814京客隆

本來諗住尋日寫的,費事又石頭同腳,於是遲一日先寫

大致係咁的,疫情下可以不受影響的行業,超商係其中之一,如果市值由底數上黎,京客隆應該係最好的選擇

疫情間有3種股:1.受負面影響的,2.不受影響的,3.受正面影響的

疫情初期,差唔多乜股都跌此時買受正面影響的是上選,不受影響的是中選,受負面影響的是下

疫情過一段時間,差唔多乜股都跌,受正面影響的升返,不受影響的跌左,受負面影響的也跌左,邊種好話唔埋,視乎股價

疫情後期,受正面影響的價高同埋影響可能會消失是下選,不受影響的是中選,受負面影響的價低同影響可能會消失是上選

京客隆由於不受影響,無論如何也不是上選,但一定不是下選,優先度中等

有受影響的,每次業績都會動L,不受影響的出業績都可能不太動,做短不行,長的話也不及上選,兩頭唔到岸,但持有中選本身並不是壞事

回到京客隆本身,股價1.18,淨值4.25,PB0.23,PE7,派超過10厘,而總市值只不過2億多D

營業額基本5年不變,盈利幾千萬,但利息支出居然去到1.7億,佢欠債38億,利率4.4厘

營業額5年不變,存貨量也不變,經營穩定,不進不退

2017年佢的折舊是0,但2018起爆升到2億,2019年後將近4億

2019年固定資產增加11億,而多出黎呢11億,折舊是2億,之後還加速折舊到4億,而固定資產下降未有4億咁快,代表佢買4億以內的固定資產填補

11億折舊2億,咁肯定唔係買舖,而係買花巧設備,至少代表佢係2018年作出不知名的重大轉營

在不斷幾億幾億咁補錢入去固定資產度,最近的現金並沒有減少,甚至增加,還派了10厘息,盈利數字得幾千萬有點可笑

在轉營時點前佢現金流6億交0蚊稅,轉營時點後現金流10億交稅3億,以味皇所見似會計屍轉型多D

2016年派息5000萬,2017年後都派起碼2億,損益表所示佢利息支出1.7億,但現金流表利息支出是0,佢必然是用其他會計項目黎代替,味皇估係來自現金流的"其他"項目,還有果2億派息可能有優先股撈係度

用上商的資料,味皇可以猜測到佢有優先股或換股債,38億欠債唔一家全部係債,但如果係換股債而佢股價一直咁低,攤薄會好甘,之後味皇睇年報確認

總而言之,京客隆的會計手法極唔尋常,可能同佢的少數股東權益有關

但結論而言,一間交3億稅,派2億息,現金流過10億,股息率10厘的公司,市值2億係低

係年報度睇,佢誇張的折舊係來自:1.舖頭裝修,2.執9左佢

折舊分左平時的折舊1億同叫使用權資產折舊2億,2019年增加果11億固定資產如果用2億黎扣,代表果個所謂使用權資產有效期是6年,推算大概在2023年到期

同時佢有個4億的2019年中起2024年中到期的債券,唔知同上面有冇關聯,還是根本就是同一樣野

佢銀行欠債是23億而不是38億,當中23億銀行,4億上面債劵,9億"租賃負債",叫租賃負債,唔通租約當欠價,還錢當交租?

如果味皇係會計師,會覺得佢條數好難做,佢市值可以去到咁平,可能同會計師連續兩年保留意見有關,稱聲要不到子公司的賬簿咁話

味皇點解仲信京客隆呢,其中一個原因係佢2008年到現家一直都有派息,尚算肥厚

咁10厘算唔算多呢?佢PB只有0.23,如果PB1時,咁佢只得2.5厘,盈利能力點都算唔上高,而且佢5年營業額同存貨都差唔多,叫唔上成長,而且最近季績營業額仲要跌,10厘只係佢價低到不可思議

會計師保留意見幾難要求佢上返PB1以上,但1倍水位應該有的

*下面有人提京客隆的市值係4.8億,睇返佢總股本4.1億,每股股本1蚊,即係4.1億股,計返係4億幾市值,佢啱我錯,2億只係H股市億

不過唔影響閱讀

第一針復必泰

如上文,早前4.16沽出10000股惠記,10.15換入4000股路勁,之後還會繼續轉換

另外6.3買入13000股晨嗚,唔係增持,係轉倉,味皇打算慢慢由永亨轉立橋,永亨最低收費85蚊,立橋疑似28蚊

最後,過多陣味皇就去衛生局拮針,全世界都搶針,而澳門打唔完擺到過期好夭壽的,一係快D拮左佢,一係送比帝汶

如果味皇拮完未死先繼續更新

*係不可描述的日子裡,味皇做左風險相當大可能後悔的事,還立了Flag,不過到現在為止,味皇還活著

味皇拮的係復星的快過期的BNT第一劑,拮左之後觀察30分鐘,大概15分鐘開始頭暈同手震,持續左3分鐘左右,之後冇事,BNT的針目測3-5毫升左右,醫生9UP分散你注意力,偷偷用牙籤仔拮你,1秒以內拮完,唔算痛,事後痛,現在打字時間是拮後10小時,仲係痛,可忍耐,味皇剝橫生智齒的牙痛都能忍了,唔知咁仲有冇參考價值,大陸藥劑量疑似比德國藥劑量大,多幾毫升,拮落去應該會更痛苦

MRNA系的疫苗的副作用主要係爆血管類型,所以拮後應避免運動同炒炒賣賣刺激血壓,最好躺平,要不就平躺

另外本日再4.16以下沽出14000股惠記,10.06左右換入6000股路勁

*現家係拮完後32小時,現在的情況大概係咁,針打係上臂,1晚訓醒,上臂肌肉位置大概比館長抦一拳淤左咁的感覺,而下臂就有肌肉痛,如果單手揪個4KG的西瓜行3公里第2日的肌肉痛係10,咁打完針第二日的下臂係7,另外全身大概有2的疲勞感,在24-26小時時,心跳有比較重的感覺,冇測過唔清楚有冇發燒,頭腦還是清醒的

另外呢兩日一口氣睇完大時代,以前未睇過的,內容神神化化,成班都神經病,但佢9幾年講的老千股,在味皇0幾年入股票市場時都仲有非常類似的,可能係同一系,也可能係同一班人但第二批股,自從澳門賭廳收緊之後,向下炒係一定程度上已經收皮,算是己成歷史,冇乜撚用,大時代的感想如果有人睇就寫,冇就罷就

*針後48小時,症候基本消失,一陣會去驗核酸,睇下會唔會變偽陽性

*之後去驗左核酸,結果陰性,冇因為抗體而變偽陽性,呢批BNT針的有效期到8月,而且唔一定補貨,第2針同第一針時隔1個月,因此要拮最遲7月好去拮

8月之後如果再入貨,可能BNT會變成復星生產的大陸針,自己判斷一下

路勁惠記近期

渣住惠記7年了,由於近日四環動L而退居至第3大持股,味皇最近考慮緊佢的估值,一直都冇高估過

但是,如果是惠記同路勁之間黎比較的話,現家惠記應該算係相對估值最高的期間,例如上年疫情前路勁13蚊時,惠記4.6,按PB唔準確計分別是0.46同0.37,疫情後路勁10蚊時,惠記3.7,PB分別是0.36同0.3,而現家係10.3同4.25,PB分別是0.37同0.34,差距收近到比較細

原因係上年路勁公路收少幾個月,減派息,而惠記雖然面臨一樣的情況,但息冇減,另外惠記其他子公司的前景也相當好

但是,取個平均值好了,差距124-109%,平均116.5%,如果惠記轉換為路勁,應該有起碼7.5%的水位可以套利,大致就是下年業績出左之後,假設惠記維持在4.25而路勁會升到11.5-11.8,同時派息惠記派35仙而路勁派1毫

就業務黎講,同7年前相比,路勁公路還算穩定,地產的前景不及往年,負債也多,利基7年前是垃圾,現家係明星股,惠記的美國REIT也錢途變差,總體上惠記除左揸住利基外,其他變得有點不外如是,賣點除左超平以外就是勁抵

相對而言,現時比起惠記,路勁在歷史估值同派息反彈方面優於惠記,而整體估值上,比起0.34的PB,能比佢平的大概只有PB0.2左右的建業漢國,而且前景更好,但是建業系以往的派息都不多,無論惠記還是路勁,派息皆在8厘以上,而漢國的派息要多派1倍以上才能拉近,漢國倒是有可能的,但建業一向姑寒未必肯派

惠記的派息佔味皇年收入的一個重大部分,但味皇的今年起收入增長已較多,底子較厚,不必追求惠記的穩定性,經過評估之後,味皇應該會開始將惠記轉換,惠記長期0成交,轉換可能是個漫長的過程

回到路勁同惠記本身上,本來應該留在業積後再寫,現定超前寫下

路勁投資增加26億,存貨增加85億,借貸增加69億,利息26億,公路賺5-7億,,資金缺口較大,一般黎講佢係子公司收到的派息會佔利息支出的一半,但前年只有1/3,今年仲得1/5,所以減派息都唔出奇,假如佢今年公路回復正常水平,好似10億咁,都係佔利息1/3,就算增派息惺派息比率麵不及以往,而且存在唔增派的可能,一方面佢地產炒得太大,另一方面佢借錢利率7厘,優先還錢都唔定

惠記會有路勁一樣的問題,但佢收路勁的息多,派返出黎少,某種意義叫緩衝左,因此惠記的派息較難減少,利基上年剩係交稅都交2億,隨時1個救全家,利基淨現金10億,惠記可以調到出黎,結果是母公司有錢,路勁冇錢,同時路勁又低估值,因此:1.配股,2.供股,3.回購,由於路勁街貨甚少,點搞都有困難

1936利特米

同上一隻一樣,保薦人垃圾,但財務數字看起來不錯,所以留個心眼

同上一隻一齊找的,當時佢仲得0.53,現家0.81,已無利用價值

點解味皇呢排都係寫埋D濕鳩股呢?是咁的,如果是2年前的味皇,金錢也不算非常多,一蚊都不能少,面現在味皇的資金在"滿足"的水平以上,例如2年前味皇的財力移民可能不太現實,但現在可以足夠移民去較多的地方咁,所以可以把滿足以上的攞黎浪

對味皇來說投資同玩模擬GAME玩呎球經理冇分別,差別在味皇之前用生命去玩,現在可以用籌碼黎玩

這是分階段的,味皇搵工掙扎求存一個階段,固本培元一個階段,靜雞雞贏一個階段,倒數人生一個階段,如果是較早期的階段味皇會去月供返正常野,以前味皇會考慮呢種,但奶過野經驗值增加後,味皇不會再係前期買呢類有疑慮的,不知不覺就連中期都過埋了,讀者最好利用味皇當年奶野的教訓,跳過交學費呢段

回到正題,由於現家係疫情,好多股都跌到地底泥,半新股上市後反正係唔係都會跌到地底泥,於是可能變泥下泥,實際上,味皇上年搵股是由市值倒數開始,由幾千萬到3億市值全部揀一次,市值超低的股,本身賺錢一般不會多,夾硬上市一定係用老千保薦人垃圾核數師,故意用垃圾同比唔起錢用垃圾應該有一點點差異,於是味皇(閒錢)用稍為寛鬆的心態對待財務數字看起來還不錯的超小型公司

佢固定資產一直不變,存貨有浮動但上下不大,上市前現金一直微量增加,上市前有派息,代表一直有錢賺,現金流不穩定浮動大,可能賬期長,交稅上下淨動但都有幾百萬

營業額變化不大,同固定資產情況接近,上市後盈利變化大,味皇認為係佢上市兩年前的借錢時就已設下的財技,另外就是提高了折舊率同堵加存貨

佢最大的缺點是存貨大於現金很多,這代表存貨唔流通,存貨的價值可以隨意UP,存貨唔透明--的可能性較大

味皇覺得佢就是個年賺千幾萬馬B的貨,佢現家市值4.05億港幣,PE22.56,每股賺0.0359,推出盈利是港幣1800萬,盈利未低估時勉強夠上市資格,折算返味皇估2800萬咁上下啦

以盈利2800萬計,股價0.53時PE10,淨值0.28,PB1.9,估值馬馬夫夫啦,如果肯派的話派息能力3仙左右,佢的業務是生產畜牲的飼料同人類的飼料,在疫情期間算是能維持到業績的行業味皇先留意佢,現在0.81的股價就不了

2258華滋海洋

呢隻野的保薦人係垃圾,但齋財務數字黎睇又唔應該忽視,姑且留個心眼

上市價1.22,dum一聲跌到現家0.56

發行2.5億,手續費5000萬,收費去左1/4,算係常態,所謂羊毛出自羊身上

集左果兩億仲未用,淨現金現家4億幾,而市值又4億幾

上市前已經淨現金兼0負債,上市前仲派左億幾比大股東,說明係有一定的賺錢能力的

上市前2年交稅800萬,前1年交2000萬,賺幾多自己用稅率除返開就係,佢比的盈利數字參考就好

平均交稅都有2000萬嘅,現金流不太平均,賬期應該偏長,基本每年都有派息

最近幾年現金冇增加,基本得存貨多左,收到的錢派息派左去

折舊率上市前10%,上市後16%

上市前固定資產7000-8000萬,交到800-2000萬稅,上市後固定資產1.2億,稅得前年升到3600萬,今年疫情得1100萬,前年未必係常態,但今年也不是常態,假設甲-平均就好了,2400萬,假設乙-8000萬固定資產交2000萬稅時,1.2億按比例交3000萬,假設丙-新買的折舊率差咁遠,唔知賺幾多,於是唔知

上市前固定資產7000-8000萬,營業額13-14億,上市後固定資產1.2億,疫情前營業額20-23億,疫情後也有18億,增加的比例較大,上面的假設乙同丙的可能性相對較為按近,當中假設丙的的唔知可能是有益方向的唔知

存貨的變化不健康,但出左盈警

上年借6000萬,但利息2000萬,過程一定使用了些財技,例如贖回債務之類的

現金流5年平均8400萬,現家固定資產1.2億,淨現金4億幾,淨值0.8,而股價0.56

味皇推算正常時候每股盈利0.17,派息0.04,PE3.2,PB0.7,息率7.1厘,"正常時候"

30秒大法能做到的就去到以上水平爹斯

睇年報的文字部分,佢係碼頭保養,疏浚,拖吊之類的業務,當果起碼有部分是固定收入

因為工期不定,所以收錢時間也不定

佢上年的工期是延誤收唔到尾,無限期延誤無限期收唔到尾,但不代表是取消工程,至少不會全部取消

但一直拖落去總會有一年會集體完工

佢做大陸港口,大陸港口一般係政府資本

佢集資用的錢用黎買左船,所以折舊率高D

佢集資剩的錢原本想用於收購,但現在冇去收購,而佢借貸利率5.1厘,但按回報率來說,私有化更有效率,以佢的現金夠私有化兩次有突

附註度標利息支出同上年差唔多,唔知上商個利息數字點計出黎

大致係咁

結論:要分析隻股,齋睇3表得出的結論是相對足夠的,而年報文字是有用,但只是補充水平,睇股先要識睇財務報表,而唔係聽人講甚至聽老闆講

炫富

去永亨試下提倉隻1576嘗試避稅,佢居然開4600蚊提倉費食人車馬炮,所以就提倉不成了,另外冇去旅行冇用到信用卡,比佢抽近500蚊年費,即時剪卡, 剪卡後發現,已退休的味皇開唔返信用卡,因為銀行歧視味皇冇工開

1576停牌,如果係私有化就發達

今年黎到現家,又爆完新經濟,又爆完乜乜物物幣,而味皇依然一直揸住廢老股不動如山

上年又契媽又盛,現家咪又變臭雞,老巴話水退就睇到邊D人裸泳,但而現家係水退左見到老巴身穿鯊魚戰衣,鶴立"雞"群

下面節錄味皇上年年結的內容:

按類型市值計,似乎收租25%,公路18%,空港/海港18%,電訊15%,數據中心7%,消費6%,藥4%,賣樓4%,公用3%

今年味皇並無插手甚麼新經濟甚麼叉叉幣,組成同上年有D改變但總體變化不大,成績及不上老巴,但也算見得下人

留意一下味皇的組合波動性係低過亂咁選股的恆指的,特別係4月之後大市爆炸緊時特別明顯,其實也有味皇的股一向冇成交的關係,嘛...成功左先可以招積嘅,個社會都係成敗論英雄,具體等到半年結再講

最近山寨幣的生物多樣性,可能比香港更多樣化,就差在未出草履蟲幣,味皇想,無厘頭的事搵無厘頭的人去做,唔好一邊做無厘頭的事一邊搵解釋,價值投資講的係獨立同理性

好似味皇係未上任時就預料AVB同摩連奴會失敗收場,買親的天價球員表現唔及平價的地球人

食不到的葡萄

1.34買入20000股秦港,2.27買入10000股齊魯,再擴大少少收息組合

1.78沽出5000股匯賢,接受佢1.74的代息股,之前都唔記得左幾次

0.12沽清35萬股強泰,賺幾萬十幾萬變賺幾千,食唔到覺得酸,習慣就是,之後再看看有冇其他可以標下

最近通街都幣神,如果說炒商品,炒台幣,都叫有D實際用途,但係炒BCD幣狗幣苟幣韮幣,味皇一邊酸一邊嗌ON9

是咁的,無論物理掘礦定係虛擬掘礦,掘礦都是破壞環境污染空氣,虛擬掘礦比物理掘礦更加惡劣的地方是還會製造塑膠垃圾,暫時味皇未發現顯卡風扇同電線的膠除左燒同埋之外有人用其他處理方法

1隻比特幣,D人會聲稱個算法會越掘越少不合經濟效益時,例如成個月都掘唔到1/1000個幣咁,D人就唔會再掘,唔會再燒電,但是如果有1000種比特幣時又如何?N年前味皇就寫過佢即使唔增發,如果有利可圖也會有其他品種山寨一直出現,現在掘礦一年浪費的電力超過阿根廷的年用電量,卻冇產生任何垃圾以外的實質東西

巴黎協定有限制二氧化碳的各種規定,掘礦再發展落去將來總會演變成浪費的電力超過德國的用電量之類的,如果這時有好事者在巴黎協定上提議限制虛擬幣時會如何?

1.虛擬幣接受程度高的是年青人,反對的多是廢老,而社會是廢老話事的世界而非年青人話事的世界

2.味皇的年齡介於年青人同廢老之間,姑且當是年青人好了,也會內卷,並不是所有年青人都支持虛擬幣大於環保

3.虛擬幣在社會上的既得利益者,整體缺乏政治影響力,冇選票,關說時處於下風,例如NV,ATI影響力點都比唔上煙草商同軍火商

4.某D國家要剪網線,要追查,要充公,有幾難

5.允許使用虛擬幣的國家是減少傾向大於增加傾向

6.當山寨之類產量大卡熱錢增量時,是但一隻山寨崩盤時,就會有契機令廢老提出通通收皮的動議

7.崩盤時,所謂最大的支持者都是爭相走鬼,而不是死撐,一盤散沙

8.逃稅洗黑錢一向可以用藝術品紀念鈔之類代替虛擬幣

因此,將來如果有正義魔人係巴黎協定度叫削,想一想有幾多個國家會反對?可能一個唔覺意就通過左,變成黑市幣