SOHO業績

最終今年只能收到微量的股息，相當失望，不過味重倒很歡迎佢轉營為收租佬，因為時間一般都企係業主而不是租客同賣主一方，等幾年對味皇好閒啫，集優新廠等佢3年，美蘭等擴建又4年，奧普都揸左8年啦，只是soho搞到味皇看起來買貴左7到冇朋友

soho大把人有貨，要睇業續分析雪球度大把人寫，去雪球睇啦，味皇補充d冇人寫的內容就算

佢個3Q乜Q,轉換成香港的日常說法就係搞劏房，租比個體戶，由於soho寫字樓個名貌似可以增加屬性點，如果騙徒的登記地址係甲級寫字樓，咁佢行騙成功的概率就會大幅提高，好似澳門d千幾呎豪宅好多時租比賓賓廿幾三十人住一間，日日去會所坐，話比人知住係豪宅，身上噴的臭水都變香水

就咁，本來應該空置的地方，以不正常的高價高價高高價租出，結果而言會令呎價強烈扭曲，爛床位king's cube呎租仲高過天璽一樣，於是你睇落soho層寫字樓呎租超高，就以為佢神靈附體而作過度評價，將來如果出現天價租金唔好過度反應，好賺就自然多人跟風最後就回落返似樣少少的呎租

soho最近唔買地唔起樓，因此資金需求唔多，加上佢財政好，有高派息比率的動機，當然只有動機並不足以包生仔，現時點根本估唔到佢肯派返幾多出黎，現家講呢d同毛利小5郎講“你就係兇手”一樣不可靠，“你就係變態”之類的都係等臨完場比瘟神黎講啦

雖然佢唔起樓，但唔代表佢唔會買現樓，現家佢欠200億負債比率先25％，現金流又強，因此再借一兩百億不成問題，但現棲一般得3幾個％淨回報，在借港元會有風險而借人仔利息又高的前提下，佢冇動機進行收購，現時高回報的投資手段以回購普通股的回報最高（加上可避稅），其次是優先票據，現時主席持股63％，公司市值200億以內，回購12％到持股上限用20億左右就得，而優先票據7億美元利率5.75-7.125％，而現家大陸銀行貸款利率已降至4.6％，相信有足夠的水位進行轉換

但有劏房呢招的話（實際係搭檯，冇必要一定要話間開），現樓回報可能翻倍到6％以上（需要地點同名氣），因此soho有機會用貸款收購一d寫字樓，專門用黎劏，1開2，2開4，4間變8間，8間變16間，之後就上市納錢鬆人

如果佢有好似上面果d明確的駛錢途徑，恐防佢會派唔足息

佢今期大跌主要係冇賣樓同停派息，但唔一定以後都唔賣，例如同復星領導班子打緊8-1地皮官司，仲有機會打輸，無論輸贏，打到終審判埋出黎，就多數被法院強拍塊地皮，soho冇法掌實權的話多數會收返拍賣錢算數，咁就會出現一次賣樓收益

soho的風險是，如果味皇係主席，現家可以有好多方法玩到小股東一棟都冇，例如利用呢次人為低價（停售同減息完全是主動行為），先用人頭收集股票，收到乾再用貸款私有化，想低價私有化成本百幾二百億絕對借得到，或者放風老吹高價私有化比人頭出貨然後告吹就得（類似48小時系列，險簽系列之類的），或者人頭收完之後，特登賣樓同派特別息，拉高股價後比人頭出貨，高完之後又停售同減息向下炒之類的，睇炒家就少掂soho較好，收息只要影响唔到租金就話之佢玩，舞高弄低反而仲好，只要唔好私有化就得了

電腦網業績

盈利跌15％，嚇死人咩，個心離一離呀

營業額同毛利增加，照計是很好的，應該好順利咁達成10厘股，不過問題係支出忽然大升，如果係一次性，咁現價的電腦網就係神仙股，就唔知係一次性定常規性

於是味皇試下回憶下上年電腦網同今年電腦網，個網有乜分別－－係有分別的，不過唔係pc版，而係手機版，同上年相比，電腦網多左個app，以前手機版係用百度現成的生成系統，而現家卻更似淘寶的外形，簡單講就係搵it重新寫過曬，呢d支出唔可以計入有形資產，咁唯有用黎扣減盈利囉，因此味皇憶測為一次性支出

如果唔好彩支出成為常規支出，一年大概派0.15的水平，如果只是一次性支出，以後就派到0.22，至於今年，估計派0.15-0.19

現家應該要改口叫汽車網？

汽車網的好處係每個零件同周邊背後都有間公司，唔止成架車咁賣廣告，避震，音响，潤滑油都可以賣廣告，以前電腦網都係咁，主板，顯卡，聲卡乜都可以賣廣告，幾百幾千間公司，自從時代流向手機一體機之類後再唔興散賣，幾百幾千間公司合體成幾十間公司，咁廣告商就出事了，好彩汽車好多人當玩具玩損耗又大，零件有得散賣，汽車網還算安全

電腦網冇得救，比起以前，小米華為果d座大左，少左好多山寨廠，打廣告的公司變得更少

女人網有得搞，大陸賣易容產品比之前平左，但都要有多d正貨入口，d人先有野可以比較，大陸大城市或者有莎莎咁多品種的舖頭，但細城市就冇咁多品種貨，最多都係商場有d不知名物體，上網睇左都買唔到，於是，隨物流業的發展，女人網由大城市的小眾讀者擴展到小城市的腐女只是時間問題，只要多d推介網購就可以

家居網就同樓市相關，近期應該冇乜人有心情睇

春子網就麻麻地，啪啪啪的確係多左，但叉燒數量反而少左，有菊花冇結果，好在基數細仲有成長空間，不過佢最近收購d類似小霸王學習機類似的物體進入實體經營，但電腦網的重要賣點正是佢非實體因而佔用資金少，佢一旦進入實體經營後可能產生更多的固定支出同預留營運資金，進而影响派息比率

匯賢以股代息

今次呢篇係用手機寫的，帶有試驗性質，篇幅會短d

匯賢出左以股代息價為3.32，即持有50000股就可以進行Lv1,98000股就可以進行Lv2,148000股就Lv3咁，假設使用的是手損同痕身，買賣手續費分別是5蚊同100數

1仙差價Lv1的2000股為20蚊，Lv3的6000股為60蚊，用手損就有肉食

同理8仙差價分別是160同480，痕身都有肉食

味皇用的永亨Lv2的打和點需2仙以上的差價，即匯賢低於3.3味皇就買4000股收現金息，高過3.34就沽4000股收代息，不過大雞被銀行食細米，為左有足夠的水位同唔益咁多比人，味皇打算有8仙差價先行動，由於不太認為匯賢會點跌，因此區間暫時設定為3.31～3.39，但不一定嚴格遵守

N年前寫過現家寫多次，如果第一擊觸發左，即係味皇已買/賣4000股,而之後股價反轉，第二擊就轉為賣/買8000股，第三擊又買/賣8000股咁,具體例如3.31買左4000股準備收金，好彩的話3日後升到3.38就沽8000股變為收代，2日後跌到3.32就買8000股又收金，6日後升返3.37又放8000股咁，狂食波幅，玩到股息真係到手的日期為止，呢招對匯豐相當有效，但對匯賢呢d死人心電圖有幾大效果就冇乜底，果如果唔好彩一升/跌冇回頭或一直牛皮，咪食得一次咁多多

人仔貶值

學者：中國領導班子不懂經濟

oh no。。。。唔好呀

雖然味皇沒有做人仔定期，但組合有4成是借美金的chi na reits，加上仲有個大陸舖位，咁唯有用生命值硬接

鑑於澳門把大部分身家做人仔定期的人相當普遍，至少味皇公司入面己經屍橫遍野，屍山最底果浸係應該係澳門借錢買大陸豪宅果批，咁講起黎味皇也算是墊屍底的一員了，雖然是舖位

人民幣晨早就應該要貶值，東莞d廠執粒之前黎貶先有效，拖到現家先黎，廠都冇曬就算救都救唔返，之前一直都唔貶，搞都睇死中國領導班子有齊中國人的生活習性，議而不決，決而不行，點知今次發下瘟，就咁燒焦

今次貶值，資產上損失的人居多，但是相對的，收入變相增加，出拱北買菜多返一兩條，茶餐廳斷唔會減價益你，但都叫冇左加價理由，姑且通漲變輕（抽中埃邦有105仲唔快放就會出事了），對有糧出的人是好事，對供樓的人也是好事，因為咁樣一搞美國佬就加唔到息

兩日跌6％似乎過左火，好多細公司純利率都冇6％，萬一去銀行搞左信用證之後整個匯損就收皮了，基於中央一啖砂糖一啖屎的尿性，跟住好大機會穩住匯率後，減息呵返

有乜行業有利同不利？本地旅業同零售有關的會不利，大陸人本身唔想黎現家d野貴左更加唔黎，對香港個碼頭不利，d人會更加傾向用深圳，對香港科技行業不利，大陸人材更多人工更低左，咁計香港4大支得返金融同地產兩支，塘水炒塘魚好了，反過黎對水電公司有利，可以平價同大陸買更多水同燃料，變成更依賴大陸，味皇完全不認為大陸是存心針對香港，只是施政時偶然地順便地收左香港皮啫，澳門的話就完全不用擔心，d人爛賭的話用掘頭掃把趕都唔會走

香港唔係唔可以反抗的，只要將港幣兌美元調為8.1：1就可以了，又可以同步返兼冇破棄聯匯，完全是有自主能力的，不過香領導班子有齊中國人的生活習性啫

去返股票度，死剩的出口股有d會返生，只要原料不是進口就可以，當中以汽車同手機最明顥，貶值同時令出口增加同入口減少，內需出口都食正，汽車毛利本身少會反彈多d，其次係紡織，出口價不變但成本少左，至於之前死得勁快的東莞一類，由於廠要搬一早去曬印度印尼，做起左今時今日也不會搬返黎，大陸貶值人地一樣貶得，只可以話貶得太遲，而且大陸計劃生育令適齡的民工比以前少左好多，冇得斗命賤了

大陸reits就派息少左6％先，美元欠債增加倒不會有巨大影响，一黎老細此時應該已踢廁門，員工褲都唔休就沖去銀行搞匯率對沖，二黎reit的債基本是永遠不還，而是無限續借，咁最終體現出黎的是負債比率增加同利支出增加些少，派息影响唔算太大，但冇得玩收購，美元加唔到息算佢執到，越秀今次執返身彩，借錢買野時撞正，有得反口，早排買落的領匯就食蕉蕉了，其他本地reits，由於之後旅業更唔掂，難寄厚望，reit算是流年不利，同樣公路股都係，今時今日d股票好難唔同大陸拉上關係，如果呢個時候先黎追求真本土的收息股，係得返新意網算是獨立王國

最大影响的是乜野？就是果d無視核心盈利，只是用盈利數字乘固定派息比率的公司（新創建是典型），如果出現重大匯損或耆其他一次性項目的話，即使核心盈利再好，還是會按盈利數字扣除派息而不是按現金流來設定，最終顯示出來的是盈利下降兼派息減少股價插水，陰到人的，講開呢樣，好似奧普，莎莎，維他之類的是相反類型，佢地用現金流黎設定派息，因此好輕易就會出現100％以上的派息比率

題外話，雖然味皇買左舖位而歸類為墊屍一族，但收緊租同交緊管理費實質上有相當的差異，今日去左個舖位果頭食飯，見個商場終於轉返定位，由廣東道轉為mk，變左食街當堂旺返好多

撿齊

上次8.18沽778筆錢，近日換成3.41匯賢6000股，2.47電腦網10000，4.79soho5000，0.85佳寧娜10000，0.59世城20000，味皇燈己不是一次半次，己習以為常

9000蚊雖仲未到手，但今次出糧收左果兩份，己達成最終目的，味皇隨時也可以辭工了，現在差個良辰吉日

屋企裝修仲未搞掂，仲未可以上網，唔多開到pdf，寫業續呢d大工程暫時都未得

冇野寫就講下個組合，現時味皇的食飯倉就咁：

春泉20％－－65000

匯賢11％－－38000

開元7％－－25000

－－－－－－－－－－－－－－－

惠記9％－－25000

奧普8％－－25000

電腦網8％－－22000

隹寧娜6％－－10000-30000

貿易通5％－－18000

美蘭5％－－6000-24000

soho5％－－13000-22000

新創建4％－－10000-15000

川河3％－－8000-15000

世城2％－－5000-12000

晨鳴2％－－4000

建業2％－－2000-7000

新百貨1％－－5000

－－－－－－－－－－－－－

派息281000-352000

樓果d唔理先，味皇現時每月來自股票的股息收入予料最低都有23000，都夠去大陸同台灣做大爺

越秀vs匯賢

http://realblog.zkiz.com/lgaim/134395

（越秀（405）現價4.32，匯賢（87001）現價4.45港幣，差3％
今期派息0.153/0.164，差7.2％，即是表面証供上匯賢比越秀好）（3/6）

越秀（405）現價4.4，匯賢（87001）現價4.51港幣，差3％
今期派息0.154/0.171，差11％，表面証供上匯賢比越秀好的結論看來還算妥當

405來自服務式公寓的營業額2.4億，賺得6000幾萬，就算當佢全年有5億，全年都係2億，離淨租金2.7億的打和點還是有點距離

以外的營業額5.5億同上年的5.4億差唔多，而出租率己到頂，當佢全年12億，從這基數上搾取7000萬的淨收入成長似乎有點困難

呢半年用近4000萬補貼填呢個氹，不計補貼405全年派到6億上下，如果405可以有10％成長的話，大致可以抵銷補貼到期的影响，只是成長10％要求也不算太高，特別是利息支出大減，即使東塔起好搶飯食，估計都係坐一年兩年內就可以達到平衡

跟住呢排405的派息會開始停滯，說回來好像已經停滯了？之前半年0.153現在在0.154甚麼的，成長追不上管理費的攤簿，不過租約簽好曬出租率又高，以現在的情況即使未來一年派息下跌，也未至於跌好多，問題只係“忽然派息下降”市場會比乜反應啫

數量半年前己作予測，予測一段時間後的結果真的具有理據的話，並不會在無發生意外的情況下就推翻，技術分析寫的文章可能到明天就已經思覺失調，但基本分析的文章就算經過好幾年也有一定的參考價值，所以就不重覆了

87001的物業租金若干上升，東方廣場淨收9億兼上升中，升5％就有4500萬，相對地酒店得6000萬就算再降一半都無關痛痒，新收購的4個月上貢5000萬，咁6齊個月兼加租的話應該有8000萬

借銀行80幾億，係港元，如加息半厘成本多4000萬倒不是問題，一黎冇咁快，但是如果人仔貶1％，不但轉返租金少左，欠款用午餐肉還的話恐怕仲要還多幾百萬罐，反過來有借人民幣的405就可以還少d，不過鑑於reit的價值通常只在派息而非資產上反映，午餐肉甚麼的基本不會轉為顯性現象

不過老美的尿性，口說加息，但又一點也不想美元升值，如果匯率走向不太明朗的話，這邊的官員不論口裡說乜，身體也會自動只會照跟美國佬，想做大事但又不想出位而揹鑊，明白這種心情的味皇似乎骨子裡也是中國人

前半年匯率問題不大時87001明顯比405優勝些，現在多了個不明朗因素，但在拉開10-15％的差距下，且一個停滯而另一個進步，相信其中的利益差應足夠抵消或然的風險

出清龍翔同置富

上唔到網好唔方便

1.1沽清龍翔，持貨兩年賺3成半，兩年前龍翔在市場上是相對高息的股票，黎到今日弚變成相對低息的股票，所以換馬，實情味皇係擔心龍翔的將來，我們從來不需要擔心寄生蟲的健康，但寄主的情況卻必須留意，近年大陸勁為強大，我指幣值，兌美金以外的外幣升值幾成，加上地方政府去西人化的政策，好很懷疑塞拉尼斯個工廠會係大陸留得幾耐

另外8.18沽清剩下的置富，打算換入匯賢，由於銀行關係，吸納要分批進行

2.55買入1000股543，1.7入8000股536令股數變齊頭，再11.64入3000股659，4.73入10500股410，最後入左9000股3.52的87001，全年股息估計可增加6000

就咁的，6000蚊話多唔多，話少唔少...但係萬里死左，做黨主席條路斷左，咁唯有報風水洞課程，年青人方可發達，聽大c點，唗勁氣啦，in 陳振聰 we trust 

87001每股派息0.1362，每手要2000股，以3.6計一手要7200蚊，因此最低lv1也需52000-54000股才可施行套息大法，而味皇打算進行lv2所以要收夠近104000股先得

樓c現市況睇怕又賣唔成，所以最近味皇想轉換策略，試下趁現家仲有張糧單黎度，利用冇按揭的自住樓黎進行債務重組，睇下可唔可以增加返每個月四五千的現金流

9000蚊仲未收到

人人以為澳門經濟差，要好似希臘咁收皮，實情某賭場入面呢幾個月好似街市咁，同早幾年全盛期時有得比，以賭場內的盜賊數量為例，味皇目測是早幾年的二三十倍，或者可以同廣州火車站匹敵，估計是尼泊爾地震少左批保安又縮骨唔請返的關係，場內d雞就冇點多到，未及沙圈的規模，如果平買收下息的話就未至於會派唔出，如果說問題的話，佢旁邊有唔知乜7大型酒店就起好，會拖低入住率，為左繽牌談判又唔可以停左新場的建設，所以下年的新場養老鼠居多

最近同出版社有關個日本地產交流，發現新大陸，合法地搞民宿也，味皇評定是--有得做，有技巧進行的話成功率不低，不過本金門檻有點高而且政治不正確，睇下味皇遲下有冇閒錢參一腳啦

至於本書，味皇同出版社講完之後，話會係9月出版咁話