響,其實係語言偽術,若計入貶值5.8%,營業額上升3%,可分派多2%,每股派息跌1%,資產淨值下降11%,淨值下降原因是美金債升值,現時負債比率20%

物業本身,北京的商場多租3%,其間有裝修冇租收,今年就有租收,北京寫字樓多租7%,呎租維持上升,出租率高企,扮酒店住宅,出租率由87.8%上升至92.3%,升左4.5%,而租金多8%,看起來呎租冇下跌,酒店前景唔係太好(毒氣?),但酒店佔租金的比例只有6%可以忽視,重慶大廈佔租金的比例4.6%,只有10個月入賬,今年就收齊,總體有94%的物業前景向好

人民幣貶值產生4.5億的債務增加,現時欠債94億,全美債,利率2.1%,因為利率低,借人債取代美債行不通,每加息0.25厘利息支出將增2400萬,而負債比率20%,如果要收購仲有借錢空間

現價3.08,息率8.8%

1426春泉

計入貶值5.8%,營業額下降1%,可分派多9%,每股派息多1%,資產淨值下降1%,淨值下降原因是美金債升值,現時負債比率35%,可分派多9%的原因是前年有債務重組,現家才是正常水平,而匯兌損失2100萬美元,唔計貶值營業額是上升的

物業本身出租率高企,加左少少租,今年有45%的樓面到期準備續租,物業前景向好,而旁邊KING SIZE的地盤到2019年先入伙,仲有3年安全期

欠債4.8億美元,利率H+2.75,暫時冇借人債取代的誘因,每加息0.25厘利息支出將增200萬,負債比率35%,收購空間有限

現價3.28,息率8.2%

405越秀

其本上所有野都有租加,補貼即將完結而扮住宅的部分業績算追上補貼,補貼影響可以無視

匯兌損失3.8億,欠債110億,當中83億為美元,利率2.5-3%,暫時冇借人債取代的誘因,每加息0.25厘利息支出將增1900萬,負債比率37%,收購空間有限

物業本身白馬大廈同書城因為屬零售用途,所以成長快,但其他寫字樓增長得好少,國金如果剔除地舖的租金,寫字樓都係冇乜增長,而旁邊的周大福塔似乎今年完工形成競爭,因此廣州的寫字樓估計都持平,白馬大廈同書城租金佔總體3成,其下年的增長除3大致就是越秀的增長了,總體有28%的物業前景向好,其他持平一兩年

現價4.27,息率7.2%

6139金茂

金茂的酒店入住率普遍上升,房租就下降,代表人數多左,質量差左,人數多左對零售同飲食有利,對酒店就不太好,因為執房次數同被偷的牙刷毛巾增加,總體而言,大陸的出遊人數增加,但賤左些少,說旅遊業復甦不如說餐飲業(下價)復甦,來自酒店的租金多7%,前景不過不失,上海酒店或會因美鬼鼠而改善,寫字樓就幾猛下,增長12%,出租率亦高,總體21%的寫字樓前景向好,其他一般

匯兌損失冇乜,欠債83億,利率4.6%,有借人債取代的誘因,其實估計大半已是人仔,負債比率26%,有收購空間

現價4.38,息率7.2%

1275開元

租金多15%,原因是收購,唔計補貼增派6%,計埋就少10%

同金茂一樣酒店入住率普遍上升,房租就下降(匯賢都係),由於開元的酒店係杭州,都會受益於美鬼鼠,新收購的酒店有間得半年入賬,所以今年會多1000萬,佔12%的舖位加租較多,其他一般向好

匯兌損失9500萬,欠債20億,利率3.4%,其中17億為美元,暫時冇借人債取代的誘因,每加息0.25厘利息支出將增400萬,負債比率37%,收購空間有限

現價2.86,息率7.3%,補貼用曬就不用計了

REIT業績(香港)

2778冠君

租金同派息都跌2%咁上下,由於花旗銀行大廈出租率開始租滿而上年空比較多,今年可以收多D,花旗銀行大廈佔47%,朗豪坊寫字樓增加9%佔15%,朗豪坊商場增8%佔38%,所有物業都向好,特別係花旗銀行大廈可能有雙位數

欠銀行107億,利率1.9厘,加息0.25厘利息支出多2700萬,債劵36億,利率3.5%,負債比率22%可以收購

現價3.93,派息5%

435陽光

租金多4%,派息多14%,原因係賣樓,屬於特別息,出租率同呎租雙升,足以抵銷賣樓的租金減少有突,剔除賣樓部分,剩低的樓加租7%,下年估計都差唔多

利率1厘幾,加息0.25厘利息支出多1000萬,負債比率21%可以收購

現價4,派息5.9%

808泓富

租金同派息都升8%咁上下,情況同陽光水平相近,下年估計都差唔多

利率2.1厘,加息0.25厘利息支出多700萬,負債比率27%可以收購

現價2.88,派息6.1%

假設冠君增長20%,陽光泓富各8%,一年後派息分別是6%,6.4%,6.6%,由於冠君向來有溢價,冠君回復至5%,陽光泓富回到6%,最終股價分別是4.7,4.3,3.1,因此2778>808>435

*用20%似乎多得滯,如改用14%,冠君一年後派息5.7%,股價4.5

778置富

增加12%以上,冇乜特別弱點,而且折讓低管理費攤薄少

利率2.4厘,加息0.25厘利息支出多2600萬,負債比率30%可以收購

現價8.29,派息5.7%

比上面全部同下面費事寫果隻都好

1881富豪

租金持平,派息下降5%,主要是因為用基金單位計的管理費攤薄同利息支出,酒店詳細情況避而不談,前景唔係咁好

欠銀行62億,利率1.8厘,加息0.25厘利息支出多1600萬,債劵19億,利率4.3%,負債比率37%收購空間不大

現價1.99,派息7.7%,由於租金下跌,特以最近的半年息計,息率8%

1270朗廷

租金減近1成,派息下降15%,做左人仔定期所以蝕水,正常派息冇跌咁多,同富豪相比,冇收購,冇機場酒店,所以酒店質量富豪好D跌幅少D前景唔係咁好

利率1.7厘,加息0.25厘利息支出多1600萬,負債比率36%收購空間不大

現價2.71,唔計補貼派息8.6%,以最近的半年息計,息率9%

假設富豪回復8%,朗廷回復10%,息率分別係8.6%同9.9%,股價回到7%時股價分別是2.45同3.82,而假設富豪下跌8%,朗廷下跌10%,息率分別係7.4%同8.1%,股價回到8%時股價分別是1.84同2.68,結論是現在的朗廷應該比富豪抗跌,返生時亦彈得快,而且派息更高一點,1270>1881